Bo Moumerang el Kmo a Jehovah a Betik a Rengul er Kau

1. Ngera uchul me ke tilbir a klengar er kau el mora Jehovah? (Dirrek el momes er a siasing.)

KAU, ke dirk remember er sel taem er a moluluuch el mora Jehovah el melib er a klengar er kau el mo er ngii? Ke millilt el meruul er tiang e le ke mlo medengelii a Jehovah e mlo betik a rengum er ngii. Ke mle promise el kmo ke mo nguu a soal el mo kot er a klengar er kau e mo melemolem el betik a rengum er ngii loba rengum el rokir, klengar er kau el rokir, uldesuem el rokir, me a klisichem el rokir. (Mk. 12:30) Seikid el taem el mei e a bltkil a rengum el mo er ngii a menga el mla lmuut el mo mesisiich. Me ke mo dmu el kmo ngerang okmo chad oker er kau el kmo, “Kau, ngmera el betik a rengum er a Jehovah?” Ke kulterekokl el di mereched el melekoi el kmo, “Ngkuk betik a renguk er ngii el ngaruchei er a ngii di el chad me a ngaruchei er a ngii di el tekoi!”

2-3. A Jehovah ngngera soal a bo lulterekokl a rengud er ngii, e ngera kede mo mesaod er tia el suobel? (Jeremia 31:​3, NW)

² Engdi okmo chad oker er kau el kmo, “Kau, ngulterekokl a rengum el kmo a Jehovah a betik a rengul er kau?” Ke mo meoud longer, e le ke melatk el kmo ngdiak mrredemelel a bltkil a rengul? A ta el odos el kmal mle mekngit a ulekurulel a kmo: “Ngkmal diak kuumededenger er a bltkil a renguk el mora Jehovah. Engdi ak blechoel el mo melatk el kmo a Jehovah ngbetik a rengul er ngak?” Ngera sebechel ngosukau el mo medengelii a mera el uldesuel a Jehovah el kirem?

³ A Jehovah kmal soal a bo lulterekokl a rengum er a bltkil a rengul el mo er kau. (Monguiu er a Jeremia 31:​3, NW.a) Ngii ngike el ulemekrael er kau el mo er ngii. Sera omtengetengii a klengar er kau el mo er ngii e metecholb e ke ngiluu a kmal mekreos el sengk. Ke ngiluu a diak lemengodech el bltikerreng er ngii. Tia belkul a kmo ngkmal dmolech a bltkil a rengul el mo er kau e kmal diak bo lechitau. Tiakid el bltkil a rengul el mora reblak a rengrir el mesiungel a uchul me ngomes er tir el ‘mekreos el kloklel.’ A leuaisei e kau a kmal mekreos er osengel. (Mal. 3:​17, NW) A Jehovah soal a bo lulterekokl a rengum er a bltkil a rengul el mo er kau, el ua apostol Paulus el mle ulterekokl a rengul el kmo a Jehovah a betik a rengul er ngii. A Paulus a mle ulterekokl a rengul el meluches el kmo: “[A] kungil el medengei el kmo ng ka le kodall, ma ka le klengar, ma ka le re anghel, ma ka le omengedereder, ma ka le tekoi er chelechang ma ka le tekoi er a ngar medad, ma ka le klisiich, ma ka le beluulchad er bab, ma ka le beluulchad er iou; ng kmal diak a ngera el ngar a rokuil bleob el mo sebechel el choridid er a bltikerreng er a Dios.” (Rom 8:​38, 39) Ngar tia el suobel e kede mo mesaod er a uchul me ngkired el smisichii a klaumerang er kid er a bltkil a rengul a Jehovah el mei er kid me aike el sebeched el meruul me bo lulterekokl a rengud el kirel.

UCHUL ME NGKLOU A ULTUTELEL A BO LULTEREKOKL A RENGUM ER A BLTKIL A RENGUL A JEHOVAH EL MO ER KAU

4. Ngmekera sebeched el mo mesisiich er aike el lousbech a Satan lomekbat er kid?

⁴ Sel bo lulterekokl a rengum er a bltikerreng er a Jehovah e ngmo sebechem el mtok a ‘ukbetil’ a Satan. (Efe. 6:​11, BT) A Satan a soal a destob el mesiou er a Jehovah. Ngmora bek el cheldechulel el melasem el meruul er kid el mo diak dosiou er Ngii. A Satan a soal el meruul er kid el mo oumerang el kmo a Jehovah a diak el betik a rengul er kid. Tia el blulak a ta er a ulekbat el lousbech er ngii. A Biblia omekesiu er a Satan el mora laion. (1 Pe. 5:​8, 9) A laion a soal loldechelakl aike el charm el mechitechut e diak el sebechel di ngii el omekerreu er ngii. Ngdi osisiu, a Satan a blechoel el oldechelakl er kid sel lemechitechut a rengud, mesaul a bedenged, me a lechub ngmekngit a rengud le ngtekoi el dilubech el me er kid er a ngar er a mong, ngtekoi el dechelebangel er chelechang, me a lechub ngtekoi er a ngar medad el suebek a rengud el kirel. (Osi. 24:​10, NW) Ngomeltkel a Satan a meruul er kid el kmal mo mechitechut me kede mo stob el mesiou er a Jehovah. Engdi ngkmal sebeched el mtekengii a Satan loeak sel doruul aike el rokui el sebeched me bo el ulterekokl a rengud el kmo a Jehovah a betik a rengul er kid.—Jak. 4:7.

5. Ngera uchul me kede ousbech el mo omelechesiu el kmo a Jehovah betik a rengul er kid e mengreos er kid?

⁵ Sel bo lulterekokl a rengum er a bltikerreng er a Jehovah e ngmo sebechem el mo kmeed er ngii. Molatk er a uchul me ngsebeched el melekoi el uaisei. Kede ulebeob el mo oubltikerreng el mora rebebil e ousbech er a bltikerreng. Me sel loubltikerreng a chad el mei er kid e ngodbechid el mo oubltikerreng el mo er ngii. Me sel bo dolechesuar el kmo a Jehovah betik a rengul er kid e mengreos er kid, e ngmo betik a rengud er ngii. (1 Jn. 4:19) E sel lemukeroul a bltkil a rengud el mo er ngii e a bltkil a rengul el mei er kid me ngdirrek el mukeroul. A Biblia ouchais er kid el kmo: “Molekeed er [kau] er a Dios, me bo lekeed er [kau].” (Jak. 4:8) Engdi ngmekerang e sebechel mo ulterekokl a rengud el kmo a Jehovah a betik a rengul er kid?

NGERA SEBECHEL NGOSUKAU EL MO OUMERANG EL KMO A JEHOVAH A BETIK A RENGUL ER KAU?

6. Ngera sebeched el meluluuch el kirel me bo lsebeched el mo oumerang el kmo a Jehovah a betik a rengul er kid?

⁶ Molemolem el meluluuch el mora Jehovah lolengit er ngii me lengesukau el mo understand er a uchul me ngbetik a rengul er kau. (Lk. 18:1; Rom 12:12) Nglocha mo betok el taem el mousbech el meluluuch el mo er ngii er a bek el sils me lengesukau el mo oba osengel el kirem. Me nguaisei engdi sel lemekngit a uldesued el kired e ngrullii el mo meringel er kid oumerang el kmo a Jehovah a betik a rengul er kid. Engdi lak mobes el kmo a Jehovah a lmuut el klou er a rengum. (1 Jn. 3:​19, 20, BT) Nglmuut lungil medengelkau e mes aike el diak el sebechem el mes. (1 Sa. 16:7; 2 Kr. 6:30) Me “msbedii er a ikel ngar a rengum” e molengit er ngii me lengesukau el mo oumerang el kmo ngbetik a rengul er kau. (Psa. 62:8) E moureor lobengkel a nglunguchem loeak omoltaut aika el tekoi el bo domasech.

7-8. Ngmekera Psalm e olterekokl er a rengud er a bltkil a rengul a Jehovah el mei er kid?

⁷ Moumerang a tekingel a Jehovah. A remilluches er a Biblia mlukreng el mo meluches louchais el kmo a Jehovah ngmera el uangerang. Molatk er a klebokel el rolel e a David el ta er a milluches er a Psalm a mesaod el kirel a Jehovah. Ngdilu el kmo: “A RUBAK a kmeed er tirkel chelam a rengrir; ng olsobel er tirkel di dikea omeltkir.” (Psa. 34:18) Sel lebo el mekngit a rengum e ke locha mo feel el kmo ngkmal di kau el tang. Engdi a Jehovah a tibir el kmo ngar choua ikakid el taem e ngkmeed er kau e le ngmesa el kmo ke kmal lousbech er ngii. A David a dirrek el milluches el kmo: “Mlecha iuechel a medak er a ollemelem el rruul er a budel a charm.” (Psa. 56:​8, NW) A chad el merael er a medirt el beluu omes er a ralm el ngar er a blil ollemelel el kmal mekreos. Ngdi osisiu, a Jehovah omes a iuechel a medad el kmal mekreos me ngua lomekeek er a chelsel a blil ollemelel. A Jehovah a mesekau sel omchuarm. Ngkmal omekerreu el kirem e omelechesiu er a ringel el mngar ngii. Kede menguiu el ngar er a Psalm 139:3 el kmo: “Ke medengei a rokui el kuruul.” Ngmes a rokui el moruul engdi ngulturk osengel er aike el ungil el moruul. (Heb. 6:10) Ngmeruul el uaisei e le ngmengreos aike el rokui el moruul el loldeu er a rengul.b

⁸ Ngoeak chouaika el bades el ngar er a Tekingel a Jehovah e ngua lolekoi er kid el kmo: “Ngkmal soak obo modengei el kmo ak kmal omekerreu el kirem e kmal betik a renguk er kau.” Engdi ngua dulsaod er ngii er a uchelel, a Satan a soal a bo doumerang el kmo a Jehovah diak el betik a rengul er kid. Me a lsekum a lebebil er a taem e ke mo oumededenger er a bltkil a rengul a Jehovah el mo er kau, e mstob e molatk el kmo, ‘Ngak, ak mo oumerang er techang? Ak mo oumerang er a “demal a bek el blulak” me a lechub ak mo oumerang er a “Dios er a klemerang”?’—Jn. 8:44; Psa. 31:​5, NW.

9. Ngera ngtibir a Jehovah el mo er tirke el betik a rengrir er ngii? (Exodus 20:​5, 6)

⁹ Molatk er a rengul a Jehovah el bedul tirke el betik a rengrir er ngii. Momtab aike el ledilu a Jehovah el mora Moses me a rechad er a Israel. (Monguiu er a Exodus 20:​5, 6.) A Jehovah tibir el kmo ngmo melemolem el lolecholt er a diak a ulebengelel el bltikerreng er ngii el mo er tirke el betik a rengrir er ngii. Tia olterekokl er a rengud el kmo a Dios er kid a oba blakerreng el Dios el oubltikerreng el mo er tirke el loubltikerreng el mo er ngii. (Neh. 1:5) Me a lsekum e ngngar ngii aike el taem e ngmo kirem el olterekokl er a rengum er a bltkil a rengul a Jehovah el mo er kau e mstob e di lekau el oker el kmo, ‘Ngak, ngbetik a renguk er a Jehovah?’ E molatk er tiang: A lsekum ngbetik a rengum er ngii e mora tkurrebab el sebechem el loldeu er a rengul, e ngkmal sebechel mo ulterekokl a rengum el kmo ngkmal betik a rengul er kau. (Dan. 9:4; 1 Ko. 8:3) Tia belkul a kmo, a lsekum kau a ulterekokl a rengum el kmo ngbetik a rengum er a Jehovah, e lak moumededenger er a bltkil a rengul el mo er kau. Ngkmal sebechel mo ulterekokl a rengum el kmo ngbetik a rengul er kau e kmal diak bo lechitau.

10-11. A Jehovah ngsoal a lebo el uangerang a osenged el kirel a olubet? (Galatia 2:20)

¹⁰ Molebedebek el kirel olubet. A olubet el tengetengel a Jesus Kristus a kot el ngarbab el sengk er a Dios el mora rechad. (Jn. 3:16) Engdi tia el sengk ngmora rederta el chad? Chochoi! Molatk er a apostol Paulus. Ngika riruul a kmal oberaod el tekoi er a uchei er a bo le Kristiano. Mo lmuut er a uriul er a lebo el Kristiano me ngmle kirel melemolem loldechelakl a chelitechetul. (Rom 7:​24, 25; 1 Ti. 1:​12-14) Engdi ngmlo ulterekokl a rengul el kmo a olubet a ileakl el sengk er a Jehovah el mo er ngii. (Monguiu er a Galatia 2:20.) Lak mobes el kmo a Paulus a mlukreng er a Jehovah el mo meluches aika el tekoi. Me a dirrek el rokui el tekoi el ngar er a Biblia milluches el osisechakl er kid. (Rom 15:4) A tekingel a Paulus ochotii el kmo a Jehovah a soal kau obo momes er a olubet el ileakl el sengk er ngii el mo er kau. Sel lebo el uaisei a osengem el kirel olubet e ke mo mesisiich loumerang el kmo a Jehovah a betik a rengul er kau.

¹¹ Kede mereng a sulel a Jehovah el ulderchii a Jesus el mei er tia el chutem el mo mad el kired. A lmuut el ta er a uchul me a Jesus a mlei er tia el chutem a me ouchais er a klemerang el kirel a Dios. (Jn. 18:37) Tia el klemerang a uldimukl er ngii a klungel a bltkil a rengul a Dios el mei er kid.

ROLEL E A JESUS A NGOSUKID EL MO OUMERANG EL KMO A JEHOVAH A BETIK A RENGUL ER KID

12. Ngera uchul me ngsebeched el loumerang aike el lolekoi a Jesus el kirel a Jehovah?

¹² A Jesus er a lengar tia el chutem e ngkmal mle soal louchais er a rechad el kmo a Jehovah ngkmal uangerang. (Lk. 10:22) Ngkmal sebeched el loumerang aike el lolekoi a Jesus el kirel a Jehovah. Ngika kiliei er a eanged lobengkel a Jehovah el betok el biliol el rak er a uchei er a lemei er tia el chutem. (Kol. 1:15) Ngika mla chormii e mesa er a medal a klungel a bltkil a rengul a Jehovah el mora reblak a rengrir el ngelekel el sechal me a redil. Ngmekera Jesus e ngosukid el mo oumerang el kmo a Jehovah a betik a rengul er kid?

13. A Jesus ngsoal a domes er a Jehovah el uangerang?

¹³ A Jesus a soal a bo domes er a Jehovah el uai ngii. Ngar er aike el Ebangkelio e a Jesus a mle betok er a 160 el taem el lomekedong er a Jehovah el ‘Chedam.’ E sera longedecheduch er a rultirakl er ngii nguluusbech er a tekoi el “Demmiu el ngar a eanged.” (Mt. 5:16; 6:26) A study note el kirel a Mateus 5:16 a kmo: “A remesiungel a Jehovah er a uchei a uluusbech a ngarbab el dui el omekedong me a lechub e te mesaod el kirel a Jehovah. Aika uldimukl er ngii a “Olab a Bek el Klisiich,” “Kot el Ngarbab,” me a “Ngarbab el Sensei” engdi usbechel a Jesus er a tekoi el ‘Chedam’ ochotii el kmo a Jehovah a soal a remesiungel a bo lomelechesiu er tir el kmeed er ngii el ua feeling er a ngalek el mora betik er a rengul el demal.”

14. Ngmilekera Jesus e ochotii el kmo a rederta er kid a mekreos er osengel a Demad el ngar er a eanged? (Mateus 10:​29-31) (Dirrek el momes er a siasing.)

¹⁴ A kot e molatk aike el ledilung a Jesus el ngar er a Mateus 10:​29-31. (Monguiu.) A chesisebangiau a mekekerei el suebek el charm el diak el sebechel mo betik a rengul er a Jehovah e mengull er ngii. Engdi Demad el ngar er a eanged a omes el kmal mekreos me ngdiak a ta er ngii el ruebet e ngii lak lodengei. A lsekum a Jehovah omes er ngika el charm el kmal mekreos e ngkmal sebechel mo ulterekokl a rengud el kmo nglmuut el ngaruchei a ulekerreuil el mei er a rederta er kid el mesiungel el mesiou er ngii e le ngbetik a rengud er ngii. A study note el kirel a 30 el kekerei el bades a mesaod el kirel a “mo lmuut er a chui er a bdelmiu me ng medengei a ildisel” el kmo: “A Jehovah el medengei aika el mekekerei e kora diak el meklou a belkul el tekoi el kired oterekeklii a rengud el kmo ngkmal semeriar er a rederta el oltirakl er a Kristus.” Me ngbleketakl el kmo a Jesus a soal a bo lulterekokl a rengud el kmo a rederta er kid a kmal mekreos er osengel a Demad el ngar er a eanged. Ka me dorriter a teblo er aike el taem el Jesus uluusbech er a tekoi el ‘Chedam.’

15. Ngera ngouchais er kau a tekingel a Jesus el ngar er a Johanes 6:44 el kirel a Demam el ngar er a eanged?

¹⁵ Molatk er a lmuut el ta er a olechotel a Jesus lousbech er a tekoi el “Chedam.” (Monguiu er a Johanes 6:44.) A Demam el ngar er a eanged a ulemekrael er kau me a lechub e ngmilengurs er kau el mei er a klemerang. Ngera uchul me ngmilekrolau? Ngmilsa el kmo ngungil a heart er kau. (Rel. 13:​48, NW) A Jesus er a ledung aika el tekoi el ngar er a Johanes 6:44 e nglocha milsaod a tekingel a Jehovah el debetik er a Jeremia 31:3 (NW). Ngar tia el bades e a Jehovah dilu er a rechedal el kmo: “Ak kuleba diak lemengodech el bltikerreng lomekrael er kau el mei er ngak.” (Jer. 31:​3, NW; momekesiu er a Hosea 11:4.) Molatk er a belkul tiang. A Demad el ngar er a eanged a blechoel lomes aike el ungil er kau el locha diak el sebechem el mes.

16. (a) A Jesus ngngua lolekoi er kid el dmu el kmo ngerang? Ngera uchul me ngungil doumerang er ngii? (b) Ngmekera sebechem el smisichii a klaumerang er kau el kmo a Jehovah ngike el Chedam el mousbech er ngii? (Momes er a baks el “Chedam el Kid el Rokui a Ousbech er Ngii.”)

¹⁶ A Jesus er a lomekedong er a Jehovah el Demad e ngua louchais er kid el kmo: “A Jehovah diak di el Demak, ngdirrek el Demam. E kmal soak a bo lulterekokl a rengum el kmo ngomekerreu er kau e betik a rengul er kau.” Me a lsekum a lebebil er a taem e ngmo diak lulterekokl a rengum er a bltkil a rengul a Jehovah, e molatk a tekingel a Jesus e moumerang er ngii, e le ngblechoel el melekoi a klemerang, e ngii ngike el kot el lungil medengelii a Chedam.—1 Pe. 2:22.

MORUUL AIKE EL ROKUI EL SEBECHEM ME LOLEMOLEM EL ULTEREKOKL A RENGUM EL KMO A JEHOVAH BETIK A RENGUL ER KAU

17. Ngera uchul me ngkired el melemolem el meruul aike el rokui el sebeched me bo lolemolem el lulterekokl a rengud el kmo a Jehovah a betik a rengul er kid?

¹⁷ Ngkired el meruul aike el rokui el sebeched el mo melemolem el ulterekokl a rengud el kmo a Jehovah betik a rengul er kid. Ngua desilubii er a uchelel, a Satan a meruul aike el rokui el sebechel el melasem el meruul er kid el mo stob el mesiou er a Jehovah. Ngmo melemolem el melasem el mengitechut er kid e meruul er kid el mo diak doumerang el kmo a Jehovah a betik a rengul er kid. Ngkmal diak el soad el mecherei a Satan me ngmo mesisiich er kid!—Job 27:​5, NW.

18. Ngera sebeched el meruul er ngii me lolemolem el ulterekokl a rengud el kmo a Jehovah a betik a rengul er kid?

¹⁸ Molemolem el meluluuch lolengit er a Jehovah me lengesukau el mo oba osengel el kirem. Bom dmolech el melatk aike el bades el mesaod er a klungel a ulekerreuil a Jehovah el mo er tirke el betik a rengrir er ngii. Lak mobes el kmo a Jehovah mo blechoel el betik a rengul er tirke el betik a rengrir er ngii. Molebedebek er a uchul me ngsebechem lomes er a olubet el kmo ngileakl el sengk el mo er kau. E bo moumerang el kmo a Jehovah a Demam el ua ledilung a Jesus. Sel moruul el uaisei e ngmo ngosukau el mo ulterekokl a rengum el kmo a Jehovah betik a rengul er kau. Seikid e a lsekum a ngii di el chad oker el kmo: “Kau, ngulterekokl a rengum el kmo a Jehovah a betik a rengul er kau?” e ngsebechel lulterekokl a rengum el melekoi el kmo: “Chochoi! E bek el sils el kbora tkurrebab el klisichek lolecholt er a bltkil a renguk el mo er ngii!”