Molemolem el Loba Deurreng er a Chelsel a Cheluodel

1-2. Ngngera uldesuel a Jehovah el kirir a reblak a rengrir el mesiungel el mechudelang? (Psalm 92:​12-14; dirrek el momes er a siasing.)

A RECHAD a kakerous a uldesuir el kirel a cheluodel. Ngar er a bebil beluu er a beluulechad e a rechad omes er ngii el chetengakl el tekoi a bo dechuodel engdi ngar er a kuk bebil er a beluu e te mora tkurrebab el sebechir el meruul er tir el mo mekekerei el chad. El ua tiang, a lsekum te mesa cheball er a bderrir e te di mereched el medelii. Tia ochotii el kmo ngmeringel er a rebetok el kongei el kmo te di merael el mo chuodel.

² Me nguaisei engdi ngngera uldesuel a Demad el ngar er a eanged el kirir a remesiungel el mechudelang? (Osi. 16:31) A Jehovah omekesiu er tir el mora klebokel el kerrekar. (Monguiu er a Psalm 92:​12-14.) Tiang ngera belkul? A kerrekar el betok a llel me a bngal a olechotel a kmo ngchuodel el kerrekar. A ta er a kmal el ileakl el kerrekar a sakura el kerrekar er a Siabal. A bebil er aike el kot el klebokel er ngii el kerrekar a mla dechor el kemanget er a ta el telael el rak. Ngdi osisiu, a remechudelang a kmal klebokel el di uaika el kerrekar, tokubets er osengel a Dios. A Jehovah mengreos a klebokel el blekeradel el lolab a remechudelang. Te mla mesiou er Ngii el betok el rak e melemolem loba blakerreng el mo er Ngii er a chelsel a ungil taem me a mekngit el taem.

3. Mouchais a example er a remechudelang el Jehovah uluusbech er tir el mo oltaut er a moktek er ngii.

³ A chad el merael el mo chuodel a diak lorael a kerresel el moriou er osengel a Jehovah.a Ngbai a Jehovah blechoel lousbech er a remechudelang el mo oltaut er a moktek er ngii. El ua tiang, a Sara kmal mle klunga el redil er a ledu er ngii a Jehovah el kmo ngmo delal a mesisiich el renged e mo uldidellel a rsechel a Mesias. (Gen. 17:​15-19) A Moses me ngdirrek el mle chuodel kung er a loderchii a Jehovah el mo oltobed er a rechad er a Israel er a Ekipten. (Exo. 7:​6, 7) Me a apostol Johanes me ngmle chuodel er a lemukreng er a Jehovah el mo meluches a kleim el babier er a Biblia.

4. A doltirakl er a Osisechakl 15:​15, e ngera sebechel ngosuterir a remechudelang loutekangel a omelsemai el bo lechebangel? (Dirrek el momes er a siasing.)

⁴ A remechudelang a locha mo betok a omelsemai el bo lechebangel e le tir el mla mo betok a rekrir. A ta el odos a oungelakel el kmo, “A mo chuodel a diak lebora rebedektall.” Me nguaisei engdi ngsebechem el mtekangel a ringelel a cheluodel a obo moba deurreng.b (Monguiu er a Osisechakl 15:15.) Ngar tia el suobel e kede mo mesaod aike el sebechir a remechudelang el meruul me lsebechir el melemolem loba deurreng. Kede dirrek el mo mesaod aike el sebechir a rebebil el meruul lolengeseu er a remechudelang el odam me a odos er a ongdibel. Engdi a kot e me dosaod er a uchul me ngsebechel mo meringel er kid a melemolem el loba deurreng sel lorael el mo betok a rekid.

UCHUL ME NGSEBECHEL MO MERINGEL A DOLEMOLEM LOBA DEURRENG SEL BO DECHUODEL

5. Ngera uchul me a rebebil mechudelang a mo mechitechut a rengrir?

⁵ Ngera sebechel rullau el mo mechitechut a rengum? Nglocha mekngit a rengum le ngdikea el sebechem el meruul a tekoi el murruul er a ngar er a mong. Ke locha oureng aike el taem er omdirk kekerei el chad e mesisiich a bedengem. (Oli. 7:10) El ua tiang, a odos el Ruby a kmo: “Ringelel a bedengek, me ngak el diak el sebechek el ouedikel el ua ngar er a mong a uchul me ngmeringel er ngak a oltuu a bilek. A kora beot el tekoi el ua kiderii ochik el mei er bab e oltuu a socks me ngmeringel. A chimak me ngkmal mo meringel me ngdi mo diak feel. Ak dirrek el arthritis me a cheldngelel a chimak a diak el klalo. Mo lmuut er a kmal mekekerei el tekoi me ngdiak el sebechek el remuul.” A Harold el milsiou el ngar er a Bethel a kmo: “A lebebil e ngkmal mo kesib a renguk e le ngdikea el sebechek el meruul a tekoi el kmal soak. Ak mle blechoel el ousekool a sports. E kot el soak el klekool a iakiu. A rechad a mle blechoel el melekoi el kmo, ‘Mnguu a btuu el msa Harold e le ngsebechel ngosukid el mo kats.’ Engdi chelecha nglocha dikea el sebechek el metechii a btuu.”

6. (a) Ngera lmuut el bebil er a uchul me a remechudelang a sebechel mo mechitechut a rengrir? (b) Ngera sebechel ngosuterir a remeklunga el chad el mo mtebengii el kmo ngungil a lolemolem el lomekall me a lechub ngdiak? (Momes er a suobel el “Ngungil Ak Stob Lomekall?” el ngar tia el Ongkerongel.)

⁶ Nglocha mo mechitechut a rengum e le ngmla mo diak em independent el ua ngar er a mong, tokubets a lsekum ngngar ngii a chad lobekau me a lechub ngmo kirem el kiei el lobengkel a ta er a ngelekem. Me a lechub ke kmal mla mo mechitechut me ngdiak el sebechem el mora ngii di el ker el di kau el tang me a lechub ngkmal mekngit ku osengem me ngmla mo diak el sebechem lomekall. Aika sebechel mo uchul a klou el kngtil a rengum! Ngmerang, ngdikea el sebechem el meruul a betok el murruul er a ngar er a mong. Engdi lak mobes el kmo kau a kmal mekreos er osengel a Jehovah me a rebebil. E kmal sebechel mo ulterekokl a rengum el kmo a Jehovah a understand a feelings er kau. Sel kot el klou a ultutelel er a Jehovah a ngike el chad er a chelsel. Ngmedengei el kmo ngkmal betik a rengum er ngii e betik a rengum er a rudam me a rudos er kau. E tiakid sel kot el klou a ultutelel er ngii.—1 Sa. 16:7.

7. Ngera sebechel ngosuterir tirke el mekngit a rengrir e le te omdasu el kmo te mo mad er a uchei er a lemei a ulebongel?

⁷ Nglocha mekngit a rengum e le komdasu el kmo ke mo mad er a uchei er a lemei a ulebongel. A lsekum ke feel el uaisei e ngera sebechel ngosukau? Molasem el diak mobes el kmo a Jehovah ngar ngii a uchul me ngoba kllourreng el mengiil er a mo olekngemed er tia el mekngit el blekeradel. (Isa. 30:18) Ngera uchul me ngoba kllourreng? Ngomeltkel el kmo a relmuut el betok el chad bo lodengelii e bo losiou er ngii. (2 Pe. 3:9) Me sel bo lemechitechut a rengum, e molebedebek el kmo a rebetok el chad a kmal dirk sebechir el mo medengelii a Jehovah e mo suobel er a uchei er a lemei a ulebongel. A rebebil er tir a locha chedam.

8. A remechudelang el smecher me a lechub te chuarm er a ringel, ngngera sebechir el mo remuul?

⁸ A demeklou me a demekekerei me kid el rokui sel desecher me a lechub kede chuarm er a ringel e ngklou a techelled el mo dmung me a lechub kede rullii a tekoi el uriul e kede ouuchel er a rengud el kirel. (Oli. 7:​7, NW; Jak. 3:2) El ua tiang, a Job el blak a rengul el mesiungel a Jehovah er a bo lechuarm er a ringel e a cheldechedechal a “mlo ua le terrekakl.” (Job 6:​1-3, NW) Me a lmuut kung, a secherir a remechudelang a sebechel mo uchul e te mo dmung me a lechub te remuul a tekoi el diak el teletelir a uaisei. Me nguaisei engdi ngkmal diak a ta er kid el mo ousbech er a cheluodel er ngii me a lechub ngsecherel el ua le excuse er kid el mo mekngit omerelled me a lechub kede expect er a rebebil el meruul a tekoi el kired. E a lsekum kede mtebengii el kmo ngmlo mekngit a tekinged el mora chad e ngkired el di mereched el mo olengit a klausubes.—Mt. 5:​23, 24.

ROLEL E NGSEBECHEM EL MELEMOLEM LOBA DEURRENG

9. Ngera uchul me ngungil omkengei a ngelsurir a rebebil? (Dirrek el momes a siasing.)

⁹ Mkengei a ngelsurir a rebebil. (Gal. 6:2) A uchelel e nglocha meringel er kau a kongei er a ngelsurir a rebebil. A odos el Gretl a kmo: “A lebebil e ngmo meringel er ngak el kongei a ngelsurir e le ak mo feel el kmo ak ongesang. A kuluusbech a taem el mo ngodechii a uldesuek e mo ngariou a renguk e ouchais el kmo a kuusbech a ngeso.” Sel omkengei a ngelsurir a rebebil e ke mesterir a techellir el mo nguu a deurreng el mei loeak sel dorous. (Rel. 20:35) Ngdirrek el kmal mo dmeu a rengum sel omesa el kmo a rebebil a kmal betik a rengrir er kau e sorir el omekerreu er kau.

10. Ngera uchul me ngdiak el kirem lobes el mereng a saul? (Dirrek el momes a siasing.)

¹⁰ Mochotii omereng el saul. (Kol. 3:15; 1 Th. 5:18) Sel loruul a ungil el mei er kid a rebebil e kede kmal oba omereng el saul engdi kede locha mo obes el mereng a sulir. Me nguaisei engdi sel de smile e dedu sulang e kede rullii a chad el mo feel el kmo kede appreciate er a tekoi el lerirellii. A Leah el obetiterir a remechudelang el ngar er a Bethel a kmo: “A ta el odos el kubang a blechoel el meluches a mekekerei el thank you notes. Alta ngdiak el kemanget a tekingel engdi ngkmal sweet. Ngkmal soak el melai aika el mekekerei el notes er ngii e dirrek el kmal mo dmeu a renguk sel kudengei el kmo ng appreciate er a ngelsuik.”

11. Ngmekera sebechem el ngosuterir a rebebil? (Dirrek el momes a siasing.)

¹¹ Moruul aike el sebechem el lolengeseu er a rebebil. Sel mongoit a temem me a klisichel a bedengem el focus er a rebebil e ngmo kekerei a techellem el melatk a mondai er kau. Ngngar ngii a ta el belkul a tekoi er a Africa el omekesiu er a remechudelang el mora library el meseked er a book el mui er a tekoi er a llomeserreng. Me nguaisei engdi a book el di ngar er a shelf a diak el sebechel louchais me a lechub e losisecheklid er a tekoi er a llomeserreng. Me kau el “di ngar el library” em share er a klemedengei er kau me a experience er kau lobengterir a remekekerei. Moker er tir a ker e morrenges. Mosisecheklterir er a uchul me ngkot lungil kirir e dirrek el mo uchul a deuil a rengrir sel lekiei loltirakl a llechul a Jehovah. Ngulterekokl el kmal mo dmeu a rengum sel mongelaod e molisiich er a remekekerei el sechelim.—Psa. 71:18.

12. A doltirakl er a Isaia 46:​4, e ngera ngtibir el mo meruul er ngii a Jehovah el kirir tirke el mechudelang? (Dirrek el momes a siasing.)

¹² Moluluuch lolengit er a klisichel a Jehovah. A lebebil e nglocha mo mesaul a bedengem me a rengum e tia sebechel mo uchul e ngmo mechitechut a rengum. Engdi lak mobes el kmo a Jehovah a “kmal diak bo le mesaul ma lechub e bo le mechitechut.” (Isa. 40:28) Ngmekera Jehovah lousbech er tia el diak lengemed el klisichel? A ta er ngii a ngousbech er ngii el melisiich er a reblak a rengrir el mesiungel el mechudelang. (Isa. 40:​29-31) Ngtibir el kmo ngmo ngosukau. (Monguiu er a Isaia 46:4.) E a Jehovah kmal diak loleiit a telbilel. (Jos. 23:14; Isa. 55:​10, 11) Me sel moluluuch e bom feel er a bltkil a rengul a Jehovah me a ngelsuil el mo er kau, e ngrullau el kmal mo dmeu a rengum.

13. A doltirakl er a 2 Korinth 4:​16-18, e ngera diak el kired el lobes er ngii? (Dirrek el momes a siasing.)

¹³ Lak mobes el kmo ngdiak di bo mchuodel el diak a ulebengelel. Sel dodengei el kmo a ringel el dechelebangel er ngii a di tedeb e ngsebechel mo beot er kid outekangel er ngii. E a Biblia melekoi el kmo a cheluodel me a secher a di tedeb. (Job 33:25; Isa. 33:24) Me ngsebechel mo dmeu a rengum sel modengei el kmo aike el kot lungil sils er a klengar er kau a merael el mei ngdiak el ngar er a ullem. (Monguiu er a 2 Korinth 4:​16-18.) Engdi ngngera sebechir a rebebil el meruul el lolengeseu?

ROLEL E A REBEBIL A SEBECHIR EL OLENGESEU

14. Ngera uchul me ngklou a ultutelel a doldingel e domekedong er a remechudelang er a ongdibel?

¹⁴ Mblechoel loldingel er a remechudelang el odam me a odos e mblechoel lomekedong el mo er tir. (Heb. 13:16) A remechudelang a sebechel kmal mo mekngit a rengrir e le ngklou el taem el di letir el tang. A Camille el odam el di housebound a kmo: “Ak di ngar er a chelsel a blai er a tutau el mo kebesengei. Me ak kmal mo bored. A lebebil e ak mo feel el ua chudelang el laion el chelseches er a chelsel a blil. Tiakid a uchul me ngdiak bo lechelellakl a renguk e mo kesib a renguk.” Sel bo doldingel er a remechudelang e kede olterekokl a rengrir el kmo te meklou a ultutelir er kid e betik a rengud er tir. Nglocha ngar ngii aike el taem el dullatk a omekedong me a lechub e kede mo oldingel er a chudelang el chedal a ongdibel er kid engdi ngdimlak dotutii. Nguaisei, ngkmal betok a kired el meruul. Me ngngera sebechel ngosukid el mo “ngmilt a lmuut el meklou a ultutelel el tekoi” el ngii a uldimukl er ngii a oldingel er a remechudelang el ngar er a ongdibel? (Fil. 1:​10, NW) Nglocha mo ngosukau sel omluches a ngklir a remechudelang er a ongdibel er kau me aike el sils me a taem el bom message me a lechub e koudengua el mo er tir. Ngdirrek el sebechem el schedule er a taem el mo oldingel er tir.

15. Ngera sebechir a remekekerei me a remechudelang el dmak el meruul?

¹⁵ A lsekum ke kekerei e ke locha melatk el kmo, ngngera sebechem el mesaod lobengkel a chuodel el odam me a odos me a lechub ngngera sebechem el meruul el obengkel. Engdi lak mbekikl el kirel bai di bo mungil el friend. (Osi. 17:17) Em stob e mongedecheduch er a remechudelang er a uchei me a uriul er a miting er a ongdibel. Nglocha sebechem el melekoi er tir me te ouchais er kau er sel kot el sorir el bades me a lechub te ouchais er kau a oltobedechur el tekoi el lerirellii er a lengalek. Ngdirrek el sebechem el invite er tir el me dmak lomes a prokuram er a JW Broadcasting^®. Ngdirrek el sebechem el ngosuterir er aike el tekoi el diak el sebechir el di tir el meruul. El ua tiang, ngsebechem el help er tir el update a device er tir me a lechub e ke download aike el babier el dousbech el mesuub. A odos el Carol a kmo: “Em offer el meruul aike el soam el tekoi lobengterir a remechudelang. Alta ak mla mo chuodel engdi ngkmal dirk soak el oldeu a renguk er a klengar. Ngsoak el shopping, omengur er a blil a blengur, e oldeu a renguk er a blebelel a Jehovah.” A odos el ngklel a Maira a kmo: “A ta er a sechelik a 90 a rekil. Ng 57 el rak a delongelam. Engdi ak blechoel lobes el kmo ak kmal kekerei er ngii e le ki dmak el kaderroakl e omes a movie. E sel lebo er ngii a mondai er kemam, e aki blechoel lolengit a advice er ngike el tang.”

16. Ngera uchul me nglocha mo ngosuir a chudelang el odam me a lechub e ngodos omobengkel el mora appointment er ngii?

¹⁶ Mobengterir el mora appointment er tir. Ngsebechem el ngoititerir el mora osbitar engdi ngdirrek el sebechem el melemolem lobengterir e make sure el kmo a retoktang me a re nurse a ungil er tir e omesterir a ngeso el lousbech er ngii. (Isa. 1:17) Ngdirrek el sebechem el help er tir loeak omolai a notes sel longedecheduch a toktang. A Ruth el chuodel el odos a kmo: “Ngblechoel sel di lengak el tang el mo omes er a toktang e ngdiak lorrenges er ngak. A retoktang a locha mo dmu er ngak el kmo ngdiak secher; tia di ngar er a bdeluk. Engdi sel lobengkek a chad el mong e a toktang a ungil el mei er ngak. Ak mereng a sulir a rudam me a rudos er ngak el mengoit a taem el me obengkek.”

17. Ngoeak a ngera el rolel e ngsebechem lomerk lobengterir a remechudelang er a ongdibel?

¹⁷ Moureor lobengterir el omerk er a klumech. A rebebil er a remechudelang a diak el sebechir el merael el oldingel obliil. Me nguaisei engdi nglocha sebechem el invite er tir el mo ou cart witnessing. Nglocha sebechem el nguu a kingall me ngsebechel dengchokl el kmeed er a cart. Me a lechub ngsebechem el invite er ngii el mora study er kau. Nglocha sebechem el nguu a study er kau el mora blil e ko mesuub er isei. A rebebil el mechudelang a locha mo beot er tir el mo omerk a lsekum a miting er a odingel a ngar er a blirir. A leuaisei e a remechuodel a sebechir el kutmeklii me a miting er a odingel a mora blirir. A Jehovah a kmal mo dmeu a rengul sel doruul aike el rokui el sebeched lolecholt er a bltikerreng me a omengull el mora remechudelang.—Osi. 3:27; Rom 12:10.

18. Ngera kede mo mesaod er a ongingil el suobel?

¹⁸ Tia el suobel a mla omeklatk er kid el kmo a Jehovah a kmal betik a rengul er a remechudelang e omes er tir el mekreos. Me a rokui el odam me a odos er a ongdibel me te dirrek el feel el uaisei! Ngmeringel a dorael el mo chuodel engdi ngoeak a ngelsuil a Jehovah e ngsebechem el melemolem loba deurreng. (Psa. 37:25) E kmal mo smisichau sel lak mobes el kmo aike el ungil sils er kau a merael el mei ngdiak el ngar er a ullem! E kuk mekerang tirke el oba chudelang el chederir me a lechub te oba ngalek me a lechub e ngsechelirir el smecher? Ngmekera sebechir el melemolem loba deurreng? Kede mo mesaod er tiang er a ongingil el suobel.