A Babier er a Job a Kmal Sebechel Ngosukau Sel Bom Chuarm

1-2. Ngera bebil er a uchul me ngungil kired a donguiu er a babier er a Job?

KAU, ngdirkak bo lemeketeket er a omchiuii a babier er a Job? Alta ngmilluches er a bekord el 3,500 el rak er a mla me mong, a rebetok a melekoi el kmo ngta er a kot lungil omelechesel el babier. A rechad a kmal chemat er ngike el milluches e le ngousbech a tekoi el beot er kid a mo medengei a belkul e a osisiu el taem e ngkmal klebokel e klou a klisichel. A Moses ngike el milluches er tia el babier engdi ng Jehovah ngike el uluuchais er ngii el kmo ngngera ngmo lemuches.—2 Ti. 3:16.

² A babier er a Job a kmal klou a ultutelel el part er a Biblia. E ngerang? Ngouchais er a ngarbab el mondai el lechelebangel er ngii a rokui el anghel me a rechad: Te mo ngiltii el mesiou er a Jehovah e le ngbetik a rengrir er ngii e sorir el mesebechakl er a chisel? Ngdirrek louchais er kid a klebokel el blekerdelel a Jehovah el ua bltikerreng, llomeserreng, llemalt, me a klisiich. El ua tiang, a babier er a Job a betok el taem el lomekedong er a Jehovah el Dios el Olab a Bek el Klisiich. A babier er a Job a dirrek el louchais er kid a nger er aike el betok el ker el loker a rechad luldimukl er a nger er tia el ker el kmal mengesang er a rebetok el chad: Ngera uchul me a Dios omechei a ringel me ngngar ngii?

3. Ngera bebil er a rolel e ngsebeched el ngmai a klungioled er a omesubel a babier er a Job?

³ Ngsebeched lomekesiu er a babier er a Job el mora dolemiakl a rois. Sel obo er bebul a rois e ngsebechem el bleketakl el mes a rokui el tekoi el meliuekl er kau. Me sel donguiu er a babier er a Job e ngngosukid el mo bleketakl el mesa uldesuel a Jehovah el kirel a ringel el dechuarm. Ka me domes er a rolel e a babier er a Job a sebechel ngosukid sel bo dechuarm a ringel. Ngar tia el suobel e kede mo mesaod er a rolel e a rechad er a Israel a mle sebechir el ngmai a klungiolir er a cheldecheduch er a Job me a rolel e ngsebeched el ngmai a klungioled er ngii er chelecha el taem. Kede dirrek el mo mesaod er a rolel e ngsebeched lousbech er tia el cheldecheduch el olengeseu er a rebebil.

A DIOS A MILECHEREI A JOB ME NGMO CHUARM

4. Ngera mle klou el klekakerous er a Job me a rechad er a Israel el mlara Ekipten?

⁴ A rechad er a Israel er a lechuarm e sibai er a beluu er a Ekipten e ngmla er ngii a chad el ngklel a Job el kiliei er a Uz, el beluu el locha mla er ongos er a Beluu er a Nglat e diluches er a beluu er a Arabia. A Job a kmal mle ngodech er a rechad er a Israel e le ngmilsiou er a Jehovah loba blakerreng e tir a bai mlo mengull a bleob el chelid er a Ekipten. (Jos. 24:14; Ese. 20:8) A Jehovah millekoi el kirel a Job el kmo: “Ng diak a ngar a beluulchad el blak a rengul e ungil el ua ingii.”a (Job 1:8) A Job a mle merau me a dirrek el rokui el chad el kiliei er a ongos a milengull er ngii el ngaruchei er a ngii di el chad. (Job 1:3) A Satan a ulterekokl el kmal mlo kesib a rengul sel lomes er a Job el kmal ble lodengelii e mengull er ngii a rechad el kmo, ngmesiou er a Dios loba blakerreng!

5. Ngera uchul me a Jehovah milecherei a Job me ngmo chuarm? (Job 1:​20-22; 2:​9, 10)

⁵ A Satan a dilu el kmo a lsekum a Job a mo chuarm e ngmo choitii a bliochel el omengull. (Job 1:​7-11; 2:​2-5) Me alta Jehovah kmal mle betik a rengul er a Job engdi a belkul aika el tekingel a Satan a milekdubech a kmal oberaod el ker me a Jehovah milecherei a Satan me ng prove aika el tekingel. (Job 1:​12-19; 2:​6-8) Me a Satan a ngilai a chermel a Job, milekodeterir a reteruich el ngelekel, e rirellii a Job el mo btuu a bedengel el ta el chad. Engdi aika el kmal mekngit el omeruul a dimlak letemellii a blakerreng er a Job. (Monguiu er a Job 1:​20-22; 2:​9, 10.) A uriul e a Jehovah ulemekungil er a Job, milsang a lmuut el betok el kerruul, e milsang a relmuut el teruich el ngelekel. Ngdirrek el milsa Job a kemanget el klengar. A Job a kiliei el lmuut el 140 el rak me ngmle sebechel mesterir a rengelekel a rengelekel me a rengelekir a rengelekel a rengelekel. (Job 42:​10-13, 16) Ngmekera tia el cheldecheduch e mle sebechel ngosuterir a remesiungel a Dios er a irechar e mekera sebechel ngosukid er chelecha el taem?

6. Ngmekera cheldecheduch er a Job e mle sebechel ngosuterir a rechad er a Israel? (Dirrek el momes er a siasing.)

⁶ Rolel e ngmle sebechir a rechad er a Israel el ngmai a klungiolir. A rechad er a Israel a kmal mle meringel a klengar er tir er a Ekipten. El ua tiang, a Josua me a Kaleb a mle sibai er a lengalek. E mlo kirir el kiei er a ked el 40 el rak e le rebebil el chad er a Israel a mlo diak lolengesenges er a Jehovah. Me a cheldecheduch er a Job a mle sebechel melisiich er a rechad er a Israel el kiliei er uriul er ngii. Ngmlo sebechir el mo medengei el kmo ng Satan a uchul a ringel el lechuarm ngdiak el Dios. Ngmle sebechir el dirrek el mo understand er a uchul me a Dios a omechei er a rechad me te chuarm me a Jehovah kmal betik a rengul er tirke el melemolem loba blakerreng el mo er ngii mo lmuut er a chelsel a meringel el taem, me ngii omekngeltengat er tir.

7-8. Ngmekera babier er a Job e sebechel ngosuterir tirke el chuarm? Mouchais er a ta er a experience.

⁷ Rolel e ngsebeched el ngmai a klungioled er ngii. A rebetok el chad er chelecha el taem a omes er a rungil el chad el chuarm e diak el sebechir el mo understand er a uchul me a Dios omechei er tiang me ngduubech. Tiakid a uchul me te mla oridii a klaumerang er tir er a Dios. A one el example a Hazelb el redil er a Rwanda. Sera lekekerei e nguluumerang er a Dios engdi ngmlo betok a mekngit el tekoi el duubech er a klengar er ngii. A rechad er a blil a mle divorce me a delal a liluut el mo bechiil e a bechil a kmal mle mekngit er a Hazel. E sera bo lengeasek e ngngar ngii a chad el ulterebekii. Me a Hazel a mlora basio er omengull er ngii el losiik ongelaod engdi ngdimlak lebetik er ngii. Uriul e a Hazel a lilechesii a babier el mora Dios. Ngmelekoi el ngar tia el babilengel el kmo: “Rubak ak milluluuch el mo er kau, e millasem el meruul a ungil, engdi ke miltechei a ungil er a mekngit. Me ak mo choitau er chelechang e mo meruul a ngii di el tekoi el soak.” Ngmera el metemall a rengud el kirir a rechad el uai a Hazel el tir a bla lerelleterir el mo oumerang el kmo a Dios a uchul me te chuarm!

⁸ Me nguaisei engdi kede mla suubii er a babier er a Job el kmo a Satan a uchul me kede chuarm ngdiak el Dios! Kede dirrek el mla suubii el kmo ngdiak el kired el mo omdasu el kmo a chad el chuarm a melai a medal omerellel. A Bades a ouchais er kid el kmo a “taem me a bkaischemrungel” a sebechel duubech el mora ngii di el chad er a ngii di el taem. (Oli. 9:​11, NW; Job 4:​1, 8, NW) E mla suubii el kmo sel doutekangel a ringel el loba blakerreng e kede msa techellel a Jehovah el mo ouchais er a Satan el kmo ngbulak. (Job 2:3; Osi. 27:11) Kid a kmal diak dorrekakl aika el tekoi el bla desuub er a Biblia. Aika ngosukid el mo medengelii a klemerang el kirel a uchul me kid me a rebetik er a rengud a chuarm. A uriul e a Hazel a mlo mesuub a Biblia lobengterir a Resioning er a Jehovah e mlo medengei el kmo a Dios a diak luchul a ringel el dilubech el mo er ngii. Ngmelekoi el kmo: “Ak liluut el meluluuch el mora Dios el louchais er ngii aike el mera el ngar er a renguk. Ak dilu er a Jehovah el kmo ngdimlak el mera el soak el mengoit er ngii er ak du el uaisei. Ak di millekoi el uaisei e le ngdimlak mera el medengelii. Chelecha ak mla mo medengei el kmo ngbetik a rengul er ngak. Ak kmal mla mo happy er chelechang.” Kede mera el oba omereng el saul e le ngdiak el Dios a uchul me kede chuarm! Chelecha e me dorriter er a rolel e a cheldecheduch er a Job a sebechel ngosukid sel dechuarm a ringel.

ROLEL E A CHELDECHEDUCH ER A JOB A NGOSUKID LOUTEKANGEL

9. Ngera ngmirruul er ngii a Job er a lechuarm er a ringel? (Jakobus 5:​11, NW)

⁹ Molatk er a Job el di ngii el tang el dengchokl er a chab e di btuu el ta el chad e chuarm er a klou el ringel. Rektel a uchul me a bedengel a di chedelekelek me ngii a kmal kora di chiuis kung. A Job a dimlak a kmal klisichel a bedengel me ngdi dilengchokl loba ulemengelel a bekai el mengkas a btungel e di melekoi el kirel a ringel el lomelechesiu er ngii. Me nguaisei a Job a dimlak di lorreked er a klengar ngbai uluutekangel. (Monguiu er a Jakobus 5:​11, NW.c) Ngera ngilsuir a Job el outekangel?

10. Ngmle uangera teletelel a deleuill er a Job me a Jehovah? Mosaod.

¹⁰ A Job a uluuchais er a Jehovah aike el mlara rengul. (Job 10:​1, 2; 16:20) El ua tiang, a 3 el bliongel ouchais er kid er a kngtil a rengul a Job el kirel a tekoi el dilubech el mo er ngii, me ngii a mlo omdasu el kmo ng Jehovah riruul aika el tekoi el mo er ngii. E seikid e a retedei el sechelil a mlo betok el di lolekoi el kmo a Dios a omals er ngii el kirel a kngtil. Me a Job a mlo meringel el mesebechakl er a blakerreng er ngii el mora Jehovah. A bebil tekingel a Job ochotii el kmo ngmle telkib el taem lomdasu el kmo nglmuut el melemalt er a Dios. (Job 10:​1-3; 32:​1, 2; 35:​1, 2) Engdi a Job a dirrek el dilu el kmo a bebil er a tekingel a mlo “terrekakl” el cheldecheduch e le ngkmal mlo meringel el melasem el mesebechakl er a blakerreng er ngii. (Job 6:​3, 26, NW) Ngar er a 31 el bliongel e kede menguiu el kirel a Job el kmo ngsoal a Dios a lebeketeklii el kmo ngii a diak a telemellel. (Job 31:35) Me nguaisei engdi kede medengei el kmo ngdiak el melemalt el tekoi el Job a mengerechir er a Dios me di lebleketakl louchais er ngii er a uchul me ngchuarm.

11. Ngmilekera Jehovah er a tekingel a Job el kmo ngkmal dimlak a ngerang el letemellii?

¹¹ Kede mesa er chelechang el kmo a Job er a longedecheduch el uaisei e ngulechotii a diak lemesim el blakerreng er ngii el mora Jehovah me a mesisiich el klaumerang er ngii el kmo a Jehovah mo mesa el kmo ngdimlak a ngerang el letemellii. Cherengel a taem e a Jehovah milengedecheduch er a Job loeak a meses el eolt. Me nguaisei a Jehovah dimlak losaod er a uchul me a Job a chilarm. Me ngii a dimlak lomlals er a Job er aike el ledilung me a lechub e lomals er a Job el mlo meringel el di ngii el mesebechakl er ngii. Ngbai ulsisecheklii a Job el ua chedam a lolisechakl er a ngelekel. Tia mle sel kot lungil rolel e ngsebechel ngosuir a Job. Me a Job a ngiluu a rengul el meriou e dilu el kmo ngkmal diak a ngera el lodengei e ulengit a klausubes. (Job 31:6; 40:​4, 5; 42:​1-6) Ngmekera tia el cheldecheduch e mle sebechel ngosuterir a rechad er a irechar, e mekera sebechel ngosukid er chelecha el taem?

12. A rechad er a Israel ngmilekera sebechir el ngmai a klungiolir er a cheldecheduch er a Job?

¹² Rolel e ngmle sebechir a rechad er a Israel el ngmai a klungiolir. A rechad er a Israel a mle sebechir el ngmai a klungiolir er a tekoi el dilubech el mora Job. Ka molatk er a Moses. Ngdimlak el beot er ngii omekrael er a renged er a Israel. Ngmle betok el taem el rechad er a Israel a mlo diak lolengesenges er a Jehovah e kingtir a rengul a Moses. A rechad er a Israel a mle blechoel el mengeremrum el oumondai er a Jehovah engdi a Moses a mle blechoel el mora Jehovah er a chelsel a meringel el taem. (Exo. 16:​6-8; Ule. 11:​10-14; 14:​1-4, 11; 16:​41, 49; 17:5) A kerebil a Job a dirrek el mle sebechel ngosuir a Moses el outekangel er a losmechokl er ngii a Jehovah. El ua tiang, a rechad er a Israel er a lekiamp er a Kades er a mong me ngokeua el rak er tir el merael er a ked e a Moses a “mlo mekngit a cheldechedechal” e dimlak el bsa Jehovah odanges el rredemelel. (Psa. 106:​32, 33) Tiakid a uchul me a Jehovah dimlak lebecherei a Moses me bo lsiseb er a Beluu er a Nglat. (Dut. 32:​50-52) Tia el omesmechokl a ulterekokl el mlo uchul a klou el kngtil a rengul a Moses engdi ngngiluu a rengul el moriou e kongei er a omesmechokl. A cheldecheduch er a Job a dirrek el mle sebechel ngosuterir a rechad er a Israel el uleba blakerreng el mora Jehovah el kiliei er a uriul er a taem er a Moses. Omelebedebekir er tia el cheldecheduch a sebechel ngosuterir el mo meduch louchais aike el ngar er a rengrir el mora Jehovah e diak bo di letir lomeklemalt er tir er a medal a Jehovah. Ngdirrek el mle sebechir el suubii el mo oba klengariourreng el kongei omesmechokl er a Jehovah.

13. Ngmekera cheldecheduch er a Job e sebechel ngosukid loutekangel? (Hebru 10:36)

¹³ Rolel e ngsebeched el ngmai a klungioled er ngii. Kid a Rekristiano a dirrek el lousbech el loutekangel. (Monguiu er a Hebru 10:36.) El ua tiang, a rebebil er kid a locha ngar ngii a secherel a bedengir me a lechub ngsecherel a uldesuir, ngar ngii a mondai er a telungalek er tir, ngmla mad a betik er a rengrir, me a lechub nglmuut el ta er a oberaod el mondai. E a lebebil e a tekingir me a omerellir a rechad a rullii el mo meringel er kid outekangel er a blekeradel el dengar er a chelsel. (Osi. 12:18) Me nguaisei engdi a babier er a Job a osisecheklid el kmo ngkmal sebeched louchais er a Jehovah aike el kmal berrotel er a rengud, lulterekokl a rengud el kmo ngmo rongesid. (1 Jn. 5:14) A Jehovah diak lengasech a rengul okmo ngngar ngii aike el taem el bo demeterekakl el mengedecheduch el ua dilubech mora Job. Ngbai a Dios a meskid a klisiich me a llomeserreng el dousbech er ngii el mo outekangel. (2 Kr. 16:9; Jak. 1:5) Ngdirrek el locha mo ousbech el mesmechokl er kid el ua lurruul er ngii el mora Job. Me a babier er a Job a dirrek el losisecheklid er a rolel e ngsebeched el loutekangel a lsekum kede ngmai omesmechokl er a Tekingel a Dios, cheldebechelel, me a lechub te resechelid el mla mukeroul er a klereng. (Heb. 12:​5-7) Ngdi ua Job el mlo uchul a klungiolel er a lenguu a rengul moriou e lekengei omesmechokl el lengilai, ngdirrek el mo uchul a klungioled sel dekengei a omesmechokl el dengai. (2 Ko. 13:11) Aika kmal meklou a ultutelel el tekoi el sebeched el suub er a Job! Chelecha me dosaod er a rolel e ngsebeched lousbech er a cheldecheduch er a Job lolengeseu er a rebebil.

MOUSBECH ER A BABIER ER A JOB LOLENGESEU ER A REBEBIL

14. Ngera ta er a rolel e ngsebeched el smodii a uchul me a rechad a chuarm?

¹⁴ Ngmla ta el momerk er a klumech e meet er a chad loker er kau er a uchul me a rungil chad a chuarm? Ngmilekera omonger er ngii? Ke locha silodii el mo er ngii aike louchais a Biblia el kmo ngdilubech er a sers er a Eden. Ke locha ulemuchel el melekoi el kmo a Satan el mekngit el anghel a ulumulak el mora kot el obekel luchul me te mlo omtok er a Dios. (Gen. 3:​1-6) Seikid e ke locha smodii el kmo a Adam me a Eva el mlo diak lolengesenges a uchul me a rechad a mo chuarm e mad. (Rom 5:12) A ulebongel e ke locha silodii el kmo a Dios a omechei er a taem el mo omeketakl er ngii el mora rechad el kmo ngdiak el klemerang a tekingel a Satan e dirrek el mecherei a taem me bo loberk a ungil chais el kmo a rechad a lmuut el mo mecherrungel er a ngar medad. (Och. 21:​3, 4) E tia kmal lungil lomesodel, e mla ngosuterir a rebetok el chad el mo medengelii a uchul me a rungil el chad a chuarm.

15. Ngmekera sebeched lousbech er a babier er a Job el ngosuir a chad loker er a uchul me a rechad a chuarm er a ringel? (Dirrek el momes a siasing.)

¹⁵ Molatk er a lmuut el ta er a rolel e ngsebeched longer er tia el ker lousbech er a babier er a Job. Ngsebechem lomuchel loeak omchetengii a chad el luleker er a kmal lungil el ker. E dmu el kmo a ta er a kmal mle ungil chad el Job el kmal mlo chuarm a dirrek luleker er a osisiu el ker. Ngika dirrek el mlo omdasu el kmo a Dios a ulemekcharm er ngii. (Job 7:​17-21) Nglocha kmal mo rutechii a rengul ngika el chad el mongedecheduch er ngii sel bo lodengei el kmo mo lmuut er a rechad er a kmal irechar me te mle sorir el mo medengelii a nger er tia el keril. A next e ngsebechem el smodii el kmo ngoeak a babier er a Job e kede suubii el kmo ng Diabelong ulemekcharm er a Job ngdiak el Dios. A Diabelong a mirruul er tiang e le ngmle soal lomeketakl el kmo a rechad a di mesiou er a Dios e le ngngar ngii a lenguu er ngii. Ngsebechem el dochelir el kmo alta Dios a dimlak lukdubech a ringel el mlora Job engdi ngii el milecherei me ngduubech ochotii el kmo ngoumerang el kmo a rechad el ngar ngii a klaumerang er tir a diak di lolatk er a di tir me tir a mo prove el kmo a Satan a cheleuid. A ulebongel e ngsebechem el louchais er ngii el kmo a cherengel a taem e a Dios ulemekngeltengat er a blakerreng er a Job. Ngsebeched el mengelaod er a rebebil loeak a dolterekokl a rengrir el kmo a ringel a diak el ngar er a Jehovah el mei.

16. Mouchais er a ta er a experience el ngii ochotii a rolel e a babier er a Job a sebechel ngosuir a chad el chuarm.

¹⁶ Molatk er a rolel e a babier er a Job a ngilsuir a Mario. A ta er a klebesei er a 2021 e a odos ulemerk er a klumech lousbech er a dengua. A kot el chad el ble le call er ngii a Mario. Ngmle share er a bades el mo er ngii e silodii el kmo a Dios diak di lorrenges er kid sel doluluuch el mo er ngii, ngdirrek el tibir el mo meskid a ungil klengar er a ngar medad. Sera loker er a uldesuel a Mario, e a Mario dilu el kmo ngmilluches er a suicide note er ngii er a le call er ngii a odos. Ngdilu el kmo: “A kuumerang el kmo ngngar ngii a Dios engdi ak millatk er chelecha el tutau el kmo ngika ngmla choitak?” Ongeru el taem er a lomekedong el mo er ngii e nguluuchais er a Mario el kirel a Job me a ringel el blo lechuarm. A Mario a mlo melatk el kmo ngkirel chiuii a babier er a Job el rokir. Me a odos a mle send er ngii er a link el mora New World Translation of the Holy Scriptures el Biblia. Me ngngera dilubech? A Mario a kilengei er a omesubel a Biblia e kmal semeriar el mo medengei a lmuut el betok el kirel ngika el Dios el milsang e soal mo medengelii.

17. Ngera uchul me ke kmal oba omereng el saul el mora Jehovah el lilia cheldecheduch er a Job er a mlukreng el Tekingel? (Job 34:12)

¹⁷ Me ngbleketakl el kmo a Tekingel a Dios a kmal klou a klisichel e sebechel ngosuterir a rechad luldimukl er tirke el chuarm. (Heb. 4:12) Kede kmal oba omereng el saul el mora Jehovah el lilechesii a cheldecheduch er a Job er a mlukreng el Tekingel! (Job 19:​23, 24) A babier er a Job olterekokl er a rengud el kmo “a Olab a Bek el Klisiich el Dios a diak loruul a mekngit.” (Monguiu er a Job 34:12.) Ngdirrek louchais er kid er a uchul me a Dios omechei a ringel me ngngar ngii me a rolel e ngsebeched el mtekangel. Ngngosukid el mengelaod er tirke el chuarm. Ngar er a ongingil el suobel e kede mo mesaod er a rolel e a babier er a Job a sebechel ngosukid sel bo dosmechokl er a chad.