Ngera Te Suub a Rebebil Sel Lomes er Kau?
1. Ngera te siluub a redisaiplo er a Jesus er a lomes er ngii?
1 A Jesus a dilu el kmo: “Mo mchelngii chongelungel er ngak e mosuub er ngak.” (Mt. 11:29) Me ngbleketakl el kmo ngullisechakl er a rebebil el loeak a ungil el kerebai er ngii, el diak el di loeak a tekingel. Ka molatk el kmo ngngera te siluub a redisaiplo er a lomes er a Jesus. Ngmle medemedemek, e bekokeuii, e ulecholt a bltikerreng. (Mt. 8:1-3; Mk. 6:30-34) E dirrek el mera el mle ngariou a rengul. (Jn. 13:2-5) Me sera lobengkel a Jesus el ngar er a omesiungel, e a redisaiplo a milsa el kmo ngmle blak a rengul el chad er a ureor el mle meduch el lolisechakl er a klemerang el mo er a rebebil. (Lk. 8:1; 21:37, 38) Ngera te suub a rebebil sel lomes er kid el ngar er a omesiunged?
2. Ngmekerang e a ungil el omengetmekled me a blekerdeled el ngar er a omesiunged e mo uchul a ungil el chised er a rechad er a blai?
2 Rechad er a Blai: A ungilbesul el biled me a ungil el blekerdeled, me a klemeriarreng er kid er a rechad a ngar er ngii a klou a lerellii er a rechad er a blai. (2 Ko. 6:3; Fil. 1:27) Te mesa el kmo kede blechoel el ousbech er a Biblia. A rekuk bebil a mechas a rengrir el kmo kede oba omengull e orrenges er tir sel longedecheduch. Ngdiak el kired el oumededenger el kmo a ungil el kerebai er kid er aika el tekoi a sebechel el mekroleterir a rechad el mo orrenges er tia el klumech er a renged.
3. A ungil el blekerdeled ngera ngrullii er a rudam er kid?
3 Rudam er Kid: Ka dirrek el molatk el kmo a ungil el blekerdeled a dirrek el ngar er ngii a lerellii er a rudam er kid. A blakerreng er kid el kirel a omesiunged a sebechel el rulleterir a rebebil el mo oba osisiu el blakerreng. El ua deel el merorem a deel, e a ungil el kltmokl el cheldechedechad a sebechel el mo melisiich er a rebebil el mo olengeriakl er a duch er tir el loldingel. (Osi. 27:17) A blakerreng er kid el meruul a ungil el rekord er kid er tirke el olecholt a klemeriarreng e mereched el lmuut el mo oldingel er tir a ngosuterir a rebebil el mo meruul el uaisei. Seikid e kede mecherei a ungil el kerebai el mo er a rekldemed er a ureor sel decherrengelii a omesiunged.—2 Ti. 4:5.
4. Ngera me a lebebil er a taem e ngungil a dorriter a omelekinged me a blekerdeled?
4 Ngera me ngdiak morriter a omelekingem me a blekerdelem a lebebil er a taem e mesa el kmo ngera ngrullii er a rebebil? A ungil el kerebai er kid a odeuir a rengul a Jehovah e ngosukid el mo melekoi a tekingel a apostol el Paulus er a ledu el kmo: “Kemiu bo moukerebai er ngak, el ua ingak loukerebai ra Kristus.”—1 Ko. 11:1.