Mkengei el Mo Ngodechii a Uldesuem

A ngii di el chad el soal el mo medengelii a klemerang a kirel el mo kongei el “mdechem a bek luldasu el mo chederdall ra Kristus.” (2 Ko. 10:5) Tiang a diak leblechoel el beot, el ileakl a lsekum aike el uldasu a kmal mle dmolech er a rengum. El uai tia el kmo, uchei er a omosuub er a klemerang, e ke locha uleldeu er a rengum el mengedaol a bebil er a ungil el klebesei er a klsuul el klechelid el obengkel a telungalek er kau. Engdi uriul er a obo momuchel el mesuub er a Biblia, e ke mlo medengei el kmo a uchetemel aika el ungil el klebesei a mlengai er a klsuul el klechelid. Me a kot, e ke locha mle meoud el oltaut aike el bla msuub. Engdi uriul, e a bltikerreng el kirel a Dios a mlo mesisiich er a bltikerreng er kau el kirel a tekoi er a klechelid, me ke milengeroid er kau er aike el ungil el klebesei el omtok er a uldesuel a Dios. Ngdimlak lomekngeltengat er kau a Jehovah er a ungil el omelilt er kau?​—Momekesiu er a Heb. 11:25.

Ngblechoel el mo uchul a klungioled a doruul a rokui el tekoi el oltirakl er a rolel a Dios. (Isa. 48:17, 18) Me sel bo lebleketakl a osenged el kirel a bades er a Biblia, e bo doldeu a rengud er a ngelsecheklel a klemerang! Ngmerang, a dolemolem el mukllomes e ngolecholt el kmo kede ngar er a melemalt el rael. Ngrolir a remelemalt, el “ua llomes el merael el mo mellomes el mo lmuut er sel bo el ulterekokl a sils.”​—Osi. 4:18, New World Translation.