Ongeru el Suobel
Ngtechang a Dios?
Ngtechang a mera el Dios, e techa ngklel? (1, 2)
Ngua ngerang a bedengel? (3)
Ngera aike el kot el ngar er a bab el blekerdelel? (4)
Ngsebeched el lousbech a bleob ma lechub e ngokesiul a kmung ngerang er a chelsel a omengull er kid el mo er ngii? (5)
Ngerang a eru el rolel e ngsebeched el mesuub el kirel a Dios? (6)
1. A rechad a mengull a kmal betok el tekoi. Engdi a Biblia a ouchais er kid el kmo ngar er ngii a di ta el MERA el Dios. Ngii a mileob a rokui el tekoi el ngar er a eanged ma chutem. Ngii el milskid a klengar a uchul, e ngkirel el di ngii el Tang a dongull er ngii.—1 Korinth 8:5, 6; Chocholt 4:11.
2. A Dios a kmal betok a dial engdi ngdi chimong a ngklel. Ngii el ngakl a JEHOVAH. Ngar er a oumesingd el Biblia, e a ngklel a Dios a bla lotebedii e mtechir er a dui el ua RUBAK ma DIOS. Engdi Biblia er sera lemeluches, e a ngakl el Jehovah a luluusbech er ngii el bekord 7,000 el taem er a chelsel!—Exodus 3:15; Psalm 83:18.
3. A Jehovah a ngar er ngii a bedengel, engdi ngdiak leua aika el bedenged. A Biblia a melekoi el kmo, “A Dios a Reng.” (Johanes 4:24) A reng a blekerdelel a klengar el kuk ngar er a bab er aika el klengar er kid. Ngdiak a ngii di el chad el mla mesa Dios. A Jehovah a kiei er a eanged, engdi ngsebechel el mes a rokui el tekoi. (Psalm 11:4, 5; Johanes 1:18) Ma leuaisei, e ngngerang a chedaol el reng? Ngdiak el chad el ua Dios. Ngbai, klisichel a Dios.—Psalm 104:30.
4. A Biblia a chocholt er kid a blekerdelel a Jehovah. Ngolecholt el kmo aike el kot el ngar er a bab el blekerdelel a Dios a bltikerreng, ma llemalt, ma llomeserreng, ma klisiich. (Duteronomi 32:4; Job 12:13; Isaia 40:26; 1 Johanes 4:8) A Biblia a ouchais er kid el kmo ngkmal chubechub, e bekokeuii, e bekururau, e klou a rengul. Me ngkired el mo ua rebekongesenges el ngalek, e oltirakl aika el omerellel.—Efesus 5:1, 2.
5. Ngsebeched el mo terrob ma lechub e kede meluluuch el mo er a bleob, ma lechub e ngbilt, ma lechub e ngokesiul a kmung ngerang er a chelsel a omengull er kid? Ngdiak! (Exodus 20:4, 5) A Jehovah a melekoi el kmo ngkirel el di ngii el tang a dongull er ngii. Ngdiak lomii a klebkellel el lobengkel a ngii di el chad ma lechub e ngngii di el ngerang. Ma bleob a diak a klisichel el lolengeseu er kid.—Psalm 115:4-8; Isaia 42:8.
6. Me kede mekerang e mo sebeched el mo ungil el medengelii a Dios? A ta el rolel a sebeched el lomes aike el lulemeob e dmolech el melebedebek el kmo ngngera ngouchais er kid. A blebelel a Dios a cholecholt el kmo ngkmal klou a klisichel ma llemesel a rengul. Kede dirrek el mesa bltikerreng el mocholt er aike el rokui el lriruul. (Psalm 19:1-6; Rom 1:20) A lmuut el ta er a rolel e ngsebeched el mesuub el kirel a Dios a oeak a omesubed er a Biblia. Ngar er a chelsel e ngouchais er kid a lmuut el betok el blekerdelel a Dios. Ngdirrek el louchais er kid el kirel a moktek er ngii maike el soal a bo doruul el tekoi.—Amos 3:7; 2 Timoteus 3:16, 17.
[Siasing el ngar er a 5 el llel]
Kede mesuub el kirel a Dios el loeak a blebelel ma Biblia