Molisechakl er a Rengelekiu el Mo Omerk er a Klumech
1. A Psalm 148:12, 13 ngmengelechel er a Rekristiano el chedam me a rechedil el mo meruul a ngerang?
1 A Jehovah a mengemedaol er a rengeasek el mo mengebkall er ngii. (Psa. 148:12, 13) A rechedam me a rechedil el Kristiano a diak di lolisechakl er a rengelekir el kirel a klemerang el ngar er a Biblia me a llechul a Dios el kirel a tekoi er a kldung e lemerekong. Te dirrek el olisechakl er tir el mo omerk er a ungil el chais. Ngmekerang e sebechel tia el tekoi e meketmokl?
2. Ngmekerang a ungil el kerebil a chedam me a lechub e ngchedil a lengar er ngii a lerellii er a rengelekel?
2 Ungil el Kerebai: A Mengeteklel a Israel el Gideon a dilu er tirke el 300 el chedal el kmo: “Kom omes er ngak e meruul a ikel kurruul.” (Men. 7:17) A rengalek a ngar er ngii a blekerdelir el omes er a redemerir me a rederrir e oltirakl a blekerdelir. A ta el chedam, el oureor a leklebesei, a diak lebo el bechiuaiu sel bo el lrei sel tutau er a Sebadong, e bai ngoititerir a rengelekel el mo oldingel a obliil alta ngkmal mesaul a bedengel. Me alta ngdiak a ngera el lolekoi, engdi ngolisechakl er a rengelekel el kmo a ureor er a berkel a klumech a klou a ultutelel. (Mt. 6:33) A rengelekiu te sebechir el melechesuar el kmo ngdmeu a rengmiu el meruul a kakerous el rolel a omengull, el ua sel moluluuch, me sel monguiu a Biblia, me sel monger er a temel a miting, me a omoldingel obliil? Nguaisei engdi ke ulterekokl el medengei el kmo ngdiak el sebechem el kmal mo cherrungel el ungil el kerebai. Engdi a rengelekem a mo kongei er kau a molisechakl er tir el mo mesiou er a Jehovah sel lomes er a blakerreng er kau el meruul el uaisei.—Dut. 6:6, 7; Rom 2:21, 22.
3. Ngera el turrekong a sebechir a ruungalek el ngosuterir a rengelekir el mo meruul e oltaut?
3 Ungil el Turrekong: A ruungalek a uaisei el blak a rengrir el olisechakl er a rengelekir el mo merael, e mo mengedecheduch, e mo meduch el di tir el oubail e mo meruul a lmuut el bebil er a tekoi. Me a rengalek sel lotaut aike el meklou a ultutelel el tekoi er a okurulir, e ngsebechir el kuk omes el bedul a beches el turrekong. A lsekum a ruungalek a Kristiano, e te mo ngosuterir a rengelekir el mo meruul e oltaut a turrekong el kirel a omengull er tir el oltirakl er a rekrir me a duch er tir. (1 Ko. 9:26) Kau ke olisechakl er a rengelekem el mo onger el olab a di tekingir e di tir el mengetmokl a cheldechedecherir er a Skuul el kirel a Berkel a Klumech? (Psa. 35:18) Kau ke olisechakl er tir el mo teloi a kakerous el rolel a omesiou? Ke mla ngosuterir el mo omes er a techolb me a mui el taem el omesiou el ua el turrekong er tir? Ke blechoel el mechititerir me te obengterir a redmeu a rengrir e blak a rengrir el ruumerk er a klumech, el tir a sebechir el mo melisiich er tir?
4. Te mekerang a rengalek e ngmai a klungiolir er a ruungalek el omuchel el olisechakl er tir el mo meduch el omerk a klumech sel dirk mekekerei?
4 A milluches er a psalm a dilu el kmo: “Dios, ser a kkekerei el mer chelechang el mullisechakl er ngak, mak dirk ouchais a mengasireng el omerellem.” (Psa. 71:17) Momuchel el olisechakl er a rengelekiu sel dirk lemekekerei el mo omerk a klumech. A uchetemel a klaumerang er tir, el kau a olengeseu er tir el mo mekurulii a ulterekokl el mo uchul a klungiolir sel bo el meklou el chad!—Osi. 22:6.