Ongeteruich el Suobel
Aike el Omeruul el Louketui a Dios
Ngkirel el mo ua ngerang a uldesued el kirel aike el tekoi el ledu Dios el kmo ngmekngit? (1)
Ngua ngera el bedengel a durs a mekngit? (2)
Ngkirel el mo ua ngerang a osengel a Kristiano el kirel a blulak? (3) ma bakutsi? (3) ma omerechorech? (3) ma uldikel? (4) ma oltuubladek? (5) ma cheltelaol er a rrom? (6)
Ngmekerang e sebechel a chad el mo mimokl er aike el mekngit el lurruul? (7)
1. A remesiungel a Dios a betik a rengrir er a ungil. Engdi dirrek el kirir el mo ouketui aike el mekngit. (Psalm 97:10) Tiang a belkul a kmo ngkirir el mengeroid er tir er aike el lomeruul el Dios a ouketui. Ngerang a bebil er aika el lomeruul?
2. Deleboes: A durs er a uchei er a chebechiil, ma laokreng, ma ousechelei a charm, ma ousechelei er a rengelekel ma lechub e te chedal, ma remengolchotaor a rokui el kmal oberaod el klengit el omtok er a Dios. (Levitikus 18:6; Rom 1:26, 27; 1 Korinth 6:9, 10) A lsekum a reteru el chad a diak lebechiil e dmak el kiei, e ngkirir el mo chacheroid ma lechub e te mo mekur a chebechiielir el loltirakl a llach.—Hebru 13:4.
3. Blulak, ma Bakutsi, ma Omerechorech: A Jehovah el Dios a diak lsebechel el lomulak. (Titus 1:2) Ma rechad el sorir a kengei er ngii a kmal kirir el mengeroid er tir er a blulak. (Osisechakl 6:16-19; Kolose 3:9, 10) A ngii di el bedengel a bakutsi a churrechomel er a rechorecherreng. Me seikid a uchul a Rekristiano a diak el kirir el ngar er a ngii di el bedengel a bakutsi, el ua lottery, ma klaidesachel er a uos, ma bingo. (Efesus 5:3-5) A Rekristiano a dirrek el diak lorechorech. Te diak lomechar a klalou el lodenge el kmo ngerrechorech ma lechub e lolai a klalou el dimlak lolturk.—Exodus 20:15; Efesus 4:28.
4. Blekongesngasech el Reng, ma Mekngit el Odechelakl: A diak lultebechel el ngasechereng a sebechel el mo uchul a mekngit el odechelakl. (Genesis 4:5-8) A chad el mekngit el loldechelakl a diak el sebechel el mo sechelil a Dios. (Psalm 11:5; Osisechakl 22:24, 25) Ngmekngit a lsekum kede melaitechei ma lechub e domekesiu er a mekngit el lomerellel a chad el me er kid.—Osisechakl 24:29; Rom 12:17-21.
5. Cholai ma Oltuubladek: A rebebil er a rechad a omekedong a klisichir a rebladek el me omekungil a secher. A rebebil a kuk melecha olai er a recherrouir el meruul er tir el mo smecher ma lechub e te omekoad er tir. Ngike el uchul aikakid el klisiich a Satan. Me seikid a uchul ma Rekristiano a kmal diak el kirir el mo teloi er a chouaika el lomeruul. (Duteronomi 18:9-13) A dolemolem el kmeed er a Jehovah seikid a kot el lungil el ulekerreuid er a ngii di el olai el loruul a rechad el me er kid.—Osisechakl 18:10.
6. Cheltelaol er a Rrom: Ngdiak lemekngit a dolim a sese el bilong, ma biang, ma lechub e ngngii di lilumel el ngar er ngii a arukor er ngii. (Psalm 104:15; 1 Timoteus 5:23) Engdi a imis el lomelim ma cheltelaol er a rrom a mekngit er a osengel a Dios. (1 Korinth 5:11-13; 1 Timoteus 3:8) A imis el lomelim a sebechel el tomellii a klisichel a bedengem e dirrek el mridii a delengcheklem. Ngdirrek el sebechel el rullau me ke mereched el ruebet er a kuk bebil er a ngibes er a klechad.—Osisechakl 23:20, 21, 29-35.
7. A rechad el meruul a tekoi el ledu Dios el kmo ngmekngit a diak lsebechir el mo “oudiukes er a rengedel a Dios.” (Galatia 5:19-21) A lsekum ngmera el betik a rengum er a Dios e soam el loldeu er a rengul, e ngkmal sebechem el mo mimokl er a chouaika el mekngit el lomeruul. (1 Johanes 5:3) Mosuub el mo ouketui aike el lolekoi a Dios el kmo ngmekngit. (Rom 12:9) Mobengterir a rechad el omerellir a oltirakl a soal a Dios. (Osisechakl 13:20) Tirke el mesisiich el Kristiano a omobengterir e ngkmal sebechir el mo uchul a klisichem. (Jakobus 5:14) Engdi ngar er a bab er ngii el rokui, bo multuil er a Dios el kirel a ngeso el loeak a nglunguuch.—Filipi 4:6, 7, 13.
[Siasing el ngar er a 20, 21 el llel]
A Dios a ouketui a cheltelaol er a rrom, ma chomerechorech, ma bakutsi, ma mekngit el loldechelakl