Ngsebechem el Mo Teloi er a Berkel a Klumech Sel Sandei?
1. Ngera kede suubii er a omerellel a Paulus me a rekldemel er a beluu er a Filipi?
1 Ngmle Sebadong el sils, me a ruumesingd el chad er a Judea el ngar er a beluu er a Filipi a ulengull. A Paulus me a rekldemel a uleldingel er a chelsel a mats el meruul er a omesiungir el uai a remissionari. Ngdimlak a chad el melenguul er tir e le tir el merruul er a omesiungir er a taem el mle kirir el olengull. Te bai mle medengei el kmo a Rechijudea a kldibel er a ikrel a mats el meluluuch me ngmlo er ngii a techellir el mo merkii a klumech el mo er tir. Ngulterekokl el kmal mlo dmeu a rengul a Paulus me a rekldemel er a lomes er a Lydia el kmal mle blak a rengul el orrenges e bo lemetecholb ngii me a rokui el chad er a blil! (Rel. 16:13-15) Me chelecha el taem el betok el chad a olengull sel Sandei, e nglocha ungil el techall el sebeched el oldingel e omerk er a klumech el mo er tir.
2. Ngera el ultok a lechilarm a rechedal a Jehovah el kirel a berkel a klumech sel Sandei, el mlo uchul me chelechang e ngdmeu a rengud el diak a rumtok er kid a doldingel?
2 A Meringel el Ultok el kirel a Berkel a Klumech Sel Sandei: Ngar er a rak er a 1927, e a rechedal a Jehovah a mluchelechel el mo mengoit er a telkib el temir sel Sandei el mo oldingel a obliil. Tiang a mlo uchul a meringel el ultok. Ngar er a beluu er a Merikel, e te betok a mlekelebus el kirel a omerellir el ua blo letemellii a llechul a Sebadong el Sils, e dirrek el ua lullemall er a budech, e olterau a babier el dimlak a license er tir. Me nguaisei engdi a rechedal a Jehovah a dimlak lemeterob el omerk er a klumech. Ngar er a rak er a 1930 e te milekdebechii a tekoi el lomekedong er ngii el kmo “divisional campaigns,” el rokui el chad el omerk er a klumech el ngar er a kaiuekeed el basio a mo dmak e oldingel el churrengelii a berkel a klumech er a ta el territory. Ta el taem e te mludechem e mlekelebus, te kmal mle betok me ngmlo diak el sebechir a rebulis el torebengii a urerir. Me kau, ke oba omereng el saul el kirel a blakerreng er tirka el odam el tir a riruul a tekoi el mlo uchul me chelecha el taem, e ngsebeched el omerk er a klumech sel Sandei el diak a chad el omecheracheb er kid?
3. Ngerang a rullii a Sandei el sils el mo ungil el taem el doldingel a obliil?
3 A Kot el Ungil el Taem er a Odingel: A rebetok el chad a di ngar er a blirir sel Sandei el sils. Te blechoel el mla olengull a bedengir. Te ngar er ngii a rebebil el mla mo er a ikelesia me ngungil a rengrir el mesaod el kirel a Dios er sel taem. A lsekum e ngngar er ngii a miting er kid sel Sandei, e nglocha ungil a deketmeklid er a uchei me bo el sebeched el teloi er a odingel obliil er a uriul er a miting. Ngdirrek el ungil a deketmokl a bento er kid.
4. Kede mo melechesuar a ngera el deurreng sel dechitii a telkib el temed el mo oldingel a obliil er sel Sandei?
4 A lsekum e kede ousbech er a telkib el temed er sel Sandei el mo oldingel, e ngdirk ngar er ngii a temed el mo olengull a lsekum e ngmo kired. Me a ungil el ulengelled a mo er ngii el uldimukl er a klou el deurreng er kid sel derellii tia el ileakl el ureor. (Osi. 19:23) Ngulterekokl el sebeched el mo melechesuar a klou el deurreng sel debetik er a chad el ua Lydia!