A Klou el Ieleb​—Te Rua Techang a Ullengesenges? E Rua Techang a Dimlak?

A ruumesingd el chad er sel taem er a Noah a mirruul a mekngit. Genesis 6:5

A Adam me a Eba a mlo er ngii a rengelekir, me ngmlo betok a rechad el ngar er tia el chutem. Omerollel a taem, e a rebebil el anghel a mlo obengkel a Satan el omtok.

Te mlei er a beluulechad e remuul a bedengir el mo ua rechad me bo el sebechir el mo becherir a redil er tia el chutem. Tirka el redil a mlo omechell er a rengelekir a rechelid el tir a mle mekouar e mesisiich el chad.

Me a beluulechad a mlo mui er a remekngit el chad. A Biblia a kmo: “A re bek el chad er a beluulechad a kmal mle dengerenger, ma mekngit el uldasu a blechoel el omekeek a uldesuir.”

A Noah a ullengesenges er a Dios e milleketek er a arhe. Genesis 6:13, 14, 18, 19, 22

A Noah a mle ungil el chad. A Jehovah a uluuchais er ngii el kmo ngmo olekngemed er a remekngit el chad el ousbech er a klou el ieleb.

A Dios a dirrek el dilu er a Noah me ngmo meleketek er a klou el bilas, el domekedong er ngii el arhe, e mle kirel ngii me a telungalek er ngii me a bek el bedengel a charm el mo soiseb er a chelsel.

A Noah a milengelechel er a rechad el kirel a merekung el klou el Ieleb, engdi te dimlak lorrenges er ngii. A rebebil a ulecherechur er ngii, me a rekuk bebil a uluuketui er ngii.

Me sera lemeteketek a arhe, e a Noah a ulsiseb a betok el charm er a chelsel.