A Ungil Chais Ngmera el Mla er a Dios?

1. Ngbabilengel techang a Biblia?

Ngar er a Biblia, e kede metik er a ungil chais el kmo a rechad a mo kiei er tia el chutem el mo cherechar. (Psalm 37:29) Ngngar er ngii a 66 el mekekerei el babier el ngar er a chelsel, e a Dios a uluusbech er a rebekord el 40 el blak a rengrir el chad el mo meluches aika el babier. Aike el kot el eim el babier a lulluches a Moses er a bekord el 3,500 el rak er a mla me mong. E sel ulebongel el babier a lulluches er ngii a apostol el Johanes er a kuk betok er a 1,900 el rak er a mla me mong. Me nguldesuel techang a lulluches er ngii tirka el chad? A Dios a milengedecheduch er tir el okiu a chedaol klisichel. (2 Samuel 23:2) Me te milluches a uldesuel a Dios el dimlak el di luldesuir. Me a leuaisei, e a Biblia a babilengel a Jehovah.​—Monguiu er a 2 Timothy 3:16; Rellir 3:21.

2. Ngmekerang e mo ulterekokl a rengud el kmo a Biblia a klemerang?

Kede medengei el kmo a Biblia a mla er a Dios el mei e le ngmelemalt a ulochel el kirel a ngar medad el klebesei. Ngdiak a ngii di el chad el sebechel el meruul er tiang. (Josua 23:14) Ngdi ta el Dios el Olab a Bek el Klisiich a sebechel el mo medengei aike el mo duubech er a ngar medad el taem.​—Monguiu er a Isaia 42:9; 46:10.

A lsekum a Biblia a babier el mla er a Dios el mei, e ngkirel el kmal ileakl el babier. Me nguaisei, a betok el biliol el Biblia a mla meluches e motobed el ngar er a betok el dart el omelekoi. Me alta Biblia a babier er a ngar er a mong, engdi sel losaod el kirel a blebelel a Dios el ua beluulechad, e ngmelemalt a omesodel. Me a lmuut el tang, tirke el 40 el chad el milluches er ngii a dirrek el dimlak el ketouch aike el tekoi el lulluches.a A omesodel a Biblia el kirel a bltikerreng a ulterekokl el mla er a Dios el mei e le ngii a Dios er a bltikerreng, me a Biblia a ngar er ngii a klisichel el melodech a klengar er a rechad el mo ungil. Aika el tekoi a uchul me a rebetok el miliol el chad a oumerang el kmo a Biblia a Tekingel a Dios.​—Monguiu er a 1 Thesalonika 2:13.

3. A Biblia ngmesaod a ngerang?

A Biblia a mesaod er a ungil chais el kmo a Dios a ngar er ngii a kmal ungil el moktek er ngii el kirel a klechad. Ngmeketeklii sel uchul me a rechad a mlo diak el sebechir el kiei er a paradis el chutem, me sel rolel e ngsebechel a paradis el lmuut el mo er ngii.​—Monguiu er a Ocholt 21:4, 5.

A Tekingel a Dios a dirrek el ngar er ngii a llach, omellach, me a ulekrael er a chelsel. Ngdirrek el ouchais er kid el kirel aike el lurruul a Dios el mo er a rechad. Me ngoeak aikang, e ngsebeched el mo medengei a blekerdelel a Dios. Me a leuaisei, e a Biblia a sebechel el ngosukau el mo medengelii a Dios me sel rolel e ngsebechem el mo sechelil.​—Monguiu er a Psalm 19:7, 11; Jakobus 2:23; 4:8.

4. Ke mekerang e mo ungil el medengelii a Biblia?

Tia el babier a ngosukau el mo medengelii a Biblia el oeak sel rolel a lolisechakl a Jesus. Nguluusbech a kakerous el bades er a Biblia e milsaod a belkul aika el “tekoi el ngar a Chedaol Llechukl.”​—Monguiu er a Lukas 24:27, 45.

A ungil chais el mla er a Dios a kuk klou a ultutelel er a bebil er a tekoi. Engdi a rebebil er a rechad a diak el semeriar er ngii, me a rekuk bebil a chetirir. Me nguaisei, engdi lak meterob el mesuub e le omeltkem el kirel a diak a ulebengelel el klengar a ultuil er sel bo modengelii a Dios.​—Monguiu er a Johanes 17:3.