Mcherrengelii a Omesiungem
1. Ngera el ungil el kerebai a lebilecherei a apostol el Paulus el kirel a omesiou?
1 “Moruul a ikel rokui el ngerchelem.” (2 Ti. 4:5) A apostol el Paulus a mle sebechel el ungil a ukltkel e mengelechel er a Timothy, e le ngar er a delongelel a rak er a 47 me a 56 er a uriul er a Kristus e ngmle sebechel el churrungel a edei el omerollel er a klemissionari. A babier er a Rellir a dirrek el blechoel el mesaod el kmo a Paulus a mle churrengelii a omesiungel. (Rel. 23:11; 28:23) Kede mekerang e meruul er tia er chelechang?
2. Ngmekerang e sebeched el churrengelii a omesiunged sel doldingel a obliil?
2 Oldingel a Obliil: Sel dolasem el mengedecheduch er a rechad el dirkak lerengesii a ungil chais, e ngkired el mo oldingel er tir er a kuk ta er a taem. Ngike el bdelul a delengchokl a locha ngar er a blai sel leklebesei me a lechub e ng Sebadong me a Sandei. Me a leuaisei e ngkired el melasem el mengedecheduch er a rechad el ngar er a bek el blai, e mo blechoel el mo er aike el blai el dimlak a rechad er ngii. Engdi ngkuk mekerang a lsekum ngdi diak el sebechem el mengedecheduch er a rechad? Nglocha ungil a lsekum e ke meluches a babier me a lechub e ke oudengua el mo er tir.
3. Ngera el techall a ngar er ngii el sebechem el omerk er a klumech er a ngii di el taem me sel omngar er a buai?
3 Ngar er a Buai me a Ngii Di el Taem: A remesiungel a Jehovah er chelechang a omerk er a mera el “llomeserreng” el mo er tirke el rokui el kongei el orrenges. A lebebil er a taem e te meruul er tiang “el ngar a chades ma blil a makit.” (Osi. 1:20, 21) Me sel doruul a tekoi er a bek el sils, e kede kerekikl el ousbech a techall el mo omerk er a klumech el mo er a rechad? Kid ngsebeched el melekoi el kmo kede ‘ousbech a rokui el temed el olisechakl a Ebangkelio’? (Rel. 18:5) A doruul el uaisei, e kede oltaut er sel ngerecheled el mo churrengelii a omesiunged.—Rel. 10:42; 17:17; 20:20, 21, 24.
4. Ngmekerang a nglunguuch me a omelebedebek e ngosukid el mo churrengelii a omesiunged?
4 A lebebil er a taem e ngmo meringel er kid a omerk er a klumech e le ngchelitechetud a uchul me a lechub e kede sekemerur. Engdi a Jehovah a ungil el medengei aike el diak el sebeched el meruul. (Psa. 103:14) Me a lsekum e kede mo chelebangel a chouaisei el tekoi, e ngsebeched el meluluuch el mo er ngii el olengit a blekeu. (Rel. 4:29, 31) Sel dosuub el di kid el tang e dolebedebek a Tekingel a Dios, e ngsebeched el mo melatk er a klungel a ultutelel a ungil chais. (Fil. 3:8) Tiang a mo uchul e kede mo blak a rengud el omerk er a ungil chais!
5. Ngmekerang e sebeched el mo teloi er a otutel a ulochel a Joel?
5 A Joel a ulemlaoch el kmo a uchei er a lemei sel klou e kdekudel el sils er a Jehovah, e a rechedal a Dios a “diak bo le meterob” el omerk er a klumech. (Joel 2:2, 7-9) Me bo doruul aike el rokui el sebeched el kirel tia el diak el lluut el mo er ngii el ureor er a berkel a klumech!