OMESODEL A SUOBEL ER A MEDAL TIA EL BABIER | A KLENGAR ER A URIUL ER A KODALL​—TIANG NGSEBECHEL EL TEKOI?

Ngar er Ngii a Omeltkir a Rulekoad?

Ngsebechir a rulekoad el lmuut el mo mekiis?

A NGER ER A BIBLIA: “A belsechel a mei el tirkel rokui el mla mad a mo rongesii a ngerel [a Jesus] me te mo tuobed er a debellir.”​—Johanes 5:28, 29.

A Jesus a ulemlaoch el kmo ngar er a cheungel a Rengedel e a rebetok el chad a mo mekiis er a kodall. A Fernando el dulsaod er ngii er a uchei a kmo: “Ngkmal mlo mechas a renguk er sera kchiuii a bades er a Johanes 5:28, 29. Ngrirellak el mo er ngii a omeltkek el kirel a ngar medad el klebesei.”

A irechar e a blak a rengul el Job a uluumerang el kmo a uriul er a lemad e a Dios a lmuut el mo okisii. Nguleker el kmo: “A lsekum ng mad a chad, e ng sebechel lmuut el mo chad?” E di mle ngii el onger el kmo: “Cho bo momekedong, e ak mo onger er kau.”​—Job 14:14, 15.

A tekoi er a okiis a dimlak el beches el tekoi er a uldesuel a ochedal a Lasarus el Martha. A uriul er a lemad a Lasarus e a Jesus a dilu er ngii el kmo: “A ochedam a lmuut el mo chad.” Me a Martha a dilu el kmo: “Ak medengei el kmo ng lmuut el mo chad er sel ulebongel sils.” Me a Jesus a dilu el kmo: “Ngak a okiis er a kodall e klengar. Ngikel oumera er ngak a le mad, e ng dirrek el di ngar.” (Johanes 11:23-25) Me ngdi mle mereched a Jesus el okisii a Lasarus er a kodall! Me tia el mengasireng el tekoi a olechotel a meklou el tekoi el mo duubech er a ngar medad el taem. Ka di molatk er sel taem el bo lebekiis er a kodall a rebetok el chad!

Te ngar er ngii a remo mekiis el mo er a eanged?

A NGER ER A BIBLIA: A Tekingel a Dios a meketeklii el kmo a okisel a Jesus a kuk ngodech er aike el eai el okiis el dulsaod er a uchei. Tirke el teai a liluut el mekiis el me chad el ngar er tia el chutem. Engdi kede menguiu el kirel a okisel a Jesus el kmo: “A Jesus Kristus . . . a mla mor a eanged e ngar a kadekmel a Dios.” (1 Petrus 3:21, 22) Me a Jesus ngdi ngii el tang a mo er a eanged? Ngdilu er a rechapostol er ngii el kmo: “A uriul er a kkedmeklii sel cho bor ngii, e ak lmuut el me ngoikemiu el mo obengkek, me kom mo obengkek er sel kngar ngii.”​—Johanes 14:3.

A Kristus a mlo er a eanged e mengetmokl el kirir a rebebil el disaiplo er ngii. Me tirke el mo mekiis el mo er a eanged a mo 144,000 a ildisir. (Ocholt 14:1, 3) Me tirkang te mo mekerang?

Te kmal mo mechesang! A Bades a kmo: “Ng dmeu a rengrir e kmal ngeltengat tirkel ngar a belsachel er sel kot el okiis er a re mla mad. Sel ongerul kodall a diak a klisichel er tir; te mo prist er a Dios ma Kristus, e mo mengedereder el obengkel el 1,000 el rak.” (Ocholt 20:6) Me tirke el mekiis el mo er a eanged a mo mengedereder er a chutem el king e prist el obengkel a Kristus.

Te rua techang a mo mekiis er a uriul?

A NGER ER A BIBLIA: A Biblia a llechukl er ngii a tekingel a apostol el Paulus el kmo: “Ak di ua itir el oumerang er a Dios el kmo a rokuil chad, el ungil ma re mekngit, a mo mekiis er a kodall.”​—Rellir 24:15.

Me te rua techang a uldimukl er tirke el “ungil” el chad el lulsaod er tir a Paulus? Sera lechudelang a Daniel e a anghel a dilu er ngii el kmo: “Ke mo mad, e ngdi ke mo mekiis el mo melai omeksullem er sel ulebongel taem.” (Daniel 12:13) Me a Daniel ngmo mekiis er ker? “A re melemalt a mo ungilbesrir el kiei er a chelsel a beluu e mo oubeluu er ngii el di blechoel.” (Psalm 37:29) E a Jesus a ulemlaoch el kmo: “Te ngeltengat ar medemedemek, le te mo oudiukes ra belulechad.” (Mateus 5:5, BT) Me a Daniel me a relmuut el bebil el mle blak a rengrir el sechal me a redil a mo mekiis e lmuut el mo kiei er tia el chutem el diak a ulebengelel.

Te rua techa tirke el uldimukl er a “re mekngit”? Ngtirke el betok el biliol el chad el kiliei e mla mad e dimlak a techellir el mo medengei a klemerang er a Biblia e bo loltirakl. Me a uriul er a okiis e ngmo er ngii a techellir el mo medengelii a Jehovaha me a Jesus e mo oba omereng el saul el bedul tir. (Johanes 17:3) Me tirke el rokui el ngiltii el mo mesiou er a Dios a mo oba omelatk el mo kiei el mo cherechar.

Ngmo ua ngera klengar er tia el chutem?

A NGER ER A BIBLIA: A Dios a “mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel.” (Ocholt 21:4) “A re chad a mo toketek a blai e mo kiei er ngii; . . . Te mo dualem a sers er a bilong, e mo dmeu a rengrir er a bilong.”​—Isaia 65:21, 22.

Ka di molatk er tia el taem el mocha sebechem el kiei el teloi er a rebetik er a rengum el mekisang er a kodall! Engdi a ker a kmo, ke mekerang e medengei el kmo ngmera el mo er ngii a okiis er a rulekoad?

[Footnote]

[Blurb el ngar er a 6 el llel]

Tirke el rokui el ngiltii el mo mesiou er a Dios a mo oba omelatk el mo kiei el mo cherechar el mesisiich a bedengir