Reference el kirel a Subeled er a Miting er a Klengar me a Omesiunged
May 1-7
MEKREOS EL TEKOI EL NGAR ER A BIBLIA | JEREMIA 32-34
“A Olangch el Kmo a Israel a Lmuut el Mo Meteketek”
it-1-E 105 par. 2
Anathoth
A Jeremia a mle chad er a Anathoth engdi ngmlo profet el mlotuub er a rechedal el tir a millekoi a kodellel e le ngii el uluuchais a klemerang el klemechel a Jehovah. (Jer 1:1; 11:21-23; 29:27) Me a Jehovah a ulemlaoch el kirel a telemall el mo duubech el mo er tia el mats, e tia sel taem el Babilon a mlo mesisiich er a Jerusalem. (Jer 11:21-23) Uchei er a telemellel a Jerusalem e a Jeremia a milecherar a sersel a ta er ngii el ngar er a Anathoth, e tia mle olangch el kmo a beluu a lmuut el mo meteketek. (Jer 32:7-9) A rebebil er tirke el mle kot el obengkel a Serubabel el lmuut el mo er a Jerusalem a mle 128 el chad er a Anathoth. Me a Anathoth a dirrek el mle ta er aike el beluu el rechad a liluut el mo kiei. Me nguaisei, a ulochel a Jeremia a tilaut.—Esr 2:23; Neh 7:27; 11:32.
Omesodel a Babier er a Jeremia
32:10-15—Ngerang a mle moktek er aike el teblo el llechukl el telbiil? Sel belkais el llechukl el telbiil a mle olechotel a telbiil el mileketmokl. E sel mle llechotel el telbiil a mle medechel el mo olterekokl er a kot el llechukl el telbiil el kmo ngmelemalt, a lsekum e ngmo usbechall. Me a Jeremia a milecherei a ungil el kerebai el kired, el mo okiu a tekoi er a llach e meruul a telbiil el obengterir a rechedad me a rekldemed er klaumerang.
jr-E 152 par. 22-23
“Sei a Rolel Cho Modengelii a Rubak”
22 A lsekum a chad a dulii me a lechub e ngrullii a tekoi el dimlak er a rengul e tomellii a rengum, e kau ke mo oukerebai er a Jehovah? A Jehovah a millekoi el kirir a Rechijudea el kmo ngmo ‘mengikiid’ er tirke el bo lousubes er tir. (Monguiu er a Jeremia 33:8.) Ngsebechel el mengikiid el belkul a kmo, ngmo chemoit aike el rokui el kngterir tirke el obult me ngmo sebecherir el omuchel er a beches el omesiungir el mo er a Jehovah. Me nguaisei, a lsekum a Jehovah a ousubes a kngtid e ngdiak el belkul a kmo a chad a mla mekikiid er a kngtil me ngmla mo cherrungel, engdi ngar er ngii a sebeched el suubii er tia el tekoi. Ngsebeched el mo er a tkurrebab el klisiched el ngmai a telemellir a rechad el me er kid el chemoit el ngii a mo uai a lemekikiid a osenged er a chad. Ngoeak a ngera el rolel?
23 Ka molebedebek okmo e ke ngiluu a sengk el kmal mekreos el bekai me a lechub e ngklalo el meketeketa el ngar er a telungalek er kau. A bo el cheisech me a lechub e ngdechudech e ke mo nguu el choitii? Ngkmal diak, ke locha kmal mekekokau e mo er sel tkurrebab el klisichem el mo melai er sel dechudech me a lechub e ngcheisech er ngii. Ngsoam a lebo er sel kmal klebekelel. Me ngdi osisiu, moureor el mo er sel tkurrebab el klisichem el mo mengoit aike el mekngit el ngar er a uldesuem me a rengum el kirel a odam me a lechub e ngodos el mla tomellii a rengum me a lechub e ngseselk a rengum er ngii. Molasem el mo diak molatk aike el mekngit el tekingir me a lechub e ngomerellir. E sel moruul el uaisei, e ke mo kikidii a uldesuem er aike el mekngit el kirel e omekbeches er a osengem el kirel ngika el bla mousubes er ngii. Me sel lemekikiid a rengum er a mekngit el uldasu el kirel, e ngmocha sebechel el lmuut el mo er ngii a kmes el deleongel er kemiu el ua ngar er a mong.
Morriter er a Tekingel a Dios
jr-E 173 par. 10
Ngsebechem el Ngmai a Klungiolem er a Beches el Telbiil
10 A Jeremia a ulemlaoch el kirel ngike el merael el mei el Mesias el kmo ngmo ngar er a ‘uldidellel a rasech’ er a David. Ngar er sel taem el Jeremia a milsiou el profet e a kleking er a klengelakel er a David a mlekimd. Me nguaisei, ngdi ua teluk el kerrekar el sebechel lmuut el mo meloseb me ngdi osisiu a klengelakel er a David a lmuut el mo nguu a kleking. Me a omerollel a taem e a Jesus a milechell er a klengelakel er a King el David. Me ngsebechel el okedongall el “A Rubak Osebeled” el olechotel a klungel a ultutelel tia el tekoi er a osengel a Jehovah. (Monguiu er a Jeremia 23:5, 6.) A Jehovah a milecherei a Ngelekel me ngmo chuarm e mad. Me ngoeak a olubet el tenget el mla er a ‘uldidelel a rasech’ er a David e a Jehovah a sebechel ousubes a kngtid. (Jer. 33:15) Tia milekengii a rael me bo el sebechel a rebebil el mo nguu a “klengar” e mo mucheluch er a chedaol reng el mo chedal a beches el telbiil. A lmuut el olechotel el kmo a Jehovah a melemalt el Dios, a kmo tirke el diak el chedal tia el telbiil a dirrek el sebechir el mo ngmai a klungiolir er a beches el telbiil.—Rom 5:18.
Omesodel a Babier er a Jeremia
33:23, 24—Ngera aike el “erul telungalek” el losaod er ngii aika el bades? A tang a telungalek el okiu a uldidelel a rsechel a King el David, me sel chimong a telungalek er a reprist el mla er a klengelakel er a Aron. Me a Jerusalem me a templo el miltemall a kora rengud a Jehovah a ultngakl aika el eru el telungalek e mo diak a rengedel me a omengull er ngii el ngar er tia el chutem.
May 8-14
MEKREOS EL TEKOI EL NGAR ER A BIBLIA | JEREMIA 35-38
“A Ebedmelek a Ungil Kerebai el Kirel a Blekeu me a Blekokuii”
it-2-E 1228 par. 3
Sedekia
A olechotel a kmo a Sedekia a mle bederengatech el mengedereder a sebeched el mesa er sel taem el remengeteklel a beluu a mle sorir el mo omekoad er a Jeremia e le te uleltelechakl er ngii el kmo milengitechut er a rechad er a taem el recheraro a mle iliuekl er a beluu. A Sedekia a millekoi el kmo: “Mada ng di ungil, bor a ikel somiu er ngii; ng diak el sebechek el merrob er kemiu.” Me nguaisei, a uriul e a Sedekia a kilengei er a Ebedmelek me ngmo osebelii a Jeremia e dilu er ngii me lengititerir a 30 el chad el mo olengeseu er ngii. E a uriul er isei, e a Sedekia a mle berrotel el mengedecheduch er a Jeremia. Ngmilengelechel er a Jeremia el kmo ngdiak bo lomekoad er ngii me a lechub e lebecherei me lebo er a chimorir tirke el sorir lomekoad er ngii. Engdi a Sedekia a mle medakt er a Rechijudea el ulebengterir a rechad er a Babilon. Sei a uchul e ngdimlak lorrenges a tekingel a Jeremia el mo mesiou er a rechad er a Babilon. Ngdirrek el sebeched el mesa dektel er a ledu er a Jeremia me lak louchais er a remengeteklel a beluu el kirel aike el tekoi el lulsaod.—Jer 38:1-28.
w12-E 5/1 31 par. 2-3
Ngike el Omesterir a Omeksullir Tirke el Mesiou er Ngii
Ngmle techa el chad a Ebedmelek? Ngmle ngarbab el mesiou er a blil a King el Sedekia. Ngika kiliei er a osisiu el taem el Jehovah a ulderchii a profet el Jeremia el mo ouchais er a redimlak el blak a rengrir el chad er a Juda el kmo a beluu a mo metemall. Me alta ngmle iliuekl er a redimlak a klaumerang er tir el mengeteklel a beluu, engdi a Ebedmelek a milluu er a Dios e ulecholt a omengull el mo er a Jeremia. Me nguaisei, engdi a Ebedmelek a mleasem er a taem el tirka el mekngit el mengeteklel a beluu er a loltelechakl er a Jeremia el kmo ngulemtok er a king me a rechad er a beluu e lenguu el choitii er a chido el mui er a dengitech, e lemedechel el mo mad. (Jeremia 38:4-6) Ngerang mo meruul er ngii a Ebedmelek?
A Ebedmelek a ullecholt er a blekeu e di mle mereched el mo olengeseu er a Jeremia, alta e nglocha mle medakt er a uldesuir a remengeteklel a beluu. Ngmlo er a Sedekia e uluuchais el kirel a mekngit el blekeradel el dilubech el mo er a Jeremia. E locha millutk er tirke el rirellii tia el tekoi el mo er a Jeremia er a lolekoi el kmo: “Tial bla le bor ngii tirkal chad a mekngit.” (Jeremia 38:9) Me a Sedekia a dilu er ngii me lengititerir a 30 el chad el mo olengeseu er ngii el mo olsobel er a Jeremia.
w12-E 5/1 31 par. 4
Ngike el Omesterir a Omeksullir Tirke el Mesiou er Ngii
A Ebedmelek a dirrek el ullecholt er a blekokeuii. Ngngilai “a bebil er a mla mo mechut el mamed e ullimoim el ngar a ekil el mor iou el mor a Jeremia er a chido.” E ngera uchul? Me bo el sebechel a Jeremia el locha er a cheungel a chebesal me lak el bo el meringel er a ekil sel longurs er ngii el me tuobed er a chido.—Jeremia 38:11-13.
Morriter er a Tekingel a Dios
it-2-E 759
Rekabait
A Jehovah a kmal mle dmeu a rengul er a blekongesenges er tir el ngii a ulecholt er a omengull el lulebang. A blekerdelir el ulecholt er a blekongesenges el mo er a Demerir a kmal mle ngodech er a Rechijudea el dimlak el lolengesenges er a Ulemeob er tir. (Jer 35:12-16) A Jehovah a tilbir el mo er tir el kmo: “A Jonadab el ngelekel a Rekab a diak bo le ngemed a re sechal er ngii el mo mesiou er ngak.”—Jer 35:19.
w98-E 1/15 18 par. 16-17
Molemolem el Merael el Obengkel a Dios
16 A Jehovah a kmal betik a rengul er kid me ngouchais er a budech el mo er ngii el ngar cheungel a omengederederel a Mesias. (Psalm 72:1-4, 16; Isaia 25:7, 8) Ngdirrek el ngosukid el mo outekangel a orrimel el dechelebangel loeak a ulekrael el kirel aike el meklou a ultutelel el tekoi er a klengar. (Mateus 4:4; 6:25-34) Ngmelisiich er kid el loeak aike el lurruul el mo er a remesiungel er a irechar. (Jeremia 37:21; Jakobus 5:11) Me sel dodengei el kmo alta kede mo chelebangel a ringel me a chelebuul engdi a bltikerreng er a Jehovah el mo er a reblak a rengrir el mesiungel a diak el mengodech, e ngkmal melisiich er kid. (Rom 8:35-39) A Jehovah a melekoi el mo er tirke el otuil a klaumerang er tir er ngii el kmo: “Ng kmal diak bo kchitau ma ka bo kubes er kau.”—Hebru 13:5.
17 Aika el tekoi a melisiich er a remera el Kristiano el mo melemolem el merael el obengkel a Dios e diak lobult el mo er a tekoi er tia el beluulechad. A rebetok el mechebuul el chad a omdasu el kmo, a lsekum e ke melai a kmung ngerang er a chad el betok a ngera er ngii me bo el sebechem el omeka er a telungalek er kau, e tia diak el omerechorech. Nguaisei, engdi tirke el merael el obengkel a Dios a diak loba tia el uldasu. A kengei er a Dios a kot el klou a ultutelel er tir. Te omes el bedul Ngii el kirel a omeksulir e le tir el meruul a llemalt. (Osisechakl 30:8, 9; 1 Korinth 10:13; Hebru 13:18) A ta er a melakl el dil er a beluu er a India a milsa el kmo, ngkmal ngosuir a bo leblak a rengul el oureor e bo lungil ousbech aike el ngar ngii er ngii. Ngdimlak bo el kesib a rengul el kirel a tekoi er a chelsel a klengar er ngii, ngbai miltebengii el kmo a lsekum e ngnguu a renged me a llemeltel el mo kot er a klengar er ngii, e a Jehovah a mo omekngeltengat er ngii e mo msang aike lousbech ngii me a ngelekel. (Mateus 6:33, 34) Te betok el telael el chad el meliuekl er a beluulechad a meruul el uaisei, alta e te chelebangel a ringel me a chelebuul e le Jehovah a klisichir e omertelir. (Psalm 91:2) Kau ke dirrek el meruul el uaisei?
w95-E 8/1 5 par. 5-6
Ngar er Ngii a Ungil Klengar er a Ngar Medad
Sel taem el Babilon a mlo iliuekl er a Jerusalem, e a “blauang el bo longang ma ralm el bo lolim a mo delbedabel.” (Esekiel 4:16) A beluu a kmal mlo chebuul me a rebebil er a redil a milenga techel a bedengir a rengelekir. (Klengiterreng 2:20) Me alta Jeremia a mle kelebus el kirel a klumech el lulemerk er ngii, engdi a Jehovah a ulemekerreu er ngii me ngmla er ngii a kelel el “blauang er a bek el sils el mlar a blil omelul el blauang el mo lmuut er a bo lak a blauang er a beluu.”—Jeremia 37:21.
Me a Jehovah ngulebes er a Jeremia er sel taem er a bo lak a blauang er a beluu? Ngdiak e le sel taem el beluu a mlo er a chimorir a rechad er a Babilon, e te milsa Jeremia a “sesel kall, ma sengk, e mecherei me ng merael.”—Jeremia 40:5, 6; dirrek el momes er a Psalm 37:25.
May 15-21
MEKREOS EL TEKOI EL NGAR ER A BIBLIA | JEREMIA 39-43
“A Jehovah a Mesterir a Rebek el Chad a Medal a Omerellir”
it-2-E 1228 par. 4
Sedekia
Rebetel a Jerusalem. Sera 607 B.C.E. er a “etiu el kebesengil a ongeua er a buil er a ongetruich ma ta er a rak er a Sedekia, e a cheuotelel a beluu a miltemall.” Sel kesus e a Sedekia me a resoldau er ngii a chiliis. Engdi te ulebdechem er a oberberk el ked er a Jeriko. Me te ngiluu a Sedekia el mo er a Nebukadnesar el ngar er a Ribla. A rengelekel el sechal a lebilekodeterir er a medal. Me a rengelekel a kmal mle mekekerei e le Sedekia a mle 32 a rekil er seikid el taem. E a uriul er a lokodeterir a rengelekel e a Sedekia a ulebechit a medal, e melechet er a bombatel, e mlengai el mo er a Babilon, e mlekelebus el mo er a kodellel.—2Ki 25:2-7; Jer 39:2-7; 44:30; 52:6-11; momekesiu er a Jer 24:8-10; Ese 12:11-16; 21:25-27.
w12-E 5/1 31 par. 5
Ngike el Omesterir a Omeksullir Tirke el Mesiou er Ngii
A Jehovah a miles a tekoi el leriruul a Ebedmelek. Me nguleba omereng el saul el kirel? Ngoeak a Jeremia e a Jehovah a uluuchais er a Ebedmelek el kmo a telemellel a Juda a kmedang. A Jehovah a milsa Ebedmelek a tekoi el lomekedo er ngii a ta el chellimosk el kmo, “eim el chachisois el olechotel a oterekeklel a osobel.” A Jehovah a dilu er ngii el kmo: “Ngak el Rubak a mo omecheliu er kau . . . Ng diak bor a chimorir a re chad . . . Ak ulterekokl el mo osebelau . . . Ke mo mochib er a mekemad . . . Ng diak ke mad.” Ngera uchul me a Jehovah a tilbir el mo omekerreu er a Ebedmelek? A Jehovah a dilu er ngii el kmo: “Ele kuluumerang er ngak.” (Jeremia 39:16-18) A Jehovah a mle medengei el kmo a Ebedmelek a dimlak di loruul aika el tekoi e le ngii el mle suebek a rengul er a Jeremia. Tia dirrek el mle ochotel a kmo a Ebedmelek a mle mui el oumerang e ultuil er a Dios.
it-2-E 482
Nebusaradan
Ngoeak a tekingel a Nebukadnesar e a Nebusaradan a ultebedii a Jeremia er a kelebus e mle ungil mengedecheduch er ngii e milecherei me di lengii el melilt a bo loruul. Ngdirrek el dilu el kmo ngmo omekerreu er ngii. A King a dirrek el dilu er a Nebusaradan me ltetkii a Gedalia el mo kabernor er a beluu. (2Ki 25:22; Jer 39:11-14; 40:1-7; 41:10) Bekord el eim el rak er a uriul er a rak er a 602 B.C.E., e a Nebusaradan a ngiltiterir tirke el Rechijudea el chiliis el mo er aike el bebil er a mats el mo blebaol er a Babilon.
Morriter er a Tekingel a Dios
Kau Ke Oker El Kmo, “Ngngar Er Ker A Jehovah?”
10 Uriul er a Jerusalem er a lemetemall me a resoldau er a Babilon bla lorael el lobetiterir a rechad er a Juda el mo blebaol, e a Johanan a mle kltmokl el melai er tirke el mlo medechel el sesei el chad er a Juda el mo er a Ekipten. Te mla meketmokl, engdi uchei er a letobed el merael e te ullengit er a Jeremia me loluluuch el kirir e losiik a ulekrael er a Jehovah. Engdi sera lak lengai a sorir el nger el kirel a ulekrael e te mlo oltirakl er a telbilir el lekltmokl el kirel. (Jeremia 41:16–43:7) Kau ngsebechem el mesang er a chelsel aika el dilubech el tekoi, a suobel el ngii a sebechel el mo uchul a klungiolem me sel bo mosiik er a Jehovah e ngsebechel el mechikau me ke metik er ngii?
it-1-E 463 par. 4
Blechebechel a Tekoi el Dilubech
A Jerusalem a mlo mechitechut er a Babilon er a 9 el rak er a omengederederel a Sedekia (609 B.C.E.) e miltemall er a 11 el rak er a omengederederel (607 B.C.E.). (2Ki 25:1-8) Ngar er a ongeim el buil er tia el rak (buil er a Ab, el ngii a mle ngar er a July el mo August) e a mats a lesilsebii, e toruud a cheotelel, e a rebetok el chad a mlengai el mo blebaol. Engdi a “re bebil er a kot el mechebuul el chad” a dirk mle kiei er a Jerusalem. Engdi sel taem er a lokodir a Gedalia e te chiliis el mo er a Ekipten me a Juda a mlo cheloit. (2Ki 25:9-12, 22-26) E tia mle ongeuid el buil el Ethamin (me a lechub e ng Tishri, e tia mle ngar er a September el mo October). Me a leuaisei, a ulaoch el kirel a Jerusalem el di mo cheloit el 70 el rak a ulemuchel er a October 1, 607 B.C.E. e mlo merek er a 537 B.C.E. Ngar er a ongeuid el buil er tia el rak e ngmla er ngii a Rechijudea el mloluut el mo er a Juda el ngii a mle 70 el rak er uriul er a telemellel a beluu.—2Kr 36:21-23; Esr 3:1.
May 22-28
MEKREOS EL TEKOI EL NGAR ER A BIBLIA | JEREMIA 44-48
“Lak Mosiik ‘a Ngarbab el Tekoi el Di Ekor Kau’”
jr-E 104-105 par. 4-6
Lak ‘Mosiik a Ngarbab el Tekoi el Di Ekor Kau’
4 A ta er a tekoi el kmal mle mengesang er a uldesuel a Baruk a kmo, ngmle soal a chetengakl. Me alta Baruk a mle oureor el melechesel a Jeremia, engdi ngar er a Jeremia 36:32, NW e ngmesaod el kirel a Baruk el kmo ngmle “chad er omeluches.” A omesuub el kirel a tekoi er a irechar a melekoi el kmo nglocha kmal mle ngarbab a deruchellel. Tia el osisiu el deruchall a dirrek el medung el kirel a Elisama, el ngii a mle ta er a mengeteklel a beluu er a Juda. Tia ochotii el kmo a Baruk a dirrek el mle sebechel el mo er a “blirir a remilluches” el ngar er a “blil a king” el mle ta er a kldemel a Elisama. (Jer. 36:11, 12, 14, NW) Me a Baruk a kmal mle ngarbab el ofiser er a blil a king. A Seraia el ta er a ngelekel a demal er a Neria, a mle bderrir a remesiou er a blil a king e dirrek el ulebengkel a king el mo er a Babilon e le ngmla er ngii a klou a ultutelel el tekoi el kirel a king el meruul er ngii. (Monguiu er a Jeremia 51:59.) Me a Seraia el mle bderrir a remesiou a ulterekokl el uluungerachel aike el tekoi el lousbech a king er aike el temel a omerollel, e tia kmal mle ngarbab el deruchall.
5 Ngsebeched el mtebengii el kmo a chad el ngii a smau a ngarbab el deruchall a sebechel el mo seselk a rengul el di meluches a ulaoch el kirel a telemellel a Juda. Me nguaisei, tia locha dirrek el sebechel el mo uchul a telemellel a deruchellel a Baruk. Ka di molebedebek a tekoi el mo duubech a lsekum a Jehovah a mo tomall aike el tileketek el di ua donguiu er a Jeremia 45:4. Aike el “ngarbab el tekoi” el lulsiik a Baruk el ua chetengakl me a lechub e ngkerruul, a locha di mo diak a ultutelel. A Baruk a lsekum e ngulsiik a ngarbab el deruchall er a chelsel a taem er a kmedu el telemellel a Jerusalem, e tia kmal mle ungil uleklatk el bilsang a Jehovah.
6 Me nguaisei, aike el “ngarbab el tekoi” el lulsiik a Baruk a locha dirrek el mle uldimukl er a kerruul. Aike el beluu el mle iliuekl er a Juda a kmal uleltuil er a iltetir me a kloklir. A Moab a mle ulsirs er a ‘klisichel me a iltetel.’ Me a Amon me ngdirrek el mle uaisei. Ngoeak a Jeremia e a Jehovah a milsaod el kirel a Babilon el kmo, “Ng beluu el betok a omochelel ma mekreos el kloklel.” (Jer. 48:1, 7; 49:1, 4; 51:1, 13) Me nguaisei, a Jehovah a millebeakl aika el beluu.
jr-E 103 par. 2
Lak ‘Mosiik a Ngarbab el Tekoi el Di Ekor Kau’
2 A Baruk a dilu el kmo: “Ak chebuul, ele Rubak a mla odekiar a klengiterreng er a ringelek. Ak chorma er a lengelel a renguk.” Ke locha mla ta el bo momdasu el ua Baruk, el millekoi aika el tekoi me a lechub e ke millatk. Me nguaisei, a Jehovah a rirengesii a Baruk. A Jehovah el ngii a merriter a rengud a rechad, a mle medengelii a uchul me a Baruk a mlo uaisei a uldesuel, me nguluusbech er a Jeremia el mo omeklemalt er a uldesuel. (Monguiu er a Jeremia 45:1-5.) Ke locha melatk el kmo ngera uchul me a Baruk a mlo mesaul a rengul. Ngmlo mesaul a rengul er a ngerechelel me a lechub a blekeradel el lebla er a chelsel? Ngdiak tia ulemuchel er a chelsel a rengul, e le ngii el mlo ‘osiik a ngarbab el tekoi.’ Aika ngngera el tekoi? Ngera mle sebechel el mo ulterekokl a rengul er ngii a lsekum e ngmo kongei a ulekrael me a omesmechokl el mla er a Jehovah? E ngera sebeched el suubii er a tekoi el dilubech el mo ngii?
Mosiik er a Renged el Kot el Diak el Klalo
6 Ka molatk er a Baruk el mle melechesel a profet el Jeremia. Sera lomuchel el “osiik a ngarbab el tekoi” el di kirel, e a Jehovah a milengelechel er ngii el kmo, ngdi kmedu el mo melemall er a Jerusalem. Engdi ngtilbir el mo er a Baruk el kmo ngmo osebelii a klengar er ngii. (Jer. 45:1-5) A Baruk a mle kirel el diak lolatk a betok el tekoi. E le Jehovah a kmal diak bo lomekerreu a kloklir a rechad. (Jer. 20:5) Me chelechang e kede kiei er a ulebongel er tia el beluulechad er a Satan. Me ngkmal diak el taem el dongudel a betok el klokled. Ngdirrek el diak el kired el omdasu el kmo a uriul er a kloul ringel e ngdirk medechel aika el klokled, alta e ngkmal mekreos er a rengud.—Osi. 11:4; Mt. 24:21, 22; Lk. 12:15.
Morriter er a Tekingel a Dios
it-1-E 430
Kemos
A profet el Jeremia er a lomlaoch el kirel a Moab e ngdilu el kmo, a chedrir er a Kemos me a reprist er tir me a remengeteklel a beluu a mo blebaol. Me a rechad er a Moab a mo merur er a chedrir e le ngii el diak el sebechel el mo olsobel er tir el di ua rechad er aike el teruich el kebliil er a Israel el mlo merur er a Bethel, e le tir el mlo mengull er a bleob el kerbou.—Jer 48:7, 13, 46.
it-2-E 422 par. 2
Moab
Ngdiak a ultekengel a melemalt el otutel a ulaoch el kirel a Moab. Betok el rak er a uchei, e a rechad er a Moab a di ngilemed el rokui. (Jer 48:42) Chelecha el taem e aike el mats er a beluu er a Moab er a Nebo, me a Hesbon, me a Aroer, me a Bethkamul, me a Baalmeon a telemall el beluu. Me a bebil er aike el belurir a mla mo diak a chad el medengei.
May 29–June 4
MEKREOS EL TEKOI EL NGAR ER A BIBLIA | JEREMIA 49-50
“A Jehovah a Omekngeltengat er Tirke el Ngariou a Rengrir e Omals er a Remekedidai a Rengrir”
it-1-E 54
Cheraro
A rechedal a Jehovah sel bo lak lolengesenges e a Jehovah a mechititerir me te mo chederedall er a recherrouir. (Psa 89:42; Kle 1:5, 7, 10, 17; 2:17; 4:12) Engdi tirka el cheraro a ulemdasu el kmo ngdi mle klisichir a uchul e te mlo mesisiich e dirrek el uleldanges er a rechedrir. Te dirrek el ulemdasu el kmo ngdiak el bo lemukerrekeriil er a mekngit el omerellir el mo er a rechedal a Jehovah. (Dut 32:27; Jer 50:7) Me a Jehovah a mlo omals er tirka el cheraro el kirel a kldidiul a rengrir (Isa 1:24; 26:11; 59:18; Nah 1:2) e dirrek el mo mengedaol er a ngklel.—Isa 64:2; Ese 36:21-24.
jr-E 161 par. 15
“A Ikel Lulmekdakt er Kid er Ngii a Rubak a Bla Leruul”
15 A Jeremia a dirrek el ulemlaoch el kirel a rebetel a Babilon. A dart er rak er a uchei, e a Jeremia a ulemlaoch er a rebetel a Babilon el kmo ngdi mereched. Tia ngmekera e mo uaisei? Ngika el profet er a Dios a dilu a kmo, a omochelel el mle sebecheklel a beluu a mo “medidirt” me a resoldau er ngii a diak el bo loumekemad. (Jer. 50:38; 51:30) A komakai el omesodel tia el ulaoch a tilaut er sel taem el resoldau er a Media me a Persia a rellii a Omoachel Eufrates el mo meched me bo el sebechir el di diak a ngera el lodengei a rechad er a beluu e te merael el mo tmuu er a mats. Ke dirrek el locha melatk er a ulaoch el kmo a Babilon di mo cheloit el diak a chad el lmuut el mo kiei er ngii. (Jer. 50:39; 51:26) Chelecha el taem e tia el kmal mle mesisiich el beluu a dirk cheloit el ua lemildung er a ulaoch.
w98-E 4/1 20 par. 20
Babier el Mla er a Dios
20 A Isaia a dimlak el kiei el mo mesa otutel a telemellel a Babilon. Engdi uaike el meldung er a ulaoch, a Babilon a mlo “bliou el ulemeongel.” (Jeremia 51:37) A Jerome el mlechell er aike el rak er a 300 C.E. el ngii a milsuub el kirir a rechad er a Hebru a melekoi el kmo, ngar tiakid el taem e a beluu er a Babilon a basio el kiliei er ngii a “bek el bedengel a tebelik el charm” e tia dirk melemolem el uaisei el mei er chelechang. A teketekel a beluu er a Babilon el mo osongel a sebechel el mo olechau er a retourist engdi ngdiak a ‘rechedal’ me a ‘klungiolel’ a Babilon el medechel el ua mildung er a ulaoch.—Isaia 14:22.
Morriter er a Tekingel a Dios
it-1-E 94 par. 6
Re Amonait
A king er a Siria er a Tiglathpileser III a ngilititerir a rechad er aike el teruich el kebliil er a Israel el mo kelebus er a Asiria. (2Ki 15:29; 17:6) Nglocha uriul er tiang e a re Amonait a mlo kiei er a sel beluu el mle kloklel a kleblilel a Gad. E tia sel osisiu el beluu el re Amonait a uluumekemad er a Jeftha el kirel e mlo mechitechut. (Momekesiu er a Psa 83:4-8.) Me nguaisei, ngoeak a profet er ngii er a Jeremia e a Jehovah a ulemlaoch el kirel a telemellir a re Amonait me a chedrir er a Malkam e le tir el ngiluu a kloklel a kleblilel a Gad. (Jer 49:1-5) Engdi a re Amonait a dimlak lorrenges e bai a cheldebechel er a resoldau er tir a mlo omecheracheb er a Juda.—2Ki 24:2, 3.
jr-E 163 par. 18
“A Ikel Lulmekdakt er Kid er Ngii a Rubak a Bla Leruul”
18 Ngdirrek el ngar er ngii a ta er a ulaoch el tilaut er a rak er a 100 C.E. Ngoeak a Jeremia e a Dios a ulemlaoch el kmo a Edom a mo ta er aike el beluu el mo chebuul er sel taem el Babilon a mo oumekemad el melai a beluu. (Jer. 25:15-17, 21; 27:1-7) Me nguaisei, a ulaoch a millemolem el melekoi el kmo a Edom a mo ua Sodom me a Gomora. Tia belkul a kmo, ngmo cheloit el diak el lluut el mo beluu. (Jer. 49:7-10, 17, 18) Ke mo metik er a ngakl el Edom me a lechub a re Edomait er ker? Ke mo metik er aike el map er chelecha el taem? Ngdiak, ngdi sebeched el metik er aike el babier el milluches er a irechar me a lechub e ngreksi er a Biblia me a lechub e ng map el kirel aike el taem er a irechar. A Flavius Josephus a melekoi el kmo a re Edomait a mlorimel el mo kongei er a klechelid er a Rechijudea er a chelsel aike el rak er a 200 B.C.E. E a uriul er a telemellel a Jerusalem er a rak er a 70 C.E. e ngmlo diak a ta el chad er a Edom el medechel.
ip-2-E 351 par. 6
Jehovah a Ngiltii a Ngakl el Uchul a Klebekelel
6 Ngera uchul me a Jehovah a uluumekemad er a Edom? A re Edomait a mle cherrouel a telbiil el chedal a Dios el ngii a ulemuchel er a taem er a demerir er a Esau. (Genesis 25:24-34; Ulecherangel 20:14-21) Ngsebeched el bleketakl el mesa el kmo a Edom a kmal mle chetil a Juda er sel taem er a lolisiich er a rechad er a Babilon el mo melemall er a Jerusalem. (Psalm 137:7) Me a Jehovah a ulemes er tia el tekoi el dilubech el mo er a rechedal el ua el tekoi el mo er ngii. Me a Jehovah a ulterekeklii a telemellel a Edom!—Isaia 34:5-15; Jeremia 49:7-22.