Reference el kirel a Subeled er a Miting er a Klengar me a Omesiunged
December 4-10
MEKREOS EL TEKOI EL NGAR ER A BIBLIA | SEFANIA 1–HAGAI 2
“Mosiik er a Jehovah er a Uchei er a Sils er a Cheldechuderreng er Ngii”
Mosiik er a Jehovah er a Uchei er a Sils er a Cheldechuderreng er Ngii
5 Kau a locha mo melekoi el kmo: ‘Ngak a mla metecholb el mesiungel a Dios, el ta er a Sioning er a Jehovah. Ngdiak bla kutaut aika el rokui el tekoi?’ Ngkmal diak el sebeched el di tibir a rengud e mo odeuir a rengul a Dios e le Israel a mle renged el ngar er a telbiil. Engdi ngar er a temel a Sefania e a rechad er a Juda a dimlak loltaut a telbilir me a Jehovah a chilititerir. Me a chad a ‘losiik er a Jehovah’ er chelecha el taem e ngkirel el melemolem er a kmes el deleuill er ngii el obengkel a Jehovah el teloi er a cheldebechelel. Ngbelkul a kmo ngmo medengelii a osengel a Dios el kirel a tekoi e mo meruul a tekoi el odeuir a rengul. Kede osiik er a Jehovah sel bo dekerekikl el mesuub er a Tekingel, e mo melebedebek, e mo oltirakl a omellach er ngii er a chelsel a klengar er kid. Ngdirrek el kired el mo blechoel el meluluuch el osiik a ulekrael er Ngii e mo oureor el obengkel a chedaol reng er ngii, e seikid e nglmuut el olekes er a deleongel er kid el obengkel e rullid el mo soad el mesiou er ngii el oba ‘rengud el rokir, ma klengar er kid el rokir ma klisiched el rokir.’—Duteronomi 6:5; Galatia 5:22-25; Filipi 4:6, 7; Ocholt 4:11.
6 A ongeru el tekoi el kired el meruul er ngii el ngar er a Sefania 2:3, NW a kmo “dosiik a llemalt.” A ruumesingd er kid a riruul a meklou el omelodech me bo el sebeched el mo nguu a techolb er a Kristiano, engdi ngdirk kired el melemolem el oltaut a melemalt el llechul a Dios er a chelsel a klengar er kid. A rebebil el kmal mle blak a rengrir er a uchelel a mla mecherei tia el beluulechad me ngmengidokel er tir. Ngkmal diak el beot a dosiik a llemalt e le kede iliuekl er a rechad el omes a deleboes el omeruul, me a blulak, me a lmuut el bebil er a mekngit el omeruul el ua lak lemekngit ngkuk di blekerdelel a klengar er a rechad. Engdi ngkmal sebeched el mo mesisiich er a uldesued el soad el melai a kengei er a rechad er a beluulechad a lsekum e ngmesisiich a urunguled el soad el loldeu er a rengul a Jehovah. A Jehovah chilititerir a rechad er a Juda e le te mlo mesuub a mekngit el blekerdelir a rechad er aike el renged el mle iliuekl er tir. Me nguaisei, bai ‘dolasem el mo uai a Dios’ e lak doukerebai er a reng er tia el beluulechad. E bo ‘doubail er ngikel beches el chad, el ulebeob el okesiul a Dios ra meral llemalt ma cheledaol.’—Efesus 4:24, BT; 5:1.
7 A ongedei el tekoi el ngar er a Sefania 2:3, NW, el kired el meruul er ngii a lsoad el mo suobel er a sils er a cheldechuderreng er a Jehovah, a kired el “osiik a delemedemek el reng.” Kid a bek el sils el deteloi er a rechad el tir a diak el oba delemedemek el reng. Te omes er a rechad el oba delemedemek el ua lemechitechut a rengrir. Me a blekongesenges a lomes er ngii el ua lekmal klou el chelitecheterir a rechad. Te di melatk er a di tir e di meruul aike el sorir, e omdasu el kmo a lsekum e ngar er ngii a llemeltir er a tekoi me a sorir e ngkirel meketmokl el diak lomekerreu a bo luchul a mekngit el mo er a rebebil me a lechub e ngdiak. Ngkmal klou el klengiterreng a lsekum e kede mo oba tia el osisiu el uldasu! Ngmla mo taem el “dosiik a delemedemek el reng.” Ngoeak a ngera el rolel? Kede mo olengesenges er a Dios, e mo ngariou a rengud el kongei a omellach er ngii e mo oltirakl a uldesuel a rengul.
Morriter er a Tekingel a Dios
A Omesodel a Babier er a Nahum me a Habakuk me a Sefania
1:8. A rebebil er a rechad er a taem er a Sefania a mlo “oltirakl a omeruul er a ngodech el beluu” el mle iliuekl er tir e le ngmle sorir el melai a kengei er tir. Ngkmal klebelung el tekoi a lsekum a rechedal a Jehovah er chelecha el taem a mo meruul a osisiu el tekoi e mo oltirakl a blekeradel er tia el beluulechad!
A Omesodel a Babier er a Hagai me a Sekaria
2:9—Ngokiu a ngera el rolel e a “klebekelel tial beches el Templo a lmuut el mo ungil er sel mlar ngii er a ngar a mong”? Tia oeak a edei el rolel: A klemengetel a taem el dilechor tia el templo, me a rullisechakl el ngar isei, me a tirke el mlo er tia el templo el mo mengull er a Jehovah. Me alta sel kmal el klebokel el templo er a Salomon a dilechor el 420 el rak el ngii a mle 1027 B.C.E. el mo er a 607 B.C.E., engdi tia el “beches el Templo” a dilechor el 580 el rak el ulemuchel er sel taem er a lemeteketek er a rak er a 515 B.C.E. el mo er sel taem er a lemetemall er a 70 C.E. Me a dirrek el Mesias a ullisechakl el ngar tia el “beches el Templo.” Me a rechad el mlo er tia el templo el mo mengull er a Jehovah a kuk mle betok er tirke el mlo er sel templo el “mlar ngii er a ngar a mong.”—Rellir 2:1-11.
December 11-17
MEKREOS EL TEKOI EL NGAR ER A BIBLIA | SEKARIA 1-8
“Morekedii a Bilel a Chad er a Judea”
“Chelechang e Kom Mla Mo Chedal” a Dios
14 Sera irechar, e a reprofet a ulemlaoch el kmo a rebetok a mo mengull er a Jehovah el obengterir a rechedal er a taem er a ulebongel. A Isaia a ulemlaoch el kmo: “Ng betok el beluu . . . a mo kmo, ‘Bo dengasech er a bukl er a RUBAK, el mor a Templo er a Dios er a Israel. Kede mo mesuub er sel soal a doruul er ngii; kede mo merael er a ikel rael el bla lengilt.’ A osisecheklel a RUBAK a ngar a Jerusalem el mei.” (Isa. 2:2, 3) Me a Sekaria a ulemlaoch el kmo: “A re betok el chad ma mesisiich el beluu a mor a Jerusalem el mo mengull el meluluuch er a RUBAK el Olab a Bek el Klisiich e olengit a klengeltengat er ngii.” Me tirka el “chad er a ngodech el beluu” a mo mengull er a Jehovah el teloi er a Israel er a Dios e mo melekoi el kmo: “Aki obengkem el mor sel bor ngii, ele kim mla remenges el kmo a Dios a obengkem.”—Sek. 8:20-23.
“Aki Obengkem el Mor Sel Bor Ngii”
4 Me a lsekum e ngdiak el sebeched el mo medengei a ngklir tirke el rokui el ngellitel er chelechang, e ngmekerang a kuk bebil el sib e mo ‘obengterir’? A Biblia a kmo: “A re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” Me alta e a Biblia a di mesaod el kirel a ta el chad er a Judea, engdi sel ledu el kmo “obengkem” e ngmesaod el kirir a rebetok. Me tiang a belkul a kmo a chad er a Judea a diak di le ta el chad, e ngbai omtechei er a cheldellir a rengellitel. Me tirke el kuk bebil el sib a medengelii tiang me te mesiou er a Jehovah el teloi er tirka el chad. Me ngdiak a ultutelel el bo lodengei a ngklir el rokui e bochu loltirakl er tir. E le Jesus a ngike el Merredeled, me a Biblia a subedid el kmo ngkired el di oltirakl er ngii.—Mt. 23:10.
w09 2/1 27 par. 14
Te “Obengkel a Ngelekel a Sib”
14 A Jesus Kristus a omes er sel ngelsuid el mo er a rudam er ngii el ua ngeso el mo er ngii. (Monguiu er a Mateus 25:40.) Ngoeak a ngera el rolel e tirke el oba omelatk el mo kiei er tia el chutem a sebechir el ngosuterir a rengellitel el odam er a Kristus? A kot el ungil el rolel a oeak a ureor er a berkel a klumech er a Renged. (Mateus 24:14; Johanes 14:12) Me alta e a ildisir a rengellitel el ngar tia el chutem a merael el mo kesai, engdi tirke el ngodech el sib a merael el mo betok a ildisir. Me tirke el oba omelatk el mo kiei er tia el chutem sel leteloi er tia el ureor el oldingel el mui el taem, e te dirrek el olengeseu er tirka el ngellitel el churrengelii a ureor er a omeruul el disaiplo. (Mateus 28:19, 20) Me a dirrek el diak dobes el ousbech a bek el techall el mo melenget el oeak a kakerous el rolel el olengeseu er tia el ureor.
Morriter er a Tekingel a Dios
A Ues el Lulemes a Sekaria—Me a Belkul el Kirem
18 Sel ues a dirrek el ulemeklatk er a Rechijudea el kmo, tir me te dirrek el mla er ngii a ngerechelir el mengikiid er a omengull er tir. A mekngit el omeruul a diak el sebechel, e kmal diak el kirel el mo er a delongelir a rechedal a Dios. Me chelechang, e a Jehovah a mla ngoikid el mo er a klikiid el cheldebechelel el dengar er ngii e ngsebeched el chormii a bltkil a rengul me a ulekerreuil. Me a derta er kid a ngar er ngii a ngerechelel el kirel el melemolem el mengikiid er ngii el cheldebechel. A mekngit el omeruul a kmal diak el kirel el mo er ngii er a delongelir a rechedal a Jehovah.
A Kuruma me a Krone a Omekerreu er Kau
7 Ngar er a Biblia, e a rois a sebechel el omtechei a renged me a lechub e ngkabelment. Aike el rois el Sekaria a miles a osisiu ngii me aike el teblo el rois el donguiu el kirel el ngar er a ulochel a Daniel. A ta er aika el rois a omtechei er a diak a ulebengelel el omengederederel a Jehovah er a eanged me a chutem, e sel kuk tang a omtechei er a Rengedel a Mesias el Jesus a King er ngii. (Daniel 2:35, 45) Ngar er a ulebengelel a rak er a 1914, er sel taem el leblo el King a Jesus, e aika el teblo el rois a dimla er ngii, e dirrek el ngar er ngii a ileakl el ngerechelel el mo oltaut a moktek er a Dios el kirel a chutem.
8 Ngera me aika el rois a rruul er a brons? A brons a kot el klou a ultutelel e mengeldoech el deel. Seikid a uchul me a Jehovah a millekoi er a rechad er a Israel el mo ousbech a brons sel lomekedechor er a chedaol tento me a dirrek el templo er a Jerusalem er a uriul. (Exodus 27:1-3; 1 King 7:13-16) Me aika el rois el rruul er a brons a uchul me ngmelisiich er a ungil el tekoi er a llemeltel a omengederederel a Jehovah er a eanged me a chutem me a Rengedel a Mesias. A rechad a mo melechesuar a ulekerreu me a betok el klengeltengat er cheungel aika el teblo el renged.
December 18-24
MEKREOS EL TEKOI EL NGAR ER A BIBLIA | SEKARIA 9-14
“Mkiei er a Chelsel a ‘Dellas’ er a Rois”
Bo Mkiei el Selebechakl er a Chelsel a Dellas er a Jehovah
10 A ulaoch a mesaod el kmo sel lobii a Rois er Olib el mo teblong, el bita er ngii a mo bedul a diluches me a bitang a mo bedul a dimes, e a ochil a Jehovah a mo dechor er bebul aika el rois. Me ngmo er ngii a “klou el dellas” er a delongelel a ochil a Jehovah. Ngngera tia el dellas? Tia el dellas a okesiul a ulekerreuil a Jehovah el remesiungel a mo er ngii e metik a ulekerreu er a cheungel a omengederederel me a omengederederel a Ngelekel. A Jehovah a kmal diak bo lebecherei me lemetemall a bliochel el omengull. Ngoingerang e a Rois er Olib a ulebii? Ngulebii er a rak er a 1914 er sera lomuchel a Jesus el mengedereder el ngar er a eanged. Me a rechedal a Jehovah te ulemuchel el chemiis el mo er tia el “klou el dellas” er oingerang?
Bo Mkiei el Selebechakl er a Chelsel a Dellas er a Jehovah
13 Me a lsekum kede melemolem el blak a rengud el mo er a Jehovah, e kede kiei er a chelsel a dellas er a ulekerreu. E ngii me a Ngelekel a kmal diak lekengei er a ngii di el chad me a lechub a ngii di lengerang me lecheridid er a ulekerreu er tir. (Jn. 10:28, 29) A Jehovah a meskid a rokui el ngeso el dousbech el ngosukid el melemolem el blak a rengud el kirel a omengederederel me a omengederederel a Ngelekel. Me ngkmal klou a ultutelel a dolemolem el kiei er a dellas er a ulekerreuil a Jehovah, e le tia mo uchul a osebechakl sel desiseb er a chelsel a kloul ringel.
Bo Mkiei el Selebechakl er a Chelsel a Dellas er a Jehovah
15 Ngera mo duubech el mo er tirke el diak loba ulekerreuil a Jehovah er sel sils el bo loumekemad er a recherrouel? A Sekaria 14:6, NW, a kmo: “Sel sils a lemei, e ngmo diak a llomes e a rokui el tekoi a mo medecherecher.” A ulaoch a kmo “ngmo diak a llomes,” el belkul a kmo ngmo diak lenguu a kengei er a Dios. A ulaoch a melemolem el kmo, “a uos, ma mule, ma kiamo, ma donkey, ma ngii di le charm” a mo “medecherecher.” Tia belkul a kmo a mesil me a klekedall er a mekemad a mo diak loureor. A Sekaria a melekoi el kmo, a Jehovah a mo omals er a recherrouel el oba “kdekudel rakt.” A chelsul a mederir me a chururir a “mo mechut.” Ngdiak dodengei el kmo tiang mera el rakt, engdi kede medengei el kmo ngmo diak el sebechir el melemall er kid me a lechub e lolekoi el omtok er a Dios. (Sek. 14:7, 12, 15) A rokui el “king er a beluulchad ma re soldau er tir” a mo obengkel a Satan el oumekemad. Me alta e te ngar er a kakerous el beluu, engdi te rokui el di mo nguemed. (Och. 19:19-21) “Isel sils e tirkel lokodeterir a RUBAK a di mo berriid a cheklechir er a bital beluulchad el mor a bitang.”—Jer. 25:32, 33.
Morriter er a Tekingel a Dios
Ngdiak a Klekedall er a Mekemad el Sebechel el Tomellau
9 A ulochel a Sekaria a ochotii a uchul maike el renged er a beluulechad a mlo omtok er a remera el Kristiano. Ka momtab er a Sekaria 12:3 el kmo: “Ngdi sel le mei isel taem, e ak mo rullii a Jerusalem el mo ua oberaod el bad.” Tiang melutk el kirel a ngera el Jerusalem? A ulochel a Sekaria el kirel a Jerusalem a melutk el mo er a “Jerusalem ra eanged,” e ngii a Renged er a eanged el mo delengcheklir a rengellitel el Kristiano. (Hebru 12:22) Chelecha el taem, e te ngar er ngii a redi mekesai el chad el tir a oudiukes er a Rengedel a Mesias el ngar er a chutem. E tirkang a obengterir a rekldemir, el “ngodech el chermek el sib,” el mengelechel er a rechad el mo chederedall er a Rengedel a Dios er a chelechang el dirk ngar er ngii a taem. (Johanes 10:16; Ocholt 11:15) Ngua ngerang a osengir a rechad el kirel tia el ongit? A Jehovah ngomesterir a remesiungel a ngera el ngeso er a chelecha el taem? Ngungil a deluut el merriter er a belkul a ulochel a Sekaria el ngar er a 12 el bliongel. A bo doruul el uaisei, e ngmo ulterekokl a rengud el kmo ngdiak a ngii di el klekedall er a mekemad el sebechel el mo mesisiich er a rengellitel el chedal a Dios me a resechelirir.
10 A Sekaria 12:3 a melekoi el kmo aike el renged a “mo metemall.” Tiang mekera e duubech? A tekingel a Dios a kmo a ungil el chais er a Renged a kirel el mo oberk. Me a Resioning er a Jehovah a kmal blak a rengrir el oltaut er tia el ngerechelir el omerk er a klumech. Me nguaisei, engdi tia el ureor el omerk el kmo a Renged a di ta el omelatk el kirel a klechad a mla mo ua “oberaod el bad” el mo er aike el beluu. Me te osiik a rolel e melemall er a urerir tirka el omerk el kirel a Renged. E sel loruul el uaisei, e ngbai di tir el ‘melemall’ er tir. A mekngit el omerellir a uchul e ngdirrek el mla mo mekngit a chisir. Ngdiak el sebechir el mutek a ngerir a remesiungel a Dios, el tir a blak a rengrir el omerk er a “diak a ulebengelel el klumech er a ungil chais” el kirel a Rengedel a Dios er a uchei er a lemei a ulebongel er tia el beluulechad. (Ocholt 14:6) Me a mengkar er a kelebus er a ta er a beluu er a Africa er a lomes er a rechad el oldechelakl er a remesiungel a Jehovah, e ngdilu el kmo: ‘Kom di mengoit a temiu me a klisichiu el di mo diak a ultutelel, e le tirka chad a diak el meterob er a urerir me a ildisir a di merael el mo betok.’
(Sekaria 12:7, NW) “Me a Jehovah a mo olsobel a tento er a Juda el kot, me a chetengakl el mo er a rengelekel a David me a rechad er a Jerusalem lak lebo er bab er a chetengakl el mo er a Juda.”
Ngdiak a Klekedall er a Mekemad el Sebechel el Tomellau
13 Monguiu er a Sekaria 12:7, 8, NW. Ngar er a Israel er a irechar, e a tento a mle iliuekl er a beluu, el ngii a luluusbech a remengkar a sib me a rechad er a sers. Tirka tirke el mo kot el modechelakl a lsekum a recheraro a mei el oumekemad er a beluu er a Jerusalem. Me a “tento er a Juda” a melutk el kirir a rengellitel er chelecha el taem el tir el ua lengar er a obereberk el beluu, el diak el ngar er a chelsel a mats. Ngar isei e te bekeu el mesebechakl er a renged el longedereder er ngii a Mesias. A Jehovah a mo mesebechakl er a “tento er a Juda” e le tir el kot el mo chelebangel a odechelakl er a Satan.
December 25-31
MEKREOS EL TEKOI EL NGAR ER A BIBLIA | MALAKAI 1-4
“A Chebechiielem, Ngodeuir a Rengul a Jehovah?”
jd-E 125-126 par. 4-5
Molisiich er a Rolel a Klengar er a Telungalek el Odeuir a Rengul a Dios
4 Sera taem er a Malakai er a chelsel aike el rak er a 400 B.C.E., e ngkmal mle klou a omerort el chebechiil er a delongelir a Rechijudea. Me a Malakai a dilu er tir el kmo a Jehovah a “medengei el kmo ke mla tomellii a telbilem el mor a bechim el redil el blo bechil er cho dirk mngeasek.” Me tirke el bechiil el sechal el dimlak lotirakl a telbilir er a chebechiil a uchul me a olengetongel er a Jehovah a mle medekedek er a chiuechel a mederir tirke el bechiil el redil el ‘lilangel el mengebechub er a klengiterreng.’ E tirke el milngebirukel el prist a di millemolem aika el mekngit el omerellir!—Malakai 2:13, 14.
5 Ngmle ua ngerang a osengel a Jehovah el kirir tirka el dimlak lotireklii a telbilir er a chebechiil er a taem er a Malakai? A Malakai a milluches el kmo: “A RUBAK el Dios er a Israel a kmo, ‘Ng kmal chetik a dertel a chebechiil.’” Ngdirrek el millekoi el kmo, a Jehovah a ‘diak lemengodech.’ (Malakai 2:16; 3:6) Me a Jehovah a bleketakl el kmal chetil a dertel a chebechiil. (Genesis 2:18, 24) Ngmle uaisei a uldesuel er a temel a Malakai, e kmal dirk osisiu a uldesuel. Me a rebebil a locha mo merort er a chebechiielir e le ngmla mo diak el deu a rengrir er ngike el chad el blo el bechil. Me alta rengud a cheblad engdi a Jehovah a ngike el merriter a reng. (Jeremia 17:9, 10) Me ngkmal ungil medengelii sel mera el luchul me a chad a mo merort er a chebechiielel. Ochoi, “ng diak a ngeral sebechel el obart er a Dios; a rokui el tekoi a di bleketakl er osengel, me kede rokui el mo mesaod er kid er ngii.”—Hebru 4:13.
A Jehovah a Ouketui a Rolel a Blulak
19 Engdi a Malakai a dirrek el dilu el kmo te mla er ngii a rebechiil el sechal el mle melemalt a blekerdelir el mo er a rebecherir. E le te uleba ‘tal reng el obengkel a Dios.’ (15 el kekerei el bades) Ngkmal dmeu a rengud e le chelecha el taem e a rebechiil el sechal el ngar er a cheldebechelel a Jehovah a kmal ‘ungil el mengull er a rebecherir.’ (1 Petrus 3:7) Te diak longelebed er a rebecherir me a diak el meterekakl a longedecheduch er tir. Te diak lorrimel er tir el mo meruul a deleboes el omeruul me a diak lolengamech er a rebebil er a redil me a lechub e lomes a siasing er a remeau. A cheldebechelel a Jehovah a dirrek el mukngeltengat er a rebetok el blak a rengrir el bechiil el redil el Kristiano el oba blakerreng el mo er a Dios me a llechul. Tirka el rokui el sechal me a redil a medengei a louketui a Dios, me a uldesuir me a omerellir oltirakl er a soal a Dios. Bo molemolem el uai tir, e ‘molengesenges er a Dios’ e bo mukngeltengat er a chedaol reng er ngii.—Rellir 5:29.
Morriter er a Tekingel a Dios
A Omesodel a Babier er a Malakai
1:10. A Jehovah a kmal mlo mederdirk a rengul sel omes aike el tengetengir tirke el merechorech a rengrir el prist, el melai a oleng er a mekekerei el ureor el ua omengesimer el chesimer me a omenguml el ngau er a olengetongel. Ngmera el klou a ultutelel a omesiunged el uldimukl er ngii aike el omerelled sel doldingel el bo lolecholt er a mera el bltikerreng er kid el mo er a Dios me a retonari er kid, el diak di doruul e le ngngar a bo denguu el kirel!—Mateus 22:37-39; 2 Korinth 11:7.
“E Ngak a Mo Obengkemiu el Di Blechoel”
5 Betok el dart el rak er a uchei er a losaod a okesiu a Jesus el kirel aika el dellomel, e a Jehovah a ulemekrael er a profet el Malakai el mo omlaoch el kirel a bebil er a osisiu el tekoi. (Monguiu er a Malakai 3:1-4.) Me ngika el ‘oderuchel el kiltmeklii a rael’ el Malakai a ulemlaoch el kirel a millutk er a Johanes el Chad er a Techolb. (Mt. 11:10, 11) Me sera lemei er a rak er a 29, e a temel a kerrekeriil el mo er a renged er a Israel a kmal kmedang. A Jesus a mle ongeru el oderuchel. Ngmlo eru el taem el longikiid er a templo er a Jerusalem, el sel kot el taem a ngar er a uchelel a omesiungel e a ongeru el taem a mlo bedul a ulebengelel a omesiungel. (Mt. 21:12, 13; Jn. 2:14-17) Me tia el ureor er a omengikiid el lurruul er ngii a Jesus a dimlak lemereched el mo merek.
6 Me ngerang a klou el otutel a ulochel a Malakai? Ngar er aike el rak el me bedul a rak er a 1914, e a C. T. Russell me a resechelil a mirruul er a klou a ultutelel el ureor el ua lurruul er ngii a Johanes el Chad er a Techolb. Te liluut el omeketakl a klemerang er a Biblia. Me a Remesuub er a Biblia a ullisechakl er a mera el belkul a olubet el tengetengel a Kristus, e ulechotii el kmo a osisechakl el kirel a beluu er a ngau a klsuul, e uluuchais el kirel a merekung el ulebongel er a Taem er a Rechisentael. Engdi ngdirk mla er ngii a kakerous el cheldebechel el millekoi el kmo te oltirakl er a Kristus. Me a klou a ultutelel el ker el mle kirel el monger a kmo: Te rua techang er a delongelir tirka el chad a mle ungil el dellomel? A Jesus a ulemuchel el merriter er a okesiu el templo er a rak er a 1914, me bo lemonger tia el ker. Me tia el ureor er a omerriter me a omengikiid a ulemuchel er a rak er a 1914 e millemolem el mo lmuut er a uchelel a rak er a 1919.