Reference el kirel a Subeled er a Miting er a Klengar me a Omesiunged

April 2-8

MEKREOS EL TEKOI EL NGAR ER A BIBLIA | MATEUS 26

“Aike el Klaisisiu me a Klekakerous er a Baskua me a Chedaol Belsoil”

nwtsty-E media

Baskua

Aike el mle meklou a ultutelel el klekedall er a Baskua a: delul el ngelekel a sib (el diak el chelam a chiuesel) (1); me a diak a omkukel el blauang (2); me a mechuached el dellomel (3). (Exo 12:5, 8; Ule 9:11) Aike el mechuached el dellomel a ulemeklatk er a rechad er a Israel er a meringel el klsibai er a lengar er a Ekipten. Me a Jesus a uluusbech er a diak a omkukel el blauang el okesiul a cherrungel el bedengel. (Mt 26:26) A apostol el Paulus a ulemekedong er a Jesus el “Ngelekel a Sib er a Baskua.” (1 Ko 5:7) Ngar er a chelsel aike el kot el dart er rak e a bilong (4) a dirrek el mlo uldimukl er a temel a Baskua. A Jesus a uluusbech er a bilong el okesiul a rsechel, el ngii a mo moiitel el tenget.​—Mt 26:27, 28.

nwtsty-E note er a omesubel a Biblia el kirel a Mt 26:26

tia ia: A tekoi er a Grik el e·stinʹ el lousbech er ngii er tiang a belkul a kmo, “ngomtechei, ng okesiul, ng belkul.” E a rechapostol a kmal mle medengelii a belkul tia el tekoi, e le ngar tiakid el taem e te ulemes er a Jesus el dirk mle cherrungel a bedengel e te dirrek el ulemes er a diak a omkukel el blauang el bo longang er ngii. Me nguaisei, a blauang a dimlak el sebechel rruul er a bedengel a Jesus. Ngdirrek el kmal utebengall el kmo, tia losisiu el tekoi er a Grik a lousbech er ngii el ngar er a Mt 12:7 me a dirrek el ngar er a betok el oidel a Biblia el oliuid er ngii el kmo, “belkul.”

nwtsty-E notes er a omesubel a Biblia el kirel a Mt 26:28

rsechek el melisiich er a telbilel a Dios: A beches el telbiil el delongelel a Jehovah me a rengellitel el Kristiano a mileketmokl el okiu a tengetengel a Jesus. (Heb 8:10) Ngar er tiang e a Jesus a ousbech a osisiu el tekoi el lullekoi a Moses er a loureor el melekingel a Jehovah el mengetmokl er a Llach er a telbiil el obengkel a Israel el ngar er a Rois el Sinai. (Exo 24:8; Heb 9:19-21) Me a rsechel a Jesus a ulterekeklii a beches el telbiil el Jehovah a rirellii el obengkel a Israel er a Dios, el di uai a rsechel a kerbou me a kaming el ulterekeklii a Llach er a telbiil er a delongelel a Dios me a renged er a Israel. Tia el beches el telbiil a mlo oureor er a Pentekost er a 33 C.E.​—Heb 9:14, 15.

Morriter er a Tekingel a Dios

nwtsty-E notes er a omesubel a Biblia el kirel a Mt 26:17

Sel kot el sils er a Chedaol Sils er a Diak Omkukel Blauang: Aike el Chedaol el Sils er a Diak a Omkukel el Blauang a ulemuchel er a Nisan 15, el ngii a sils el uriul er a Baskua (Nisan 14), e millemolem el euid el klebesei. Engdi ngar er a taem er a Jesus e a Baskua a mlo uldimukl er aika el chedaol el sils me ngmlo uai a le eai el klebesei a “Chedaol el Sils er a Diak a Omkukel el Blauang.” (Lk 22:1) Me ngar tia el bades e “Sel kot el sils” a sebeched el melekoi er ngii el kmo “Sel sils er a uchei.” (Momekesiu er a Jn 1:15, 30, el ngar tiang e a tekoi er a Grik el “kot” [proʹtos] a loleiuid er ngii el “uchei”; “ngdimla ngarngii er [proʹtos] er ngak.”) Me a doltirakl a tekoi er a Grik me a siukang er a Rechijudea, e a redisaiplo er a Jesus a uleker er ngii er tia el ker er a Nisan 13. Me seikid el mellomes er a Nisan 13 e a redisaiplo er a Jesus a milengetmokl el kirel a Baskua, el ngii a lurruul er ngii er a “bocha le kebesengei” er a uchelel a sils el Nisan 14.​—Mk 14:16, 17.

nwtsty-E notes er a omesubel a Biblia el kirel a Mt 26:39

mnguu tial kob er a ringel el choridii: Ngar er a Biblia, e a “kob” a lousbech er ngii el okesiul a soal a Dios a lemeketmokl me a lechub a mla meketmokl el blingelel a chad. A Jesus a locha kmal mle oberaod a uldesuel el kirel a kmo, a kodall el bo er ngii e le ngii el mlotelechakl el omtok er a Dios me a kabelment, a mo uchul a klou el otuub el mora Jehovah. Sei a uchul me ngmiluluuch el kmo tia el “kob” bo el cheroid er ngii.

April 9-15

MEKREOS EL TEKOI EL NGAR ER A BIBLIA | MATEUS 27-28

“Ngera Uchul, e Ngar Ker, e Mekerang a Doruul er a Remo Disaiplo?”

w04 10/1 19 par. 4

‘Morael . . . el Rulleterir ar Chad el Mo Obengkek’

⁴ A Jesus a mengedereder er a ongdibel er ngii, e sera 1914 el mei e ngmilengedereder er sel beches el mla meketmokl el Rengedel a Dios. (Kolose 1:13; Chocholt 11:15) E ngii a ngike el bderrir a rechanghel me ngii a mengedereder er a urrurt er a eanged el kirir a rebetok el dart el milliol el anghel. (1 Thesalonika 4:16; 1 Petrus 3:22; Chocholt 19:14-16) A Demal a mla oterekokl a klisiich el mo er ngii el mo olekngemed “a bek lomerreder, ma klisichel chomerreder, ma klisiich” el omtok er aike el melemalt el omellach. (1 Korinth 15:24-26; Efesus 1:20-23) A klisichel a Jesus a diak el di lebo er a redi ngar e lemerekong. Ngdirrek el “oukerrekeriil rar dingar mar mlad” e olab a klisiich el mla er a Dios el mo olekiis er tirke el mla mad. (Rellir Ar Apostel 10:42; Johanes 5:26-28) Me nguaisei a omellach el mla er Ngike el mloterekokl er ngii a kmal klou el klisiich a kired el omes er ngii el kmo ngkmal klou a ultutelel el tekoi. Sei a uchul, e kede oba omengull ma kengei el mo olengesenges er a omellach er a Kristus el ‘morael el rulleterir a rechad el mo disciplo.’

nwtsty-E notes er a omesubel a Biblia el kirel a Mt 28:19

moruul er tir el mo obengkek: A tekoi er a Grik el ma·the·teuʹo a sebechel el moiuid el “olisechakl” el moktek a meruul er a redisaiplo. (Momekesiu er a Mt 13:52, el ousbech er a “mo oltirakl a osisechakl.”) A tekoi el “molecholb” me a “molisechakl” a olecholt a tekoi el kired el meruul a lsoad el meruul er a remo disaiplo.

bek el bedengir a re chad er ker me ker: Tia el meruul er a “bek el bedengir a re chad er ker me ker” el mo disaiplo a mle beches el llach. E le uchei er a omesiungel a Jesus er tia el chutem, e a bades a ochotii el kmo a Rechisentael el mle sorir el mengull er a Jehovah a mle sebechir el mo er a Israel. (1Ki 8:41-43) Engdi a Jesus a milsterir a redisaiplo er ngii tia el beches el llach, el diak di lomerk el mora Rechijudea, e ngbai beluulechad el rokir.​—Mt 10:1, 5-7; Och 7:9.

nwtsty-E notes er a omesubel a Biblia el kirel a Mt 28:20

molisechakl er tir: A tekoi er a Grik el loleiuid er ngii el “mo olisechakl” a uldimukl er a omesaod, me a dirrek el olengeseu er tir el mo omtab osisechakl, e omesterir a ochotel suobel. (Momes er a nwtsty-E notes er a omesubel a Biblia el kirel a Mt 3:1; 4:23.) A dolisechakl er tir aike el rokui el bla du a Jesus, a tekoi el di dolemolem el meruul er ngii, e tia uldimukl er a olisechakl er tir aike el lullisechakl a Jesus, e oltaut a osisecheklel, e oltirakl er a kerebai el lebilecherei.​—Jn 13:17; Efe 4:21; 1Pe 2:21.

Morriter er a Tekingel a Dios

nwtsty-E notes er a omesubel a Biblia el kirel a Mt 27:51

templo: A tekoi er a Grik el na·osʹ el lousbech er ngii er tiang a melutk el kirel a klou el omekedecheraol el blai el ngar ngii a Chedaol me a Kmal Chedaol el basio er ngii.

mamed el mle orrars: Tia el lurruul er ngii el kmal klebokel el mamed a ulemii er a Kmal Chedaol me a Chedaol el basio er a templo. A dotirakl er a siukang er a Rechijudea, e tia el kmal oberaod el mamed a mle 18 m (60 ft) a klemengetel, e 9 m (30 ft) a tengel, e 7.4 cm (2.9 in.) a kerrekrel. Me a Jehovah er a lesedelii tia el orars el mo erung, e ngulechotii a klou klsbengel a rengul el bedul tirke el milekodir a Ngelekel, e dirrek el ulechotii el kmo ngar er ngii a sebechir el mo kiei er a eanged.​—Heb 10:19, 20.

nwtsty notes er a omesubel a Biblia el kirel a Mt 28:7

mo subedeterir a rubengkel el kmo, ‘Ng mla mekiis: Tirka el redil a mle kot el disaiplo el mo medengei el kmo a Jesus a mla mekiis er a kodall e te dirrek el mlodurech el mo ouchais er tirke el bebil er a redisaiplo el kirel. (Mt 28:2, 5, 7) A doltirakl er a siukang er a Rechijudea el diak lemengai a uchetemel er a Biblia, e a redil a diak a klisichel a tekingel a debo er a kort er a llach. Tiang a kmal klou el klekakerous er a anghel er a Jehovah el mengebkall er a redil me ngiluu tia el ngerachel el mesterir.

April 16-22

MEKREOS EL TEKOI EL NGAR ER A BIBLIA | MARKUS 1-2

“A Kngtim a Mla Mengubet”

jy-E 67 par. 3-5

“A Kngtim a Mla Mengubet”

A Jesus er a lolisechakl, e a rebetok el chad a mlei el sokedii a blai el mo lmuut er a medal a tuangel. Te mla er ngii a reteua el chad el mlei el oba ta el chitechut el chad el ngar er a dukllel. Engdi ngkmal “mle meseked me ngdimlak le sebechir el osisebii” el mo er a Jesus. (Markus 2:4) Te locha kmal mlo mekngit a rengrir. Me te mocha ngmasech el mo er a bebul a blai e oibekii a chado e ulimimii a chitechut el dimlerrek er a dukllel.

Me a Jesus ngngilasech a rengul e le tir el mlo meleb er ngii a lolisechakl? Ngkmal diak! Ngbai kmal chilat er a klaumerang er tir me ngdilu er ngika el chitechut el chad el kmo: “A kngtim a mla musubes.” (Mateus 9:2) Engdi a Jesus ngmera el sebechel melubet a kngterir a rechad? A remengeteklel a klechelid me a Refarisi a uluukerrekeriil er ngii e millekoi el kmo: “Ngika ngera me ng melekoi a ua isel tekoi? Tia otubel a Dios! Ng kmal di tal Dios a sebechel el ousubes a klengit!”​—Markus 2:7.

A Jesus a mle medengei el kmo ngngera a mlara uldesuir me ngdilu er tir el kmo: “Ngera me ng ua isei a uldesuiu? Ng ngera bai beot a dolekoi er ngikal chad? A dedu el kmo, ‘A kngtim a mla mengubet ma lechub e de du el kmo, ‘Bekiis e mnguu a dukllem e morael el mor a blim?’” (Markus 2:8, 9) Ochoi, sel tenget el bo loruul er ngii a Jesus a uchul me ngsebechel el ousubes a kngtil ngii el chad.

nwtsty-E notes er a omesubel a Biblia el kirel a Mk 2:9

Ng ngera bai beot: Ngbeot er a chad a melekoi el kmo a kngtim a mla musubes, e le ngdiak dousbech er a ochotel a meruul er ngii el tekoi. Engdi a lsekum e ngmelekoi er a chad el kmo bekiis . . . e morael, e a Jesus a mle kirel el meruul er a mengasireng el tekoi el omeketakl el mo er a rokui el chad el kmo ngngar ngii a klisichel el ousubes a klengit. Tia el cheldecheduch me a bades er a Isa 33:24 a ochotii el kmo a secher a ochotel a klengit el duldiukes er ngii.

Morriter er a Tekingel a Dios

nwtsty-E notes er a omesubel a Biblia el kirel a Mk 1:11

a ngor a mlar a eanged el mei: Tiang a kot er aike el edei el taem el aike el babier er a Ebangkelio a olecholt er a Jehovah el mengedecheduch er a rechad.​—Momes er a nwtsty-E notes er a omesubel a Biblia el kirel a Mk 9:7; Jn 12:28.

Kau a . . . Ngelekek: A Jesus er a lengar er a eanged e ngmle Ngelekel a Dios. (Jn 3:16) Ngar sel taem er a lemechell er tia el chutem, e a Jesus a mle “ngelekel a Dios” el ua Adam er a le cherrungel. (Lk 1:35; 3:38) Me nguaisei, aika el tekingel a Dios a diak di louchais el kmo ngtecha Jesus. Ngoeak a tekingel me a chedaol reng er Ngii, e a Dios a ulechotii el kmo a Jesus a Ngelekel el mla “mechell el beches” e oba omelatk el lmuut el mo er a eanged el mo mucheluch er a chedaol reng e mengilt el mo King e Ngarbab el Prist.​—Momekesiu er a Jn 3:3-6, BT; 6:51; Lk 1:31-33; Heb 2:17; 5:1, 4-10; 7:1-3.

el odeuir a renguk: Aika el osisiu el tekoi a medung er a Mt 12:18, el ngii a oltirakl er a bades er a Isa 42:1 el melutk el kirel ngike el telbiil el Mesias, me a lechub e ng Kristus. A oitelel a chedaol reng me a Dios el dilu el kmo ngika Ngelekek, a mle bleketakl el ochotel a kmo a Jesus ngike el telbiil el Mesias.

nwtsty-E notes er a omesubel a Biblia el kirel a Mk 2:28

Rubak er a Ulengull el Sils: A Jesus a millekoi aika el tekoi el kirel (Mt 12:8; Luk 6:5), el belkul a kmo ngmle sebechel el meruul er a ureor el Demal el ngar er a eanged a milsang er a temel a Ulengull el Sils. (Momekesiu er a Jn 5:19; 10:37, 38.) Ngar er a taem er a Ulengull el Sils e a Jesus a mirruul a bebil er aike el mengasireng el urerel el uai a omekungil er a resmecher. (Lk 13:10-13; Jn 5:5-9; 9:1-14) Tia olechotel aike el bo loruul er sel taem el Rengedel a Dios a mo mengedereder er tia el chutem, el ngii a mo uchul a ulengull el mo er a rokui el chad.​—Heb 10:1.

April 23-29

MEKREOS EL TEKOI EL NGAR ER A BIBLIA | MARKUS 3-4

“Lomekungil er a Ulengull el Sils”

jy-E 78 par. 1-2

Ngera Subed a Doruul er a Ulengull el Sils?

Ngar er a ta er aike el Ulengull el Sils e a Jesus a mlo oldingel er a blil a ongdibel el locha mlara Galilea. Ngar tiang ngmetik er a ta el chad el chitechut a kidekmel a chimal. (Lukas 6:6) A remengeteklel a klechelid me a Refarisi a kmal mle kerekikl el omes er a Jesus. E ngerang? Te ulechotii a mera el mlara rengrir er a loker el kmo: “Ng mekull er a Llach er kid a domekungil a rakt a le Ulengull el Sils?”​—Mateus 12:10.

A remengeteklel a klechelid er a Rechijudea a uluumerang el kmo engdi subed a domekungil er a chad er a Ulengull el Sils a lsekum a chad a medkung. El uai tiang, ngmekull a domeklemalt er a mla mecham el chiuis me a lechub e domuid a telemall, e le aikang a diak lemad a chad er ngii. Me tirka el mengeteklel a klechelid me a Refarisi a dimlak loker e le te chubur ngika el chad el chitechut a chimal. Te bai osiik a rolel e a Jesus a sebechel mo mekelebus.

jy-E 78 par. 3

Ngera Subed a Doruul er a Ulengull el Sils?

A Jesus a kmal ungil medengei aike el mera el ngar er a rengrir. Ngmesa el kmo tirka el mengeteklel a klechelid me a Refarisi a mla remuul a llach el diak loltirakl er a Biblia e kmo, ngomtok er a Ulengull el Sils. (Exodus 20:8-10) Me a Jesus a mla ngmai a mekngit el tekingir a rechad el kirel aike el ungil tekoi el bla leruul. E chelechang e ngmocha meruul er a sebechel lochau a lmuut el betok el tekoi el bedul ngii er a ledu er ngika el chitechut a chimal el chad el kmo: “Bekiis el mei.”​—Markus 3:3.

nwtsty-E notes er a omesubel a Biblia el kirel a Mk 3:5, BT

loba klsiberreng, ele ngmekngit a rengul: Ngdi ta el Markus a milluches el kirel a Jesus el mlo kesib a rengul e mekngit a rengul el kirel a delecherecherel a rengrir a remengeteklel a klechelid. (Mt 12:13; Lk 6:10) A Petrus el mle blechoel el olecholt aike el mera el ngar er a rengul a locha ngike el uchul a omesodel a blekerdelel a Jesus el ngar tia el bades.​—Momes er a video el “Introduction to Mark.”

Morriter er a Tekingel a Dios

nwtsty-E notes er a omesubel a Biblia el kirel a Mk 3:29, BT

ngikel oltuub ra Chedaol Reng: A otuub a melutk el kirel a chad el melekoi a mekngit el tekoi el omtok er a Dios me a lechub aike el mechedaol el tekoi. Me a domtok me a lechub e kede oltngakl er a urerel a chedaol reng, e kede oltuub er a Dios e le chedaol reng a ngar er Ngii el mei. El ua domes er a Mt 12:24, 28 me a Mk 3:22, tirke el mengeteklel a klechelid a milsa chedaol reng er a Dios el oureor er a Jesus er a loruul a mengasireng el ureor, engdi te ultngeklii e melekoi el kmo ngngilai a klisichel er a Satan el Diabelong.

obals ra diak a ullebengelel klengit: ngmesaod er a klengit el chad a mla er a rengul e meruul er ngii, el diak a tenget el sebechel el mo kokedir ngii el klengit.​—Momes er a nwtsty-E notes er a omesubel a Biblia el kirel ngikel oltuub ra Chedaol Reng.

w14 12/1 14-15 par. 6-8

Kau Ngsebechem el “Omtab a Tekoi el Ngar a Chedaol Llechukl”?

⁶ Ngera kede suubii er tia el okesiu? A kot, e ngkired el kongei el kmo ngdiak el sebeched el orrimel er a chad el mesuub er a Biblia el mo olengeriakl er a omesubel. Me alta e kede meruul aike el sebeched el olengeseu er ngii, engdi ngkmal diak el kired el orrimel er ngii el mo metecholb. Kede bai kongei el kmo ngdi ngii el tang a sebechel el melilt el kmo ngmo tibir a rengul el mo er a Dios me a lechub e ngdiak. E le Jehovah a di kongei a telbilel a rengrir tirke el mera el betik a rengrir er ngii.​—Psa. 51:12; 54:6; 110:3.

⁷ A ongerung, sel bo domtab er tia el okesiu, e ngdiak bo el mechitechut a rengud a lsekum a chad el dosuub el obengkel a meoud el olengeriakl er a omesubel. Ngkirel el mo klou a rengud. (Jak. 5:7, 8) A lsekum kede mirruul aike el sebeched el olengeseu er ngii, engdi ngdiak lemukeroul a klaumerang er ngii, e ngdiak el belkul a kmo kede metitur el olisechakl. A Jehovah a mekurulii a klaumerang er tirke el ngariou a rengrir e kongei el melodech a blekerdelel a klengar er tir. (Mt. 13:23) Me a uldesued el kirel a omesiunged a diak el kirel el ultuil er a ildisir a rechad el mo metecholb. A Jehovah a diak lolebodeb er a omesiunged el okiu a ildisir a rechad el olengeriakl sel dosuub er a Biblia el obengterir. Ngbai omes er a blakerreng er kid er a omesiunged el klou a ultutelel.​—Monguiu er a Lukas 10:17-20; 1 Korinth 3:8.

⁸ A ongedei, ngdiak el sebeched el mo medengei a rokui el tekoi el mengedechang er a rengul a chad. El ua tiang, a ta el obekel el milsuub el obengkel a ta er a missionari a dilu er ngii el kmo, ngmla mo sorir el mo oldingel a obliil. Engdi ngdilu er tir el kmo, a kot e ngkirir el mo diak lolamech a dekool. Me ngkmal kilebetiekl er a lesbedii el kmo ngmla mo betok er a eru el buil er a bo lak lolamech a dekool. Te mlo medengei el kmo a Jehovah a di sebechel el mes a rokui el berrotel el omerellir, e ouketui a cheleblad el omeruul. Me a lsekum ngsorir el melamech a dekool e ngbai ungil a di lolamech er a medal ngika el missionari, me lechub e ngmo diak lolamech. Me alta e ngika el missionari a dimlak lodengelii tia el klou el omeldechel a omerellir, engdi a bltkil a rengrir tirka el obekel el mo er a Jehovah a ngilsuterir el mo ungil el melilt a tekoi.

April 30–May 6

MEKREOS EL TEKOI EL NGAR ER A BIBLIA | MARKUS 5-6

“A Jesus a Ngar er Ngii a Klisichel el Olekiis er a Rulekoad el Betik er a Rengud”

nwtsty-E notes er a omesubel a Biblia el kirel a Mk 5:39

dirkak le mad; ngdi mechiuaiu: Ngar er a Biblia, e ngblechoel el omekesiu er a kodall el ua cheliuaiu. (Psa 13:3; Jn 11:11-14; Rel 7:60; 1Ko 7:39; 15:51; 1Th 4:13) A Jesus el mlo olekiis er ngika el ngalek el lmuut el me ngar a uchul e ngmillekoi el uaisei el omekesiu el kmo, ngdi ua chad el kmal mechiuaiu el sebechel el mekiis, ngdirrek el sebechir a rulekoad el mekiis er a kodall. Me a Jesus a ngiluu a klisichel el olekiis er a Demal el ngii a “Dios el omekngar a mla mad e omekdubech a dimlak le ngar ngii.”​—Rom 4:17.

jy-E 118 par. 6

A Ekebil a Lmuut el Mo Ngar!

A Jesus a dilu er tirka el chad er a blil ngika el ngalek el diak louchais a tekoi el lurruul el ua omerellel el mo er tirke el bebil er a uchei. Me nguaisei, e ngdi tirka el chad er a blil ngika el ngalek me a rebebil a kmal mle dmeu a rengrir me te uluuchais el kirel er “isel beluu el rokir.” (Mateus 9:26) Kau ngdiak mdirrek el mo ouchais er tia el kmal ungil chais a lsekum a ta er a rebetik er a rengum a mekiis er a kodall? Tia ongeru el okiis el milluches el lurruul er ngii a Jesus.

Morriter er a Tekingel a Dios

nwtsty-E notes er a omesubel a Biblia el kirel a Mk 5:19

e mouchais: A Jesus a mle ngodech omerellel el mo er ngika el chad e le ngdilu er ngii el kmo lebo er a telungalek er ngii e louchais aike el tekoi el dilubech, el diak el uai a blekerdelel el mo er tirke el bebil er a uchei el ledilu er tir el kmo ngdiak louchais er a rechad. (Mk 1:44; 3:12; 7:36) Tia locha mle uaisei e le Jesus ble lolengit er ngii el mo tuobed er tia el basio me ngdimlak el sebechel el di ngii el mo omerk el mo er tir, e dirrek el mle ungil el ocholt e le rechad a locha mle kesib a rengrir el kirel aike el babii el tiluu a mekngit el chelid er ngii.

nwtsty-E notes er a omesubel a Biblia el kirel a Mk 6:11

smirs a chebechab er ochemiu: Tia el blekeradel a ochotii el kmo, a redisaiplo a diak el bo el chelsechusem el kirel a kerrekeriil el mlara Dios el mo er tir. A osisiu el tekoi a debetik er a Mt 10:14; Lk 9:5. A Markus me a Lukas a dirrek el dochelir el kmo ngmo ocholt el mo er tir. A Paulus me a Barnabas a mirruul er tia el tekoi er a lengar er a Antiok er a Pisidia (Rel 13:51), me a Paulus a dirrek mirruul er ngii er a Korinth er a le sirars a bilel e lolekoi el kmo: “A lsekum ng diak bo msobel, e ng di telemelliu, el diak le ngak a uchul!” (Rel 18:6) Aika el omeruul a locha ble lodengei a redisaiplo. A Rechijudea el ulemdasu el kmo te kmal chedaol sel bora belurir a Rechisentael, e a uchei er a letuu er a belurir a Rechijudea e te smars aike el lomdasu el kmo ngdiak el klikiid el ngar er a oecherir. Me nguaisei, ngdi Jesus a mle ngodech a belkul a tekoi el lebilsterir a redisaiplo er ngii.