2 EL SUOBEL

A Ungil Rolel a Cheldecheduch

2 Korinth 2:17

KEDEB EL OMESODEL: Bo lungil a rolel a omongedecheduch el ochotii a mera el uldesuem el bedul a tekoi el mosaod er ngii me tirke el lorrenges er kau.

ROLEL A MORUUL ER NGII:

Moluluuch e bo mungil el kutmeklau. Moluluuch el olengit a ngeso me bo lultebechel a uldesuem e lak di bekikl, e bai molatk er a klumech el mobang. Bo mungil el medengei aike el meklou a ultutelel el tekoi el kirem el mesaod. Molasem el mesaod lousbech a di tekingem, e lak di momelekl a derta el tekoi el ngar er a babier.

A lsekum ke melatk el mo menguiu er a Biblia me a lechub e ngta er a babier, e bo mungil medengelii me bo el sebechel el diak el meteterob a omengiuem. A lsekum ke mesaod a tekingir a rechad, e bo mungil menguiu, e mkerekikl me lak molechel er ngii.
Mongedecheduch el mera el ngar er a rengum. Molatk er a uchul me a rurrenges er kau a kirir el rongesii a klumech el mobang. E a delecherum me a rolel a cho momchim me a klikm er kau a mo ochotii el kmo ke semeriar, e soam el mesaod er a klumech el mobang.

A ungil rolel a cheldecheduch a belkul a kmo lak meterekakl a omongedecheduch. Molemolem el mengebkall er a klumech el mobang el ousbech a bleketakl e melemalt el tekoi.
Momes er tirke el orrenges er kau. Momes er a chad, engdi bom kerekikl me lak molibas er ngii. Sel moltobed er a cheldecheduch, e momes er a derta el chad el ngar er a ongdibel.