Watchtower ONLINE LIBRARY
Watchtower
ONLINE LIBRARY
Palauan
  • BIBLIA
  • BABIER
  • MITING
  • mwbr20 August 1-8 el llel
  • Reference el kirel a Subeled er a Miting er a Klengar me a Omesiunged

Ngdiak a video el kirel tiang.

Mousubes, ngdimlak el sebechel el load a video.

  • Reference el kirel a Subeled er a Miting er a Klengar me a Omesiunged
  • Reference el kirel a Subeled er a Miting er a Klengar me a Omesiunged—2020
  • Mekekerei el Dai el Ngar er a Suobel
  • August 3-9
  • August 10-16
  • August 17-23
  • August 24-30
  • August 31–September 6
Reference el kirel a Subeled er a Miting er a Klengar me a Omesiunged—2020
mwbr20 August 1-8 el llel

Reference el kirel a Subeled er a Miting er a Klengar me a Omesiunged

August 3-9

MEKREOS EL TEKOI EL NGAR ER A BIBLIA | EXODUS 13-14

“‘Mkilou a Rengmiu e Bo Momes . . . er a RUBAK . . . a Bo Lolsobel er Kemiu’”

w13 2/1 4

Moses​—A Chad el Uluumerang

Nglocha dimlak lodengei el kmo a Dios a kmedu el mo omii er a Bekerkard el Daob me bo el sebechir a rechad er a Israel el chemiis. Engdi ngmle ulterekokl a rengul el kmo a Dios a mo kutmeklii a tekoi el mo omekerreu er a rechedal. Ngdirrek el mle soal a rekldemel el chad er a Israel a bo loba osisiu el klaumerang. Kede menguiu el kmo: “Ma Moses a ulenger er a re chad el kmo, ‘Lak kom medakt! Mkilou a rengmiu, e bo momes a ikel bo loruul a RUBAK er chelechang a bo lolsobel er kemiu.’” (Exodus 14:13) Me ngmlo sebechel el ngosuterir el mo mesisiich a klaumerang er tir? Nguaisei, e le Biblia a melekoi el kmo: “A re chad er a Israel a uluumerang a uchul me te mlo imuul er a Bekerkard el Daob el ua luleak a medirt el chutem.” (Hebru 11:29) A klaumerang er a Moses a mlo uchul a klungiolel ngii me tirke el mlo oumerang er a Jehovah.

w18.09 25 par. 13

Ngkot el Kedidai Engdi Ngmelatk er a Rechad

13 Monguiu er a Exodus 14:19-22. Ka molatk er kau el ngar sei el obengterir a rechad er a Israel e mla metenget. A urrurt er a Ekipten a oeak ullem e kau a chelebangel er a Bekerkard el Daob e seikid e a Dios a mocha meruul a tekoi. E sel chelsakl el eabed el mle blechoel el ngar medam a melukl el mo er uriul er a camp el ngar er a delongelem kau me a rechad er a Ekipten. Me chelechang e te ngar er a ilkolk engdi camp er kau a dmiich er a llomes! E seikid e ke mesa Moses el odersii a chimal el mo er bebul a daob e a mesisiich el eltel a ongos a mei el mingii a daob el mora bitang me a bitang. Me kau me a telungalek er kau me a chermiu a blechobech el merael er a bertakl el obengterir a rokui el chad. Me ngkmal mechas a rengum er a bertakl el diak el mengelengelt e lebekititerachel e ngbai medirt e medecherecher me ngbeot a dorael er ngii. Me tia mlo uchul me tirke el kot el meoud el merael a mlo sebechir el merael el mora bitang el dimlak el mekesakl.

w09-E 3/15 7 par. 2-3

Ngdiak el Kirem el Lobes er a Jehovah

A rechad er a Ekipten a milengelengelt a kuruma er tir er a mekemad engdi rechad er a Israel el rokui a mlo imuul el mora chelechol el ngar er a ongos. Me a Moses a mocha odersii chimal er bebul a Bekerkard el Daob. Tiakid e a Jehovah a ultengel aika el kboub el daob el meriou. Me a betok el miliol el tol el daob a mlosiu el ielebii a Farao me a rechedal er a mekemad me te riros el mad. Ngdimlak a ta er tirka el cheraro el suobel. Me a Israel a mlo mimokl!​—Exo. 14:26-28; Psa. 136:13-15.

A chisel tia el tekoi a rirelleterir aike el renged el liliuekl er tir el kmal mo medakt. (Exo. 15:14-16) A okeua el rak er uriul, e a Rahab er a Jeriko a dilu er a reteru el chad er a Israel el kmo: “Kemam el rokui a di medakt er kemiu. Aki rirenges el kmo ng milekera RUBAK er a lukdertii a Bekerkard el Daob el ngar medemiu er ser cho mtobed er a Ekipten.” (Jos. 2:9, 10) Me aika el renged el milengull a klsuul chelid me te dirrek el dimlak el lobes el kmo ngmilekera Jehovah er a lolsobel er a rechedal. Ngbleketakl el kmo a rechad er a Israel a mla er ngii a ungil uchul e ngdiak el kirir el obes er a Jehovah.

Morriter er a Tekingel a Dios

it-1-E 1117

Rael

A irechar e a rael, el uldimukl aike el rolel a otekiul a oteruul el klalo er a delongelel a beluu, a milech a mats me a renged er a Palestine. (Ule 20:17-19; 21:21, 22; 22:5, 21-23; Jos 2:22; Men 21:19; 1Sa 6:9, 12; 13:17, 18) Sel rael el ble leblechoel lousbech er ngii el mo er sel mlo Beluu er a Nglat, a mlara Ekipten e merael el bedul a mats er a Filistia er a Gasa me a Askelon e melemolem el bedul a diluchesungos el mora Megido. Tia el rael a millemolem el mora Hasor el mlara diluches er a Daob er a Galilea, e mora Damaskus. Me tia el rael el ulekiu a Filistia a mle kot el kedeb el rael el mora Beluu er a Nglat. Me nguaisei, engdi Jehovah a ulemekrael er tir el moeak a ta er a rael le ngdimlak el soal a rechad er a Israel a bo lemedakt er a odelecheklir er a rechad er a Filistia.​—Exo 13:17.

it-1-E 782 par. 2-3

Tebedir

A Bekerkard el Daob ngulebii er ker me bo lsebechir a rechad er a Israel el mo imuul?

A rechad er a Israel er a lebocha er a Etham “el ngar a tkul a ked,” e a Dios a dilu er a Moses “me lluut el mor a medal a beluu er a Pihahiroth, . . . er bita er a daob.” Tia el blekeradel a rirellii a Farao el mo omdasu el kmo a rechad er a Israel a mirrael el “diak lodengei el kmo te mor.” (Exo 13:20; 14:1-3, NW) A rechellimosk el tir a omdasu el kmo tia el basio el le blo er ngii a mle sel rael er a el Haj a melekoi el kmo, a tekoi er a Hebru el “lluut el mor a” diak el belkul a kmo “mobitokl” me a lechub e ng “lmuut kung” e ngbai mesaod er a mo touchakl. Te melekoi el kmo a rechad er a Israel a locha mlora diluches er medal a daob er a Suez e tiluchakl el mo meliuekl el mora ongos er a bita er a Jebel ʽAtaqah, el ngii a rois el ngar er a dimes er tia el Daob. Me ngbelkul a kmo, a klou el seked el ua rechad er a Israel a diak el sebechir el mereched er tir losiik a rolel a chiis a lsekum a rechad el uleltoir er tir a mla er a diluches el mei, e le te mo telengetongel er a daob.

A doltirakl er a klaumerang er a Rechijudea er a kot el dart el rak, e tiakid a omesodel a omerellir. Me nguaisei, engdi sel lmuut el klou a ultutelel a kmo tia oltirakl er a Biblia, alta rebetok el chellimosk a diak loumerang er tia el tekoi. (Exo 14:9-16) Me sel basio el blo leiuul er ngii a mla er a melengel tia el daob me ngdimlak el sebechir a resoldau er a Farao el di uleak a beluu e lolengel er tir sel loiuelii a Bekerkard el Daob.​—Exo 14:22, 23.

August 10-16

MEKREOS EL TEKOI EL NGAR ER A BIBLIA | EXODUS 15-16

“Moldanges er a Jehovah el Loeak a Chelitakl”

w95-E 10/15 11 par. 11

Ngera Me Ngkirem el Mengull er a Mera el Dios er Chelechang?

11 A Jehovah er a lokngemedeterir a resoldau er a Ekipten e ngmlo uchul odengesel er osengir a remengull er ngii e mlo uchul me a ngklel a mlukebkall. (Josua 2:9, 10; 4:23, 24) Nguaisei a ngklel a mlukebkall e le tirke el klsuul chelid er a Ekipten a dimlak a klisichir el mo olsobel er a remengull er tir. A klaumerang er tir er a chedrir me a dirrek el redi chad a mlo uchul a klengiterreng el kirir. (Psalm 146:3) Sei a uchul me a rechad er a Israel a milengitakl a chelitakl er odanges el ullecholt er a omengull er tir er a di ngar el Dios, el ngii a olsobel er a rechedal!

w95-E 10/15 11-12 par. 15-16

Ngera Me Ngkirem el Mengull er a Mera el Dios er Chelechang?

15 Ulekum kede mle ta er tirke el dilechor el obengkel a Moses e kede dirrek el locha mlo mengitakl el kmo: “RUBAK, ng techa ua ikau, el mengasireng er a chelsel a cheledaol? Ng techa ua ikau, el meruul a ngar ngii a klisichel el ureor e kdekudel a mesisiich el omerellem?” (Exodus 15:11) Aika el osisiu el tekoi a uldesuir a rebetok el chad er a irechar el mei er chelechang. Ngar sel ulebongel el babier er a Biblia e a apostol Johanes a mesaod el kirir a rengellitel el mesiungel a Dios el kmo: Te “mengitakl er a cheliteklel a Moses, el mesiungel a Dios, ma cheliteklel a Ngelekel a Sib.” Tia ngera el kmal ungil chelitakl? “Rubak el Dios el Olab a Bek el Klisiich, a urerem a meklou e mengasireng! King er a ikel beluu er a beluulechad, a rolem a melemalt e merang. Ng techa diak bo le mechas a rengul er kau e Rubang? Ng techa diak bo lomerk a chetengem? Ng di kau el tang a chedaol.”​—Ocholt 15:2-4.

16 Chelecha el taem e a remesiungel a Jehovah el tir a mla mo mimokl a dirrek el oba omereng el saul el kirel a mengasireng el urerel, e dirrek el oba omereng el saul el kirel a llechul. A rechad er a rokui el renged a mla nguu a ilmokl er a tekoi er a klereng e mla mo cheroid er tia el ulekidokl el beluulechad e le te mla mo medengei e mla mo oltirakl a melemalt el llechul a Jehovah. Ngbek el rak e te betok el dart el telael a mla mo cheroid er tia el mekngit el beluulechad e mo chedal a klikiid el cheldebechelel a Jehovah. Ngdi kmedung, el uriul er a Jehovah a lotutii a kerrekerilel el mora klsuul klechelid e lokngemedii a mekngit el blekeradel er tia el beluulechad, e te mo kiei el diak a ulebengelel el ngar er a beches el blekeradel.

it-2-E 454 par. 1

Ongngak

Tirke el mle chad er a ongngak er a taem er a Israel a locha mle blii el mo eru el group el ta choiteklii a tang e kuk mo tang, me a lechub e ngmle di ta el chad a mengitakl e mla er ngii a rechad er a chorus. Ngar er a bades e tia el rolel a omengitakl a losaod er ngii el kmo a tang a choiteklii a tang e a kuk tang ‘mengitakl’ el onger er a cheliteklel. (Exo 15:21; 1Sa 18:6, 7) Tia el rolel a omengitakl a sebeched el mesa er a teletelel a loluches a bebil psalm, el ua Psalm 136. A omesodel aike el eru el meklou el choir er omereng el saul er a taem er a Nehemia me aike el urerir er a taem er a omengedolel a cheuotelel a Jerusalem a ochotii el kmo tiakid a mle rolel a longitakl.​—Neh 12:31, 38, 40-42, NW.

it-2-E 698

Redil el Profet

A Miriam a ngike el kot el redil el ledu Biblia el kmo ngmle profet. A Dios a millekoi a bebil tekoi el oeak ngii, el locha mlukreng el chelitakl. (Exo 15:20, 21) Sei a uchul e ngii me a Aron a dilu er a Moses el kmo: “A RUBAK ng di milengedecheduch el oeak a Moses? Ng diak dilerrek el mengedecheduch el oeak kid?” (Ule 12:2) Me a Jehovah, el oeak a profet Mika, a dirrek el dilu el kmo ngulderechii a “Moses ma Aron ma Miriam” el mo oltobed er a rechad er a Israel er a Ekipten. (Mik 6:4) Me alta Miriam a mla er ngii a ileakl el techellel el Dios a uluusbech er ngii el mo melekoi a tekingel, engdi Moses a mla er bab a deruchellel er ngii. Seikid er a bo lak loba tabesul el uldasu el kirel a ngerechelel, e a Dios a milelsii.​—Ule 12:1-15.

Morriter er a Tekingel a Dios

w11-E 9/1 14

Ke Medengei el Kmo Ngerang?

Ngera bebil uchul me a Jehovah a millilt a quail el mo kelir a rechad er a Israel er a lengar er a ked?

A rechad er a Israel er a letobed er a Ekipten e ngmle eru el taem el Dios a mesterir a betok el kelir el quail.​—Exodus 16:13; Ulecherangel 11:31.

A quail a mekekerei el charm el suebek el 7 el ints a klemengetel e 3.5 el ounce a berredel. Aika kiei er aike el beluu el ngar ngebard er a Asia me a Europe. Aika el charm a blechoel el meleklukl a beluu me sel blsechel a kelekolt e ngmora North Africa me a Arabia. Sel bo el blsechel a omelukl e a klou el delebechel a suebek el mei engelakl er a Daob er a Mediterranea me a Sinai Peninsula.

Me a doltirakl er a The New Westminster Dictionary of the Bible, e aika el quail a “bekerurt e ungil suebek el ousbech er a klisichel a eolt, engdi lsekum e ngmengodech a rolel a eolt me a lechub aika el quail a mo mesaul er a omerael, e tia el rokir el delebechel a sebechel el di ruebet el me metilech er a chutem.” A uchei er a lolemolem er a omerollir e ngkirir el di telilech e olengull el ta el mo eru el klebesei, me ngkmal beot er a rechad el melai el mo kall. Ngar er a uchelel aike el rak er a 1900 e a rechad er a Ekipten a ulelterau a bekord el 3 miliol el quail er a bek el rak el mora bebil er a beluu.

Ngar er aike el taem el rechad er a Israel a milenga quail e ngmle blsechel a dellomel el omekdubech. Me alta aika el charm a mle blechoel suebek el lengelakl er a Sinai er choua tiakid el taem, me nguaisei engdi Jehovah a ngii a mle “odureklii a eolt” el ngilai aika el quail el mora camp er a rechad er a Israel.​—Ulecherangel 11:31.

w06-E 1/15 31

A Ker el Mla er a Remenguiu

Kedeb el taem er uriul er a Jehovah a losobelterir er a Ekipten, e te mlo mengeremrum el kirel a kall. Me a Jehovah milsterir a mana. (Exodus 12:17, 18; 16:1-5) Ngar tiakid el taem e a Moses a dilu er a Aron el kmo: “Mnguu a bekai el mei e mlecha erul quart el mana er a chelsel, e mlia er medal a RUBAK el mo medechel el kirir a ruldidellel a rsechiu.” Ngmelemolem a bades el melekoi el kmo: “Ma Aron a lilia er medal a Blil a Telbiil [el basio lomelecha meklou a ultutelel babier er a chelsel] me ng mo medechel el ua le dilu RUBAK er a Moses.” (Exodus 16:33, 34) Me a Aron a locha lilecha aika el mana er a bekai er tiakid el taem. Me nguaisei, engdi ngmle kirel mengiil el mo er sel taem el Moses a rullii a Blil a Telbiil e locha ike el Teruich Llach er a chelsel, e ngii mochu sebechel el nguu a bekai loia er a chelsel.

August 17-23

MEKREOS EL TEKOI EL NGAR ER A BIBLIA | EXODUS 17-18

“A Rudam el Tabesul a Uldesuir a Olisechakl e Omekngerachel”

w13 2/1 6

Moses​—A Chad el Uluubltikerreng

A Moses a dirrek el uluubltikerreng el mo er a rekldemel el chad er a Israel. Te mle medengei el kmo a Jehovah a uluusbech er ngii el omekrael er a rechedal, me te mlo er ngii el olengit a ngeso. A Bades a kmo: “Ma re chad a mle iliuekl er ngii er a tutau el mo kebesengei.” (Exodus 18:13-16) Ngulterekokl a Moses el kmal mlo mesaul a bedengel me a rengul e le ngta el sils el di lorrenges a mondai er a rechad. Me nguaisei, engdi ngkmal mle dmeu a rengul el olengeseu er a rebetik er a rengul.

w03-E 11/1 6 par. 1

A Dekaumerang er a Delongeled a Klou a Ultutelel er a Deurreng er a Klengar

Tirka el chad a ulecholt a blekerdelel a Jehovah er a uchei er a lemetutk el mo ngmai a ngerachel. Te ulechotii el kmo te mengull er a Dios. Te ulechotii el kmo te medakt el meruul a tekoi el mo kingtir a rengul. Ngbleketakl el kmo, a rechad a mesa el kmo tirka el chad a mlora tkurrebab el klisichir el mo otirakl a llechul a Dios. Ngdimlak lomulak e lolai a ududir a rebebil, e tia ochotii el kmo ngmle mesisiich a klaumerang er tir er a llechul a Dios el ngar er a Biblia me ngdiak bo lemekesuseu sel lengai a bebil klisiich. Ngdiak bo lemeterekakl er a ngerechelir e losiik a rolel e loruul a tekoi el mo uchul a klungiolir, tir me a resechelirir me a telungalek er tir.

w02-E 5/15 25 par. 5

A Blakerreng a Omekrael er a Remelemalt a Rengrir

A Moses a dirrek el mle tabesul a uldesuel e ngariou a rengul. Sel taem el kmal mlo oberaod a ngerechelel e a Jethro el demal a bechil, a milsang a ungil uldasu: Mngai a bebil ngerachel el mesterir a rebebil er a rechad el ngar ngii a duch er tir. Me a Moses a mle medengelii a telkelel me ngkilengei er a uldesuel a Jethro. (Exodus 18:17-26; Ulecherangel 12:3) Me a chad el tabesul a uldesuel a diak lechetil el omekngerachel er a rebebil me a lechub e lomdasu el kmo ngmo diak longedereder a lebesterir a bebil el ngerachel er a rekuk bebil. (Ulecherangel 11:16, 17, 26-29) Ngbai kmal semeriar el olengeseu er a rebebil el mo olengeriakl er a tekoi er a klereng. (1 Timothy 4:15) Kid ngdiak le dirrek el kired el mo oba tia el osisiu el uldasu?

Morriter er a Tekingel a Dios

w16.09 10 par. 14

“Lak Bechei a Chimam Me di Le Chelirarou!”

14 A Aron me a Hur a ngilsuir a Moses me ngdimlak lemechirarou a chimal er sel taem er a loumekemad er a rechad er a Amalek. Me chelecha el taem, e ngungil el kuk domtab a rolel e ngsebeched el olengeseu er a rebebil. A rebebil er kid a mechudelang, me a resmecher, me a dirrek el chelebangel a ultok er a rechederir, me a remekngit a rengrir me a remla mad a rebetik er a rengrir. Ngdirrek el sebeched el melisiich er a remekekerei, el tir a chelebangel a orimel el kirel a mekngit el omeruul, me a lechub e ngchetengakl er tia el beluulechad. (1 Th. 3:1-3; 5:11, 14) Mosiik a techall e molecholt er a klemeriarreng er kau el mo er a rebebil el ngar er a Blil a Ongdibel, me sel moldingel, me sel taem el mdak lomengur me a lechub e kom chadecheduch er a dengua.

it-1-E 406

Babier el Uldimukl er a Biblia

Ngbelkul a kmo aika el lulluches a Moses a mlukreng er a Dios e sebeched el lousbech el kirel a bliochel el omengull e diak doumededenger el kirel. A Moses a dimlak di le ble ngii el ngiltii el mo omekrael e omecheliu er a rechad er a Israel, nguaisei a Moses er a kot luchul e ngdimlak el soal. (Exo 3:10, 11; 4:10-14) A Dios a silsichii a Moses e milsa klisichel el mo meruul a mengasireng el tekoi me ngmo lmuut er a rechad er a olai er a Farao me te mlo melekoi el kmo ngngiluu a klisichel er a Dios. (Exo 4:1-9; 8:16-19) Me ngdimlak le uldesuel a Moses el soal mo melekingel a Dios e bo loluches a mlukreng el tekingel. Ngbai ullengesenges a tekingel a Dios me a dirrek el klisichel a chedaol reng a milekrolii el mo melekoi e dirrek meluches aike el babier el mlo uldimukl er a Biblia.​—Exo 17:14.

August 24-30

MEKREOS EL TEKOI EL NGAR ER A BIBLIA | EXODUS 19-20

“Aike el Teruich el Llach Me Kau”

w89-E 11/15 6 par. 1

Aike el Teruich el Llach, Ngngera Belkul Kirem?

Aike el kot el eua el llach a olecholt er a deruchelled er medal a Jehovah. (Kot) Ngii a kirel di ngii el tang a dongull er ngii. (Mateus 4:10) (Ongerung) Ngdiak el kirir a remengull er ngii el ousbech a bleob. (1 Johanes 5:21) (Ongedei) Ngkired el olecholt omengull sel dousbech er a ngklel a Dios el diak demeterekakl er ngii. (Johanes 17:26; Rom 10:13) (Ongeuang) A klengar er kid el rokir a kirel ochotii el kmo kede ngmai a tekoi er a klereng el mo kot. Tia uchul me ngsebeched el nguu a ‘ulengull er a Dios’ el diak dosiik er a di llemelted.​—Hebru 4:9, 10.

w89-E 11/15 6 par. 2-3

Aike el Teruich el Llach, Ngngera Belkul Kirem?

(Ongeim) A rengalek sel lolengesenges er a rechad er a blirir e ngmo uchul e ngngar er ngii a kltarreng er a telungalek me a klengeltengat er a Jehovah. Tia el “kot el llach el uldak er a telbiil” a mera el ungil el omelatk! Tia diak di bo luchul e ngmo ‘ungilbesul a rokui el tekoi er kau’ engdi ngdirrek el mo sebechem el ‘chad el meketeket er tial beluulchad.’ (Efesus 6:1-3) Chelecha el dekiei er a “uriul sils” er a mekngit el blekeradel er tia el beluulechad, e a blekongesenges er a Dios el kirel tia el tekoi a mesterir a omelatk el mo kiei el diak a ulebengelel.​—2 Timothy 3:1, BT; Johanes 11:26.

A bltkil a rengud el mora ngar bita er kid a uchul me ngdiak (Ongelolem) bo domekoad, (Ongeuid) de bora laokreng, (Ongeai) bo dorechorech, me a (Ongetiu) diak bo dolekoi a blulak el kirir. (1 Johanes 3:10-12; Hebru 13:4; Efesus 4:28; Mateus 5:37; Osisechakl 6:16-19) E kuk mekerang a moktek er kid el kirel a doruul a tekoi? (Ongeteruich) A llach el kirel a ngibeserreng a omeklatk er kid el kmo a Jehovah a mengerechir er kid el mo blechoel melemalt a moktek er kid e meruul a tekoi.​—Osisechakl 21:2.

Morriter er a Tekingel a Dios

it-2-E 687 par. 1-2

Prist

Kleprist er a Rekristiano. A Jehovah a tilbir el mora Israel el kmo a lsekum te lomelemii a telbiil e te mo ‘chimol beluu el prist el mo mesiou er ngii.’ (Exo 19:6) Me nguaisei engdi a kleprist er a telungalek er a Aron a di mle chungel a lmuut el ngarbab el kleprist. Tia el kleprist a mla er ngii el mengiil er tia el ngarbab el kleprist. (Heb 8:4, 5) Ngdi millemolem el mora ulebengelel a Llach er a telbiil el sel le meketmokl a beches el telbiil. (Heb 7:11-14; 8:6, 7, 13) Tia el ileakl techall el mo prist er a Rengedel a Dios a kot e ngmlo er a rechad er a Israel e mochu er a Rechisentael.​—Rel 10:34, 35; 15:14; Rom 10:21.

Te di mle mekesai el Chijudea a kilengei er a Jesus me a uchul me tia el renged a dimlak el sebechel el churrengelii a ildisir tirke el mo prist el mo chedal tia el chedaol el renged. (Rom 11:7, 20) Me a Israel el mlo diak loba blakerreng a uchul me a betok el dart er rak er a uchei e a Dios a dilu er tir el oeak a Profet el Hosea el kmo: “Kemiu el prist a ulkor el mengetukel er ngak e mla otngakl osisecheklek, misei e ak ultngakl er kemiu ma re ngelekiu el sechal el mo diak ko prist er ngak.” (Hos 4:6) Me a uchul me a Jesus a dilu er a remengeteklir a Rechijudea el kmo: “A Rengedel a Dios a bo le nguu er kemiu el mesterir a re bebil er a re chad el tirkel mo ourodech a ungil rodech.” (Mt 21:43) Me nguaisei, a Jesus el mla er cheungel a Llach er a lengar tia el chutem a miltebengii el kmo, a kleprist er a Aron a dirk mla er ngii a klisichel a uchul me ngdilu er tirke el lulemekungil er tir er a chebedes me lebora prist e leruul a tengetengir.​—Mt 8:4; Mk 1:44; Lk 17:14.

w04 3/1 31 par. 1

Suobel el Mla er a Babier er a Exodus

20:5​—Ngmekera e a Jehovah a “lomals el kirel a kngterir a rechedam” e tiang a dirrek el mo er a lmuut el betok el telecheroll er tir? Sel lebocha leklou el chad, e a derta el chad a mukerrekeriil el kirel a blekerdelel ma uldesuel. Engdi a renged er a Israel er a bo longull el meluluuch a bleob, e te mlo melechesuar a kngtil tiang el mo er a betok el telecheroll er tir er a uriul. Ngmo lmuut er tirke el blak a rengrir el chad er a Israel a dirrek el mle meringel er tir el oltirakl er a rolel a llemalt e le tirke el mekngit el chad a uchul.

August 31–September 6

MEKREOS EL TEKOI EL NGAR ER A BIBLIA | EXODUS 21-22

“Mochotii el Kmo Ke Oba Uldesuel a Jehovah el Kirel a Klengar”

it-1-E 271

Mengelebed

A chad er a Hebru a mle sebechel cholebedii a sibai er ngii a lsekum e ngmlo diak lorrenges me a lechub e ngmlo omtok er ngii. Engdi a lsekum e ngika el sibai a milechelebed el mad, e ngika el merredelel a kirel mo obals. A lsekum e ngika el sibai a mle chad el ta me a lechub e ngeru el klebesei er uriul er a lemechelebed e mad, e ngochotii el kmo ngdimlak er a rengul a omekoad er ngii. Ngika mla er ngii a llemeltel e mengelebed er ngii e le ngika el sibai a “kloklel.” Me a chad a diak el soal el tomellii a kloklel el lulengoit a udoud el kirel e le ngmo diak a ngera el lenguu. Ngdirrek el lsekum a sibai a mad er a uriul er a ta me a lechub e ngeru el klebesei, e ngdiak el sebeched el kmo ngmlad el chelebed a uchul. Me a lsekum e ngmlad er a ta me a lechub e ngeru el klebesei er a uriul e ngika el merreder a diak bo lobals.​—Exo 21:20, 21.

(Exodus 21:22, 23, NW) “A resechal a le kakoad el letemellii a dioll el redil me ngmechelleterir a rengelekel engdi ngdiak a mad, e ngike el tilemellii a ulterekokl el mo obals el oltirakl a bo el dung a bechil ngii el redil, e kmal kirel el mo mengkad a blsel el lokiu a kerrekeriil. 23 Engdi a lsekum ngmlo er ngii a kodall, e a blsel a mo klengar el kirel a klengar.”

lv 7 el bliongel par. 16

Kau Ke Oba Osengel a Dios el Omes er a Klengar el Mekreos?

16 Ngmo lmuut er a klengar er a dirkak lemechell el ngalek me ngmekreos er a osengel a Dios. A Llach er a Moses a kmo: “A resechal a le kakoad el letemellii a dioll el redil me . . . ngmlo er ngii a kodall, e a blsel a mo klengar el kirel a klengar.” (Monguiu er a Exodus 21:22, 23, NW.) Me a lsekum a chad a tomellii a redil el dioll me ngmad me a lechub e a ngelekel a mad, e ngar er a osengel a Dios e ngika el chad a ua lulemekoad me a belsel a mo “klengar el kirel a klengar.” Me ka di molatk er a uldesuel a Jehovah el kirir tirke el diak lemochur a ildisir el dirkak lemechell el ngalek el lolecheb er tir er a bek el rak, e le ngchetirir a redil el mo mechesang er a rengelekir, e di sorir el melemolem a ngelbesel a rengrir.

w10-E 4/15 29 par. 4

A Jehovah a Soal a Obom Ulekerreu el Diak “Mekesakl”

A Llach a dirrek el ulemekerreu er a rechad er a chermir a rebebil. A lsekum a sechal kerbou a milekodir a chad e ngike el oucharm er ngii a kirel mekodir me ngdiak lluut el mo melemall er a rebebil. Ngdiak el sebechel el mo menga me a lechub e lolterau techel ngika el charm, me ngchebuul le ngdiak a ngera el lenguu ngika el chad. Engdi omko ngika el kerbou a tilemellii a chad engdi a merrederel a diak el lechetii. Ngera mo duubech? A lsekum e ngika el kerbou a uriul e ngmilekodir a chad, e ngika el kerbou me a merrederel a mo okodall. Tia llach a mle ungil uleklatk el mo er tirke el dimlak lekerekikl a chermir.​—Exo. 21:28, 29.

Morriter er a Tekingel a Dios

w10 1/1 10 par. 4-5

A Uchul Me Kede Tuib a Rengud el Mo er a Jehovah

4 A telbilel a reng er kid el mo er a Dios a kmal klou a ultutelel el tekoi, el diak di lebeot el telbiil. Me a leuaisei, e ngmekerang e sebechel el mo uchul a klungioled? Ngsebeched el omekesiu er tiang sel dolatk er a rolel e a rechad a meruul a deleuill er tir el mo uchul a klungiolir, el ua lomak a klausechelei er tir. Ngkirem el mo kongei aike el ngerechelem me bo mungil el sechelei, me bo el sebechel el mo er ngii a ungil el sechelim. Tiang a belkul a kmo, ngkirem el meruul a telbiil e le ke melechesuar el kmo ngngar er ngii a ngerechelem el mo er a sechelim. A ta er a kot el merael a chisel el klausechelei el losaod er ngii a Biblia a sel ungil el klausechelei er a David me a Jonathan. Te mirruul er a telbiil el omak er a ungil el klausechelei er tir. (Monguiu er a 1 Samuel 17:57; 18:1, 3.) Me alta e a chouaisei el klausechelei a meringel el debetik er ngii, engdi a betok el klausechelei a mo mesisiich a lsekum a rechad a di dul melechesuar a telbiil er a delongelir.​—Osisechakl 17:17; 18:24.

5 A Llach el Dios a milsterir a rechad er a Israel a mesaod a klungiaol el sebechir a rechad el ngmai el oeak sel loruul a telbiil. A lsekum a mesiou a soal el melemolem el chederedall er a ungil el mastang, e ngkirel el rullii a mesisiich el telbiil el obengkel. A Llach a kmo: “E ngdi lsekum a sibai a kmo, ‘Ng betik a renguk er a merrederek, ma bechik, ma re ngelekek, me ng diak ktobed el mo diak ksibai,’ e seikid e a merrederel a nguu el mor medal a Dios, el mor a chesimer ma lechub e ng chelseklel a tuangel e misebsii a dingal. Isei e ng mocha sibil el mor a kodellel.”​—Exodus 21:5, 6.

it-1-E 1143

Orsul a Charm

A Exodus 21:14 a locha belkul a kmo, ngmo lmuut er a prist me ngmo okodall el kirel a koadelchad, me a lechub a lsekum a chad a mo oreked a ike el orus el ngar er a olengetongel, me ngdirrek el diak el le mukerreu ngdi mo mad e lengii el milekodir a ta er a chad.​—Momekesiu er a 1Ki 2:28-34.

    Palauan Publications (1996-2024)
    Log Out
    Log In
    • Palauan
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share