Reference el kirel a Subeled er a Miting er a Klengar me a Omesiunged
January 4-10
MEKREOS EL TEKOI EL NGAR ER A BIBLIA | LEVITIKUS 18-19
“Molemolem el Klikiid”
A Rolel e Kede Omekerreu er Kid er a Ta er a Bedeklel a Satan
A Jehovah a ulemasech a mekikiongel tekoi el lurruul aike el beluu el iliuekl er a rechad er a Israel e dirrek el milengelechel er tir el kmo: “Kele mosuub a omerellir a re chad er a Kanaan el kubekemiu el mor ngii. . . . Ma beluu a mlukidokel, mak milelsii er a mekngit el omerellel.” Me ngar a osengel a chedaol el Dios er a Israel e ngomes er a blekerdelel a klengar er a rechad er a Kanaan el kmal kikiongel el uchul me a beluu el lekiei er ngii a mla mukidokel me ngdikea leklikiid.—Lev. 18:3, 25.
A Jehovah Omekrael er a Rechedal
13 A remengeteklel a bebil er a beluu a mlukrael el okiu a telkael el llomeserreng er a rechad. El ua tiang, a remengeteklir me a rechad er a Kanaan a mirruul a kmal mekngit el tekoi, el uldimukl er a chad lousechelei er a chedal, me a remengolchotaor, me a ousechelei a charm, me a omelenget er a rengelekir, me a dirrek el omengull el bleob. (Levitikus 18:6, 21-25) Ngdirrek, a remengeteklel a beluu er a Babilon me a Ekipten a mle kakerous a llecherir el kirel a omengikiid er aike el llach el luleltirakl a rechedal a Dios. (Ulecherangel 19:13) Me nguaisei, engdi a rechedal a Dios a mle sebechir el mesa rolel, e a rechad el ulemekrael a millisiich er tir el mo melemolem el loba klikiid el omengull, e klikiid a bedengir e mengeroid er tir er a mekikiongel el rolel a durs. Me ngkmal bleketakl el kmo a Jehovah a omekrael er tir.
A Tekoi el Bo Loruul a Dios el Kirel a Mekngit
E ngera mo duubech el mo er tirke el chetirir el obult er a mekngit el omerellir e di melemolem el meruul a mekngit? Molatk er tia el bleketakl el telbiil el kmo: “A re melemalt e diak a telemellir el chad a mo kiei er a beluu el diak bo le cheroid er ngii. Ngdi Dios a mo melai er a re dengerenger el oltobed er tir er a beluu, e mengurs er a re mekngit el chad el oltobed er tir er ngii el ua lomadel a dellomel er a chutem.” (Osisechakl 2:21, 22) Me ngmo diak a mekngit el chad el mengesuseu er a rebebil el mo meruul a mekngit. Me a rebekongesenges el chad a mo kiei el ngar er a budech e a cherengel a taem e te mo mengubet er a klengit e mo cherrungel.—Rom 6:17, 18; 8:21.
Morriter er a Tekingel a Dios
“Ng Meral Betik a Renguk er a Llechum!”
11 A ongeru el telengtengil a Llach er a Moses el olecholt er a ulekerreuil a Dios el mo er a rechedal a sel llemeltir el meruu a kall. A Jehovah a mlellach er a rechad er a Israel el ousers el kmo a uriul er a loridm a rodech er a sersir, e a remechebuul a sebechir el meruu aike el rodech el mlo medechel. A rechad er a sers a diak el kirir el meridm a tkul a sersir el rokir, ma ka lolai aike el medechel el redechel a dellomel er a bilong ma olib. Aike el mlechoit el kokumots a mo medechel el kirir a remetacherbesrir ma rechad er a ngodech el beluu ma rengalek el diak a demerir ma rederrir ma remellakl el dil. Me nguaisei, a omeruu el kall a meringel el ureor, engdi ngoeak itia el rolel, e ngdiak bo lolengetngit a kall.—Levitikus 19:9, 10; Duteronomi 24:19-22; Psalm 37:25.
January 11-17
MEKREOS EL TEKOI EL NGAR ER A BIBLIA | LEVITIKUS 20-21
“A Jehovah a Meleakl er a Rechedal”
A Paradis—el Kirem?
12 E dirrek, e ngngar er ngii a kuk ta er a tekoi el diak el kired el obes er ngii. A Dios a millekoi er a rengelekel a Israel el kmo: “Molengesenges a bek el kulekoi er kemiu er chelechang, me bo le sebechiu el mo imuul er omoachel, e bo moubeluu er a beluu el bocha msiseb er ngii.” (Duteronomi 11:8) El ngar er a Levitikus 20:22, 24, sel osisiu el chutem a losaod er ngii el kmo: “A le ua isei e moltirakl a llechuk ma bek el kulekoi, e moltaut; me kngikemiu el mor a beluu el bo mkiei er ngii a lak bo loldik er kemiu. E ngdi ngak a mla dmu er kemiu el kmo kom mo oubeluu er a belurir, ak mo meskemiu me ng mo belumiu, ngbeluu el ungil a chetemel e ungil a dellomel er ngii.” Chochoi, a bo loubeluu er a Beluu er a Nglat a mle ultuil er a ungil el deluill er tir ma Jehovah el Dios. E le tir el ngalek er a Israel a dimlak lolengesenges er ngii ma uchul ma Dios a milechititerir a rechad er a Babilon el mo mesisiich er tir e ngoititerir el mo cheroid er a belurir.
it-1-E 1199
Diukes
Ngii di el chutem el sel lemad a chad e ngmo er tirke el moudiukes er ngii. A tekoi er a Hebru el lousbech er ngii a na·chalʹ (na·chalahʹ). Tia mesaod el kirel a omelai me a lechub e kede omsa chutem el mora re oeak uriul, el tirke el moudiukes. (Ule 26:55; Ese 46:18) A tekoi el ya·rashʹ a lebebil e te ousbech er ngii el “mludiukes” engdi oumesingd el taem e ngmelutk el kirel a “nguu a beluu.” (Gen 15:3; Lev 20:24) Ngdirrek el belkul a “modik er a beluu me a mengai a beluu er tir” el oeak a mekemad. (Dut 2:12; 31:3, NW) Aike el tekoi er a Grik el melutk el kirel a diukes a mengai er a kleʹros el belkul a kmo, ‘merous’ engdi uriul e a belkul a mlo “blingelel,” e chelechang e a belkul a “diukes.”—Mt 27:35; Rel 1:17; 26:18, BT.
it-1-E 317 par. 2
Charm el Suebek
Uriul er a Ieleb, e a Noah millenget a “klikiid el . . . suebek el charm” me a bebil charm. (Gen 8:18-20) Seikid el taem e a Dios a mlo kongei er a rechad me te menga charm a lsekum te otobed a rsechel. (Gen 9:1-4; momekesiu er a Lev 7:26; 17:13.) A ‘klikiid’ el suebek el charm el losaod a melutk el kirel aike el lekengei a Dios el mo tenget. A Biblia ochotii el kmo ngmle sebechir el menga ngii di el charm, engdi sera lebo er ngii a Llach er a Moses, e ngii a mlo er ngii a “diak le klikiid” el charm el diak el sebeched el mengang. (Lev 11:13-19, 46, 47; 20:25; Dut 14:11-20) Me a Biblia a diak louchais er a uchul me a bebil suebek el charm a “diak le klikiid.” Me alta oumesingd er ngii aike el suebek el charm el menga kuk bebil er a charm, engdi ngar ngii a bebil dimlak longa charm el uldimukl er ngii. Aika el charm a mlo diak le blul er sel taem er a lemeketmokl a beches el telbiil, el ua lulemeketakl er ngii a Dios el mora Petrus el ngar er a ues.—Rel 10:9-15.
Morriter er a Tekingel a Dios
it-1-E 563
Melauch a Bedenged
A Llechul a Dios a dimlak lekengei er a rechad a loludauch a bedengir el kirir a rulekoad. (Lev 19:28; 21:5; Dut 14:1) A Israel a mle chedaol chedal a Jehovah, te mekreos el kloklel. (Dut 14:2) Me ngmle kirir el klikiid er a ngii di lomengull el bleob el chelid. Ngdirrek a imis el blekeradel lolechotel omengeiung el uldimukl er a loludauch a bedengir, a diak le melemalt el tekoi e le te mle medengelii a blekerdelir a rulekoad e medengelii a omelatk er a okiis. (Dan 12:13; Heb 11:19) Ngdirrek a lak loludauch a bedengir e te ochotii omengull el kirel a blebelel a Jehovah, el ngii a milebii a bedengel a chad.
January 18-24
MEKREOS EL TEKOI EL NGAR ER A BIBLIA | LEVITIKUS 22-23
“Aike el Chedaol Sils me a Belkul el Kired”
it-1-E 826-827
Chedaol Sils er a Diak Omkukel Blauang
A kot el sils er a chedaol sils er a Diak Omkukel Blauang a chedaol ongdibel, e dirrek el ulengull el sils. A ongeru el sils el Nisan 16, e te merridm a kot el rdechel a barley e ngilai el mo msa prist, e aika el barley a mle kot el dellomel el mo ourodech er aike el beluu er a Palestine. A uchei er tia el chedaol sils e ngdiak el sebechir el menga beches el grain, blauang, me a lechub e ngdelul grain er a taem er a omeridm. Sel taem el prist a melenget er a ta rekil ngelekel a sib e nguldersii tia el ulechull el grain lobengkel a tenget el grain el rremotel er a cheluchul olib me a tenget el ilumel. (Lev 23:6-14) Ngdimlak a llach el mo melul aika el grain me a merikengko er a olengetongel, engdi uriul a reprist a mlo meruul uaisei. Me a rechad el rokui a millenget a kot el rodech, me nguaisei engdi ngsebechel a derta el telungalek me a lechub e ngderta el chad el melenget a tenget er omerengelsaul.—Exo 23:19; Dut 26:1, 2.
Belkul. Te milenga diak omkukel blauang el oltirakl a ulekrael el lengilai a Moses el debetik er a Exodus 12:14-20. Ngar er a 19 el kekerei el bades e kede menguiu el kirel a mesisiich el tekingel a Jehovah el kmo: “Ng euid el sils el diak omkukel a blauang er a blimiu.” Ngar er a Duteronomi 16:3 e ngomekedong er a diak omkukel blauang el “blauang er a ringel,” e tia ulemeklatk er a Rechijudea er a bek el rak er sera lorreched el tobed er a beluu er a Ekipten (sera lak a temir el remuul omkukel [Exo 12:34]). Me te mlo melebedebek er a ringel me a klsibai el le mlengubet er ngii el ua lolekoi a Jehovah el kmo, “tia mo omeklatk er kemiu er ser cho mtobed er a beluu er a Ekipten.” Me sel lolatk er a ilmokl el bla lenguu me a Jehovah el ngii a Osebelir, e ngmengetmokl er tir el kirel tia el kot er aike el edei el chedaol sils er a Israel el ngar ngii er a bek el rak.—Dut 16:16.
it-2-E 598 par. 2
Pentekost
Aike el kot el rdechel a wheat a dimlak el lolenget el uaike el rdechel a barley. A eua el bond el merikengko a medul el ngar ngii omkukel el mo teblo el blauang. Te ‘mo ngmai er a blirir’ el belkul a kmo, aika di uaike el blauang el lousbech er a bek el sils el diak lechedaol a rellel. (Lev 23:17, NW) A delaol tenget me a tenget er a klengit a mlo modars lobengkel me a dirrek el teblo el sechal ngelekel a sib el tenget er a budech. A prist a mo odars aika el blauang me a sib el mora Jehovah loeak sel lengai aika el blauang me a techel a sib lodars el bedul bab e lolab el mong e mei lolecholt el kmo ngomsa Jehovah. Uriul er a lemodars a blauang me a sib, e a prist a mlo kmang el tenget er a budech.—Lev 23:18-20.
Kau, Ke Merael el Beduluchei el Obengkel a Cheldebechelel a Jehovah?
11 A cheldebechelel a Jehovah a melisiich er kid el mo oltirakl er a uleklatk el ledillii a Paulus el kmo: “Bo de kaukerreu e de kaingeseu el olecholt er a bltikerreng e doruul a ungil. E lak dongoit a ongdibel er kid el ua blekerdelir a re bebil er a re chad, e bai le mengal mo blak a rengud el kasisiich er chelechal domes er sel Sils er a Rubak el olekedang.” (Heb. 10:24, 25) A rechad er a Israel er a irechar a mle blechoel el kldibel e mengull er a Jehovah e dirrek el millai a ulekrael er ngii. A Chedaol Sils er a Delidui er a taem er a Nehemia a mle ta er aike el klou el ongdibel el mlo uchul a deuil a rengrir. (Exo. 23:15, 16; Neh. 8:9-18) Me chelecha el taem e ngdirrek el ngar er ngii a miting me a meklou el ongdibel er kid. Me ngkired el blechoel el teloi aika el tekoi e le ngolengeseu er kid el mo kmeed er a Jehovah e dirrek el mo dmeu a rengud el mesiou er ngii.—Tit. 2:2.
Morriter er a Tekingel a Dios
Molemolem er a Blakerreng er Kau!
3 Kid el mesiungel a Dios a omes er a blakerreng el cherrungel el bltkil a rengud me a diak lemetemall el blakerreng er kid el mora Jehovah, me kede meruul a tekoi el oldeu er a rengul er a bek el taem. Ka molatk er sel usbechel a tekoi el blakerreng er a Biblia. A ta er a belkul tia el tekoi el “blakerreng” el ngar a Biblia, a cherrungel me a lechub e ngdiak a telemellel. El ua tiang, a rechad er a Israel a millenget a charm el mora Jehovah, e a Llach a mesaod el kmo ngii el charm a kirel el cherrungel. (Lev. 22:21, 22) A rechedal a Dios a dimlak el kirir el melenget a charm el chelemus a ochil me a lechub a dingal me a lechub e ngbelechit a medal; me a lechub e ngsmecher. Ngar a osengel a Jehovah, e ngmle klou a ultutelel el kirel a charm el cherrungel me a lechub e ngdiak a telemellel. (Mal. 1: 6-9) Me ngsebeched el mo medengelii a uchul me a Jehovah a soal a cherrungel el tekoi. Kid sel domechar a klalo, el ua babier me a lechub e ngdongu me a lechub e ngrodech, e ngdiak el soad el mecherar a klalo el ngar ngii a telemellel me a lechub e ngar ngii a ngesonges er ngii. Ngsoad a cherrungel me a lechub e ngdiak a telemellel. Me a Jehovah a uaisei a uldesuel el kirel a bltkil a rengud el mo er ngii, me a blakerreng er kid el bedulngii me ngkmal kirel mo cherrungel me a lechub e ngdiak a telemellel.
January 25-31
MEKREOS EL TEKOI EL NGAR ER A BIBLIA | LEVITIKUS 24-25
“A Rak er a Ilmokl me a Ilmokl er a Ngar Medad el Taem”
it-1-E 871
Ilmokl
Dios er a Ilmokl. A Jehovah a Dios er a ilmokl. Ngika rirelleterir a rechad er a Israel el mo mimokl er a klsibai er a Ekipten. Ngdilu er tir el kmo a lsekum te melemolem loltaut a llechul e ngdiak a bo lengesonges er ngii. (Dut 15:4, 5) Me nguaisei a Llach a dirrek el dilu el kmo a lsekum a chad a mo chebuul e ngsebechel di ngii loterur el mo sibai me bo el sebechel mesiou er ngii me a telungalek er ngii, engdi a Llach a dirrek el dilu el kmo ngmo mimokl er a ongeuid el rak el mengubet er a klsibai er ngii. (Exo 21:2) Ngar er a rak er a ilmokl (el ngar ngii sel bek el okeim el rak) a beluu el rokir a mlo mimokl, el derta el chad a mo mengubet er a klsibai me a beluu el dikesir el mloterau me ngmo moluut.—Lev 25:10-19.
it-1-E 1200 par. 2
Diukes
Ngdimlak el sebechel a beluu el moterau e le ngmle kirel el melemolem el kloklel a telungalek el mora bek el telecheroll. Me a oterullel a beluu a di mle lease, loltirakl a dbechel a dellomel el motobed er aike el rak el medechel el mo er sel lluut el moluut a beluu el mo er ngike el mera el louklalo er ngii er a Rak er a Ilmokl. (Lev 25:13, 15, 23, 24) Tia el llach a dirrek el mlora aike el blai el ngar er a diak loucheuatel el beluu, e le nguldimukl er a sers er a beluu. A blai el ngar chelsel a oucheuatel el beluu a sebechel lmuut lobechar er a chelsel a ta el rak a lsekum e ngmoterau, engdi a lsekum e ngdiak el lluut lobechar er a chelsel a ta el rak e ngdimereko el kloklel ngike el mle kot el mecherar. A re Levait a sebechir el lomechar e olterau a kloklir er a ngii di el taem e le tir el dimlak a dikesir er a chutem.—Lev 25:29-34.
it-2-E 122-123
Rak er a Ilmokl
A llechul a Rak er a Ilmokl a lsekum te ullengesenges er ngii e ngulemekerreu er tir er a tekoi el desa er chelecha el taem er a betok el beluu, el ngar ngii a eru el blingelir a rechad. Te ngar ngii a rekuk kmal merau me a rekmal chebuul. Me tia el llach a uchul a klungiaol el mora derta el chad e dirrek el mlo uchul a klungiolel a renged el rokir, e le ngdiak a chad el kmal mo chebuul te bai rokui lousbech a duch er tir el meruul a mo klungiolel a renged el rokir. Me a Jehovah a ulemekngeltengat a dellemelir e olisechakl er tir. A lsekum a rechad er a Israel a millemolem el bekongesenges e ngsebechir el oldeu a rengrir el chederedall er a cherrungel el kabelment el lungil a klengar er tir, el ngii el tekoi a di sebechel meketmokl el oeak a Jehovah.—Isa 33:22.
Morriter er a Tekingel a Dios
w09-E 9/1 22 par. 4
A Lsekum a Chad a Tomellau
A lsekum a chad er a Israel a chillebedii a ta er a chad er a Israel el tomellii a bita el medal, e a Llach a dilu el kmo a chad a mo obals. Me nguaisei engdi tia diak lebelkul a kmo ngike el miltemall a mo melaitechei er ngii me a lechub e ngta er a chedal. A Llach a kmo ngmle kirir el nguu tia el tekoi el mora remengeteklel a beluu el mo sumecheklii. Me tia mle omengelechel el mo er ngike el ngar ngii er a rengul e meruul a delengerenger me a lechub a koadelchad el kmo, ngdiak lokor el mo obals. Me nguaisei, engdi ngdirk ngar ngii a dmolech el omesodel.
February 1-7
MEKREOS EL TEKOI EL NGAR ER A BIBLIA | LEVITIKUS 26-27
“Rolel a Denguu a Kengei er a Jehovah”
Moltngakl a “Diak a Ultutelel el Ureor”
8 Ngmekerang a “kerruul” e mo uai a chelid? Tiakid a olechotel, ka momdasu er a bad el medechel er a ked er a Israel er a ngar er a mong el taem. A chouai sel bad a sebechir el ousbech er ngii el meruul er a blai ma kboub. Engdi, a lsekum e te mo ousbech er ngii el meruul er a “btangch” ma lechub a “delsachel el bad,” e ngolibesongel el mo er a rechedal a Jehovah. (Levitikus 26:1) Me nguaisei, a udoud a ngar er ngii a ultutelel. Kede ousbech er ngii el kirel aike el dousbech er a klechad e dirrek el sebeched el ousbech er ngii el ngar er a omesiunged el mo er a Jehovah. (Olisechakl 7:12; Lukas 16:9) Engdi a lsekum e kede nguu a skel a udoud el mo ngar er a uchei er a omesiunged el Kristiano, e seikid e kede rullii a udoud el mo chedud. (Monguiu er a 1 Timoteus 6:9, 10.) A rechad el ngar er a chelsel tia el beluulechad a omes er a skel a kerruul el kmal klou a ultutelel el tekoi, me ngkired el mo kerekikl me bo doba tabesul el osenged el kirel tia el tekoi.—1 Timoteus 6:17-19.
it-1-E 223 par. 3
Omeluu
A rolel e a Jehovah a uluusbech er a Moses e milengedecheduch er ngii a uchul me a rechedal a Dios a ullecholt omeluu (tekoi er a Hebru el moh·raʼʹ) el mo er ngii. (Dut 34:10, 12; Exo 19:9) Tirke el mla er ngii a klaumerang er tir a ullecholt a omengull el mo er ngii. Te miltebengii el kmo a Dios a milengedecheduch er tir loeak a Moses. Te dirrek el mle kirir lolecholt a omengull el mora blil a omengull er a Jehovah. (Lev 19:30; 26:2) Tia mle belkul a kmo te mo meruul a omengull er tir loltirakl er a rolel el ledilu Jehovah e mo kiei el oltirakl a rokui el llechul.
w91 9/1 10 par. 10
A “Budech er a Dios” a Mo Kokar a Rengmiu
10 A Jehovah a dilu er tir el kmo: “A lsekum kom oltirakl a llechuk e oltaut a tekingek, e ak mo meskemiu a chull a le belsechel a chull ma chutem a mo mekdubech a dellomel ma kerrekar a mo bekerredechel. Ak mo meskemiu a budech er a belumiu, me ng sebechiu el mechiuaiu el diak kom medakt er a ngii di le chad. Ak mo oriik a kdekudel el charm er a beluu, e diak el lluut el mo er ngii a mekemad er ngii. Ak mo merael er a delongeliu, e mo Dios er kemiu, me kemiu a mo chedak.” (Levitikus 26:3, 4, 6, 12) Ngmle sebechel el oldeu a rengrir a rechad er a Israel er a budech el belkul a kmo ng omekerreu er tir er a recherrouir, e mo er ngii a betok el ungil kloklir, ma mesisiich el deleongel er tir ma Jehovah. Ng di mle kirir el mo blak a rengrir el oltirakl er a llechul a Jehovah.—Psalm 119:165.
Morriter er a Tekingel a Dios
it-2-E 617
Rakt
Mlo er Tir a Rakt Le Tir el Chiloit a Llechul a Dios. A renged er a Israel a mluchelechel el kmo a lsekum ngdiak lotireklii a telbiil el lerirellii el lobengkel a Jehovah, e ng ‘mo odurokl a diak le mukar el rakt el mor a delongelir.’ (Lev 26:14-16, 23-25; Dut 28:15, 21, 22) Me sel losaod a Bades el kirel a chad el mesisiich, el klisichel a bedengel me a lechub e ngmesisiich er a tekoi er a klereng, e ngblechoel el melutk el kmo a Dios omekngeltengat er ngii, (Dut 7:12, 15; Psa 103:1-3; Osi 3:1, 2, 7, 8; 4:21, 22; Och 21:1-4) e a rakt a melutk el kirel a klengit me kid el diak demecherrungel. (Exo 15:26; Dut 28:58-61; Isa 53:4, 5; Mt 9:2-6, 12; Jn 5:14) Me alta Jehovah a mle uchul me a rakt a dilubech er a rebebil, el ua Miriam, Usia, me a Gehasi el mlo chebedes (Ule 12:10; 2Kr 26:16-21; 2Ki 5:25-27), me nguaisei a oumesingd el taem e a rakt me a secher a mlora rechad me a beluu e le tir el mlara klengit. Te merridm a rsel omerellir, te diak lemecherrungel me te mlo chuarm el kirel a kngterir. (Gal 6:7, 8) A apostol Paulus a millekoi el kirir tirke el mirruul a deleboes el omeruul el kmo, a Dios a “milechititerir me te ngar a ikel soal a rengrir el mengelengalek el tekoi, e dmak el olab a bedengir el meruul a mekngit . . . sei a uchul e tochau a blals el kirel a mekngit el tekoi el loruul.”—Rom 1:24-27.
February 8-14
MEKREOS EL TEKOI EL NGAR ER A BIBLIA | ULECHERANGEL 1-2
“A Jehovah Omechobech er a Rechedal”
w95 6/1 9 par. 4
A Melemalt el Deruchellel a Omengull el Mo er a Jehovah er a Klengar er Kid
4 A lsekum ke suebek er a bab er a rengelekel a Israel e omes er riou er a tento er tir el ngar er a ked, ke mo omes er a ngerang? Ke omes a kmal betok el tento el kmal ungil el kltmokl el ngar er a blechobech el kilie er ngii a chede el miliol ma lechub kuk betok el chad el ngar er a kakerous el cheldebechel el omii el edei el klebliil el ngar er a diluches ma dimes ma ongos ma ngebard. A bo le kerekikl e mo kmeed el omes e ke mo omes el kmo ngar er ngii a kuk ta er a cheldebechel el kmeed er a belngel a kiamp. A ike el eua el cheldebechel er a tento a mle delengcheklir a retelungalek er a klebliil er a Levi. El ngar er a kmal belngel a kiamp e ngmla er ngii a basio el melenget er ngii a kbekbel el mamed ma chelsel tia el basio e ng mla er ngii a kmal ileakl el blai. Ng mle “Tento er a ongdibel” me a lechub e ng chedaol tento, el milteketek er ‘tirke el rokui el mlara delongelir el sebechir’ el chad er a Israel el oltirakl er a tekingel a Jehovah.—Ulecherangel 1:52, 53; 2:3, 10, 17, 18, 25; Exodus 35:10.
it-1-E 397 par. 4
Kiamp
Ngkmal mle klou a kiamp er a rechad er a Israel. A ulecherengelir a 603,550 el sechal el kirel a mekemad, el diak luldimukl er a ildisir a redil me a rengalek, remechudelang me a rechitechut, re 22,000 el Levait, me a “rubdois el chad el diak le chad er a Israel.” A ildisir el rokui a locha mle 3,000,000 me a lechub e te mle lmuut el betok. (Exo 12:38, 44; Ule 3:21-34, 39) A klungel a basio el ble le kiamp er ngii a diak lulterekokl e kakerous a uldesuir a rechad el kirel tiang. Sel taem er a le kiamp er bita er a Jeriko er a oberberk el ked er a Moab, e a kiamp er tir a lulekedechor er a “Bethjesimoth el mo lmuut er a Abelsitim.”—Ule 33:49.
Morriter er a Tekingel a Dios
it-2-E 764
Registration
Rechad el meluches a ngklir me a ruchelir, loltirakl er a kleblillir me a telungalek er tir. Tia dimlak di el omelai a ulecherengelir a rechad. Aika el omelai el registration er a renged el rokir a mla er ngii a moktek er ngii. Ngmle kirel omelai el tax e omekngerachel a ngerechelir a rechad el kirel mekemad, e a kuk denguu er a re Levait, e te ulemekngerachel er tir er a ngerechelir er a chedaol tento.
February 15-21
MEKREOS EL TEKOI EL NGAR ER A BIBLIA | ULECHERANGEL 3-4
“Urerir a Re Levait”
it-2-E 683 par. 3
Prist
Cheungel a Llach er a Telbiil. A rechad er a Israel sera lesibai er a Ekipten e a Jehovah chiledolterir a rekot el ngalek el sechal er a Israel el mo blingelel, e milekodeterir tirke el rokui el ketengel a Ekipten er a ongeteruich el ringel. (Exo 12:29; Ule 3:13) Tirka el kot el ngalek a blingelel a Jehovah el bo lousbech er tir e mo ileakl a omesiungir el mo er ngii. A Dios a mle sebechel rulleterir tirke el rokui el kot el ngalek el sechal el mo prist e mo omekerreu er a chedaol tento. Me nguaisei, engdi ngmle ungil er a moktek er ngii a lengiltiterir a rengalek el sechal er a klebliil er a Levi el kirel tia el omesiou. Tiakid a uchul e ngkilengei er a rechad er a Israel me relleterir a re Levait el mo techil a rekot el ngalek el sechal er aike el 12 el kebliil (el rengelekel a Josef er a Efraim me a Manase a blingel el mo eru el kebliil). Sera lolai a ulecherengelir a rengalek el sechal, e aike el 12 el kebliil a kuk mle betok a ildisir er a re Levait el sechal. Te mle betok er tir er a 273, el lomechur er a ta el buil el mo er bab a rekrir. Me a Dios a milengerechir er a char el kirir a rederta er tir el kleim el silber el udoud, e mo ngmai aika el udoud el msa Aron me a rengelekel. (Ule 3:11-16, 40-51) A uchei er itiang e a Jehovah a ileklii a Aron me a rengelekel er a klebliil er a Levi el mo nguu a kleprist er a beluu er a Israel.—Ule 1:1; 3:6-10.
it-2-E 241
Re Levait
Ngerechelir. A klebliil er a Levi a mle uldekial a edei el telungalek, er a rengelekel a Levi er a Gerson (Gersom), Kohath, me a Merari. (Gen 46:11; 1Kr 6:1, 16) A derta er aika el telungalek a mla er ngii a telutk el basio el lekiamp er ngii er a ked er bita er a chedaol tento. A rechad er a Kohath el telungalek er a Aron a mle kiamp er medal a chedaol tento er a ongos. Tirke el bebil er a chedal a telungalek er a Kohath a mle kiamp er a dimes, rechedal a telungalek er a Gerson a mla er ngebard, e a rechedal a telungalek er a Merari a mlara diluches. (Ule 3:23, 29, 35, 38) A re Levait a mle urerir el olab a klekedellel a chedaol tento e omekedechor e merrakl er ngii. Sel bo el temir el melukl e a Aron me a rengelekel a mle ngerechelir el mo soiseb er a chedaol tento e nguu sel kateng lomii er a Chedaol Delemerab me a Kmal Chedaol Delemerab el dokedekii a Blil a Telbiil, olengetongel, me aike el chedaol klekedall er a chedaol tento. E tirke el kuk bebil er a chedal a telungalek er a Kohath a mle ngerechelir el mengol aika el klekedall sel loleklukl mora kuk ta er a basio. A rechedal a telungalek er a Gerson a uluungerachel a dekedekel, kateng, sersel a tuangel me a siseball, me a lechetel a chedaol tento. A rechedal a telungalek er a Merari a uluungerachel a tengal, sechesel, me a melekau a tengal a chedaol tento me aike el melekau, otil, me a okul a sersel a mekesekesel chedaol tento el meliuekl.—Ule 1:50, 51; 3:25, 26, 30, 31, 36, 37; 4:4-33; 7:5-9.
it-2-E 241
Re Levait
Ngar er a taem er a Moses e a re Levait a mlo meruul a rokui el ngerechelir er a chedaol tento sel bo le 30 a rekrir, el ua omengol a klekedellel a chedaol tento sel ta el lolukl. (Ule 4:46-49) Ngmla er ngii a bebil ngerachel el mle sebechir el meruul sel bo le 25 a rekrir, engdi ngdiak el ike el meringel el ureor el ua omengol el klekedellel a chedaol tento. (Ule 8:24) Ngar er a taem er a King David e ngngilanget a rekrir a ruureor er a chedaol tento el mo 20. A uchul me a David a mirruul el uaisei e le chedaol tento (el mo mutechei er a templo) a mo diak el lluut el melukl er ngii. Te mo merek er aika el ngerechelir sel bo el 50 a rekrir. (Ule 8:25, 26; 1Kr 23:24-26) A re Levait a mle ungil medengelii a Llach, te blechoel loleker er tir el mo menguiu er a Llach e olisechakl er ngii el mora rechad.—1Kr 15:27; 2Kr 5:12; 17:7-9; Neh 8:7-9.
Morriter er a Tekingel a Dios
Bo Lemellomes a Rengum —E Moluu er a Dios!
13 Me ngoeak a ngelseuil a Jehovah el mo er a David el blo lolechesuar er a chelsel aike el meringel el taem e ngliluut el mo dmolech a klaumerang er ngii ma dektel el bedul a Dios. (Psalm 31:22-24) Engdi ngmla er ngii a edei el taem el blo lemechitechut sel dektel a David el bedul a Dios, e tiang a mlo uchul a oberaod el klengit. Sel kot el tekoi a dilubech er sera lousbech er a kareta el melukl er a blil a telbiil er a Jehovah el mo er a Jerusalem e bai dimlak loltirakl er a Llechul a Dios el kmo ngkirir a Relevait el mengol er ngii. Me sel taem er a lolasem a Usa el mo orreked er tia el Blil a Telbiil el mlo soal el kmoll, e ngmlad e le “ng dimlak le medakt el merutech er a Blil a Telbiil.” Chochoi, a Usa a rirebet er a oberaod el klengit, engdi a mera er ngii, e ngmle kngtil a David e le ngii el dimlak loba melemalt el omengull el kirel a Llechul a Dios ma uchul e tia el tekoi a dilubech. A doba dakt el mo er a Dios a belkul a kmo kede meruul a tekoi el oltirakl aike el soal.—2 Samuel 6:2-9; Ulecherangel 4:15; 7:9.
February 22-28
MEKREOS EL TEKOI EL NGAR ER A BIBLIA | ULECHERANGEL 5-6
“Ngmekera Omoukerebai er a Re Nasarait?”
it-2-E 477
Nasarait
Tirke el tilbir el mo Nasarait a mla er ngii a edei el tekoi el dimlak el sebechir el meruul: (1) Te dimlak lolim a mesisiich el ilumel, me ka longa ngii di el ngerang el mengai er a kreip a le chemadech, marek, me a lechub e ngulekngiis me a ka lolim a osechel el rruul el juice, bilong, me a lechub e ng vinegar. (2) Te dimlak longimd a chiurir. (3) Te dimlak bo lekeed er a ulekoad el chad. A le demal, delal, obekul, ochellel, me a lechub e ngochedal a lemad me ngdimlak bo lekeed er tir.—Ule 6:1-7.
Ileakl el Telbiil. A chad el rullii a “telbilel el mo Nasarait, [mechedaol, meakl] el oldars er ngii el mor a RUBAK” a diak loruul er ngii el kirel a ues el kmo ngkuk kmal tokubets a blakerreng er ngii. Ngbai “sel lileakl el mor a RUBAK el Nasarait e ng cheledaol el mor ngii.”—Ule 6:2, 8; momekesiu er a Gen 49:26.
Me aika el llach el mlora re Nasarait a mla er ngii a ileakl el belkul er a omengull el mora Jehovah. A re Nasarait a di ua ngarbab el prist el chedaol a ngerechelel a uchul me ngdimlak el bo lekeed er a ulekoad el chad el mo lmuut er a rekmal kmeed el chedal. A ngarbab el prist me tirke el prist el mla er cheungel a mle oberaod a ngerechelir me ngdimlak el sebechir el melim a bilong me a lechub e ngmesisiich el ilumel sel loruul a chedaol urerir er a medal a Jehovah.—Lev 10:8-11; 21:10, 11.
Me a lmuut el tang, a Nasarait (tekoi er a Hebru el na·zirʹ) a “kirel el mo chedaol e mechei a chiul me ng mo mekemanget” me bo luchul e a rechad lemereched el dongchii tia el chedaol ngerechelel. (Ule 6:5) Tia el osisiu el tekoi er a Hebru el na·zirʹ a luluusbech er ngii el kirel aike el ‘dimlak longedmokl’ el kreip er a temel a Ulengull el Sils me a Rak er a Ilmokl. (Lev 25:5, 11) Ngdirrek el sel besichel a dekedekel a bdelul a ngarbab el prist er a Israel a mle tubereberk el kolt el lluches er ngii a “Cheledaol el mora Jehovah.” Tia mle okedongall el “chedaol olangch [tekoi er a Hebru el neʹzer, el mengai er a osisiu el tekoi el lemengai er ngii a na·zirʹ].” (Exo 39:30, NW, 31) A krone er a mlechilt el king er a Israel a dirrek el mle okedongall el neʹzer. (2Sa 1:10; 2Ki 11:12) Ngar er a ongdibel er a Rekristiano e a apostol a melekoi el kmo a mekemanget el chiul a redil a dekedekel a bdelul. Tia ulemeklatk er ngii el kmo ngmle ngodech a deruchellel er a sechal, e mle kirel blechoel el melatk er a deruchellel er a medal a Dios. Me aike el llach el diak omengimd el chui (el tekoi el resechal a mle blechoel meruul er ngii), diak omelim el bilong, e mo klikiid e chedaol, a ulechotii el mo er ngike el tibir a rengul el mo Nasarait el kmo, ngar ngii a ulterekokl el tekoi el diak el sebechel el meruul e mle kirel cherrungel lolengesenges er a soal a Jehovah.—1Ko 11:2-16.
Morriter er a Tekingel a Dios
w05-E 1/15 30 par. 2
A Ker el Mla er a Remenguiu
Me nguaisei, a Samson a mle kuk ta er a bedengel a Nasarait. A uchei er a cherellel e a anghel er a Jehovah a dilu er a delal el kmo: “Ele kau a mo dioll e mor ngii a ngelekem el sechal. Ng diak le kirem el mengimd a chiul, ele sel sils el le mechell, e ng mo mechedaol el Nasarait el mor a Dios. Ng mo muchelii a urerel el mesebechakl er a Israel er a re chad er a Filistia.” (Mengeteklel 13:5) Me a Samson a dimlak lerellii a telbilel el mo Nasarait. Ngika miltutk er a Jehovah el mo Nasarait, e melemolem el Nasarait er a klemengetel a klengar er ngii el rokir. Me tia el llach el kirel a kmo a Nasarait a diak el sebechel merutech er a rulekoad el chad a diak el sebechel melutk el kirel a Samson. Omko me ngdimlak er a rengul e rutechii a ulekoad el chad, e ngmekera sebechel lmuut lomuchel er a uchelel a lsekum e ngmilechell el Nasarait? Me ngulterekokl aike el llach el mlo er tirke el milechell el Nasarait el ngodech er aike el loltirakl tirke el di tir el meruul a telbilir el mo Nasarait.