10 EL SUOBEL

Delecherul a Ngerem

Mateus 20:31

KEDEB EL OMESODEL: Beketakl a uldasu el molisiich, e bo lekakerous a delecherul a ngerem, me a rechedel, me a eudel el mo omeksemeriar er a rechad.

ROLEL A MORUUL ER NGII:

Bo lekakerous a delecherul a ngerem. Mkilungii a ngerem sel mosaod aike el meklou a ultutelel el tekoi, me sel molisiich er a rurrenges er kau. Moruul er a osisiu el tekoi sel monguiu a Bades el kirel a kerrekeriil el ua tiang, kerrekerilel a Jehovah el mora rechad. E bo lungil a delecherul a ngerem el rulleterir a rechad el mo semeriar el mo medengelii a ulebengelel a tekoi me a lechub e ngdakt me a lechub e ngsebekreng.

Lak lsal mo betok el taem el di monglou er a ngerem el rulleterir a rechad el mo omdasu el kmo ke oungeroel er tir. Mkerekikl me lak mochau osengir a rechad el bedulkau, e le kau el di mekudem el melodech er a delecherul a ngerem.
Bo lekakerous a klungel a ngerem. Mtelkib el smisichii a klungel a ngerem lomeksemeriar, me a lechub ke mesaod er a klungel, me a lechub a cherridel. E mongkekerei er ngii sel mosaod el kirel a klengiterreng me a lechub e ngsebekreng.
Bo lekakerous a rechedel me a eudel a cheldechedecham. Mtelkib lorechedii a delecherul a ngerem sel mosaod er a tekoi el lomeksemeriar, e mokekokau sel mosaod aike el meklou a ultutelel el tekoi.

Lak mongas a rengrir a rurrenges er kau e le ngdi mengedengodech a rechedel me a eudel a cheldechedecham. E lak kuk msal mereched el mengedecheduch el rulleterir el mo diak lodengelii a tekoi el mosaod er ngii.