Reference el kirel a Subeled er a Miting er a Klengar me a Omesiunged
JANUARY 3-9
MEKREOS EL TEKOI EL NGAR ER A BIBLIA | MENGETEKLEL 15-16
“A Cheleblad a Demerur er Ngii el Tekoi!”
Cheleblad a Olengchelel a Uriul Sils!
4 A kot, me bo dolatk er a chelebeldil a Delila el betik er a rengul a Samson. Ngii el Samson a kmal mle soal el omekoad er a rechad er a Filistia el mesebechakl er a rechedal a Dios. Me a reteim el merreder er a Filistia a locha mle medengei el kmo a Delila a dimlak lebetik a rengul er a Samson. Me te tilbir el mo msang a betok el udoud a lsekum e ngouchais er tir a uchul a klisichel a Samson, me bo el sebechir el mekodir. Me a Delila a kilengei e mocha osiik er a uchul a klisichel. Ngmlo edei el taem el lolasem el osiik er a uchul, engdi ngdimlak el sebechel. Me ng “mle tekangel el mengetiit er ngii er a bek el sils,” me a Samson a “mocha oureng el kmo a le chulekum me ng bai mad.” Me ngouchisa er ngii el kmo a chiul a uchul a klisichel me a lsekum e ngmekimd e ngoridii a klisichel. Me a Delila a milechiuii a Samson er a ochil, e dmu er a chad me lekimd a chiul, e ulterekeklii er a recherrouel me te mo er aike el sorir er ngii. (Mengeteklel 16:4, 5, 15-21) Ngkmal mle mekngit a omerellel! Me ngsel recherechel a rengul a Delila a uchul me ngulterekeklii a chad el mle betik a rengul er ngii.
Omesodel a Babier er a Mengeteklel
14:16, 17; 16:16. A dekora orrimel er a chad el oeak a llangel me a betok el tekoi a sebechel el tomelii a delongelir a rechad.—Osisechakl 19:13; 21:19.
Cheleblad a Olengchelel a Uriul Sils!
15 Te mekerang a rebechiil el chad e melemolem el blak a rengrir el mo er a rebecherir? A Tekingel a Dios a kmo: “Mosiik er a deuil a rengum el obengkel a ekebil el blo bechil,” e “moldeu er a rengum er a klengar er kau ma bechim.” (Osisechakl 5:18; Olisechakl 9:9) Me sel lorael el mo meklou el chad, e ngkmal kirir el meruul aike el sebechir el mo melisiich er a chebechiielir. Me ngbelkul a kmo ngkirir el mo kerekikl aike el lousbech er a delongelir, e dmak el terung, e olekes er a deleuill er tir. Ngkmal kirir el melisiich er a chebechiielir me a deleuill er tir el obengkel a Jehovah. Me ngkirir el dmak el mesuub a Biblia, e dmak el omerk er a klumech, e dirrek el dmak el meluluuch el kirel a klengeltengat er a Jehovah.
MOBA BLAKERRENG EL MO ER A JEHOVAH
16 Te ngar er ngii a rechad er a ongdibel el rirebet er a oberaod el klengit, e ngilai a ‘meringel el omellach me bo lultebechel el oumerang.’ (Titus 1:13) Me a omerellir a rebebil a mlo uchul e ngmle kirir el mesuld a ngklir. Engdi “tirkel ngila klubelir” er a omellach a mlongeseu, e liluut el sumecheklii a deleuill er tir el obengkel a Dios. (Hebru 12:11) E kuk mekerang a lsekum a chedad me a lechub a kmeed el sechelid a mesuld a ngklel? Seikid e ngmocha kirel el obeketakl a blakerreng er kid el kmo, ngmo er a chad me a lechub e ng Dios? A Jehovah a omes er kid me ngmedengei el kmo, kede oltirakl er sel llechul el diak dongedecheduch er a ngii di el chad el mla mesuld a ngklel me a lechub e ngdiak.—Monguiu er a 1 Korinth 5:11-13.
Morriter er a Tekingel a Dios
“Morael el Sorechii Tial Beluu”
7 Ngar er a Mengeteklel 16:2, e ngsebechem el menguiu er a Mengeteklel el Samson el ngar er a Gasa. Tia el ngakl el Gasa a blechoel el me tuobed a chisel er a chais er a chelechang, me ke locha medengelii seikid el basio el lemla er ngii a Samson, er a chelsel a beluu er a Filistia. Chelechang e mesa Mengeteklel 16:3: “E ngdi Samson a di milchiuaiu el mo sueleb er a klebesei e mekiis el orekedii a siseball er a beluu e merudii a siseball el dimlerrek a chesimer, ma tengal ma lok ma bek el klekedellel. Ng chilol el mo mechei er a chetebtel a bukl el chemau a Hebron.”
8 Me ngulterekokl, el aike el sersel ma chelseklel a cheuatel er a Gasa a mle meklou e oberaod. Ka molebedebek er kau el melasem el mengol aikang! A Samson a mlengol, ngdi ngmlengol aikang el mo er ker, e mle ua ngera tia el omerolel? Sang, a Gasa a ngar er a klechutem er bita er a daob. Engdi, a Hebron a mo bedul ongos el olengasech el 3,000 el sak—el klou el ngesachel a dolemiakl er ngii! Ngdiak el sebeched el mo medengelii sel lemla er ngii “a chetebtel a bukl el Chemau a Hebron,” ngdi a Hebron a bekord el 37 el mael a cherridel er a Gasa—el di olengasech el mo er a bab! Ma dodengelii el kmo ngmle ua ngerang a cherridel a rullii tia el lerirellii a Samson el kuk lmuut el mo meang el tekoi, nguaisei ngdiak? E molatk er a uchul ma Samson a mle sebechel el meruul choua ika el tekoi—“a Reng er a Rubak [el Jehovah] a rirellii el mo mesisiich.” (Mengeteklel 14:6, 19; 15:14) E kid el Kristiano er a chelechang, a diak dongiil er a reng er a Dios el mo meskid a ileakl el klou el klisichel a bedenged. Engdi, seikid el osisiu el klou el reng a sebechel el kilungii a utebengel er aike el dmolech el tekoi er a klereng e rullid el mo mesisiich el oltirakl er ngike el chelsed el chad. (1 Korinth 2:10-16; 13:8; Efesus 3:16; Kolose 1:9, 10) Chochoi, me sel bo dungil el medengelii a cheldecheduch el kirel a Samson, e kede mengal mo ulterekokl a rengud el kmo a reng er a Dios a sebechel el ngosukid el dirrek.
JANUARY 10-16
MEKREOS EL TEKOI EL NGAR ER A BIBLIA | MENGETEKLEL 17-19
“Ngmo Duubech a Mondai Sel Lak Dolengesenges a Llechul a Dios”
it-2 390-391
Mika
1. Chad er a kebliil er a Efraim. Ngika mlo omtok er sel ongeai el llach er a Teruich el Llach (Exo 20:15), e rirechorech a 1,100 el silber el ududel a delal. A Mika er a louchais a kngtil e loluut aika el udoud e a delal a dilu el kmo: “Ngak a odars a ikal silber el mor a RUBAK me lak le medebeakl a ngelekek. Ma ikal silber bo lousbech el rullii a tar a bleob el chelid el kerrekar el bliull er a silber. Mada klmuut el meskau ngiil silber.” Me a delal a ngilai a 200 el silber el udoud el msang a meruul a deel “me ng rirellii a bleob el chelid er a kerrekar e milii er a silber.” Ngii el bleob el chelid a le lilia er a blil a Mika. Ngii el Mika a mla er ngii a “blil omengull el meluluuch er ngii,” e rirellii a ephod me a lmuut el bebil er a bleob el chelid e tiltkii a ta er a ngelekel el sechal el mo prist er ngii. Me alta Mika mirruul er tiang el oldanges er a Jehovah, engdi Jehovah a kmal mle mederdirk a rengul er tia el blekeradel le ngulemtok er a llechul el diak el kired el mengull a bleob el chelid. (Exo 20:4-6) Ngdirrek el dimlak lochotii a omengull el kirel a chedaol tento er a Jehovah me a kleprist er ngii. (Men 17:1-6; Dut 12:1-14) A uriul e a Mika ngiluu a Jonathan el ta er a uldidellel a rsechel a ngelekel a Moses er a Gersom el mora blil el mo prist er ngii. (Men 18:4, 30) A Mika ulemdasu el kmo ngkmal mla mo ungil me ngmillekoi el kmo: “Chelechang el le Levait a prist er ngak, e ak medengei el kmo a RUBAK a mo remuul a bek el tekoi el di mo ungil el kirek.” (Men 17:7-13) Me nguaisei engdi a Jonathan a dimlak luldidellel a rsechel a Aron me ngdimlak el sebechel meruul a urerir a reprist, e tia dirrek el dilechelir a kngtil a Mika.—Ule 3:10.
it-2 391 par. 2
Mika
Kedeb el taem er uriul e a Mika me a rechedal a mlo oltoir er a rechad er a kebliil er a Dan. Me a lebochang e te uleker er ngii el Mika el kmo ngngera telemall. Me a Mika dilu el kmo: “Kom mla nguu a prist er ngak, el ngma cheduk el kurruul e ngmai el merael. Ngera dirk medechel el kloklek?” Me te dilu er ngii el kmo a lsekum e ngdi melemolem el uaisei el loltoir er tir e oumondai e te mo odelecheklii. A Mika milsa el kmo te kuk mesisiich er ngii me ngulebult el merael el mo remei. (Men 18:22-26) A rechad er a Dan a mlo odelecheklterir a rechad er a Lais e sosebii e mekedecherur a mats er a Dan er ngii. E a Jonathan me a rengelekel a mlo prist er tir “me ngiil chedul a Mika a di mlar isei er ser a le ngar a Silo a Tento er a Dios.”—Men 18:27-31.
Morriter er a Tekingel a Dios
(Mengeteklel 19:18, NW) Ngdilu el kmo: “Aki mlara Bethlehem er a Juda e merola el mo remei er a beluak er a mesechesechel a bukl el beluu er a Efraim. Ak mlara Bethlehem er a Juda e chelecha ki mora blil a Jehovah engdi ngdiak a chad el ngoikak el mora blil.”
A Kot el Ungil el Oidel a Tekingel a Dios
6 Chelechang e ngar er ngii a lmuut el bebil el tekoi el ochotii el kmo ngkmal kired el ousbech er a ngklel a Jehovah. Tia el beches el oidel a New World Translation a ousbech er a ngklel a Dios el 7,216 el taem. Me ngbetok er a elolem el taem el lousbech er tia el ngakl er sel di mla oidel. Te dilechel a eim er ngii e le ngklel a Dios a dirk lebiltik er ngii er a chelsel aike el dirk mlotobed el Dead Sea Scrolls. E aika sebeched el metik er a 1 Samuel 2:25; 6:3; 10:26; 23:14, 16. E sel ongelolem er ngii a ngar er a Mengeteklel 19:18, e tiang a lebiltik er ngii el okiu a dmolech el omesubel aike el manuscript er a irechar.
JANUARY 17-23
MEKREOS EL TEKOI EL NGAR ER A BIBLIA | MENGETEKLEL 20-21
“Molemolem el Olengit er a Ulekrael er a Jehovah”
w11 9/15 32 par. 2
Ngsebechem el Mo Uai a Finehas Sel Bom Chelebangel a Omelsemai?
Sera loterebekii e lokodir a kankiubain er a ta el chad er a Levait a rechad er a Gibea er a kebliil er a Benjamin, e aike el bebil er a kebliil a tilbir el mo oumekemad er a rechad er a kebliil er a Benjamin. (Men. 20:1-11) Te milluluuch el mora Jehovah lolengit a ngelsuil er a uchei er a bo loumekemad. Me nguaisei engdi ngmle eru el taem el bo lemake, e kmal betok a rechederir el mlad. (Men. 20:14-25) Tia ngmo rulleterir el mo omdasu el kmo a nglunguchir a dimlak loureor? A Jehovah ngmera el mle soal a lomeklemalt er tia el klengit me a lechub e ngdiak?
w11 9/15 32 par. 4
Ngsebechem el Mo Uai a Finehas Sel Bom Chelebangel a Omelsemai?
Ngera sebeched el suubii er tiang? A bebil mondai er a ongdibel a locha di melemolem alta remechuodel a kmal melasem el mesmechokl e blechoel el meluluuch el olengit a ngeso er a Jehovah el kirel. A lsekum e ngmo uaisei e a remechuodel a kirir el diak lobes aika el tekingel a Jesus: “Molemolem el olengit [me a lechub moluluuch] me mngai, molemolem el osiik me bo betik, e molemolem el melngod me lobkais el kiriu.” (Lukas 11:9, NW) Mo lmuut me a lsekum e ngkora ua lemeoud el monger a nglunguchiu, bo lulterekokl a rengmiu el kmo a Jehovah a mo onger er sel telutk el temel.
Morriter er a Tekingel a Dios
w14 5/1 11 par. 4-6
Ke Medengei el Kmo Ngerang?
Te milekera lousbech a balech loumekemad er a ngar er a mong?
A David a uluusbech er a balech el mekodir a Goliath. Ngsiluubii el mo meduch lomalech er a lengeasek el omekerreu a delebechel el sib.—1 Samuel 17:40-50.
Kede metik er a sunga er a rechad er a Ekipten me a Asiria a olechotel a balech er a taem er a Biblia. Tia mle leather me a lechub e ngmamed el ngar ngii a bokket er ngii el ngar ngii a lechetel a bita me a bita er ngii. Me a chad a otungii er a chelsel tia el bokket a bad el 2 el mo 3 el ints a klungel e 9 el ounce a berredel. E mo merek e omiroi er ngii er bebul a bdelul e choitii a ta er a lechetel me ngsuebek a bad el tuobed el kmal bekerurt e meringel a klisichel el di melemalt el medalem er sel loltaut er ngii.
Omengiis el chutem er a Middle East a uchul me te mla metik a betok el balech er a mekemad er a irechar. A resemmong el soldau er a balech a omalech a bad el 100 el mora 150 miles per hour a rretel. Me a rehakase a kebosech a uldesuir el kirel a kmo a balech ngmla er ngii a ukerul me nguaisei engdi ngbleketakl el kmo a balech a dirrek el omekodall.—Mengeteklel 20:16.
JANUARY 24-30
MEKREOS EL TEKOI EL NGAR ER A BIBLIA | RUTH 1-2
“Molecholt er a Diak Lemengodech el Bltikerreng”
Moukerebai er Tirke el Sechelil a Jehovah
5 A telungalek er a Ruth a kiliei er a Moab, me ngmle sebechel el lmuut el mo er tir, me ngsebechir el melemolem el omekerreu er ngii. Ngmle medengelterir a rechad er a belual me a tekingir me a dirrek el siukang er a beluu er a Moab. E a Naomi a diak el sebechel el msang a Ruth aika el tekoi a lsekum te dmak el mo er a Bethlehem. Ngdirrek el mle bekikl a bo lak el sebechel el metik er a mo bechil a Ruth me a lechub e ngblai el bo lekiei er ngii. Me ngdilu er ngii me lluut el mo remei er a Moab, el ua Orpa el “mla mo remei er a re chedal ma chedul.” (Rut 1:9-15) Engdi a Ruth a dimlak lekengei el lmuut el mo er a rechedal me aike el klsuul el chelid er tir.
Moukerebai er Tirke el Sechelil a Jehovah
6 A Ruth a locha milsuub el kirel a Jehovah el okiu a bechil me a lechub a Naomi. Me ngmlo medengei el kmo a Jehovah a kmal ngodech er aike el chelid er a Moab. A Ruth a kmal mle betik a rengul er a Jehovah, e dirrek el uluumerang el kmo, Ngii a rredemelel a nguu a bltkil a rengul me a omengull er ngii. Me a omelilt el lurruul er ngii a kmal mle melemalt. Ngdilu er a Naomi el kmo: “A re chad er a beluam a mo chedak; ma Dios er kau a mo Dios er ngak.” (Rut 1:16) Ngkmal mo dmeu a rengud sel dolatk er a bltkil a rengul a Ruth el mo er a Naomi. Engdi sel lmuut el ngaruchei el tekoi a sel bltkil a rengul el mo er a Jehovah. E tia el omerellel a kmal chilsir a rengul a Boas, me a uriul e ngchilat er a Ruth e le ngmlo er a Jehovah “el kirel osebechakl.” (Monguiu er a Ruth 2:12.) Me tiang a locha mekltkid er sel rolel a ngelekel a malk a bo losiik a osebechakl er cheungel a osebekel a delal. (Psa. 36:7; 91:1-4) Me ngdi osisiu, a Jehovah a ulemekerreu e ulemekngeltengat er a Ruth el klaumerang er ngii a uchul. Me a Ruth a dimlak a ta el bo louuchel a rengul er a tekoi el lullilt el mo meruul.
Morriter er a Tekingel a Dios
w05 3/1 29 par. 1
Omesodel a Babier er a Ruth
1:13, 21—Ngera uchul me a Naomi a dilu el kmo a Jehovah a mle meringel a tekingel el mo er ngii? Ngdiak, a Naomi a dimlak loltelechakl er a Dios el kirel a ngii di el cheleuid el omeruul. El kirel aike el rokui el dilubech el mo er ngii, e a Naomi a bai ulemdasu el kmo a Jehovah a ulemtok er ngii. Ngmiltirm a rengul e mlo mekngit a rengul. A lmuut el tang, seikid el taem e a rengalek a lulemdasu el kirel el kmo te klengeltengat el mla er a Dios el mei, e a lekebai, a delebeakl. E le ngdimlak a rengelekir e mlad a reteru el ngelekel el sechal, me a Naomi a locha ulemdasu el kmo ngmle melemalt a lolebedebek el kmo a Jehovah a ulemekrur er ngii.
JANUARY 31–FEBRUARY 6
MEKREOS EL TEKOI EL NGAR ER A BIBLIA | RUTH 3-4
“Mrellii a Ungil Chisem”
w12 10/1 22 par. 5
“Meral Dil”
A Boas a milengedecheduch er ngii el kmal medemedemek, e tia locha kmal milengelaod er a rengul a Ruth. Ngdilu er a Ruth el kmo: “A RUBAK lomekngeltengat er kau e rungalek. Tial moruul er ngii er chelechang ochotii a bai kuk kloul blakerreng el bedul a telungalek er sel cho mrirellii el mor a delal a bechim; ele ng dimlak mrurt el oltoir er a re mekekerel chad el merau ma lechub e te chebuul.” (Ruth 3:10) “Sel cho mrirellii” a melutk el kirel a diak lemengodech el bltikerreng er a Ruth el mora Naomi el ulebengkel el mei er a Israel e omekerreu er ngii. “Tial moruul er ngii er chelechang” a mesaod er tia loruul er ngii a Ruth el mora Boas. Ngdilu er a Ruth el kmo ngii el dirk kekerei el redil me ngkmal sebechel losiik er a bechil er a delongelir a remekekerei el chad el merau me a lechub e te chebuul. Me nguaisei engdi a Ruth a mle soal meruul er a ungil kirel a Naomi me a bechil el mla mad, me lolemolem a klengelakel er a bechil a Naomi er a Israel. Tia e a uchul me ngkmal riretechii a rengul a Boas a omerellel a Ruth el dimlak el lolatk er a di ngii.
w12 10/1 23 par. 1
“Meral Dil”
Nglocha kmal rirellii a rengul a Ruth el mo ungil er a lolatk a tekingel a Boas el kmo: A “re bek el chad er a beluu a medengei el kmo ke meral dil”! Ruth el kmal mle soal el mo medengelii a Jehovah e mesiou er ngii a uchul me nglocha kmal lungil a chisel. Ngika dirrek lulechotii a ungilreng el mora Naomi me a rechedal e millatk a uldesuir me ngkilengei el melodech a omerellel e mesuub el mo oltirakl a siukang er tir. A lsekum e ngsoad el oukerebai er a Ruth e kede mo olecholt a omengull el mora siukang er a rechad el ngii a ngodech er kid. Sel doruul el uaisei e kede mo rullii a ungil chised.
w12 10/1 24 par. 3
“Meral Dil”
Me a Boas a mlo bechil a Ruth. Uriul e kede menguiu el kmo: “RUBAK a ngilsuir a Ruth el mo dioll, me ng milechellii a ngalek el sechal.” A redil er a Bethlehem ulemekngeltengat e oldanges er a Ruth el kmo ngkuk ungil er a reteuid el ngalek el sechal. Kede suubii el kmo a ngelekel a Ruth a mlo ta er a ruldidellel a rsechel a King David. (Ruth 4:11-22) E a David, a mlo ta er a ruldidellel a rsechel a Jesus Kristus.—Mateus 1:1.
Morriter er a Tekingel a Dios
w05 3/1 31 par. 4
Omesodel a Babier er a Ruth
4:6—El oeak a ngera el rolel e ngsebechel ngike el chad el omechar el “metom” a dikesel sel bocha el kirel el omechar? A kot el luchul, a lsekum a chad el mlo metacherbesul a ulelterau er a chutem el dikesel, e a chad el omechar a mle kirel el oltobed a udoud el mo omechar er a chutem er sel char el mlengai er a ildisel a rak el medechel el mo lmuut er sel mei el Rak er a Deurreng. (Levitikus 25:25-27) A bo loruul el uaisei, e ngmo ngar er a iou a kerresel aike el ngar er ngii er ngii. Me a lmuut el tang, a lsekum a sechal a mlechell el mo er a Ruth, e ngii el ngalek, el diak el tirke el kmeed el chedal a chad el omechar, a mo oudiukes er sel mlochar el chutem.
FEBRUARY 7-13
MEKREOS EL TEKOI EL NGAR ER A BIBLIA | 1 SAMUEL 1-2
“Moluluuch Louchais er a Jehovah Aike el Ngar er a Rengum”
ia 55 par. 12
Nguluuchais er a Jehovah Aike el Mlara Rengul
12 Me a Hana a kmal kutmeklii a ungil kerebai er a nglunguuch el kirir a rokui el mesiungel a Dios. A Jehovah a kmal soal a rechedal a di lebleketakl el mengedecheduch er ngii e louchais aike el rokui el ngar er a rengrir e lak a lorreked, el di ua ngalek el meruul el uaisei el mora betik er a rengul demal me a delal. (Monguiu er a Psalm 62:8; 1 Thesalonika 5:17.) A apostol Petrus a mlukreng el mo meluches aika el tekoi el kmal mengelaod er kid er a losaod er a nglunguuch el mora Jehovah el kmo: “Moterekokl a ikel rokui el tekoi el suebek a rengmiu er ngii, ele ng kerekikl el omekerreu er kemiu.”—1 Pe. 5:7.
w07 3/15 16 par. 4
Rolel e a Hana Miltik er a Budech
Ngera kede suub er tiang? Sel doluluuch el mora Jehovah el kirel aike el mengesang er kid e ngkmal sebeched louchais er ngii er a uldesued e olengit a tekoi el soad. A lsekum e ngdiak a klisiched er a mondai el dechelebangel er ngii, e ngkired el mecherei er a chimal. Ngdiak a ngodech lungil el mo uai sel debechei a mondai er kid er a chimal a Jehovah.—Osisechakl 3:5, 6.
Morriter er a Tekingel a Dios
w05 4/1 3 par. 5
Omesodel a Babier er a Kot el Samuel
2:10—Ngera uchul ma Hana a milluluuch el mo er a Jehovah el kmo “ng mo msa king er ngii a klisiich” e dimlak a chad el king er a Israel? Sel tekoi el kmo a rechad er a Israel a mo er ngii a king er tir a meldung el ngar er a Llach er a Moses. (Duteronomi 17:14-18)
Me a lemedkung e lolekoi a ulochel, e a Jakob a dilu el kmo: “Ng orreked er a skersel a king me ng loia er a delongelel el ochil.” (Genesis 49:10) Me a lmuut e kung, el kirel a Sara—el ngike el uchelir a Rengalek er a Israel—e a Jehovah a dilu el kmo: “E mor ngii a re king el tuobed er a ruldidellel a rsechel.” (Genesis 17:16) Me a leuaisei, a Hana a milluluuch el kirel a king er a ngar er a medal el taem.
FEBRUARY 14-20
MEKREOS EL TEKOI EL NGAR ER A BIBLIA | 1 SAMUEL 3-5
“A Jehovah Melatk er a Rechad”
Ngkot el Kedidai Engdi Ngmelatk er a Rechad
3 A Samuel a ulemuchel el mesiou er a chedaol tento er a lekekerei el buik. (1 Samuel 3:1) A ta el kesus er a uriul er a bo lebad, e ngdilubech a kmal ileakl el tekoi. (Momes er a footnote.) (Monguiu er a 1 Samuel 3:2-10.) Ngulerrenges er a chad el omekedong er a ngklel me ngulemdasu el kmo ngmle chuodel el Ngarbab el Prist el Eli. Me ngmilekiis e rirurt el mora Eli e dmu el kmo: “Kulleker er ngak, me ngak tiang.” Engdi Eli a dilu er ngii el kmo: “Ng dimlak kuleker er kau.” Me a uriul er a leduubech a osisiu el tekoi el eru el taem, e a Eli a miltebengii el kmo ng Dios a ulemekedong er a Samuel. Me a Eli a dilu er a Samuel er aike el tekoi el bo lolekoi sel luut el duubech tia el tekoi me ngullengesenges. Me ngera uchul me a Jehovah dimlak louchais er a Samuel er a uchelel el kmo Ngii a ulemekedong er ngii? A Biblia a diak losaod engdi Jehovah locha mirruul el uaisei e le ngmillatk er a uldesuel.
Ngkot el Kedidai Engdi Ngmelatk er a Rechad
4 Monguiu er a 1 Samuel 3:11-18. A llechul a Jehovah a mengelechel er a rengalek el mo oba omengull el mora remeklou el chad, el ileakl a rulab a dereder. (Exodus 22:28; Levitikus 19:32) Me ngmeringel er kid el omtab er a kekerei el buik el ua Samuel el mekiis er a tutau e mora Eli el oba blekeu el ouchais er ngii er a mesisiich el klumech er a kerrekeriil. A Biblia a ouchais el kmo a Samuel a mle “medakt el ouchais er a Eli el kirel ngii el ues.” Me nguaisei, engdi a Jehovah a mileketeklii el mora Eli el kmo Ngii a omekedong er a Samuel. Me tiang a mlo uchul me a Eli a dilu er a Samuel me lak lomart a ngii di el tekoi el ledilu Dios, me a Samuel a ullengesenges e “uluuchais er ngii a bek el tekoi.”
Morriter er a Tekingel a Dios
w05 3/15 21 par. 6
Omesodel a Babier er a Kot el Samuel
3:3—A Samuel ngmilechiuaiu er a chelsel a Kot el Chedaol el Delemerab? Ngdiak. A Samuel a mle Levait el chedal sel telungalek er a Kohath el dimlak el sebechir el mo prist. (1 Kronika 6:33-38) Me ngdimlak el sebechel el omes a “chedaol klalo.” (Ulecherangel 4:17-20) A Samuel a di mle sebechel el mora mekesekesel a chedaol tento. Tiakid a locha ble lebad er ngii. A Eli a locha mle bad er a kmung keskelel tiang el dirrek. Tia el tekoi el “sel mlar ngii a Blil a Telbiil” a mesaod el kirel a basio el lengar ngii a chedaol tento.
FEBRUARY 21-27
MEKREOS EL TEKOI EL NGAR ER A BIBLIA | 1 SAMUEL 6-8
“Ngtechang a King er Kau?”
it-2 163 par. 1
Rengedel a Dios
Ongit er a Chad el Mo King. Ngbekord el 400 el rak er uriul er a letobed er a Ekipten e betok er a 800 el rak er uriul er a oketmeklel a telbilel a Dios lobengkel a Abraham, e a rechad er a Israel a mlo sorir a lebo er ngii a king er tir el di uaike el renged el iliuekl er tir. Tia el ongterir a ulechotii el kmo te ultngeklii a omengederederel a Jehovah el king er tir. (1Sa 8:4-8) Te mle medengei el kmo a Dios a mo kutmeklii a Renged el oltirakl er a telbilel el mora Abraham me a Jakob. Me a ulochel a Jakob er a uchei er a lemad el kirel a Juda (Gen 49:8-10), tekingel a Jehovah el mora rechad er a Israel er a letobed er a Ekipten (Exo 19:3-6), aike el mlara Llach er a telbiil (Dut 17:14, 15), me a tedebechel a ulochel a Jehovah el lullekoi a profet Balam (Ule 24:2-7, 17) a ulelterekokl a rengrir er tia el tekoi. A blak a rengul el delal a Samuel el Hana a dirrek el milsaod er tiang er a nglunguchel. (1Sa 2:7-10) Me nguaisei engdi a Jehovah a dirkak louchais a rokui el omesodel a “berrotel el uldesuel” el kirel a Renged e dirkak louchais el kmo ngmo meteketek er a oingerang e mo uangerang a teletelel me a dirrek el basio el bo lemeketmokl er ngii. Me tirka ullengit el mo meruul er a tekoi el dimlak a llemeltir el meruul er ngii er a lolengit me lebo er ngii a king er tir.
w11 1/1 27 par. 1
Ngmillemolem el Outekangel Alta Te Riruul a Tekoi el Tomellii a Rengul
Molatk a tekingel a Jehovah er sel taem el Samuel a milengedecheduch er ngii el kirel tia el tekoi: “Mrenges a ikel bek el tekoi el ledu er kau a re chad. Ng dimlak loltngakl er kau, te bai uleltngakl er ngak el king er tir.” Tia locha kmal milengelaod er a rengul a Samuel engdi ngkmal dimlak lolechotel a omengull el mora Dios el Olab a Bek el Klisiich! A Jehovah dilu er a Samuel me louchais er tir a mo rsel ongterir el kmo lebo er ngii a chad el mo king er tir. Me nguaisei engdi sera louchais er tir aika el tekoi a Samuel e te kmal di mle muri el melekoi el kmo: “Ng diak! Ng somam a king.” Me a Samuel a ullengesenges a tekingel a Dios er ngii e mlo tutkii a king el lengileltii a Jehovah.—1 Samuel 8:7-19.
w10 1/1 30 par. 9
A Rolel a Longedereder a Jehovah a Melemalt!
9 A reksi a mileketeklii a klemerang er aika el omengelechel el mla er a Jehovah. A omengedereder el oeak a chad el king a mlo uchul a meringel el mondai er a Israel, el ileakl aike el taem el ngii el king a mo diak el oba blakerreng el mo er a Dios. Me a dolebedebek er tia el kerebil a Israel, e ngdiak el mechas a rengud el kmo a klemengetel a taem, e a kabelment el ngar er a chimorir a redi chad el diak lodengelii a Jehovah a dimlak el sebechir el kutmeklii a klungiaol er a beluu el kemanget el taem. Ngklemerang, el bebil er a rechad er a balatiks a olengit er a Dios me lomekngeltengat a blakerreng er tir el mo meruul a budech me a ulekerreu, engdi ngmekerang a Dios a lomekngeltengat er a rechad el diak el kengei el mo chederedall er ngii?—Psalm 2:10-12.
Morriter er a Tekingel a Dios
w02 7/1 22 par. 13
Ngera Uchul e Kede Mo Metecholb?
13 A ouuchel el reng a kirel el mo er ngii er a uchei er a techolb er kid el mo ta er a Sioning er a Jehovah. Ngike el tilbir a rengul el mo oltirakl er a Jesus Kristus a kirel el mo ouuchel a rengul. Tirka el chad a otngeklii sel dimla rolel a klengar er tir e mo oterekeklterir el mo meruul a llemalt el ngar er a osengel a Dios. El ngar er a Biblia, e a verb er a tekoi er a Hebru me a Grik el kirel a ouuchel el reng a ngar er ngii a belkul el kmo omult. Tia el omeruul a olecholt er a chad el mo obult el mo er a Dios e mo cheroid er a mekngit el rael. (1 King 8:33, 34) A ouuchel el reng a kirel el mo er ngii a “ureor el redemelel a bult.” (Rellir Ar Apostol 26:20) Me ngkired el mo cheroid er a klsuul el omengull, e mo oureor el oltirakl er a llechul a Dios, e mo mengull er a di ta el Jehovah. (Duteronomi 30:2, 8-10; 1 Samuel 7:3) A ouuchel el reng a mo omeldechel a uldesued, me a moktek er kid, me a blekerdeled. (Esekiel 18:31) Kede mo “obult” e a blekerdelel a beches el chad a mo omtechei er aike el diak loluu el blekeradel.—Rellir Ar Apostol 3:19; Efesus 4:20-24; Kolose 3:5-14.
FEBRUARY 28–MARCH 6
MEKREOS EL TEKOI EL NGAR ER A BIBLIA | 1 SAMUEL 9-11
“A Saul er a Uchelel e Ngmle Ngariou a Rengul e Tabesul a Osengel Kirel”
Moba Klengariourreng me a Tabesul el Uldasu
11 Ka molatk er a tekoi el dilubech el mora King Saul. Ngika mle tabesul a uldesuel er a lekekerei el chad. Ngmle medengelii a telkelel e dirrek el uleltngakl a bebil er a ngerachel. (1 Sa. 9:21; 10:20-22) Engdi a cherengel a taem, e ngmlo kedidai a rengul e mlo meruul a diak lengerechelel. Ngulechotii tia el mekngit el blekeradel er a uriul er a bo el king. A ta el taem, e ngmlo diak loba kllourreng er a longiil er a profet Samuel. Ngdimlak loumerang el kmo a Jehovah a mo ngosuterir a rechedal, me ngdi mle ngii el oldars a delaol tenget alta ngdimlak a llemeltel el meruul uaisei. Sei a uchul, me a Saul a mlo diak loba kengei er a Jehovah e mlo diak el king. (1 Sa. 13:8-14) Ngmellomes a rengud a lsekum kede suubii tia el ollachidnger e diak bo doruul a tekoi el diak a llemelted el meruul.
A Rolel e Ngmo Diak Di Dolatk er a Di Kid
8 Ngsebeched el nguu a klubeled er a omerellel a King el Saul el ngii a di mlo melatk er a di ngii. Sera bo el king, e ngkmal mle ngariou a rengul. (1 Sa. 9:21) Ngmle ngariou a rengul e “dimlak a ngera el ledung el kirir” a rebebil el millaes er ngii alta ngmle sebechel el omals er tir e le Dios a milsang a klisichel el king. (1 Sa. 10:27, NW) A Saul a dirrek el mlukrael er a chedaol klisichel a Dios er sera bo lemengeteklir a rechad er a Israel el mo oumekemad er a rechad er a Amon. E a uriul er a bo lekats, e ngmle ngariou a rengul el oldanges er a Jehovah el ngii a uchul e te mlo mesisiich.—1 Sa. 11:6, 11-13.
w95 12/15 10 par. 1
A Re Amonait a Ulemtechei a Saul er a Koadelchad
A re Amonait a miltechir a ungilreng er a Jehovah er a koadelchad. A Jehovah dimlak lemeiko osengel er tia el omerellir. “Saul er a le rengesii [a tekingel a Nahas] e ng meltuchel er a Reng er a Dios e kmal mlo kesib a rengul.” Me a Saul ultireklii a ulekrael er a chedaol reng e ngii me a re 330,000 el soldau a mlo oumekemad er a rechad er a Amon me te ulebriid e “chiliis el di chad me a bedengel.”—1 Samuel 11:6, 11.
Morriter er a Tekingel a Dios
w05 3/15 22 par. 8
Omesodel a Babier er a Kot el Samuel
9:9—Ngera me ngutebengall tia el tekoi el “a profet a lulemekedong er ngii el kmo ngikel omlaoch”? Tia ochotii el kmo sera lorael el mo betok a ngerechelir a reprofet er a taem er a Samuel me a reking er a Israel e te mlo diak lousbech er a tekoi el “ngikel omlaoch” e bai mlo ousbech er a “profet.” A Samuel ngike el kot el mlo okedongall el profet.—Rel 3:24.