Reference el kirel a Subeled er a Miting er a Klengar me a Omesiunged
MAY 2-8
MEKREOS EL TEKOI EL NGAR ER A BIBLIA | 1 SAMUEL 27-29
“Teletelel a David er a Loumekemad”
Me Dedak el Oldanges er a Ngklel a Jehovah
7 A David a mla er a Nob, e chiliis el 25 el mael el mo bedul a ngebard er a beluu er a Filistia e ulsiik a osebechakl el obengkel a King el Akis el ngar er a belual a Goliath, el ngii a Gath. Malta e a David a ulemdasu el kmo a Saul a ulterekokl el diak bo losiik er ngii er a beluu er a Gath. Engdi, a telkib el taem er a uriul, e a remesiungel a king er a Gath a dilengchii a David. Ma David er a bocha lodengei el kmo a rechad a mla mo medengelii, e “ng kmal mlo medakt er a Akis el king er a Gath.”—1 Samuel 21:10-12.
8 Ma Rechad er a Filistia a mocha mdechemii a David. E locha ngar er tiakid el taem e a David a millibech er sel psalm er a lolengit er a Jehovah el kmo: “Ma iuechel a medak a ngar a record er kau.” (Psalm 56:8) Me ngullecholt er a klaumerang er ngii el kmo a Jehovah a diak bo lobes er a kngtil a rengul e bai mo omekerreu e mesebechakl er ngii. A David a dirrek el ulemdasu er a rolel e ngmo sebechel el mengeblad er ngike el king er a Filistia. Me ngmlo melodech er a blekerdelel el leko ngkebelung. Ma lesengei tia el tekoi, e a King el Akis a uluungeroel er a remesiungel el uleba ngika el “kebelung” el chad el mo er ngii. Me ngbleketakl el kmo, a Jehovah a ulemekngeltengat er tia el rolel a David. Me te uldikii a David er a mats, me ngmle sebechel el chemiis er a kodall.—1 Samuel 21:13-15.
Remekekerei el Odam, Ko Mekera e Rulleterir a Rebebil el Mo Oumerang er Kemiu?
8 Mdirrek el melatk er a ta er a omelsemai el blo lechelebangel er ngii a David. Uriul er a lemucheluch el mo king, e ngmle kirel el mengiil el betok el rak e mo nguu a kingellel a omerreder er a Juda. (1 Sa. 16:13; 2 Sa. 2:3, 4) Ngera ngilsuir el melemolem el mengiil el oba kllourreng? Ngdimlak bo lemechitechut a rengul ngbai mle ultab a osengel er aike el tekoi el sebechel el meruul. El ua tiang, sera lechiis el mo kiei er a Filistia e nguluusbech er tiakid el taem el oumekemad er a recherrouel a Israel. Ngoeak tiakid el rolel e ngulemekerreu aike el belurir a rechad er a Juda.—1 Sa. 27:1-12.
it-2 245 par. 6
Blulak
Me alta Biblia kmo ngmekngit a domulak me nguaisei engdi tia diak lebelkul a kmo ngkired louchais er a chad a tekoi el diak a llemeltel er ngii. A Jesus a milellach el kmo: “Lak moba chedaol klalo el omsa bilis, e ng mo lobult el odelecheklemiu. Lak momidokl a ngisel a chesiuch er medal a babii e ng mol roderd.” (Mt 7:6) Tiakid a uchul me a Jesus a lebebil e ngdimlak louchais a rokui el tekoi me a lechub e le bleketakl longer a ker el ngii a mle sebechel mo uchul a telemellel. (Mt 15:1-6; 21:23-27; Jn 7:3-10) Ngdi osisiu el kirel a omerellel a Abraham, Isak, Rahab, me a Elisa el dimlak lebleketakl louchais a tekoi er tirke el dimlak losiou er a Jehovah.—Gen 12:10-19; 20 el bliongel; 26:1-10; Jos 2:1-6; Jak 2:25; 2Ki 6:11-23.
Morriter er a Tekingel a Dios
Ngsebechir a Rulekoad el Olengeseu er a Redi Ngar?
Ka molatk er tia el tekoi. A Biblia a kmo, sel lemad a chad e “ng moluut el mor a chutem; isei e a rokui el uldesuel a mo mekimd.” (Psalm 146:4) A Saul me a Samuel a dul mle medengei el kmo a Dios a ouketui er tirke el chad el olengit a ngeso er a rultuubladek. Me nguaisei, a Saul er a uchei a milengikiid a tekoi er a oltuubladek er a beluu el rokir!—Levitikus 19:31.
Oleko a Samuel a dirk kiliei el ua deleb, e omomdasu e ngsebechel el mo omtok a llechul a Dios e mo kongei er a ongit el okiu a oltuubladek el mo mengedecheduch er a Saul? A Jehovah a mla mo diak el kengei el mengedecheduch er a Saul. Omomdasu e a oltuubladek ngsebechel el oremelii a Kot el Mesisiich el Dios el mo mengedecheduch er a Saul el okiu a mla mad el Samuel? Ngkmal diak el uaisei. Ngbleketakl el kmo ngika el lekong “Samuel” a diak el ngike el mle blak a rengul el profet er a Dios. Ngbai mle mekngit el reng el mirruul er ngii el ua mla mad el Samuel.
MAY 9-15
MEKREOS EL TEKOI EL NGAR ER A BIBLIA | 1 SAMUEL 30-31
“Msisichii a Rengum Loeak a Jehovah el Dios er Kau”
Bo Medakt er a Jehovah—E Bo Ldeu a Rengum!
12 A dektel a David el bedul a Jehovah a mlo uchul a lmuut el betok er a di lolekebai er ngii me lak lebo er a klengit. Ngmillisiich er ngii el mo oba llomeserreng el mo ungil el melilt a tekoi sel lengar er a eungel a meringel el blekeradel. A David ma rechedal a ulemart er tir er a Saul, el ta el rak ma eua el buil el ngar er a mats er a Siklag er a beluu er a Filistia. (1 Samuel 27:5-7) Te mle dibus a resechal er a ta el taem, e a rechad er a Amalek a siliseb er a mats e ngilititerir a rebecherir ma rengelekir ma cheremir el sib. Ma lluut uriul er tir e leues aike el dilubech, e a David ma rechedal a lilangel el kmal mekngit a rengrir. A klengiterreng a di mle mereched el obult el mo ngasecherreng, ma rechedal a David a mlo sorir el omekoad er ngii. Altang mla er ngii a meringel er a uldesuel, engdi ngdimlak bo lemechitechut a rengul. (Osisechakl 24:10) A dakt el bedul a Dios a uchul me ngulsiik er a ngelseuil a Jehovah, misei e a “David a silisichii a rengul er a RUBAK el Dios er ngii.” Ngokiu a ngelsuil a Dios, e a David ma rechedal a mlo mesisiich er a rechad er a Amalek e liluut el ngma rokui el kloklir.—1 Samuel 30:1-20.
A Jehovah a Omekerreu er Kid el Kirel a Osobel
14 A David a chilebangel a betok el meringel el tekoi er a klengar er ngii. (1 Samuel 30:3-6) A Biblia a olecholt el kmo a Jehovah a mle medengei aike el ngar er a rengul. (Monguiu er a Psalm 34:18; 56:8.) A Dios me ngmedengei aike el ngar er a rengud. Sel ‘chelam a rengud’ me a lechub e ng ‘dikea omeltked,’ e ngolekeed er ngii er kid. Tia el tekoi a sebechel el mengelaod er kid, el ua lulengelaod er a David el ngii a milengitakl el kmo: “Ak mo oldeu er a renguk e mo ungil a renguk er a diak le mengodech el bltkil a rengum, ele ke milsekak er a chelebulek, e dimlak mchitak er a kerior el kmlar a chelsel.” (Psalm 31:7) Engdi a Jehovah a diak di lomes a ringel el dechelebangel, e ngbai ngosukid el outekangel el okiu a ongelaod me a omelisiich. A ta er a rolel a loruul er tiang a okiu a miting er a Rekristiano.
Morriter er a Tekingel a Dios
w05 3/15 24 par. 8
Omesodel a Babier er a Kot el Samuel
30:23, 24. Tia oltirakl er a Ulecherangel 31:27 e ochotii el kmo a Jehovah a kmal mengreos a urerir tirke el diak lolab a ngerachel engdi te di olengeseu. Me a ngii di el tekoi el doruul e “bo le blak a [rengud] el meruul, el diak le kirir a re chad, e ng kirel a Rubak.”—Kolose 3:23.
MAY 16-22
MEKREOS EL TEKOI EL NGAR ER A BIBLIA | 2 SAMUEL 1-3
“Ngera Kede Suubii er a ‘Chelitakl er a Klengiterreng el Kirel a Saul ma Ngelekel er a Jonathan’?”
w00 10/1 10 par. 9
Mongull er Tirke el Olab a Klisichel a Omerreder er Kemiu
9 A David ngmera el mle suebek a rengul er a lecharm a ringel? A David a lilangel el mo er a Jehovah el kmo: “Te ngar er ngii a remekngit el merredel el osiik a kodellek.” (Psalm 54:3, NW) Ngmilluluuch el oba cherrengelel a reng el mo er a Jehovah el kmo: “Mosobelak er a recherrouek, O Dios er ngak . . . A remesisiich a oldechelakl er ngak, e ngdimlak kumtok er tir ma kale kngtik a uchul, O Jehovah. Altae ngdiak a kngtik, engdi te remurt el mo mengetmokl er tir. Bo morrenges er ngak e momes.” (Psalm 59:1-4, NW) Kau ke mla omdasu el uaisei—e ngdimlak moruul a ngii di el mekngit el mo er a chad el ngar er a omerredel, engdi ngmelemolem el omekcharm er kau? A David a dimlak bo lak longull er a Saul. Sera lemad a Saul, e ngdimlak lolecholt a deurreng, e ngbai milluches a chelitakl er a klengiterreng el kmo: “A Saul ma Jonatan a mle ungil e mle betik ra rengrir ar chad; te dilak ra klengar . . . Te kuk bekerurt ra uasi, e kuk mesisiich ra laion! Kemiu el redil ra Israel, mongeiung el kirel a Saul.” (2 Samuel 1:23, 24) Ngkol ua ngera el ungil el kerebai el kirel a mera el omengull el mo er a ngellitel er a Jehovah, e alta e a David a dimlak a kngtil e mlukcharm er a Saul!
Cheleblad a Olengchelel a Uriul Sils!
8 A Biblia a dirrek el mesaod er a rebetok el mle blak a rengrir. Me bo dosaod er a reterung, el tir a ungil kerebai. A kot a Jonathan el ngii a mle blak a rengul el mo er a David. Ngmle ketengel a King el Saul, me ngmle kirel el mo ongingil a demal el king er a Israel. Engdi a Jehovah a ngileltii a David el mo king. Me a Jonathan a milengull er sel omelilt er a Dios, e dimlak bo lemechechei e bai “kmal mlo soal a David me ng mlo betik a rengul er ngii,” me ngmilsang a bilel, saider, belechel me a olekesengelel el olechotel a omengull er ngii el mo er a David. (1 Samuel 18:1-4) Ngdirrek el milsebechakl er a David, el mo lmuut er a taem el blo el ocherur a kodall. Me ngdilu er a David el kmo: “Kau a mo king er a Israel e ngak a mo ongingim.” (1 Samuel 20:30-34; 23:16, 17) Me ngmera el sebeched el mesang a klou el kngtil a rengul a David el ngar er a cheliteklel er sera lemad a Jonathan.—2 Samuel 1:17, 26.
Morriter er a Tekingel a Dios
it-1 369 par. 2
Odam
“Odam” a dirrek el melutk er tirke el tang a moktek me a turrekong er tir el meruul a tekoi. El ua tiang, a King Hiram er a Tyre ulemekedong er a King Salomon el odam er ngii le ngdiak di le ta deruchellir ngdirrek el mle sorir lolengeseu er a rolel a ureor er a templo el ua rolel a kerrekar me a lmuut el bebil. (1Ki 9:13; 5:1-12) A David a dirrek el milluches el kmo ngdiak di lerolel a rasech a uchul a budech me a kltarreng er a rudam. Ngdilu el kmo: “Ng meral ungil, e deurreng sel le dak el kiei a rudam el ta rengrir!” (Psa 133:1) Ngbltikerreng el diak el rasech a uchul me a David ulemekedong er a Jonathan el odam er ngii. (2Sa 1:26) A rekaukledem el tir osisiu a blekerdelir e sorir osisiu el tekoi, el mo lmuut me a lemekngit a okedongall el odam.—Osi 18:9.
MAY 23-29
MEKREOS EL TEKOI EL NGAR ER A BIBLIA | 2 SAMUEL 4-6
“Molemolem el Medakt el Kingtir a Rengul a Jehovah”
Omesodel a Babier er Ongeru el Samuel
6:1-7. Alta e a omerellel a David a mla er ngii a ungil el luchul, engdi a omelasem er ngii el mo melukl er a Arhe el ngar er a karrong a ulemtok er a llechul a Dios e mlo uchul a mekngit. (Exodus 25:13, 14; Ulecherangel 4:15, 19; 7:7-9) A Usa el urrekedii a Arhe a dirrek el olecholt el kmo a omeruul el ngar er ngii a ungil el luchul a diak lengedechii a llechul a Dios.
A Jehovah a Blechoel el Meruul a Llemalt
20 Kele mobes el kmo a Usa a mle kirel el ungil el medengelii a Llach. A Ark a ulemtechei er a kmo a Jehovah a mla er a delongelir. A Llach a mle bleketakl el melekoi el kmo a chad el dimlak lemetutk a kmal diak el kirel el merutech er ngii, el kmal omeklatk el kmo tirke el omtok er tia el Llach a mo obals er a kodall. (Ulecherangel 4:18-20; 7:89) Me nguaisei, a osengir a rechad el kirel a oiuelel sel chedaol el klalo a dimlak el kirel el mo kora kebekakl el tekoi. A Usa a mle Chad er a Levi (altang ngdimlak el prist), me ngmle kirel el ungil el medengelii a Llach. E dirrek, a sese el rak er a uchei e sel Ark a lengiluu el mo er a blil a demal me ngmlo medechel er isei. (1 Samuel 6:20–7:1) Ngmla er isel bekord el 70 el rak, el mo lmuut er a taem el David a mle soal el melukl er ngii. Me nguaisei e sera ledirk el lengalek el merael el mo klou el chad, e a Usa a mle medengei aike el llach el kirel a Ark.
A Jehovah a Blechoel el Meruul a Llemalt
21 El ua dulsaod er a uchei, a Jehovah a sebechel el menguiu a ngar er a rengrir a rechad. E le Tekingel a melekoi el kmo a Usa a “dimlak le medakt el merutech er a Blil a Telbiil,” misei e a Jehovah a locha milsang a rechorecherreng er ngii el diak losaod er ngii el ngar er sel cheldecheduch. A Usa ngchad el mle kedidai a rengul, me ngblechoel el meruul aike el tekoi el diak el kirel el meruul er ngii? (Osisechakl 11:2) A telungalek er a Usa el milengkar er a Ark er a chelsel a blirir me nguaisei e sera longetakl er a Ark el ngar er a buai ngrirellii el mo omdasu el kmo ngii a ngar er a bab el chad? (Osisechakl 8:13) A Usa ngmle ngesonges a klaumerang er ngii me ngulemdasu el kmo ngkedeb a chimal a Jehovah me ngdiak lsebechel el omekerreu er sel chedaol el box el ngii a ulemtechei er a kmo Ngii a mla er a delongelir? A ngii di lengera el uchul, e ngsebeched el ulterekokl el medenge el kmo aike el lurruul a Jehovah a mle melemalt. Ngmilsa tekoi er a chelsel a rengul a Usa me a uchul e ngmle mereched el oukerrekeriil er ngii.—Osisechakl 21:2.
Morriter er a Tekingel a Dios
Omesodel a Babier er Ongeru el Samuel
6:8, 9. El ngar er a meringel el blekeradel, e a David a kot el ngilasech a rengul, e mocha medakt—e dirrek el locha uleltelechakl er a Jehovah el kirel tia el chelebuul. Ngkmal kired el mo kerekikl me ngdiak doltelechakl er a Jehovah el kirel a mondai el mo er ngii sel dotngakl a llechul.
MAY 30–JUNE 5
MEKREOS EL TEKOI EL NGAR ER A BIBLIA | 2 SAMUEL 7-8
“Jehovah a Rullii a Telbiil Lobengkel a David”
w10 4/1 20 par. 3
“A Rengedem a Mo Diak a Ulebengelel”
A urungulel a David a kmal rirtechii a rengul a Jehovah. Me ngrirellii a telbiil lobengkel a David e dirrek el oltirakl er a ulaoch el kmo, a uldidellel a rsechel a mo mengedereder el mo cherechar. Me a Nathan uluuchais er a telbilel a Jehovah el mora David el kmo: “Ng mo blechoel el ngar ngii a ruldidellel a rsechem, e ngak a mo rullii a rengedem me ng di mo medechel el mo cherechar. Ma omerrederel a kleking er kau a mo diak a ulebengelel!” (16 el kekerei el bades) Ngika ngtecha el mo mengedereder el mo cherechar?—Psalm 89:20, 29, 34-36.
w10 4/1 20 par. 4
“A Rengedem a Mo Diak a Ulebengelel”
A Jesus er a Nasareth a uldidellel a rsechel a David. A anghel er a louchais el kirel a cherellel a Jesus e ngdilu el kmo: “A Rubak el Dios a mo rullii el mo king el ua uchelel er a David me ng mo mengedereder er a re ngelekel a Jakob el mo cherechar, ma rengedel a mo diak a ulebengelel!” (Lukas 1:32, 33) Me a telbilel a Dios lobengkel a David a tilaut er a Jesus Kristus. Me ngika mengedereder el mo cherechar e le ngtelbilel a Dios a msa llemeltel, ngdiak loltirakl er a rechad. Lak dobes el kmo a telbilel a Dios a di blechoel el tmaut.—Isaia 55:10, 11.
Bo Mesisiich el Oumerang er a Rengedel a Dios
14 Tiang a telbilel a Jehovah el mo er a David, el king er a Israel er a irechar. (Monguiu er a 2 Samuel 7:12, 16.) A Jehovah a tilbir el mo er a David el kmo a ta er a chad er a klengelakel er ngii a mo Mesias. (Lk. 1:30-33) Me ngoeak tiang, e a Jehovah a silodii a beches el omesodel a klengelakel er a Mesias. A Jehovah a dilu el kmo, ngika el chad el mei el okiu a klengelakel er a David a “ngikel kirel el oungerachel” er a Rengedel a Mesias. (Ese. 21:25-27) Me a kleking er a David a mo diak a ulebengelel e le Jesus el ngar er a klengelakel er a David a “di mo blechoel el ngar ngii” er a “klteketel el le diich a sils.” (Psa. 89:34-37) Me ngulterekokl a rengud el kmo a Mesias a kmal diak bo lemekngit el mengedereder me a klungiaol el mei el okiu a omengederederel a melemolem el mo cherechar!
Morriter er a Tekingel a Dios
it-2 206 par. 2
Uriul Sils
Ulochel a Balam. Uchei er a lesiseb er a Beluu er a Nglat e a profet Balam a dilu er a King Balak er a Moab el kmo: “Ak mengelechel er kau er a ikel bo loruul a re chad er a Israel el mor a re chedam er a ngar medad. . . . A tal king, el ua medidiich el btuch a mo tuobed er ngii el beluu. Ng ua melech el btuch el ngar a Israel el mei. Ng mo olebedeterir a re merreder er a Moab, e choiuerteterir tirkel rokui el mekedidai a rengrir e mekngit el bekeu omerellir.” (Ule 24:14-17) Sel kot el otutel tia el ulaoch a kmo, ngika el “btuch” a King David, el ngii uldelecheklterir a rechad er a Moab. (2Sa 8:2) Me a kot el otutel tia el ulochel a Balam el kirel a mo duubech er a “ngar medad” a melutk er sel taem er a lebo el king a David. E a David el chungel a Jesus el king er a Rengedel a Mesias a uchul me tia el ulaoch a dirrek el melutk er sel taem el Jesus a mo odelecheklterir a recherrouel.—Isa 9:7; Psa 2:8, 9.
JUNE 6-12
MEKREOS EL TEKOI EL NGAR ER A BIBLIA | 2 SAMUEL 9-10
“David Ulechotii a Diak Lemengodech el Bltikerreng”
Molemolem el Kaiuecholt er a Diak Lemengodech el Bltikerreng
7 A moktek er a chad el meruul er a tekoi a ochotii a klekakerous er a blakerreng el losaod er ngii a parakurab 6 me a diak lemengodech el bltikerreng. Ngera uchul me a remesiungel a Dios er a taem er a Biblia ullecholt er a diak lemengodech el bltikerreng? Tirke el lolecholt er tia el blekeradel a diak loruul er ngii le ngngerechelir lolecholt er ngii, e ngbai mlara reng er tir a meruul el uaisei. Molatk er a David. Reng er ngii a uldbechii el mo olecholt er a diak lemengodech el bltikerreng el mora sechelil er a Jonathan alta demal a Jonathan a mle soal lomekoad er ngii. Betok el rak er uriul er a lemad a Jonathan e a David a millemolem lolecholt er a diak lemengodech el bltikerreng el mo er ngii e le ngdirrek lullecholt er a diak lemengodech el bltikerreng el mora ngelekel er a Mefiboseth.—1 Sa. 20:9, 14, 15; 2 Sa. 4:4; 8:15; 9:1, 6, 7.
Omesodel a Babier er Ongeru el Samuel
9:1, 6, 7. A David a millemolem er a telbilel. Kid me ngdirrek el kired el melasem el mo meruul aike el tekoi el detilib el mo meruul.
Te Uluutekangel er a Toched er a Bedengir
10 A bebil el rak er a uriul, e a King el David el uleak a klou el bltikerreng er ngii el mo er a Jonathan, e ngulechotii a blekokuii el bltikerreng el mo er a Mefiboseth. A David a mlo olluut el mo er ngii a rokui el chetemel a Saul, me a Siba el mesiungel a Saul a uluungerachel er tia el chutem. A David a dirrek el dilu er a Mefiboseth el kmo, ‘Ke mo blechoel el obengkek ra tebelek ra blengur.’ (2 Samuel 9:6-10) Ngulterekokl a blekokuii el bltikerreng er a David a milengelaod er a Mefiboseth e ngilsuir el mo outekangel er a ringelel a chelitechut. Ngkol ua ngera el ungil el suobel! Ngkired el dirrek el olecholt a blekokuii el mo er tirke el outekangel a toched er a bedengir.
Morriter er a Tekingel a Dios
it-1 266
Chusem
Ngar er a delongelir a rechad er Ongos er a irechar el uldimukl er a rechad er a Israel, e a chesemel a sechal a mle olechotel a klsechal er ngii. Ngmle llechul a Dios el mora rechad er a Israel el kmo ngdiak el kirir el mengimd a ‘chui er a bita ma bitang er a bderrir’ me a lechub e longedeb a chesemir. (Lev 19:27; 21:5) Nglocha mle llach el uaisei e le tia el omeruul a mle chelsechusem er a klsuul el omengull.
JUNE 13-19
MEKREOS EL TEKOI EL NGAR ER A BIBLIA | 2 SAMUEL 11-12
“Lak Bechere Ngibes Me Lomtebechel er Kau”
Ngsebechem el Mo Mesisiich er a Bedeklel a Satan!
10 A ngibeserreng a rirellii a King David el mo obes aike el bla lebsang a Jehovah. Aika uldimukl er ngii a kerruul ngdirrek a Jehovah a rirellii el mo chetengakl e milsa klisiich er a recherrouel er a mekemad. A David a di mle ngii el dmu el kmo a klengeltengat er a Jehovah a ‘kuk betok er a ikel sebechel el mchais.’ (Psa. 40:5) Engdi ngngar ngii a taem el David a ulebes aike el bla lebsang a Jehovah. Ngmlo diak lungil a rengul er aike el ngar ngii er ngii. Alta ngmle betok a bechil, ngmlo nguibes a rengul er a bechil a ta er a chad. Ngika el redil a mle Bathseba el bechil a Uria el Hitait. A David a mlo obengkel a Bathseba me ngmlo dioll. Me nguaisei, tia diak el sel kot el mekngit el tekoi el lerirellii. A David a uchul me ngmlad a Uria! (2 Sa. 11:2-15) Ngera ngulemdasu a David? Ngika ngulemdasu el kmo a Jehovah a diak el sebechel mes aika el tekoi? Alta David a milsiou er a Jehovah el kemanget el taem engdi ngmlo nguibes a rengul. Tia mlo uchul me ngmlo betok a ringel el mo er ngii. A uriul e a David a uluuchais a kngtil e ulebult. Nglocha kmal mle dmeu a rengul el lmuut el moba kengei er a Jehovah!—2 Sa. 12:7-13.
Mkengei el Olengesenges er a Jehovah —E Ngera Uchul e Mekerang?
15 A Jehovah a tiltkii a David el dimlak di blo el bdelul a telungalek er ngii, e ngdirrek el mlo mengedereder er a rokir el renged er a Israel. Me ngii el mle king a uchul me ngmle klou a klisichel. A lebebil er a taem, e ngmlo ousbech er a klisichel el ngar a mekngit el rolel, e dirrek el mlo remuul a oberaod el klengit. (2 Sa. 11:14, 15) Engdi ngkilengei lorrenges a omellach er a Jehovah, me sera loluluuch e nguluuchais er a Jehovah er aike el rokui el mlara rengul. E millasem er a tkurrebab el sebechel el olengesenges a omellach er a Jehovah. (Psa. 51:1-4) Me a lmuut el tang, ngmle ngariou a rengul e kilengei a ungil uleklatk el mlara rebebil el sechal me a redil. (1 Sa. 19:11, 12; 25:32, 33) A David a siluub a tekoi er aike el cheleuid lomerellel e rirellii a Jehovah el mo kot el klou a ultutelel er a klengar er ngii.
Bechei a Llechul a Dios me a Omellach er Ngii Me Loksongii a Ukltkem
7 A klemedengei er kid er a ungil me a mekngit a diak lebelkul a kmo, ngkired el mo tomall a lechul a Dios e mochu medengei. Me ngsebeched el ngmai a klubeled er a cheleuid el omerellir a rebebil el ngar er a Biblia. A Osisechakl 1:5 a melekoi el kmo: “A . . . osisechakl a dirrek el sebechel dochel a klemedengei er a re mellomes a rengrir el chad.” E tia el kmal ungil el ulekrael a ngar er a Dios el mei er kid! El ua tiang, ka molatk a ringel el blo lechebangel a David er a uriul er a bo lak lolengesenges er a Jehovah, e lebo er a deleboes el obengkel a Bathseba. (2 Samuel 12:7-14) Sel monguiu er tia el cheldecheduch, e di lekau el merriter el kmo: ‘Ngera mle sebechel a David el remuul el mo oibngii er aika el mondai? Ak mo mekerang sel bok chelebangel er a osisiu el blekeradel? A lsekum e ak mekesuseu el mora deleboes, e ak mo ua David me a lechub ak mo ua Josef?’ (Genesis 39:11-15) A lsekum kede mo ungil melebedebek el kirel a mo telemellel a debo er a klengit, e kede mengal mo ‘ouketui a mekngit.’
Morriter er a Tekingel a Dios
‘A Demmiu a Chubechubechad’
11 Ngar er sel blekeradel el dilubech el mo er a David me a Bathseba, er a uchei er a bo lekebekakl sel kerrekeriil el kirir el mo okodall, e ngmle kirel el musubes a kngterir. A remengeteklir a rechad er a Israel a dimlak a llemeltir el meruul er tia el tekoi. Omko e tirkang a mlo oukerrekeriil er tia el tekoi, e ngdimlak a mo cheldechulel er tir me ngmle kirir el di otebedii a tekoi el kmo te mo okodall. Tiaikid a mle llechukl er a Llach. Engdi a Jehovah a millatk er sel telbilel el obengkel a David, me ngmle soal el omes el kmo kele lengar er ngii a uchul me bo lsebechel el ousubes er a kngtil a David. (2 Samuel 7:12-16) Sei a uchul, me a Jehovah el Dios, el “Ngikel oukerrekeriil er a beluulchad el rokir” e “omes a reng” a di mle ngii el mo oungerachel er tia el tekoi. (Genesis 18:25; 1 Kronika 29:17) A Dios a mle sebechel el menguiu er a rengul a David, e merriter er a delechel a beltel a rengul, e msa klausubes.
Ngera Belkul Sel Lousubes er Kau a Jehovah?
9 A Jehovah a milecherei a David me ngmlo chuarm er a belsel a mekngit el omerellel, e ngii el ringel a millemolem el omekcharm er ngii. Me nguaisei, engdi sera lomes er ngii el mera el uluuchel er a rengul e ‘loltubokl’ er ngii, e nguluusubes er ngii. (Monguiu er a Psalm 32:5; Psalm 51:17) Me a Jehovah a ungil el medengei a uldasu me a moktek er a chad el meruul a klengit. Me ngmle chubechub el uluusubes er a David me a Bathseba e dimlak loukerrekeriil e lomekoad er tir el oltirakl er a Llach er a Moses el kirir tirke el mo er a laokreng. (Levitikus 20:10) E rirellii a ngelekir el Salomon el mo ongingil el king er a Israel.—1 Kronika 22:9, 10.
10 Sel blekerdelel a David el ullecholt er a klechubechub el mo er a Saul a locha ta er a uchul me a Jehovah a uluusubes er ngii. (1 Samuel 24:4-7) A Jesus a milsaod er a blekerdelel a Jehovah el kmo: “Lak moukerrekeriil er a re chad, me lak bo loukerrekeriil er kemiu a Dios, ele Dios a mo oukerrekeriil er kemiu el di ua iser cho moukerrekeriil er a re chad; ng mo meruul el ekor kemiu a ikel murruul el mor a re chad.” (Mateus 7:1, 2) Ngkmal mo mechelaod a rengud sel dodengei el kmo a Jehovah a mo ousubes a oberaod el kngtid el uldimukl er a laokreng me a okodellel a chad! Ngousubes er kid a lsekum kede ousubes er a rebebil, e ouchais a kngtid el mo er ngii, e ngmodech a uldesued el kirel a mekngit el omerelled. Me nguaisei, a Jehovah a ousubes er a chad el mlo er a klengit a lsekum e ngouuchel er a rengul e obult er a kngtil.—Monguiu er a Rellir 3:19.
JUNE 20-26
MEKREOS EL TEKOI EL NGAR ER A BIBLIA | 2 SAMUEL 13-14
“Amnon el Di Millatk er a Di Ngii a Mlo Uchul a Klou el Tellemall”
it-1 32
Absalom
Okodellel a Amnon. Klebekelel a ochedal a Absalom er a Tamar a uchul me a ta er tir er a Amnon a ngilanged er ngii. A Amnon ulumulak el smecher e kiltmeklii a rolel e a Tamar a mlora delemerab er ngii el mo meruul a kelel e okor e oterebekii. Tia el ngelbesel a Amnon er a Tamar a di mle mereched el mengodech el mo kltui me nguldikii lotebedii er a delemerab er ngii. Me a Tamar a sildelii tia el bilel el ngii ulemeketakl el mora rechad el kmo ngngelekel a king el dirkak a ta el bo loilil, e lilecha chab er a bdelul e merrael losiueklii a Absalom. A tekingel a Absalom el mora ochedal a mileketeklii el kmo ngmilechedech er a ngelbesel a rengul a Amnon el bedul a Tamar. Ngdilu er ngii el kmo lak loruul er a ultuteklel e ngiluu el mo kiei er a blil.—2Sa 13:1-20.
Momekeroul er a Ulserechakl el Reng
11 A Biblia a dirrek el mesaod el kirir a rechad el tir a mlo mechitechut er a omengesuseu el mo meruul a deleboes. Ngdirrek el mesaod aike el tellemall el mo er ngii a lsekum ngmo diak de kilmekl a rengud. Me a lsekum ke mo chelebangel er a tekoi el ua Kim, e molatk er ngike el kebelung el buik el losaod er ngii a 7 el bliongel er a Osisechakl. Ngdirrek lungil molatk er a Amnon me a tellemall el mlo er ngii el mekngit el omerellel a uchul. (2 Samuel 13:1, 2, 10-15, 28-32) Me a ruungalek a sebechir el ngosuterir a rengelekir el mo omekeroul a ulserechakl el reng me a llomeserreng el okiu sel losaod aike el kerebai er a Biblia er a temel a omengull el telungalek er tir.
it-1 33 par. 1
Absalom
Ngmlo chuib eru el rak. Ngtemel omelamk el sib el taem er a ungil klebesei me a Absalom a kiltmeklii a blengur er a Baal Hasor el bekord el 14 el mael a cheridel er a Jerusalem. Ngmilengemedaol er a David me a rengelekel el sechal el me teloi er ngii. A demal er a lekotouar e ngurremelii me loderechii a ketengel er a Amnon el mo techil. (Osi 10:18) Ngtemel ngii el mur e a Amnon a “chetelolang” me a Absalom a dmu er a remesiungel me te mekodir. Tirke el bebil er ngii el sechal a liluut el mora Jerusalem e ngii a chiliis el mora Gesur el ngii a mlara ongos er a Daob er a Galilea el mo kiei lobengkel a demal rubak el chad er a Siria. (2Sa 13:23-38) Me a “kdekudel el kodall” el lulemlaoch el kirel a Nathan a mlora rebebil ruldidellel a rsechel a David e melemolem el mo er ngii er a klemengetel a klengar er ngii el rokir.—2Sa 12:10.
Morriter er a Tekingel a Dios
Ngera Uchul me ak Bekikl er a Rolel a Omengetmeklek?
Ngklemera el tekoi el kmo a rengul a chad a rullii el mo olechaumad me a lechub e ngdiak. Ka molatk er a Absalom el ngelekel a King el David. A Biblia a mesaod el kmo:
“Ng dimlak a tal chad . . . el merael a chisel a klungiolel. . . . Ng dimlak a telemall er a bedengel.”—2 Samuel 14:25.
Engdi ngika el kekerei el chad a mle kedidai a rengul, e soal a chetengakl e dirrek el mle cheblad! A Biblia a diak el lochotii a ungil el siasing er a Absalom; ngbai mesaod er ngii el kmo, ngkmal mle cheblad e durengul el osiik a rolel a kltui.
Tiaikid a uchul me a Biblia a meskid a ulekrael el kmo:
“Milemiu er a beches el klengar.”—Kolose 3:9, 10.
“Lak momesiich a ikriu el menglebokel er kemiu . . . , A klebekeliu bai bo lecholt er sel meral kau el ngar a chelsem.”—1 Petrus 3:3, 4.
Me alta e ngdiak el mekngit a donglebokel er kid, engdi a bai klou a ultutelel a sel mera el kid er a chelsed. A cherengel a taem, e a ungil el blekerdelem a ochau a osengir a rechad er a bai klisichel a bedengem me a lechub e ngklebekelem! A redil el ngklel a Phylicia a dilu el kmo: “A klebekeled a mereched el ochau a osengir a rechad, engdi sel mera el kau er a chelsem me a ungil el blekerdelem a kmal diak el lobes er ngii a rechad.”
JUNE 27–JULY 3
MEKREOS EL TEKOI EL NGAR ER A BIBLIA | 2 SAMUEL 15-17
“Kldidairreng a Uchul me a Absalom a Mlo Omtok”
Moukerebai er Tirke el Blak a Rengrir el Chedal a Jehovah
10 A Absalom el ngelekel a King el David a dimlak leblak a rengul el mo er a Dios e le ngmle kedidai a rengul. Ngmle soal el mo king me “ngiluu a tar a kuruma ma bebil er a uos, ma re 50 el soldau el remurt er medal.” (2 Sa. 15:1) Ngdirrek el milengesuseu er a rebetok el chad er a Israel el mo olengeseu er ngii. Me a lmuut el tang, ngmillasem el omekoad er a demal, alta ngmle ungil el medengei el kmo a Jehovah a tiltkii a David el mo king er a Israel.—2 Sa. 15:13, 14; 17:1-4.
Mosiou er a Jehovah el Dios er a Ilmokl
5 Ngar er ngii a betok el okesiu el ngar er a Biblia el kirel a mekngit el omerellir a rechad el milengesuseu er a rebebil. E a ta er tir a Absalom el ngelekel a King el David, el kmal mle ungil el sechal. Ngdi mle ua Satan el milecherei a mekngit el uldasu me ngmukeroul er a chelsel a rengul. Me ngmlo soal el orribech er a deruchellel a demal el king, alta e ngdimlak a llemeltel. Ngmillasem el mengesuseu er a rechad el mo omdasu el kmo a demal a dimlak lomekerreu er tir engdi ngii a soal el lolengeseu er tir. Me a Absalom a di ua omerellel a Diabelong er a chelsel a sers er a Eden, el milengesuseu er a rechad el mo omdasu el kmo ngomekerreu er tir, e dirrek el uluuchais a blulak el kirel a demal.—2 Samuel 15:1-5.
it-1 1083-1084
Hebron
A sesei el rak er uriul e a ngelekel a David er a Absalom a liluut el mora Hebron el mo melasem el melai er a kleking er a demal. (2Sa 15:7-10) A doltirakl er a reksi e a Hebron a mle klou a ultutelel beluu er a ta el taem el capital er a Juda me a dirrek el Absalom a mle chad er ngii. Sei a uchul me nglocha ngileltii tia el basio el mo uchelel omeasem er ngii el melai er a kleking. Uriul e a ngelekel a ngelekel a David el King Rehoboam a liluut el toketekii a Hebron. (2Kr 11:5-10) A lmuut el uriul er a letemellii a Juda rechad er a Babilon e lluut a reblebaol el mo remei er ngii, e a rebebil er tir a mlo kiei er a Hebron (Kiriath Arba).—Neh 11:25.
Morriter er a Tekingel a Dios
Kau, Kungil Medengei a Rokui el Tekoi?
11 Nglocha mo er ngii a taem el metemall a rengud e le rechad a ulemerk a diak leklemerang el chais el kired. E tia dilubech el mora Mefiboseth. A King el David a milsa Mefiboseth a rokui el beluu el mle kloklel a demal rubak el Saul. (2 Samuel 9:6, 7) Engdi uriul e a David a rirenges a mekngit el tekoi el kirel a Mefiboseth. E dimlak bo lungil tirterii tia el tekoi el kmo ngklemerang me a lechub e ngdiak, e bai ngilai a rokui el kloklel a Mefiboseth. (2 Samuel 16:1-4) Me sel taem el David a mlo mengedecheduch er ngii er a uriul, e ngmlo medengei el kmo ngkmal mle cheleuid a omerellel. Me ngliluut el msang a bebil er a kloklel. (2 Samuel 19:24-29) Me oleko David a milengoit a temel el mo merriter er a klemerang e dimlak lorreched el meruul a tekoi el okiu a di tedobech el omesodel a tekoi, e ngmle sebechel a Mefiboseth el dimlak bo lechuarm er a chelebirukel lomeruul.