7 EL SUOBEL

Klemerang me a Melemalt el Tekoi

Lukas 1:3

KEDEB EL OMESODEL: Mousbech a mera el olechotel a tekoi el ngosuterir a rurrenges er kau el mo medengelii a melemalt el omesodel a tekoi.

Mosiik e mousbech a klemerang el tekoi. A tekingem bo lultuil er a Tekingel a Dios, e mchiuii er a Biblia a lsekum ngsebechel. E a lsekum ke mesaod a tekoi er a science, me a chais er a beluu, me a tekoi el dilubech me a lmuut el bebil, e mkerekikl me a tekoi el mousbech lemelemalt e lemera el tekoi.
Bo mungil lousbech a klemerang el tekoi. A lsoam el mo smodii a rolel a omoltaut er a bades, e ngkirem el mo medengei el kmo ngera soal a Jehovah el olisechakl er ngii er tia el bades. Me a otutel a dirrek el kmal kirel el oltirakl a rokui el tekoi el lolekoi a Biblia, me a babier el loltobed a “blak a rengul e mellomes a rengul el mesiou.” (Mt. 24:45) A lsekum kousbech a babier el dimlak lemengai a uchetemel er a Biblia, e mkerekikl me lak molodech a tekingel a chad el milluches er ngii.

Lak molechel me a lechub e bo leiis a omesodem er a klemerang el tekoi. Bom kerekikl me a tekoi el “bebil er a rechad” lak bo el “oumesingd er a rechad,” me a “lebebil er a taem” lak bo el “blechoel,” me a “locha” lak bo el “sebechel.”
Beketakl a mera el olechotel a tekoi. A uriul er a omchiuii a bades me a lechub ke mesaod er a tekoi, e moker a ker, me a lechub e momekesiu a tekoi el ngosuterir a rurrenges er kau el mo medengelii a belkul a tekoi el mosaod er ngii.