Berrotel el Tekoi 5
Bo Blechoel el Lousbech a Tekingel a Dios
NGERA NGOLISECHAKL A BIBLIA? “Te ngeltengat a re medengei el kmo te chebuul a lak lousbech er a Dios.”—Matteus 5:3.
NGERANG A OMELSEMAI? Ngngar ngii a kmal betok el telael el kakerous el bedengel a klechelid, el betok er ngii a olisechakl a kakebosech el uldasu el kirel a rolel a lolisiich er kau el kirel a tekingel a Dios. Me a leuaisei, e ke mekerang e mo sebechem el ngiltii a klechelid el ngii a olisechakl a klemerang el tekoi, e dirrek el odeuir a rengul a Dios? A rebebil el merael a chisir el meluches a babier, a melekoi el kmo a klaumerang me a blakerreng el bedul a Dios a diak a ultutelel, e dirrek el sebechel el mo uchul a telemelled. A babier el Maclean’s a ngklel, a ouchais a tekingel a ta el ngarbab el chad, el ngii a diak el loumerang er a Dios el kmo: “Sel klaumerang er a Rekristiano el omdasu el kmo ngngar ngii a lmuut el meklou el tekoi el dirkak bo lodengei a rechad el mesuub a tekoi er a science . . . a diak di longitechut er a klengar er kid, e ngdirrek el sebechel el mo uchul e a rechad a mo morimel el mo meruul a uldikel.”
NGERA SEBECHED EL MERUUL ER NGII? Me bo dorriter aike el bleketakl el olechotel el kmo a Dios a mera el ngar ngii me a lechub e ngdiak. (Rom 1:20; Hebru 3:4) Lak becherei a ngii di el chad me longitechut er a uldesuem el soam el losiik a nger er a meklou a ultutelel el ker el ua ikang: Ngera uchul me kede ngar tiang? Ngngar ngii a klengar er a uriul er a kodall? Ngera uchul me ngkmal klou a chelebuul me a ringel? Ngera soal a Dios a doruul? Ngkmal klou a ultutelel el bo dodengei a nger er aika el ker, e le ngsebechel el ngosukid el mo kiei el ungilbesul er a rengud er aike el ngar ngii er kid.
Me nguaisei, engdi lak di mereched el kongei el mo oumerang a ngii di el tekoi el louchais er kau a resechelim. A Tekingel a Dios a melisiich er kau el kmo “modars a bedengiu” el ochotii el kmo ke meruul a tekoi el odeuir a rengul a Dios. (Rom 12:1, 2) A lsekum e ke meruul el uaisei, e ngulterekokl a Dios el mo omekngeltengat er kau. Sel mongoit a temem el menguiu er a Biblia e dirrek el moltirakl a omellach er ngii, e ngmo sebechem el oibngau er a betok el mondai, e kosadel a meringel el uldasu, e bai kilungii a deurreng er a klengar er kau. Ngkmal sebechem el otilii a klaumerang er kau er tia el telbiil. A rebetok el miliol el chad el kakerous a blekerdelel a klengar er tir a mla ngmai a klungiolir el oeak a omesubir el kirel a klemerang el tekoi el kirel a Dios me a moktek er ngii.
Me sel moltirakl er a mellomes el ulekrael er a Biblia e moltaut er a chelsel a klengar er kau, e ngulterekokl el mukeroul a dmolech el bltkil a rengum el mo er a Dios. Ngera me ngdiak mkengei er a Resioning er a Jehovah el ekong me mosuub a Biblia el obengterir? Oleko ke kongei el mo mesuub el obengterir, e ke ulterekokl el mo kongei aike el tekoi el lulluches a Paulus el ngar a 1 Timoteus 6:6 el kmo: “Ngdi le ngarngii a meluu ra Dios e lak a ngesonges ra rengul, e ngkloul klungiaol.”
[Siasing el ngar er a 8 el llel]
Mochotii el kmo ke meruul a tekoi el odeuir a rengul a Dios