Kot el Ker: Ngar er Ngii a Belkul a Klengar er Ngak?

A ROSALIND el mlukeroul er a England a kmal mle soal el mesuub e dirrek el mle soal el olengeseu er a rechad. Me a uriul er a letobed er a skuul e ngmlo oureor el olengeseu er a remechebuul me a rechitechut, e dirrek el ullengeseu er tirke el meringel er tir el mesuub. Me alta ngmla er ngii a kot el ungil el urerel e mle ungilbesul a klengar er ngii, engdi ngmle blechoel el melatk el kmo, ‘Ngera uchul me kede ngar er tiang?’ me a ‘Ngerang a belkul a klengar?’

Ngera uchul me kede oker a ker? A rechad a diak el ua charm el diak el sebechel el omdasu a tekoi. Ngsebeched el ngmai a klubeled er aike el durruul er a ngar er a mong e melib el kirel aike el bo doruul. Ngsoad a lebo er ngii a belkul a klengar er kid.

Ngerang a nger er a rebebil? A rebetok a oumerang el kmo ngdi kired el mo osiik a betok el kerruul me a chetengakl me bo ledeu a rengud.

Ngera belkul a nger er tir? Ngsebeched el di kid el melilt aike el soad el mo meruul, e ngii el tekoi a kuk klou a ultutelel er a soal a Dios.

Ngera ngolisechakl a Biblia? A King el Salomon a kmal mle merau el chad e uleldeu er a rengul er aike el rokui el soal, engdi ngmlo medengei el kmo aika el rokui el tekoi a dimlak lerellii a klengar er ngii el mo er ngii a belkul. Ngbai milsaod er a belkul a klengar el kmo: “Ng mla medung a rokui el tekoi ma ulebongel el tekoi a kmo: Moluu er a Dios e moltaut a llechul; tiaikid ia ngerechelel a chad.” (Olisechakl 12:13) Ngerang a soal a Dios a doruul?

A ta er a moktek er a Dios el kired a soal a bo doldeu er a rengud. A Salomon a milluches el kmo: “Ng bai ungil er a chad a longa e lolim e loldeu er a rengul er a urerel. Tia dirrek el blo kudengelii el kmo ng mlar a Dios el mei.”​—Olisechakl 2:24.

A Dios a dirrek el soal a domekerreu e doubltikerreng el mo er a rechad er a blid. Momtab aika el ulekrael el mo er a dersta el chad er a chelsel a telungalek.

“A re sechal a kirir el mo betik a rengrir er a re becherir el di ua le betik a rengrir er a di bedengir.”​—Efesus 5:28.

“Ma re bek el redil a kmal kirir el mengull er a re becherir.”​—Efesus 5:33.

“Re ngalek, ng ngercheliu er a klekristiano el olengesenges er a re demmiu ma re delemiu.”​—Efesus 6:1.

Ngsebechel el mo dmeu a rengud a lsekum e kede oltirakl aika el omellach er a Biblia. Engdi ngklou a ultutelel a dosuub el kirel ngike el Ulemeob er kid e domak a deleuill er kid el obengkel. A Biblia a melisiich er kid el kmo “Molekeed er kemiu er a Dios, me bo lekeed er kemiu.” (Jakobus 4:8) Tiang a kmal klou el techall el kired! Me a lsekum e kede kongei er tia el techall e a klengar er kid a mo er ngii a mera el belkul.

Me chelechang e a Rosalind el dulsaod er ngii er a uchei a oumerang el kmo, ngmla metik er a mera el belkul a klengar.

A lsoam a lmuut el betok el omesodel a rolel a klengar el lekengei er ngii a Dios, e momes er a 12 el bliongel er a babier el Ngerang Mera el Lolisechakl a Biblia? Ngsebechem el download er tia el babier er a www.jw.org

[Baks el ngar er a 5 el llel]

Ngerang Dilung a Jesus el Kirel a Belkul a Klengar?

A Jesus a mle medengelii a moktek er a klengar er ngii. Ngdilu el kmo: “A uchul mak mlechell el mer tial beluulchad, a mlei el me ouchais er a klemerang.” (Johanes 18:37) Me a Jesus a uluusbech er a klengar er ngii el mo olisechakl er a rechad a klemerang el kirel a Dios me a moktek er Ngii.

A klengar er kid a dirrek el mo klou a belkul a lsekum kede oukerebai er a Jesus. Me nguaisei, a Jesus a melisiich er kid el mo mesuub er ngii. (Mateus 11:29) Me bo dosaod a eru el rolel e ngsebeched el oukerebai er ngii.

A Jesus a dilu el kmo: “Te ngeltengat a re medengei el kmo te chebuul a lak lousbech er a Dios.” (Mateus 5:3) Ngsebeched el mekurulii a deleuill er kid me a Dios sel dosuub el kirel a ‘di ta el meral Dios, e bo dodengelii a Jesus Kristus el ngikel lulderchii el mei.’​—Johanes 17:3.

A Jesus a uleldurech er a rultirakl er ngii el mo olisechakl er a rebebil a tekoi el bla lesuub. Ngdilu el kmo: “Morael el mor a bek el bedengir a re chad er ker me ker e moruul er tir el mo obengkek, e molecholb er tir loba ngklel a Chedam, ma Ngalek, ma [oureor el klisiich], e molisechakl er tir me bo loltirakl a ikel rokui el bla kdu er kemiu.”​—Mateus 28:19, 20.

Tirke el medengelii a klungel a ultutelel a deleuill er tir el obengkel a Dios e oltirakl aike el tekoi el losuub er a Biblia a kmal mo ungil a klengar er tir. Me te mo melechesuar el kmo ngmera el ngar er ngii a belkul a klengar er tir sel lomuchel el olisechakl er a rebebil el kirel a Dios.