A Dios a Kutmeklii a Rolel el Mo Olsobel er a Klechad

A Dios a tilbir el mo er a blak a rengul el Abraham el kmo a mildung er a ulaoch el ‘uldidellel a rasech’ a mo ta er a klengelakel er ngii. Me ngokiu ngikang, e a rechad er a “bek el beluu” a mo ngmai a klengeltengat. (Genesis 22:18) A ngelekel a ngelekel a Abraham el Jakob a millukl el mo er a Ekipten er a uriul, e a telungalek er ngii a mlo obdois el mo renged er a Israel er a irechar.

A uriul el ngar er a Ekipten, e ngike el mekngit el Farao a uluusibai er a rechad er a Israel el mo lmuut er sel taem el Dios a tiltkii a profet el Moses, el mo mengetakl er a renged el tuobed er tia el beluu el okiu a mengasireng el bingel a Bekerekard el Daob. A uriul er tiang, e a Dios a milsterir a rechad er a Israel a llach, el uldimukl er a Teruich el Llach, el mo omekrael e omekerreu er tir. Aike el llach a ulemeketakl a uldars el kirel a klausubes er a klengit. A Dios a ulemekrael er a Moses el mo ouchais er a rechad er a Israel el kmo ngmo odureklii a kuk ta er a profet. Ngika el profet a mo ngike el miltib el ‘uldidellel a rasech.’

Kuk betok er a eua el dart el rak er a uriul, e a Dios a tilbir el mo er a King el David el kmo ngike el merael mei, el ‘uldidellel a rasech’ el mildung er a Eden, a mo mengedereder er a renged el ngii a mo medechel el mo cherechar. Ngkaikid a mo Messias, el Ngike el lengileltii a Dios el mo olsobel er a klechad e olutii a Paradis el me er tia el chutem.

Me ngokiu a David me a rebebil el profet, e a Dios a milekekokil el olecholt a betok el kirel a Messias. Ngmildung el kirel el kmo ngmo ngariou a rengul e chubechub e ngar cheungel a omengederederel, e a klengerenger, chelebirukel, me a mekemad a mo nguemed. A rokui el chad a mo er ngii a budech er a delongelir el uldimukl a charm. A secher, ringel, me a kodall, el dimlak el tedebechel a dimla moktek er a Dios a mo diak, me a rechad el mla mad a lmuut el me ngar er tia el chutem.

A Dios a ulemlaoch el okiu a profet el Mika el kmo a Messias a mo mechell er a Bethlehem e dirrek el ulemlaoch el okiu a profet el Daniel el kmo a uriul e ngmo mokoad. Engdi a Dios a mo okisii a Messias er a kodall e tutkii el mo King el ngar er a eanged. A Daniel a dirrek el milsa er a ues el kmo a Rengedel a Messias a ulterekokl el mo mtechei a rokui el kabelment el diak a ulebengelel. A Messias ngmera el mlei el ua mildung er a ulaoch?

​——Mlengai er a Genesis 22-50 el bliongel, me a dirrek el Exodus, Duteronomi, 2 Samuel, Psalm, Isaia, Daniel, Mika, Sekaria 9:9.