OMESODEL A SUOBEL ER A MEDAL TIA EL BABIER | NGERA BELKUL EL KIREM—A RENGEDEL A DIOS?

Ngera Ngmo Rullii er Kau—A Rengedel A Dios?

Ngokiu aike el mlo merek el suobel e ke ulterekokl el mlo medengei el kmo, a Rengedel a Dios a kmal klou a belkul el kirir a Resioning er a Jehovah. Me ke locha mlo mechas a rengum er a bebil er a klengeltengat el mo er ngii el okiu ngii el Renged. E a osisiu el taem, e ke locha millatk el kmo aika el telbiil ngmera el mo tmaut me a lechub e ngdiak.

Ngrolel a llomeserreng el bo mkerekikl er a bai di moumerang a rokui el tekoi el omrenges. (Osisechakl 14:15) Sel bo mkerekikl e ke mo ua rechad er a Berea er a irechar.a Sera lekot el rongesii a ungil chais er a Renged, e ngdimlak el di loumerang e le tir el mle sorir a bo le klemerang. Te bai mle kerekikl el merriter a bades el kmo “a ikel lullekoi a Paulus ng klemerang ng diak.” (Rellir 17:11) Te ulemes aike el bebil er a bades e ulemekesiu er ngii er a osisecheklel a Paulus el kirel a ungil chais. Me sera loruul el uaisei e ngmlo ulterekokl a rengrir el kmo a ungil chais a mlengai a uchetemel er a Tekingel a Dios.

A Resioning er a Jehovah a kmal mengemedaol er kau el mo meruul er a osisiu el tekoi. Me a lsekum ke mo mesuub er a Biblia el obengkemam el diak locheraol, e ngmo er ngii a techellem el omekesiu er a klaumerang er a Resioning er a Jehovah el kirel a Rengedel a Dios me aike el lolisechakl a Biblia.

Me sel mosuub er a Biblia e ke mo medengei a lmuut el betok el kirel a Rengedel a Dios e dirrek el mo metik a nger er a bebil el meklou a belkul el ker el kirel a klengar.

Kid kede mla er ker el mei?
Ngera moktek er a klengar?
Ngera uchul me a Dios a omechei a ringel?
Ngera mo duubech sel lemad a chad?
Tia el beluulechad ngmo mokngemed?
Kede mekerang e metik a deurreng er a chelsel a telungalek?

E a ngar er bab er ngii, a omesubel a Biblia a ngosukau el mo ‘olekeed er kau er a Dios.’ (Jakobus 4:8) Me sel bo mkeed er a Dios, e ke lmuut el mo ungil el medengei el kmo ngmekerang a Rengedel a Dios e mo uchul a klungiolem er chelechang me a ngar er a medam el klebesei. Me a Jesus a millekoi er a nglunguchel el mo er a Demal el kmo: “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.”—Johanes 17:3.

A Resioning er a Jehovah a sebechir el mesuub er a Biblia el obengkem el ousbech er tia el babier.

A lsoam a diak locheraol el omesubel a Biblia, e mongedecheduch er a ta er tir, me a lechub e mlechesii a ongtim el ngar er a www.jw.org/pau. (Momes er a MOLENGIT A OMESUBEL A BIBLIA er a home page.)

a A Berea a mle mats er a Masedonia er a irechar.

A Uchul Me Ngkmal Soal a Rengedel a Dios

A 10 a rekil el ngalek el redil el Folake a mle kirel el meluches er a babilengel er a skuul el mesaod er a tekoi el kmo “Ngerang a Kot el Soak el Tekoi.” A Folake a ngileltii el mo meluches el kirel a uchul me ngkmal soal el ouchais er a rechad el kirel a Rengedel a Dios.

A Folake a milsaod el kmo: “A Rengedel a Dios a mera el kabelment, engdi ngdiak el meues, me ngdiak el sebechem el mesang el mo lmuut er a omousbech a klas!”

A Folake a millemolem el meluches el kirel a klengeltengat er a Renged el lesal oureng er ngii. Ngmilluches el kirel a bebil er a mondai el Renged a mo sumechokl el kmo: “Ngkmal mekngit a renguk sel kisterir a rechad el diak a blirir me te kiei er a tkul a rael,” me a “rengalek el ngar er a betok el beluu er a beluulechad el mad el klengerenger a uchul.” Ngdilechelii el kmo: “Nglmuut el mo dmeu a renguk sel kunguiu er a Isaia 65:21.” Tia el bades a tibir el mo er a rechad el tir a mo kiei el chederedall er a Rengedel a Dios el kmo: Te “mo toketek a blai e mo kiei er ngii; . . . te mo dualem a sers er a bilong, e mo dmeu a rengrir er a bilong.”

A Folake a millekoi el kmo, ngmengiil er sel taem el Dios a mo ousbech er a Rengedel el mo choroid a rokui el secher. Me ngar er a babilengel e ngliluches a tekoi el medung er a Ocholt 21:4 el kmo, a Dios a “mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel.” Me ngar er a orokiolel a babilengel e ngliluut el mesaod el kmo, ngkot el soal el ouchais el kirel a Jehovah me a Rengedel. Me ngkmal bleketakl el kmo, a Rengedel a Dios a kmal mekreos er a rengul ngika el ekebil!