Kerrir A Rechad
◼ Ngua ngera klteketel a taem el dosuub el obengkel a chad el olengeriakl er a omesubel?
Ngungil a dolemolem el mesuub el obengkel a chad el olengeriakl er a omesubel el dimerekmo bla el suub aika el teblo el babier el Ngerang Mera el Lolisechakl a Biblia? me a Molemolem el Ngar er a Bltikerreng er a Dios sel lebo er ngii er a tekoi er a Belau. Tiang a uaisei el mo lmuut me a lsekum ngike el mesuub a mo metecholb er a uchei er a lemerekui aika el babier. A uriul er a lemetecholb e ngsebeched el melemolem el meluches aika el temed el mesuub el obengkel e mo oldingel er ngii. Me a lsekum a ta er a chad el mla mo oldingel a obliil a obengked, e ngii el chad me ngdirrek el sebechel el meluches a temel.
Ngklou a ultutelel el kirir a rebeches el chad el mo oba ungil el uchetemel a klemedengei er tir er a klemerang er a uchei er a bo demerek el mesuub el obengterir. Ngkirir el mo ‘omak a risir’ er a Kristus e mo ‘ulterekokl a klaumerang er tir’ me bo el sebechir el outekangel aike el mondai el bo el chelebangel. (Kol. 2:6, 7; 2 Ti. 3:12; 1 Pe. 5:8, 9) Me a lmuut el tang, a bo el sebechir el mo meduch el olisechakl er a rebebil, e ngkirir el mo oba melemalt el klemedengei el kirel a “klemerang.” (1 Ti. 2:4) Me sel bla el suub aika el teblo el babier, e kede mla ngosuterir tirka el mesuub el mo mesisiich el dechor er a rael el “mora klengar.”—Mt. 7:14.
A uchei er a lekengei er a chad el mo metecholb, e a remechuodel er a ongdibel a kirir el oterekeklii el kmo ngii el chad a ungil a klemedengei er ngii el kirel a osisechakl er a Biblia e kiei el oltirakl er a chelsel a klengar er ngii. A remechuodel a kmal kirir el mo kerekikl er a chad el dirkak el suubii sel kot el babier e soal el mo metecholb. Me a lsekum a chad a diak el kltmokl el kirel a techolb, e a remechuodel a sebechir el ngosuir el kirel aike el lousbech el rullii el mo rredemelel a mo metecholb er a ngar medal el taem.—Momes er a Organized to Do Jehovah’s Will el babier, er a 217-218 el llel.
[Blurb el ngar er a 2 el llel]
Ngklou a ultutelel el kirir a rebeches el chad el mo oba ungil el uchetemel a klemedengei er tir er a klemerang