Lmuut el Mo Ungil a Duch er Kid el Ngar er a Omesiunged—Kutmeklii a Rolel a Deluut el Mo Oldingel er a Chad

A Uchul Me Ngklou a Ultutelel: Sel debetik er a chad el semeriar, e ngsoad el lmuut el mong er a taem el lengar er a blai me bo el sebeched el melubs er a tane er a klemerang el dedillemii. (1 Ko. 3:6) Ngungil el blechoel el uchei er a dorael, e kede oker er a chad el kmo ngoingerang a ungil taem el sebeched el lmuut el me omes er ngii. Ngdirrek el ungil a debecherei a ker el obengkel el sebeched el mo mesaod er ngii sel deluut el me oldingel er ngii. E seikid e ngsebechel a chad er a blai el mo semeriar el mengiil er kid, e a lsekum a nger er sel ker a ngar er a babier el debilecherei el obengkel, e ngklou a techellel el mo menguiu er ngii. A deketmeklii a rolel a deluut el mo mengedecheduch er ngii, a dirrek el rullii el mo beot er kid a lmuut el mo oldingel er ngii, e le ngmla moterekokl a tekoi el bo dosaod er ngii, me a chad er a blai a medengei aike el bo dosaod. Me sel deluut el mo mesang, e ngsebeched el dmu er ngii el kmo kede liluut el me oldingel er ngii el mo onger er a kerid el dulsaod er ngii er a uchei, e sola e mo omuchel.

Rolel a Moruul er Ngii:

Sel mongetmokl a cheldechedecham el mo oldingel a obliil, e ngdirrek el ungil a omketmeklii a ta er a ker el bo monger er ngii sel omluut el mo oldingel er a chad. Ngsebechel el mesaod er a tekoi el losaod er ngii a babier el morous er ngii er seikid el sils, me a lechub e ngker el monger el ngar er a ta er aike el babilenged el dousbech el mesuub, el sebechem el lousbech er ngii sel omluut el mong.
Me sel mrekir a cheldechedecham el obengkel a chad el semeriar, e mouchais er ngii er a urungulem el soam el lmuut el mo mengedecheduch er ngii e mouchais er ngii er a ker el mkiltmeklii. Ngar er a bebil el basio el doldingel er ngii e a rechad a kmal mechesang e kora diak el sorir a deluut el mo omes er tir. Me ngar er a chelsel aikaikid el blekeradel, e ngsebechem el dmu el kmo: “Tiang blechoel el ungil el taem el debetik er kau el ngar er a blai? [Mongiil er a nger er ngii.] Tia el mei el sandei, e ngsoak el me mesekau e bo donger er tia el ker . . . E a lsekum ke mechesang sel kmei, e ngsebechem el di ouchais er ngak.”
A lsekum e kouchais er a chad er a blai el kmo ke mong er a ulterekokl el taem, e motireklii a tekingem. (Mt. 5:37) E a orokiolel a odngelem, e mketmeklii a rolel a omluut el mo oldingel er ngii.

Molasem er Tiang er Chelecha el Buil:

Sel mongetmokl er a cheldechedecham el mo oldingel a obliil, e ngdirrek el ungil a omketmeklii a ker el bo moker er ngii sel mluut el mo oldingel er a chad. E mouchais er tia el ker el mo er tirke el chad el mdak el oldingel.