Rolel e Ngsebechem el Mo Kiei er a Beches el Beluulechad

Aike el uleak uchei el suobel a ulechotii el kmo a Dios a di kmedung e ngmo okngemedii a mekngit el blekeradel er tia el chutem. Ngsebechel mo ulterekokl a rengud el kmo tia mera el mo duubech. E ngera uchul? E le Tekingel a Dios el Biblia tibir el kmo:

“Belulechad ma ngelbokl ra belulechad a mo nguemed.”—1 JOHANES 2:17, BT.

E sebechel el mo ulterekokl a rengud el kmo te ngar ngii a remo suobel e le tia el bades a melemolem el melekoi el kmo:

“Ngikel meruul a soal a Dios a di kiei el mo cherechar.”

Me a leuaisei e a di ta el rolel e kede mo suobel a bo doruul er a soal a Dios. E a bo dodengei el kmo ngera soal a doruul e ngkired el mo medengelii.

MSOBEL ER A ULEBONGEL LOEAK SEL ‘BO MODENGELII’ A DIOS

Siasing: 1. Nurse el reborb el skarer e mesaul a rengul. 2. Ngou break er a cafeteria e mtebengii a chad er a urerel el kmal dmeu a rengul menguiu a magazine. 3. Ngika el chad er a urerel a choiuii a bades el mo er ngii e msang a jw.org contact card.

A Jesus a dilu el kmo: “A diak a ulebengelel klengar a belkul a kmo, bo lodengelkau el di ta el meral Dios.” (Johanes 17:3) Me a lsoad el suobel er a ulebongel e mo kiei el mo cherechar e ngkired el ‘mo medengelii’ a Dios. Tia belkul a kmo ngdiak di bo doumerang el kmo ngmera el ngar ngii a Dios e dodengei a bebil er a tekoi el kirel. Ngkired el mo sechelil. Me ngdi ua ngii di el deleuill, ngkired el mengoit a taem el obengkel a chad a lsoad a lebo er ngii a mesisiich el deleuill er kid me ngii. Ngdi osisiu ngii me a deleuill er kid me a Dios. Molatk a bebil klemerang el desuub er a Biblia el sebechel ngosukid el mekurulii e smisichii a deleuill er kid me a Dios.

Klemerang el Desuub er a Biblia

Kede suubii el kmo ngmle moktek er a Dios el bo dekiei er a Baradis.

Ngika milebii a kot el obekel el Adam me a Eva e ulsisebeterir er a klebokel el sers er a Eden. Tirka mle mecherrungel e a Dios a milsterir aike el rokui lousbech me bo el deu a rengrir er a klengar. Ngmle sebechir el kiei el mo cherechar. A lsekum te millemolem el sechelil a Dios e te dimlak el mad. Me nguaisei engdi te ngileltii el mo diak lolengesenges er a llach el lebilsterir a Dios.

Kede suubii a uchul me kede chelebangel a ringel.

A Adam er a bo lak lolengesenges er a Dios e ngurridii a techellel el kiei el mo cherechar me a dirrek el techellir a rokui el chad. A Biblia kmo: “A klengit a siliseb er a beluulchad el okiu a tal chad, ma kodall a ulekiu a klengit el mei, ma kodall a ulemerk el mor a re chad el rokui.” (Rom 5:12) Ngdi ua chad el sebechel mudiukes er a rektir a rechad er a blil, a Adam a uchul me kid el rokui a diak demecherrungel. Sei a uchul me kede mo chuodel e mad.

Kede suub aike el bla leruul a Dios el mo olengeseu er kid.

A Biblia kmo: “Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Johanes 3:16) A Dios a ulderchii a Jesus el mei er a chutem el mo mad el kired. A 86 a rekil rubak er a India el Prabhakar a mesaod el kirel tia el bltikerreng el kmo: “Ngochotii a klou el bltkil a rengul a Jehovaha el mei er ngak. Tia el bltkil a rengul a uchul me ngngar ngii a omeltkek el kiei el mo cherechar.”

Kede suubii a rolel e kede ochotii omereng el saul el kirel aike el bla leruul a Dios el kired.

A Biblia kmo ngsebeched lochotii omereng el saul er kid el kirel aike el bla leruul a Dios el kired loeak sel ‘doltirakl a tekingel.’ (1 Johanes 2:3) A Jehovah mla ochotii a rolel e ngsebechel mo dmeu a rengud er a klengar er kid er chelechang. (Isaia 48:17, 18) Ngdiak el soal a dechuarm. Ngtibir el kmo a lsekum e kede mo oltirakl a tekingel e ngdiak di bo lungil a klengar er kid er chelechang, ngdirrek el mo er ngii a techelled el mo kiei el mo cherechar.

MONGUIU ER A TEKINGEL A DIOS EL BIBLIA ER A BEK EL SILS

Ngika el nurse el temel a sueleb er ngii e ngngar rikl el menguiu er a Biblia e omes el bedul a eanged. — Ngsebechem el mo suobel er a ulebongel er a beluulechad loeak sel moluluuch lolengit a ngeso er a Dios e moruul er a soal

Kid a kired el blechoel el menga kall me bo lsebeched el melemolem el ngar. Me nguaisei engdi a Jesus a dilu el kmo: “A klengar er a chad a diak di lultuil er a kall e le merekong; ng dirrek el ultuil er a bek el tekoi el tuobed er a ngerel a Dios.”—Mateus 4:4.

Chelecha el taem e kede metik a tekingel a Jehovah er a Biblia. Sel mosuub er tia el kmal chedaol babier e ke mo suub aike el lurruul a Dios er a irechar, aike el loruul er chelechang, me aike el bo loruul er a ngar medad.

MOLULUUCH EL MORA DIOS EL KIREL A NGESO

Ngera sebechem el meruul er ngii a lsekum e ngsoam el oltirakl a ulekrael er a Dios engdi ngmeringel er kau a stob el meruul aike el tekoi el ledu Dios el kmo ngmekngit? Ngkmal sebechel ngosukau a bo mungil medengelii a Dios.

Molatk er a redil el bo domekedong er ngii el Sakura. Ngika kiliei el ngar er a deleboes. Sera lomuchel el mesuub er a Biblia e ngsiluubii a llechul a Dios el kmo “mongeroid er kemiu er a deleboes el delengerenger.” (1 Korinth 6:18) Me a Sakura milluluuch el mora Dios me lengesuir me ngmlo sebechel mo diak loruul er tia el tekoi. Me nguaisei engdi ngdirk oldechelakl omengesuseu el mo meruul er tia el tekoi. Ngmelekoi el kmo: “A lsekum a uldasu el kirel a deleboes a me soiseb er a uldesuek e ak meluluuch el mora Jehovah e le ak medengei el kmo ngdiak el sebechek el ultuil er a di klisichek. A nglunguuch a mla rullak el lmuut el mo kmeed er a Jehovah.” A rebetok el miliol el chad a di ua Sakura el mesuub el mo medengelii a Dios. A Dios olengeseu er tir el melodech a klengar er tir e mo kiei el odeuir a rengul.—Filipi 4:13, NW.

Sel molemolem el menglou er a klemedengei er kau el kirel a Dios, e a Dios a mengal ‘mo medengelkau’ el mekreos el sechelil. (Galatia 4:9; Psalm 25:14) Seikid e ngmo sebechem el suobel e mo kiei er a beches el blekeradel er tia el chutem. Engdi ngmo uangerang tia el beches el beluulechad? A ongingil suobel a mo mesaod er tia el tekoi.

a Biblia ochotii el kmo a Jehovah a ngklel a Dios.