Kau, Ke Kltmokl el Mo “Oudiukes ra Belulechad”?

MERUUL ER A BELUULECHAD EL MO BARADIS

Jehovah er a ledu er a rechad el kmo “bo le betok a re ngelekiu, . . . er ker me ker er a beluulchad e bo lorreder er ngii,” a mle belkul a kmo a cherengel a taem e a beluulechad el rokir a mo baradis. (Gen. 1:28) Tirke el mo oudiukes er a beluulechad me ngkirir el mo meruul er tiang. Engdi ngmla mo diak a baradis me ngkirir lomuchel er a ureor er a uchelel. Ngkmal mo betok a ureor el mengetmokl aike el kikingelel a beluulechad. Nguaisei, ngkmal mo klou a ureor!

Tia mekltkid er a ureor el rechad er a Israel el mle blebaol a mlo kirir el meruul er a lluut el mora belurir. A beluu a mle cheloit el 70 el rak. Engdi Isaia ulemlaoch el kmo ngoeak a klengeltengat er a Jehovah e te lmuut el mo toketekii. A ulaoch a dilu el kmo: “A ikel medidirt el beluu er ngii a bo kruul el mo sers, el ua sers el kdillemii er a Eden.” (Isa. 51:3) E a rechad er a Israel a mle sebechir el kutmeklii tiang. Ngdi osisiu, ngoeak a klengeltengat er a Jehovah e tirke el rokui el mo oudiukes er a beluulechad a mo rullii el rokir el mo baradis. E chelechang e ngsebechem lochotii el kmo ngsoam el mo teloi er tia el ureor.

A ta el rolel e kede meruul er tiang a sel blechoel el clean a blid me a maori er ngii. Ngsebechem el meruul uaisei alta retonari er kau a diak el clean. Ngdirrek el sebechem lolengeseu el mengetmokl e maintain er a Blil a Ongdibel me a Assembly Hall. E a lsekum e ngsebechem, em apply el mo volunteer el kirel aike el ureor el olengeseu a beluu el miltemall. Tia ochotii el kmo ngsoam lolengeseu er a rudam me a rudos er kau. Di lekau loker, ‘Ngak, ngsebechek el suub a bebil duch el sebechek el mo ousbech a lsekum a Jehovah kongei er ngak el mo oudiukes er a beluulechad?’

KLTMOKL EL OMESTERIR A REMO MEKIIS AIKE EL LOUSBECH

Ngkmal di milekiis er a kodall a ngelekel a Jairus e a Jesus a kmo bsa kall me lomengur. (Mk. 5:42, 43) Tia kmal dimlak el meringel el ureor lomeka er ngika el 12 a rekil ngalek. Engdi ka molatk er a klungel a ureor el mo er ngii er sel taem el “tirkel rokui el mla mad a mo rongesii a ngerel me te mo tuobed.” (Jn. 5:28, 29) Alta Biblia diak losaod el kmo tia el taem ngkmal mo uangerang, engdi ngsebeched el mtebengii el kmo tirka mo ousbech a ngeso losiik a kelir, blirir, me a bilir. Ngsebechem lochotii er chelechang el kmo ngsoam el kltmokl el mo olengeseu er tir? Ka molatk aika el ker.

Sel le announce el kmo ngmo er ngii a odngelel a circuit overseer, e ke offer el nguu el mo omengur? A chad el ngar er a ileakl el mui el taem lomesiou er a Bethel sel le reassign er ngii el mora berkel a klumech me a lechub a circuit overseer a mo merek el mesiou el loldingel ongdibel, e kau ngsebechem el ngosuir el metik er a blil? A lsekum e ngmo er ngii a convention er a beluu el mngar ngii, e kau ngsebechem el volunteer el mo oureor er a uchei me a lechub e nguriul er a convention el outkeu er a re delegates?

KLTMOKL EL OLISECHAKL ER A REMEKIIS

Ngua donguiu er a Rellir 24:15, te locha betok el biliol el chad a mo mekiis. A rebetok er tir a dimlak a techellir el mo medengelii a Jehovah er a uchei er a lemad. Tia el techall a mo er tir sel lebekiis er a kodall.a A remesiungel a Dios a mo olengeseu lolisechakl er tir. (Isa. 11:9) A Charlotte el mla omerk er a klumech er a beluu er a Europe, South America, me a Africa a kmal omes el beduluchei el kirel tiang. Ngkmal dmeu a rengul el melekoi el kmo: “Ak kmal omes el beduluchei el mo olisechakl er a rechad el mo mekiis. Sel kunguiu el kirel a chad el mle chad er a ngar er a mong, e ak blechoel el melatk: ‘Ulekum ngika el chad a mle medengelii a Jehovah me a klengar er ngii lemlak bo leuaisei.’ Ak kmal mad el tmuil el mo ouchais er tirka el mo mekiis el kirel a Jehovah me a kmal ungil klengar el kirir a lsekum te mo mesiou er ngii.”

Mo lmuut er a reblak a rengrir el mesiungel a Jehovah el kiliei er a uchei er a leme Jesus er tia el chutem me ngbetok a kirir el mo suub. Molatk er a deurreng me a ileakl el techall louchais er a Daniel a otutel a ulaoch el leliluches engdi ngdimlak lodengei a belkul. (Dan. 12:8) Me a lechub e ke osisecheklii a Ruth me a Naomi el kmo a telungalek er tir a uldidellel a rasech el mora Mesias. Ngmera el mo klou a deurreng el sebeched el mo teloi er tia el prokuram er a osisechakl el mo er ngii er a beluulechad el rokir, e diak a orrimel me a ongesang er tia el mekngit el beluulechad er chelecha el taem!

Ngmekera e sebechem el lochotii el kmo ngsoam el mo kltmokl el mo teloi er tia el prokuram? A ta er ngii a bora tkurrebab el sebechem el lolengeriakl er a rolel omolisechakl e bo blechoel el teloi er a berkel a klumech. (Mt. 24:14) Mo lmuut me a lsekum a rekim me a lechub e ngblekeradel a uchul e ngdiak el sebechem el meruul a betok, engdi sel moruul aike el rokui el sebechem er chelechang e ke ochotii el kmo ke kmal omes el beduluchei el mo olisechakl er tirke el mo mekiis.

Ngmera el klou a ultutelel el dolatk aika el ker: Kau, ke omes el beduluchei el mo oudiukes er a beluulechad? Ke omes el beduluchei el mo meruul er tia el beluulechad el rokir el mo baradis e olengeseu er a remekiis el ngmai aike el lousbech e mo olisechakl er tir? Ngsebechem lochotii er chelechang el kmo ke kltmokl loeak sel mousbech a bek el techall el meruul aike el tekoi el mo ruoll sel bo moudiukes er a beluulechad!