Rolel e a Jehovah Guarantee er a Telbilel er a Baradis

1. Ngera mle tekingel a Isaia el mora rechad er a Israel?

A PROFET Isaia milsaod el kirel a Jehovah el kmo ng “Dios er a klemerang.” A tekoi el moiuid el “klemerang” a belkul a kmo “amen.” (Isa. 65:​16, NW, ftn.) A belkul a “amen” a “bo leuaisei.” A tekoi el “amen” sel lousbech er ngii a Biblia el mesaod er a Jehovah me a Jesus, e ng guarantee el kmo ngklemerang el tekoi. Me ngbleketakl a tekingel a Isaia el mora rechad er a Israel: Aike el lolekoi a Jehovah a sebeched el loumerang. A Jehovah mla ochotii tiang loeak a telbilel el bla loltaut.

2. Ngera uchul me ngsebeched el loumerang a telbilel a Jehovah el kirel a ngar medad, e ngera el ker a bo dosaod?

² Kid, ngdirrek el sebeched el loumerang a telbilel a Jehovah el kirel a ngar medad? Kmeed el 800 el rak er uriul er a taem er a Isaia e a apostol Paulus a silodii a uchul me ngsebeched el loumerang a telbilel a Dios. A Paulus a kmo: “Dios . . . [a] diak lomulak.” (Heb. 6:18) Ngdi ua madedok el diak el sebechel loltobed a di ralm e a osisiu el taem e ngoltobed a mecherocher el ralm, a Jehovah el uchul a klemerang a diak el sebechel el melekoi a blulak. Me ngkmal sebeched el loumerang a rokui el tekoi el lolekoi, luldimukl er a telbilel el kirel a ngar medad. Ngar tia el suobel e kede mo mesaod aika el ker: Ngera ngmla tibir a Jehovah el mo omeskid er a ngar medad? E ngera bla lebeskid a Jehovah el guarantee el kmo ngmo tmaut a telbilel?

NGERA NGMLA TIBIR A JEHOVAH?

3. (a) Ngera el telbiil a kmal mekreos er a rengrir a remesiungel a Dios? (Ocholt 21:​3, 4) (b) Ngera te mo melekoi a rebebil sel de share er tia el telbiil lobengterir?

³ A telbiil el bo dosaod er ngii a kmal mekreos er a rengrir a rokui el mesiungel a Dios er a beluulechad el rokir. (Monguiu er a Ocholt er a 21:3, 4.) Jehovah tibir a taem el “dikea lluut el mor ngii a kodall, e mo diak a klengiterreng, ma langel, ma ringel.” A rebetok er kid ousbech er tiakid el bades el mesaod er a klengar er a Baradis sel domerk er a klumech. Ngera te dmung a rebebil sel de share er tiang el lobengterir? Te locha mo melekoi el kmo, “Ngmera el soad engdi nglocha diak el sebechel tekoi.”

4. (a) Ngera ngmle medengelii a Jehovah? (b) Ngera ngdirrek el milskid a Jehovah er a lerellii tia el telbiil?

⁴ Nguaisei el apostol Johanes er a lemukreng el mo meluches er tia el telbiil el klengar er a Baradis, e a Jehovah mle medengei el kmo kede mo share er tia el omelatk sel domerk er a klumech er a Renged. A Jehovah dirrek el mle medengei el kmo a rebetok a mo meringel er tir oumerang aika el “beches el tekoi.” (Isa. 42:9; 60:2; 2 Ko. 4:​3, 4) Me ngmekera dolterekokl a rengrir a rechad me a dirrek el rengud el kmo aika el klengeltengat el losaod a Ocholt 21:​3, 4 a klemerang? A Jehovah dimlak di lerellii tia el telbiil el kmal rutechii a rengud, ngdirrek el milskid a ungil luchul me ngsebeched loumerang er ngii. Ngera ngmla meskid?

JEHOVAH GUARANTEE ER A TELBILEL

5. Ngera el bades a meskid a ungil luchul me kede oumerang er a telbilel a Dios, e ngerang ngdmung?

⁵ Kede mes a ungil luchul me ngsebeched loumerang er a telbilel a Jehovah er a Baradis er aike el oeak uriul el bades. Kede menguiu: “Ngikal dengchokl ra kingall a dula el kmo, ‘Mesang, ak meruul a bek el tekoi el mo beches.’ E dirrek el dilu el kmo, ‘Mluches, e a ikal tekoi a ulterekokl e klemerang.’ E dilu er ngak el kmo, ‘Ngmla tmaut a ikal tekoi! Ngak a Alfa e Omega, el uchul e ullebongel.’”—Och. 21:​5, 6a, BT.

6. Ngera uchul me a tekoi el llechukl er a Ocholt 21:​5, 6 (BT) a smisichii a klaumerang er kid er a telbilel a Dios?

⁶ Ngera uchul me aika el tekoi a smisichii a klaumerang er kid er a telbilel a Dios? Ngua losaod er ngii a Revelation Climax el book, a tekoi el loruul er ngii a Jehovah er aika el bades a sebeched lomekesiu er ngii el saing er a babier el olterekokl er a rengud el kmo ngmera el mo oltaut er a telbilel.b A telbilel a Jehovah a llechukl er a Ocholt 21:​3, 4. Engdi kede metik er a signature er a Jehovah er a 5 me a 6 el kekerei el bades el ngii a guarantee er a otutel. Me de dmolech el merriter aika el tekoi el lousbech a Jehovah el guarantee el kmo ngmo oltaut er a telbilel.

7. Ngtecha mengedecheduch er a 5 el kekerei el bades, e ngera uchul me ngkmal ileakl?

⁷ A 5 el kekerei el bades omuchel el melekoi el kmo: “Ngikal dengchokl ra kingall.” Aika el tekoi a kmal ileakl e le ngta er aike el edei el taem el babier er a Ocholt a melekoi el kmo ng Jehovah mengedecheduch. Me ngdiak el ta er a anghel me a lechub e ng Jesus a melekoi aika el tekoi, ng Jehovah! Tia olterekokl a rengud el kmo ngsebeched loumerang aika el tekoi el oeak uriul er ngii. E ngerang? E le Jehovah “diak lomulak.” (Tit. 1:2) Me ngkmal sebeched loumerang aike el lolekoi a Ocholt 21:​5, 6 (BT).

“MESANG, AK MERUUL A BEK EL TEKOI EL MO BECHES”

8. Ngera ngmelekoi a Jehovah el melisiich el kmo a telbilel a mo tmaut? (Isaia 46:10)

⁸ Chelechang e me dorriter er a tekoi el “Mesang.” (Och. 21:​5, BT) A tekoi er a Grik el moiuid el “mesang” a betok el taem el lousbech er ngii a babier er a Ocholt. A ta el reference a melekoi el kmo tia el tekoi a “lousbech er ngii el melekoi er a chad el menguiu me bo el kerekikl lomtab aike el tekoi el oeak uriul er ngii.” Ngera ongingil tekoi el lolekoi a Dios? “Ak meruul a bek el tekoi el mo beches.” Nguaisei a Jehovah melekoi el kirel a ngar medad, engdi ngii el kmal ulterekokl a rengul el kmo ngmo klemerang a uchul me ngmelekoi el ua loruul er ngii er chelechang.—Monguiu er a Isaia 46:10.

9. (a) A tekoi el “meruul a bek el tekoi el mo beches” ngmesaod a ngera el eru el tekoi el loruul a Jehovah? (b) Ngera mo duubech el mora “eanged” me a “belulechad” er chelecha el taem?

⁹ Ka me dorriter ongingil tekoi er a Ocholt 21:5 (BT): “Meruul a bek el tekoi el mo beches.” Ngar tia el bliongel er a Biblia e aika el tekoi a mesaod a eru el tekoi el loruul a Jehovah, el omtechei e omekbeches. A kot, e ngera bo el mtechei a Jehovah? A Ocholt 21:1 (BT) a kmo: “A dimla eanged ma dimla belulechad a ngilemed.” A “dimla eanged” a melutk el kirel a kabelment er tia el beluulechad el cheltikaik er a Satan me a remekngit el anghel er ngii. (Mt. 4:​8, 9; 1 Jn. 5:19) E ngar er a Biblia e a tekoi el “belulechad” a sebechel melutk el kirir a rechad el kiei er ngii. (Gen. 11:1; Psa. 96:1) Me a leuaisei e a “dimla belulechad” a melutk el kirir a remekngit el chad er tia el beluulechad. Me a Jehovah diak di bo el lomekbeches er a “eanged” me a “belulechad,” e ngmo kikidii e dirrek el mtechei. Ngmo mtechir a eanged me a beluulechad er a “beches el eanged ma beches el belulechad,” el beches el kabelment me a beches el bedengir a rechad.

10. Ngera ngmo meruul a Jehovah el mo beches?

¹⁰ Ngar er a Ocholt 21:5 (BT) e kede menguiu el kirel a ongingil tekoi el bo lomekbeches a Jehovah. Mutebengii el kmo a Jehovah dimlak el du el kmo, “Ak meruul a beches el tekoi.” E ngbai dilu el kmo: “Ak meruul a bek el tekoi el mo beches.” Me a Jehovah mo rullii a beluulechad me a rechad el mo beches loeak a lerelleterir el mo cherrungel. Ngua lulemlaoch a Isaia, a beluulechad el rokir a mo klebokel el ua sers er a Eden. Kede dirrek el rokui el mo mukbeches. Ngmo diak a chitechut, meiko, me a bengong. Rechad el rokui a mo ungil me a rulekoad a mo mekiis el lmuut el me ngar.—Isa. 25:8; 35:​1-7.

“MLUCHES, E A IKAL TEKOI A ULTEREKOKL E KLEMERANG. . . . NGMLA TMAUT A IKAL TEKOI!”

11. Jehovah ngdilu er a Johanes me lokerang, e ngera uchul?

¹¹ Ngera dirrek el lullekoi a Dios lolterekokl a rengud el kmo ngsebeched loumerang er ngii? A Jehovah dilu er a Johanes el kmo: “Mluches, e a ikal tekoi a ulterekokl e klemerang.” (Och. 21:​5, BT) Jehovah dimlak di ledu el kmo “mluches.” Ngdirrek el meskid a uchul me ngmelluches. Ngkmo: “A ikal tekoi a ulterekokl e klemerang,” el belkul a kmo ngsebeched el lultuil er a tekingel. Kede mera el oba omereng el saul el Johanes a uleltirakl a tekingel a Jehovah el “mluches,” me ngsebeched el menguiu er a telbilel a Dios er a Baradis e melebedebek a klengeltengat el medechel el kired.

12. Ngera uchul me a Jehovah sebechel melekoi el kmo: “Ngmla tmaut a ikal tekoi!”

¹² Ngera ongingil tekingel a Dios? “Ngmla tmaut a ikal tekoi!” (Och. 21:​6, BT) Chelecha Jehovah mengedecheduch el ua bla letaut a rokui el tekoi el kirel a Baradis. E mera el sebechel melekoi el uaisei e le ngdiak a sebechel stob er ngii loltaut er a moktek er ngii. A Jehovah a dirrek el meskid a ta er a kmal olterekokl a rengud el kmo ngmo tmaut a telbilel. Tiang ngerang?

“NGAK A ALFA E OMEGA”

13. Ngera uchul me a Jehovah dilu el kmo: “Ngak a Alfa e Omega”?

¹³ Ngua dullekoi er a uchelel, a Jehovah edei el taem el lulengedecheduch er a Johanes er a ues. (Och. 1:​8, BT; 21:​5, 6, BT; 22:​13, BT) Ngbek el taem e ngdilu el kmo: “Ngak a Alfa e Omega.” A alfa omuchel er a alphabet er a tekoi er a Grik e a omega ulebongel el alphabet. Me a Jehovah lolekoi el kmo ng “Alfa e Omega,” e ngngosukid el mo mtebengii el kmo sel luchelii a tekoi, e ngrokir.

14. (a) Mouchais er a example er a taem el Jehovah ua lullekoi el kmo “Alfa” me a taem el bo ledu el kmo “Omega.” (b) A tekoi el debetik er a Genesis 2:​1-3 ngolterekokl er a rengud er a ngerang?

¹⁴ Jehovah er a lebebii a Adam me a Eva e nguluuchais er a moktek er ngii el kirir a rechad me tia el beluulechad. A Biblia kmo: “[Dios] ulemekngeltengat er tir el dilu el kmo, ‘Bo le betok a re ngelekiu, ma ruldidellel a rsechiu bo le kiei er ker me ker er a beluulchad e bo lorreder er ngii.’” (Gen. 1:28) Ngar tiakid el taem e a Jehovah ua ledilu el kmo, “Alfa.” Ngdi mle bleketakl louchais er a moktek er ngii: A taem a mei el rebekongesenges e cherrungel el ruldidellel a rsechir a Adam me a Eva mo mekekii a beluulechad e rullii el mo baradis. Sel letaut tia el moktek er ngii e ngmo ua lolekoi el kmo, “Omega.” A uriul er a lebebii a “beluulchad ma eanged, ma bek el ngar a chelsel” e a Jehovah milsterir a guarantee er a tekingel. Kede metik er ngii er a Genesis 2:​1-3. (Monguiu.) A Jehovah kiltmeklii a ongeuid el sils e rirellii el mo chedaol. Tiang ngera belkul? Jehovah mle guarantee el kmo ngmo otutii a moktek er ngii el kirir a rechad me a beluulechad. Ngmo tmaut a moktek er ngii er a ulebengelel a ongeuid el sils.

15. Ngera uchul me a Satan a ua letirrebengii a moktek er a Dios el kirir a rechad?

¹⁵ Sera bo lomtok a Adam me a Eva e te mlora klengit e uliuelii a klengit me a kodall el mora rengelekir. (Rom 5:12) Me ngua le Satan a tilemellii a moktek er a Dios el omekeek er a beluulechad er a remecherrungel e bekongesenges el chad. Me a Satan a ua bla lerellii el mo diak el sebechel a Jehovah el dmu el kmo “Omega.” A Satan a locha mlo omdasu el kmo a Jehovah mla mo diak el sebechel lotireklii a telbilel. Nglocha mlo omdasu el kmo Jehovah mo mekodir a Adam me a Eva e mebii a lmuut el ta er a cherrungel el obekel el mo otutii a moktek er ngii el kirir a rechad. Engdi a Dios a bo loruul er tiang e a Diabelong a sebechel dmu el kmo a Dios a bulak. E ngerang? Le Jehovah dilu er a Adam me a Eva el ngar er a Genesis 1:28 el kmo ngrengelekir a mo mekekii a beluulechad.

16. Ngera uchul me a Satan a locha mlo omdasu el kmo ngsebechel dmu er a Jehovah el kmo ngdiak el sebechel lotireklii a tekingel?

¹⁶ Ngera ta er a tekoi el Satan a locha ulemdasu el kmo ngmo meruul er ngii a Dios? A Satan kele el blo lomdasu el kmo a Jehovah mo mecherei a Adam me a Eva me te mo oungalek engdi te diak el bo lemecherrungel. (Oli. 7:20; Rom 3:23) E a lsekum a rengelekel a Adam me a Eva diak el sebechir el mo mecherrungel e a Satan a mo dmu el kmo a Jehovah diak el sebechel mo klemerang a moktek er ngii. A beluulechad a diak bo lemui er a remecherrungel el chad.

17. Ngmilekera Jehovah e sumecheklii a ultok er a Satan me a kot el lobekel, e ngera mo ulebengelel? (Dirrek el momes er a siasing.)

¹⁷ Jehovah silmecheklii a ultok er a Satan me a rekot el obekel er a rolel el dimlak el sebechel mdesuii a Satan. (Psa. 92:5) A Jehovah diak el bulak, ngmilecherei a Adam me a Eva me te mo oungalek. E ulechotii el kmo a lsekum ngdulii a tekoi e ngdiak a ngerang el sebechel el stob er ngii. Ngulterekeklii el kmo a moktek er ngii a mo tmaut loeak a ‘ruldidellel a rasech’ el ngii a mo osobelterir a rebekongesenges el ngelekel a Adam me a Eva. (Gen. 3:15; 22:18) A Satan a locha kmal mlo mechas a rengul er a olubet el tenget el lekiltmeklii a Jehovah! E ngerang? E le tia el tekoi a mileketmokl loeak a bltikerreng el diak a cheleblad er ngii. (Mt. 20:28; Jn. 3:16) A Satan diak loba tia el blekeradel e le ngdi melatk er a di ngii. Me ngngera mo meketmokl loeak a olubet el tenget? Ulebengelel a ta el telael el rak er omengederederel a Jesus e a rokui el bekongesenges el uldidellel a rsechel a Adam me a Eva mo kiei er a baradis el chutem loltirakl er a di mla moktek er a Jehovah. Seikid el taem e a Jehovah mo ua ledu el kmo, “Omega.”

ROLEL A DESISICHII A KLAUMERANG ER KID ER A TELBILEL A JEHOVAH ER A BARADIS

18. Ngera el edei el tekoi a lebeskid a Dios lolterekokl er a rengud? (Dirrek el momes er a baks el “Edei el Luchul Me Kede Oumerang er a Telbilel a Jehovah.”)

¹⁸ Ngar tia el suobel e kede mla smaod a uchul me ngsebechel mo ulterekokl a rengud el kmo a beluulechad a mo Baradis. Me ngngera sebeched louchais er a rechad el lolterekokl a rengrir el kmo ngmera el mo tmaut? A kot, e ng Jehovah ingii a rirellii tia el telbiil. A babier er a Ocholt a kmo: “Ngikal dengchokl ra kingall a dula el kmo, ‘Mesang, ak meruul a bek el tekoi el mo beches.’” Ngngar ngii a llemesel a rengul, klisichel, me a urungulel lotutii tia el moktek. Ongerung, a Jehovah kmal medengei el kmo ngmo tmaut a moktek er ngii me ngmengedecheduch el ua bla letaut. Tia uchul me ngkmo: “A ikal tekoi a ulterekokl e klemerang. . . . Ngmla tmaut a ikal tekoi!” Ongedei, a Jehovah sel lebechelii a tekoi e ngrokir. Sei a uchul me ngkmo: “Ngak a Alfa e Omega.” A Jehovah mo meketeklii el kmo a Satan a bulak e diak el sebechel stob er a Jehovah lotutii a moktek er ngii.

19. Ngera sebechem el meruul er ngii sel loumededenger a rechad el kirel a telbilel a Dios er a Baradis?

¹⁹ Lak mobes el kmo a bek el taem el em share lobengterir tirke el em meet er tir er a odingel aike el loterekokl er a rengud el kmo a moktek er a Dios a mo tmaut, e ke smisichii a klaumerang er kau er a telbilel a Jehovah. Me ngngera sebechem el meruul er ngii a lsekum a next taem el mchiuii tia el telbiil er a Ocholt 21:4 el kirel a Baradis el mora chad e ngkmo, “Ngmera el soad engdi nglocha diak el sebechel tekoi”? Ngsebechem el chiuii a 5 me a 6 el kekerei el bades e smodii el mo er ngii. Mochotii a rolel e a Jehovah guarantee er tia el telbiil me ngua bla le saing er a signature er ngii.—Isa. 65:16.