Mukanda wa Thomo wa Mafumu

2 Hakhalele Davidi mutshigina gufua, wawambelele mun’enji Salomo egi: 2 “Gualeha ndo ngudi mufua gami. Uvi aye khala nu ngolo, kalagala ndaga gifua yala. 3 Udi naye gukalagala ndaga jiagasue jidi gugutoga Yehowa Nzambi waye. Wenda mu njila jienji, tumagela mikhuala yenji nu badesizio enji nu malongo enji gifua luholo idi ya gusonega mu Mukhuala wa Moize. Ngenyi mbawubinga* mu ndaga jiagasue udi mutshita nu guma guagasue udi muya. 4 Yehowa mbawutagenesa ndaga jiangulayele muene egi: ‘Gula an’aye adituameza muabonga, asala ya gujinginyina gudi ame nu mutshima wawo wagasue nu monyo* wawo wagasue, mbagukhala nu muthu mukatshi dia ajigulu aye ha nguasa ya ufumu gu Isalele tangua diagasue.’

5 “Udi nji mujiya muabonga ndaga yangutshitshile Yoabe mun’a Seluya, ndaga yatshitshile muene gudi mafumu mbadi a masuta a Isalele: Abnere mun’a Nere nu Amasa mun’a Yetele. Waashiyile. Mu sungi athu akhalele mu guhuima, muene wambosesele mahatshi awo gifua mu sungi ya ita; wakudile mahatshi gu mukaba wakhalele ha kete dienji nu gu saphata jiakhalele gu malu enji. 6 Udi naye gutshita ndaga nu gutema, ubembigo egi muthu yowu wa gukola afue mu guhuima.*

7 “Uvi udi naye gumonesela ana a Barzilayi muenya gu Gileade guzumba gua giamatshidia, adi naye nji gukhala mukatshi dia athu ana gudia gu mesa aye handaga ajile gungukuatesa tangua ngakhalele mulenga phangi’aye Abasaloma.

8 “Ujimbilago nji Shimeyi mun’a Gela muenya giphuta gia Benjame mu dimbo dia Bahulime. Wangutele mikumbu yakola lusugu ngakhalele muya gu Mahanayime; uvi tangua diajile muene gungutagana gu Yordane, ngadilogele mu jina dia Yehowa egi: ‘Mbangushigo gugushiya nu phogo ya khusa.’ 9 Udi naye gumuhana ndola. Aye udi muthu watema, udi mujiya ndaga udi naye gumutshita; umubembigo hagula abue muthu wa gukola, afue gifua muana gufua athu agasue.”*

10 Gungima Davidi wafuile gifua muafuile akhakh’enji, amufundjile mu Dimbo dia Davidi. 11 Davidi wahinyile ivo 40 gu Isalele. Gu Hebrone wahinyine ivo 7, uvi gu Yelusalema ivo 33.

12 Gungima Salomo wahinganele ha nguasa ya ufumu ya sh’enji Davidi. Fumu Salomo wasendesele gubua nu ngolo jiavula.

13 Gungima Adoniya mun’a Hagita wayile gudi Batesheba gin’a Salomo. Batesheba wamuhudile egi: “Waza mu guhuima ba?” Muene wamuvutuile egi: “Ayi, ngaza mu guhuima.” 14 Adoniya wamuwambelele egi: “Ngudi nu ndaga ya guguwambela.” Muene wamuvutudile egi: “Zuela.” 15 Adoniya wamuwambelele egi: “Udi mujiya muabonga egi ame ngakhalele naye gubua fumu, enya Isalele agasue akhalele nji munengena* egi ngubue fumu. Uvi ufumu wene wangutambuiwe, wahanewe gudi phangi’ami handaga Yehowa watshiginyile egi amuhane nawo. 16 Uvi ngudi gugutoga phamba gima gimoshi, unguminyigo nagio.” Batesheba wamuwambelele egi: “Zuela tuvue.” 17 Wazuelele egi: “Ngabuba, ngutogele gudi fumu Salomo anguhane Abishage muenya gu Shuneme hagula abue mukaji’ami; handaga gula aye wamutoga, gashigo mutuna.” 18 Batesheba wamuwambelele egi: “Gima ndo! Ngudi muya muwambela fumu.”

19 Batesheba wayile gudi Fumu Salomo ha gumuwambela ndaga jiazuelele Adoniya. Salomo wazugile mbala imoshi ha guya gumutagana, washiwugile gutuama dienji. Gungima, fumu wakhalele ha nguasa yenji ya ufumu, watogele nji nguasa iko ya ufumu mukunda nu gin’enji hagula akhale gu koko dienji dia madia. 20 Gungima Batesheba wamuwambelele egi: “Ngudi nu ndaga imoshi yazonda ya gugulomba. Utunyigo.” Hene fumu wamuvutuile egi: “Mama, ngutoge ndaga watshigina. Ngushigo mutuna.” 21 Batesheba wazuelele egi: “Ngabuba, Abishage muenya gu Shuneme ahanewe gudi phangi’aye Adoniya abue mukaji’enji.” 22 Fumu Salomo wavutuile gin’enji egi: “Mukunda natshi udi mutshigina egi ahane Abishage muenya gu Shuneme gudi Adoniya? Mulombele nji ufumu handaga udi mukulu wami, nganga-nzambi Abiatare nji nu Yoabe mun’a Seluya adi gu khanda yenji.”

23 Gungima Fumu Salomo wadilogele mu jina dia Yehowa egi: “Nzambi anguhane ndola yakola gula ngashiyilego Adoniya mukunda nu ndaga yatogi muene. 24 Henyaha ngudi muzuela giamatshidia mu jina dia Yehowa Nzambi wa monyo, munu wanguhagele ha nguasa ya ufumu ya sh’ami Davidi, munu wakolesele ufumu wami nu watshitshile egi enya fami* yami alandule guhinyina gifua mualayele muene, mangino Adoniya udi naye gushiyiwa.” 25 Fumu Salomo watumile mbala imoshi Benaya mun’a Yoyada ha gushiya Adoniya. Benaya wayile, wamushiyile.

26 Fumu Salomo wawambelele nganga-nzambi Abiatare egi: “Vutuga mu mahia aye gu Anatota! Ngakhala naye gugushiya mangino, uvi ngushigo gugushiya handaga wabatele Mushete wa Yehowa Nzambi Wabalega Gukoma hakhalele sh’ami Davidi nu monyo; wamonele nji n’enji malamba hamoshi.” 27 Salomo watunyishile Abiatare ha gukhala nganga-nzambi wa Yehowa. Ndaga yene yataganesele mbimbi jiazuelele Yehowa gu Shilo mukunda nu enya fami ya Eli.

28 Havuile Yoabe ndaga yene, walengele, wayile mu tenta ya Yehowa, wakuatele mbinga jia giwotshielo; ikhale gakhalelego gu khanda ya Abasaloma, uvi wakhalele gu khanda ya Adoniya. 29 Gungima awambelele fumu Salomo egi: “Yoabe walenga mu tenta ya Yehowa, udi hehi nu giwotshielo,” Salomo watumine Benaya mun’a Yoyada, wamuwambelele egi: “Nda umushiye!” 30 Benaya wayile mu tenta ya Yehowa, wawambelele Yoabe egi: “Fumu wazuela egi zoga!” Uvi muene wamuvutudile egi: “Ngatunyi! Ngufuila haha.” Benaya wayile muwambela fumu ndaga jiazuelele Yoabe. 31 Fumu wamuwambelele egi: “Tshita gifua muazuela muene: mushiye, gungima umufunde; hagula mahatshi a athu akalegelego gubola ashiyile muene akhadigo ha muto wami nu ha muto wa enya fami ya tata. 32 Yehowa mbawumuvutuila gubola mukunda nu mahatshi a athu ashiyile muene.* Washiyile athu awa mbadi akhalele athu abonga gumubalega muene: Abnere mun’a Nere fumu wa masuta a Isalele nu Amasa mun’a Yetele fumu wa masuta a Yuda. Waashiyile nu phogo ya khusa, tata nu gujiya ndo. 33 Mahatshi awo mbaakhala ha muto wa Yoabe nu ha muto wa ajigulu’enji mayilago; uvi Yehowa mbawuhana guhuima gua mayilago gudi Davidi nu gudi ajigulu enji nu gudi enya fami yenji nu mu ufumu wenji.” 34 Benaya mun’a Yoyada wayile, washiyile Yoabe. Wafundjiwe hehi nu inzo yenji mu mavu a luselenga. 35 Gungima fumu wabuishile Benaya mun’a Yoyada fumu wa masuta ha fundo dia Yoabe, wabuishile nji Zadoke nganga-nzambi ha fundo dia Abiatare.

36 Gungima fumu watamegele Shimeyi, wamuwambelele egi: “Tunga inzo gu Yelusalema, ukhale guene. Uzogigo mu dimbo ha guya ha fundo diko. 37 Lusugu mbawuzoga mu dimbo, wazawuga baba dia Kidelona, jiya egi mbawufua. Mahatshi aye mbaakhala ha muto waye.” 38 Shimeyi wavutuile fumu egi: “Ndaga wazuela idi yabonga. Fumu, muenya mudimo waye mbawutshita gifua luholo wazuela.” Shimeyi wasalele gu Yelusalema masugu avula.

39 Uvi gungima dia ivo thathu, enya mudimo mbadi a Shimeyi alengele, ayile gudi Akishe mun’a Maka, fumu wa gu Gate. Tangua awambelele Shimeyi egi: “Enya mudimo aye adi gu Gate,” 40 Shimeyi walondele mbala imoshi phunda yenji, wayile gudi Akishe gu Gate ha guzangula enya mudimo enji. Havutugile Shimeyi gu Gate nu enya mudimo enji, 41 athu awambelele Salomo egi: “Shimeyi wazogi gu Yelusalema, wayi gu Gate, henyaha wavutuga gale.” 42 Fumu watamegele Shimeyi, wamuwambelele egi: “Ngaguwambelele ha gudiloga gutuama dia Yehowa, ngagutemesele nji egi: ‘Lusugu mbawuzoga mu dimbo edi ha guya ha fundo diko, jiya egi mbawufua.’ Aye wanguwambelele egi: ‘Ndaga wazuela idi yabonga. Mbanguyitumagela.’ 43 Na, mukunda natshi watunyi gutumagela ndaga wadilogele gutuama dia Yehowa nu mukhuala ngaguhanele?” 44 Gungima fumu wawambelele Shimeyi egi: “Aye mujiya muabonga ndaga jiagasue jiabola wakalegele sh’ami Davidi. Yehowa udi guguvutuila gubola wakalegele. 45 Uvi Yehowa mbawukuatesa Fumu Salomo, mbawukolesa nji nguasa ya ufumu ya Davidi mayilago.” 46 Gungima fumu watumine Benaya mun’a Yoyada ha guya mushiya Shimeyi; Benaya wamushiyile.

Ngenyi ufumu wakhalele diago wakola mu utuameji wa Salomo.