Mukanda wa Mbadi wa Mafumu
21 Manase wakhalele nu ivo 12 habuile muene fumu, wahinyine ivo 55 gu Yelusalema. Jina dia gin’enji diakhalele Hefesiba. 2 Wakalegele ndaga jiabola gu meso a Yehowa, walanduile makalegelo a usala a ifutshi inyi Yehowa wakayele gutuama dia Isalele. 3 Watungile luko mafundo a gukombelela anyi amuangele sh’enji Ezekiase, walondele nji iwotshielo mukunda nu Bale, walondele mutshi wa gijila* gifua muatshitshile Ahaba, fumu wa gu Isalele. Wafugamele themua nu ima iko* ya mu dilu, wayikombelele. 4 Watungile nji iwotshielo mu inzo ya Yehowa, fundo Yehowa wazuelele egi: “Mbanguhaga jina diami gu Yelusalema.” 5 Watungile nji iwotshielo mukunda nu themua nu ima iko ya mu dilu mu ibanzala mbadi ya inzo ya Yehowa. 6 Wawetshiele mun’enji ha tshuya,* waphongele, wakambele gujiya ndaga mbajibua mu masugu adi muza, wahagele nji nganga-ngombo nu athu ana zuela ndaga mbajibua gu matuama. Wakalegele ndaga jiavula jiabola gu meso a Yehowa ha gumuhana khabu.
7 Wazudile gisongo gia mutshi wa gijila* gialondele muene, wagihagele mu inzo inyi Yehowa wawambelele Davidi nu mun’enji Salomo egi: “Mbanguhaga jina diami mayilago mu inzo eyi nu gu Yelusalema, dimbo ngatombi mukatshi dia iphuta yagasue ya Isalele. 8 Mbangushigo luko muwunganesa enya Isalele gualeha nu mavu anyi ngahanele akhakh’awo gula ene atumagela muabonga ndaga jiagasue ngaawambelele, nu mikhuala yagasue inyi muenya mudimo wami Moize waawambelele ha gutumagela.” 9 Uvi enya Isalele atumagelego. Manase waawunganesele, waatumile ha gukalagala gubola guavula gubalega gua enya ifutshi inyi Yehowa washiyile gutuama diawo.
10 Yehowa walanduile guzuela mu njila ya enya mudimo enji baprofete egi: 11 “Manase fumu wa gu Yuda wakalagala ndaga eji jiagasue jiabola. Wakalagala gubola guavula gubalega gunu guakalegele enya Amole agasue anyi adiangele gutuama dienji, watumi nji enya Yuda ha gutshita gubola nu isongo yenji ya usala.* 12 Hene Yehowa Nzambi wa Isalele udi muzuela egi: ‘Ngudi mubata malamba gu Yelusalema nu gu Yuda; muthu wagasue mbawuvua ndaga yene mbawuvua woma wavula.* 13 Mbanguthesa Yelusalema nu shinga inyi ngathesele Samaliya, mbangukalegela nivo* gifua inyi ngakalegele ha guthesa inzo ya Ahaba. Mbanguwevua Yelusalema gifua luholo longa diana wevuewa; gula diawevuewa, diana fulumigiwa. 14 Mbangutuna athu ami* anyi mbaasala, mbanguahana ha mago a mbalagaji jiawo. Mbalagaji jiawo jiagasue mbajiaabata mu uhiga, mbajikuya ima yawo, 15 handaga akalegele ndaga jiabola gu meso ami nu adi mulandula gunguhana khabu, sendese lusugu akhakh’awo azogele gu Ejipitu uu nu mangino.’”
16 Manase washiyile* athu avula anyi akalegelego gubola, wazalesele mahatshi awo gu Yelusalema songi nu songi. Wadiangele gutshita gubola guko luholo luatumine muene enya Yuda ha gutshita ndaga jiabola gu meso a Yehowa. 17 Ndaga jiko jiakalegele Manase nu ima yagasue yatshitshile muene nu gubola guatshitshile muene, idi ya gusonega mu mukanda wa mene jia mafumu a gu Yuda. 18 Gungima Manase wafuile gifua muafuile akhakh’enji, amufundjile mu gilanga giakhalele mu inzo yenji, mu gilanga gia Uza. Mun’enji Amona wabuile fumu ha fundo dienji.
19 Amona wakhalele nu ivo 22 habuile muene fumu, wahinyine ivo mbadi gu Yelusalema. Jina dia gin’enji diakhalele Meshulemeta, mun’a Halusa wa gu Yotaba. 20 Wakhalele mutshita ndaga jiabola gu meso a Yehowa gifua muatshitshile sh’enji Manase. 21 Wawendele mu njila jiagasue jiawendele sh’enji, wakombelele isongo ya usala yakhalele mukombelela sh’enji, wayifugamele. 22 Watunyile Yehowa Nzambi wa akhakh’enji, gawendelego mu njila ya Yehowa. 23 Gungima enya mudimo a fumu Amona amuyidile giphungi, amushiyile mu inzo yenji. 24 Athu a mu gifutshi ashiyile athu agasue anyi ayidile Fumu Amona giphungi, abuishile mun’enji Yoziase fumu ha fundo dienji. 25 Ndaga jiko jiakalegele Amona jidi jia gusonega mu mukanda wa mene jia mafumu a gu Yuda. 26 Amufundjile mu malumba enji mu gilanga gia Uza. Mun’enji Yoziase wabuile fumu ha fundo dienji.