Mukanda wa Mbadi wa Mafumu
3 Mu givo gia 18 gia uhinyinyi wa Yosafata fumu wa gu Yuda, Yolama mun’a Ahaba wabuile fumu gu Isalele. Wahinyine gu Samaliya ivo 12. 2 Wakhalele mukalagala ndaga jiabola gu meso a Yehowa, uvi gubola guenji guakhalelego gifua gua sh’enji nu gin’enji handaga wakatudile kunji dia gijila dia Bale dialondele sh’enji. 3 Uvi walanduile gutshita gubola gunu Yeloboama mun’a Nebate watumile enya Isalele ha gutshita. Gabembelego gutshita gubola guene.
4 Mesha, fumu wa gu Moaba, wakhalele mufugi wa imeme. Wakhalele mufuta gitadi gudi fumu wa gu Isalele. Wakhalele gumuhana mitumba ya imeme 100 000 nu imeme ya milume 100 000 inyi khenji abatula galego uvuji. 5 Hafuile Ahaba, fumu wa gu Moaba walumbugidile fumu wa gu Isalele. 6 Mu tangua diene, Fumu Yolama wakatugile gu Samaliya, wabungishile enya Isalele agasue. 7 Watumile nji mbimbi gudi Fumu Yosafata wa gu Yuda egi: “Fumu wa gu Moaba wangulumbugila. Mbawuya gungutuala ha guluisa Moaba ba?” Yosafata wamuvutudile egi: “Ayi, mbangudi muya. Ame nu aye tudi muthu mumoshi. Athu ami nu athu aye adi nji muthu mumoshi. Tubalu tuami nu tubalu tuaye tudi luholo lumoshi.” 8 Yosafata wamuhudile egi: “Mu njila itshi tuza muyila?” Muene wamuvutudile egi: “Mu njila ya mavu a luselenga a Edome.”
9 Gungima fumu wa gu Isalele nu fumu wa gu Yuda nu fumu wa gu Edome ayile. Gungima dia guwenda masugu 7, akhalelego nu meya mukunda nu masuta awo nga mukunda nu shitu akhalele najio. 10 Fumu wa gu Isalele wazuelele egi: “Idi lamba diago! Yehowa watamega diago mafumu awa thathu ha guahana ha mago a enya Moaba!” 11 Yosafata wazuelele egi: “Gushigo nu profete wa Yehowa haha munu tuajiya guhula Yehowa mu njila yenji ba?” Muenya mudimo mumoshi wa fumu wa gu Isalele wamuvutuile egi: “Elisha mun’a Shafata munu wakhalele mumbila Eliya meya ha mago* udi haha.” 12 Yosafata wazuelele egi: “Yehowa wana zuela mu njila yenji.” Hene fumu wa gu Isalele nu Yosafata nu fumu wa gu Edome ayile gudi Elisha.
13 Elisha wawambelele fumu wa gu Isalele egi: “Mukunda natshi waza gudi ame?* Nda gudi baprofete a sh’aye nu gin’aye.” Uvi fumu wa gu Isalele wazuelele egi: “Ndo, Yehowa watamega mafumu awa mutatu ha guahana ha mago a enya Moaba.” 14 Elisha wamuwambelele egi: “Ngudi guguwambela giamatshidia mu jina dia Yehowa Nzambi wa masuta udi nu monyo, munu ngana kombelela* egi gula nga fumu Yosafata wa gu Yuda gajile ndo haha, nga ngagutalelego nga hazonda. 15 Henyaha ngutamegelenu muthu wana shiga gitare.”* Tangua muthu muene wasendesele gushiga gitare, nyuma* ya Yehowa yajile gudi Elisha. 16 Wazuelele egi: “Yehowa wazuela egi: ‘Hagenu mawina avula mu baba edi, 17 handaga Yehowa wazuela egi: “Mbamumonyigo funji nga mvula, uvi baba edi mbadizala nu meya. Mbamunua, mbamunuisa nji shitu jienu.”’ 18 Uvi ndaga eyi idi yaleba gudi Yehowa, handaga muene mbawuhana nji enya Moaba ha mago enu. 19 Mudi naye gumuanga membo agasue adi nu ibayi yakola nu membo agasue abonga. Mudi naye gukoka mitshi yagasue yabonga nu gushita ito yagasue ya mita. Gungima mudi naye gubishila maseso mu mahia agasue abonga ha guabolesa.”
20 Mu gimenegena, mu tangua ana hana mulambu wa mbuto, meya akatugile gu khanda ya Edome, abulumugile, baba diazalele nu meya.
21 Enya gu Moaba agasue avuile egi mafumu thathu aji ha gualuisa. Hene, atamegele mala agasue akhalele atagana ha gubata iluilo ya ita,* ayile mumagana mu mudidilo. 22 Tangua azugile mu gimenegena, muanya wakhalele muhenya holu dia meya; enya Moaba akhalele gu sambua diko, akhalele mumona meya ene abenga gifua mahatshi. 23 Azuelele egi: “Wawa mahatshi! Mafumu adishiyi nu phogo ya khusa. Oo Moaba, tuyenu tuzule ima yawo!” 24 Tangua ayile mu phundo ya enya Isalele, enya Isalele azugile, asendesele guashiya, enya Moaba alengele gutuama diawo. Enya Isalele ayile nu guashiya uu nu gu Moaba. 25 Amuangele membo, muthu wagasue wasonuene seso mu mahia agasue abonga, a azalesele nu maseso. Ashitshile ito yagasue ya mita, akokele mitshi yagasue yabonga. Phamba ibayi ya maseso ya Kile-Halesete yasalele mu molu, uvi masuta akhalele mulua nu lanse ayijietele, ayimuangele.
26 Tangua fumu wa gu Moaba wamonele egi wabingiwa gu ita, wazudile masuta 700 anyi akhalele mulua nu phogo jia khusa, akambele gubalegela gu khanda ya fumu wa gu Edome uvi abalegelego. 27 Wazudile mun’enji wa yala wa somi munu wakhalele naye guhinyina ha fundo dienji, wamuhanele gifua mulambu wa guwotshia holu dia gibayi. Athu* avuidile Isalele khabu, abembele fumu wa gu Moaba, avutugile mu gifutshi giawo.