Mukanda wa Thomo wa Gudilanduluila

2 Ana a Isalele enyawa: Ribene nu Simeone nu Levi nu Yuda nu Isakale nu Zabulona, 2 nu Dane nu Yozefe nu Benjame nu Nefetali nu Gade nu Asele.

3 Ana a Yuda akhalele: Ele nu Onane nu Shela. Gin’a ana awa mutatu wakhalele mun’a Shuwa, muenya gu Kanana. Uvi Ele mun’a Yuda wa somi, gakhalelego musuanguluisa Yehowa, hene muene wamushiyile. 4 Tamare giwaji gia Yuda, wavualele n’enji ana awa: Phelese nu Zela. Ana agasue a Yuda a mala akhalele thano.

5 Ana a Phelese akhalele: Heselona nu Hamule.

6 Ana a Zela akhalele: Zimiri nu Etane nu Hemane nu Kalekola nu Daleda. An’enji agasue akhalele thano.

7 Mun’a* Kalemi wakhalele Akale,* munu wabatele enya Isalele malamba; muene gatumagelego ndaga jiazuelele Nzambi mukunda nu ima yakhalele naye gushiyiwa.

8 Mun’a* Etane wakhalele Azariya.

9 Ana a Heselona enyawa: Yelamele nu Rama nu Kelubayi.*

10 Rama wavualele Aminadaba, Aminadaba wavualele Nashona, fumu wa ajigulu a Yuda. 11 Nashona wavualele Salema, Salema wavualele Boaze. 12 Boaze wavualele Obede, Obede wavualele Yese. 13 Mun’a Yese wa thomo wakhalele Eliyabe, wa mbadi Abinadaba, wa thathu Shimea, 14 wa nguana Netanele, wa thano Ladayi, 15 wa 6 Oseme, wa 7 Davidi. 16 Aphangi’awo a akhetu akhalele: Seluya nu Abigayile. Ana a Seluya akhalele mutatu: Abishayi nu Yoabe nu Asaele. 17 Abigayile wavualele Amasa; sh’a Amasa wakhalele Yetele mujigulu wa Ishemayele.

18 Kalebe* mun’a Heselona wavualele ana a mala nu mukaji’enji Azuba nu Yeliota; ana ene enyawa: Yeshele nu Shobabe nu Aledona. 19 Hafuile Azuba, Kalebe wazudile Efrata mu ulo, wavualele n’enji Hule. 20 Hule wavualele Uri. Uri wavualele Besalele.

21 Gungima Heselona wabungishile muila nu mun’a Makile wa mukhetu. Makile wakhalele sh’a Gileade. Heselona wamuzudile mu ulo hakhalele muene nu ivo 60, wavualele n’enji Seguba. 22 Seguba wavualele Yayile munu wakhalele nu membo 23 mu mavu a Gileade. 23 Gungima enya gu Geshule nu enya gu Siliya a atambudile Havote-Yayile, nu Kenata nu membo azonda-zonda akhalele hehi; membo ene akhalele 60. Athu ene agasue akhalele ajigulu a Makile sh’a Gileade.

24 Gungima dia gufua gua Heselona gu Kalebe-Efrata, mukaji’enji Abiya wasalele gumuvuadila mona wa yala, jina dienji Ashehule sh’a* Tekoa.

25 Ana a Yelamele mun’a Heselona wa somi enyawa: mun’enji wa somi wakhalele Rama, gungima wavualele Buna, nu Olene nu Oseme nu Ahiya. 26 Yelamele wakhalele nji nu mukhetu muko, jina dienji Atala. Wakhalele gin’a Oname. 27 Ana a Rama mun’a Yelamele wa somi akhalele: Mase, Yamine nu Ekele. 28 Ana a Oname akhalele: Shamayi nu Yada. Ana a Shamayi akhalele: Nadabe nu Abishule. 29 Jina dia mukaji’a Abishule diakhalele Abihayile; wavualele ana mbadi a mala: Abana nu Molida. 30 Ana a Nadabe akhalele: Selede nu Aphayime. Uvi Selede wafuile nu guvuala ndo nga mona mumoshi. 31 Mun’a* Aphayime wakhalele Yisheyi. Mun’a* Yisheyi wakhalele Sheshana. Mun’a* Sheshana wakhalele Ahelayi. 32 Ana a Yada phangi’a Shamayi akhalele: Yetele nu Yonatana. Uvi Yetele wafuile nu guvuala ndo nga mona mumoshi. 33 Ana a Yonatana akhalele: Phelete nu Zaza. Athu ene agasue akhalele ajigulu a Yelamele.

34 Sheshana gavualelego ana a mala, phamba ana a akhetu. Wakhalele nu muenya mudimo wenji mumoshi wa gu Ejipitu, jina dienji Yara. 35 Sheshana wahanele mun’enji wa mukhetu mu ulo gudi Yara, avualele mona wa yala, amuhanele jina egi Atayi. 36 Atayi wavualele Natana. Natana wavualele Zabade. 37 Zabade wavualele Efelale. Efelale wavualele Obede. 38 Obede wavualele Yehu. Yehu wavualele Azariya. 39 Azariya wavualele Helese. Helese wavualele Eleasa. 40 Eleasa wavualele Sisimayi. Sisimayi wavualele Shaluma. 41 Shaluma wavualele Yekamiya. Yekamiya wavualele Elishama.

42 Ana a Kalebe* phangi’a Yelamele enyawa: mun’enji wa somi Mesha sh’a Zife; guakhalele nji nu ana a Malesha sh’a Hebrone. 43 Ana a Hebrone akhalele: Kora, Taphuwa, Lekeme nu Shema. 44 Shema wavualele Rahama sh’a Yolekame. Lekeme wavualele Shamayi. 45 Shamayi wavualele Maona. Maona wavualele Bete-Sule. 46 Kalebe wakhalele nu mukhetu muko, jina dienji Efa; wavualele Halana nu Mosa nu Gazeze. Halana wavualele Gazeze. 47 Ana a Yahedayi akhalele: Legeme, Yotama, Geshane, Phelete, Efa nu Shafe. 48 Kalebe wakhalele nji nu mukhetu muko, jina dienji Maka; wavualele Shebele nu Tilena. 49 Gungima mukhetu muene wavualele Shafe sh’a Mademana nu Sheva sh’a Makebena nu Gibeya. Jina dia mun’a Kalebe wa mukhetu diakhalele Akesa. 50 Athu ene agasue akhalele ajigulu a Kalebe.

Ana a Hule mun’a Efrata wa somi akhalele: Shobale sh’a Kiriyate-Yalima, 51 nu Salema sh’a Beteleheme nu Halefe sh’a Bete-Gadele. 52 Shobale sh’a Kiriyate-Yalima wavualele Halowe nu gitshinyi gia enya Menuhota. 53 Fami jia Kiriyate-Yalima jiakhalele: enya Iteli, enya Phute, enya Shumate nu enya Mishelayi. Guene guakatugile enya Sola nu enya Eshetaole. 54 Ana a Salema akhalele: Beteleheme nu enya Netofa nu enya Atelote-Bete-Yoaba nu gitshinyi gia enya Manahata nu enya Sola. 55 Fami jia alongeshi a mikhuala jiakhalele mukhala gu Yabese jiakhalele: enya Tila, enya Shimea nu enya Suka. Athu ene akhalele enya Kena; guene guakatugile Hamate, khakha wa enya Lekabe.