Yobo
36 Elihu walanduile guzuela egi:
2 “Monesa khadilo dia guhuiminyina tangua ngudi muzuela,
handaga ngudi nu ndaga jiavula jia guzuela jiatadila Nzambi.
3 Mbanguzuela muabonga ndaga ngudi mujiya,
mbangumonesa nji egi Mufugi wami udi muthu wabonga.
4 Yadiago mbimbi jiami jishigo jia mambo;
muthu udi nu ujiyi watagana udi haha gutuama diaye.
5 Ayi Nzambi udi nu ngolo, ganago nji gutuna nga muthu;
muene udi wakoma, luholo luenji lua gukotelesa ndaga* ludi nji luakoma.
6 Muene mbagashigo mubemba athu abola nu monyo,
uvi wana kalegela athu adi mumona lamba ndaga mu luholo luabonga.
7 Muene gana katula ndo meso enji gudi athu abonga,
wana guakhalesa ha nguasa jia ufumu nu mafumu,* ene ana tumbuishiwa nji mayilago.
8 Uvi gula adi agujitshigiwa nu malenge
adi agukuatewa nu ngonji jia malamba,
9 Nzambi wana guawambela ndaga atshitshile,
gubola atshitshile mukunda nu lulendo.
10 Muene wana kangula matshui awo hagula avue lubelo,
wana guawambela nji ha gubemba gutshita ndaga jiabola.
11 Gula amutumagela nu amukombelela,
mbaakhala nu gusuanguluga mu masugu a monyo wawo asala,
ivo yawo nji mbayikhala ya gusuanguluga.
12 Uvi gula atumagelego mbaafua gu phogo ya khusa;*
mbaafua gutema ndo.
13 Athu anago gunemesa Nzambi* mu mutshima mbaakhala nu khabu.
Ashigo mutoga ukuateshi ngatshima muene udi guaajitshiga shinga.
14 Ana fua nu ulenge wagasue,
adi mubalegesa* monyo wawo mukatshi dia thambi jia mala jia mu tempelo.
15 Uvi Nzambi* wana huluisa athu adi mumona malamba;
wana kangula matshui awo tangua adi mumonesewa lamba.
16 Muene udi gugukatula hehi nu malamba
ha gugubata ha fundo diakoma, dinyi dishigo nu malamba,
mesa aye adi nu ima yavula ya gudia ha guguhana gikhesa.
17 Ngenyi mbawusuanguluga tangua athu abola mbaasophesewa,
tangua mbaabatula mulonga mu luholo luabonga.
18 Uvi tema hagula khabu jiakola jigubatshigo ha gutshita ndaga jiabola,*
ubembigo nji egi gukoma gua gabatshi’a kano* guguhuige.
19 Gukaluguga guaye ha gutoga ukuateshi
nga gikhesa giakola udi mutshita mbagugukatula mu malamba ba?
20 Unengenenago muavula phipha
tangua athu ana tota mu mafundo awo.
21 Monesa gutema hagula usendesago gutshita ndaga jiabola,
utombigo ndaga jiene ha fundo dia malamba.
22 Tala! Nzambi wana tumbuishiwa mu ngolo jienji;
mulongeshi mutshi udi gifua muene?
23 Nanyi wamudijigile* luholo lua gukalagala ndaga?
Nga ndo nanyi wamuwambelele gale egi: ‘Ndaga watshitshi idi yabola’?
24 Ubuitshigo mutshima ha gutumbuisa midimo yenji,
midimo inyi athu ayimbidile ngimbo.
25 Athu agasue amonele midimo yene,
muthu wa ha mavu wana guyitalela gualeha.
26 Yadiago, tuajiyilego gukotelesa gukoma gua Nzambi;
tuajiyilego gukotelesa* guvula gua ivo yenji.
27 Muene wana nana manoso a meya,
gimbundu-mbundu giana gudibungisa ha gubua mvula.
28 Gungima matuta ana guyinogesa;
mvula yakola yana nogela athu.
29 Nanyi wajiya gukotelesa luholo matuta ana gudimuanga,
nu matululu a miandu idi mukatuga mu tenta ya Nzambi?
30 Tala luholo ludi mumuanga muene guhenya* guenji holu dia matuta,
muene udi mutshuiga nji jinga* dia kianga.
31 Muene wana kuatesa* athu ha gukhala nu monyo mu njila ya ima yene;
wana guahana nji ima ya gudia yavula.
32 Muene wana tshuiga guhenya gua mvula nu koko dienji,
wana guyituma nji ha fundo didi mutshigina muene.
33 Muandu wenji wana zuela ndaga jia mutadila,
shitu nji jiana monesa muthu* udi muza.