Ngimbo
106 Tumbuisenu Yah!*
Hanenu Yehowa mersi handaga muene udi wabonga;
guzumba guenji gua giamatshidia guana khala mayilago.
2 Nanyi wajiya diago gulongesa ndaga jiakoma jiakalegele Yehowa
nga midimo yenji yakoma idi yatagana ha gutumbuishiwa?
3 Gusuanguluga gudi nu athu ana kalagala ndaga nu giamatshidia,
anyi ana tshita ndaga jiabonga tangua diagasue.
4 Oo Yehowa, nguwunguluge ha udi mumonesela athu aye gisemo.
Ngukuatese, nguhuluise,
5 hagula ngajiya guheta gubonga wana monesela athu aye watombele,
ngusuanguluge hamoshi nu gifutshi giaye,
nu hagula ngajiya gudisunzula mukunda nu aye hamoshi nu khapho diaye.
6 Tuatshitshile gubola gifua muatshitshile akhakh’etu;
tuakalegele diago gubola; tuatshitshile ndaga mu luholo luabola.
7 Hakhalele akhakh’etu gu Ejipitu, akoteleselego* ndaga jia gushimana wakalegele.
Awungulugilego guzumba guaye gua giamatshidia guavula,
uvi alumbugile hehi nu kianga, Kianga Giabenga.
8 Uvi muene waahuluishile mukunda nu jina dienji,
hagula ngolo jienji jijiyiwe.
9 Muene wabalele Kianga Giabenga, giamiginyile;
waawendesele mu majinga a meya gifua mu mavu a luselenga;
10 waahuluishile ha mago a mbalagaji jiawo,
waakudile ha mago a mbalagaji.
11 Meya atshuigile mbalagaji jiawo;
gushigo nga mumoshi wasalele nu monyo.
12 Hene ashile mutshima gu ndaga jialayele muene;
asendesele guyimba ngimbo ha gumutumbuisa.
13 Uvi ajimbidile muphushi ndaga jiakalegele muene;
anengenenego utuameji wenji.
14 Abuile mu ngina jiawo jiabola mu mavu a luselenga;
alolele Nzambi mu mavu a luselenga.
15 Waahanele ima atogele,
uvi waatumidile misongo, misongo yene yaalebesele nu yaashiyile.
16 Hakhalele ene mu phundo, avidile Moize giphi
nu Alona, muthu wa gijila wa Yehowa.
17 Mavu akangulugile, aminyile Datana
atshuigile athu agasue akhalele nu Abirame.
18 Tshuya tuazogele mukatshi dia hunji diawo;
tshuya tuashididishile athu abola.
19 Alondele gana ga ngombe gu Horebe,
afugamele gisongo gia utadi;
20 Ene ahanele lutumbu luami
gudi gifuanesa gia ngombe yana dia muangu.
21 Ene ajimbidile Nzambi, Muhuluishi wawo,
munu wakalegele ndaga jiakoma gu Ejipitu,
22 ndaga jia gushimana mu mavu a Kame,
ndaga jia woma gu Kianga Giabenga.
23 Wakhalele mutshigina guamanesela,
uvi Moise muthu watombele muene, wamububidile
ha gubemba guvua khabu, hagula gaashiyigo.
24 Gungima aseguluile gifushi giawo giabonga;
ashilego gutshigina gu ndaga jiaalayele muene.
25 Akhalele muboguta mu tenta jiawo;
ategelelego mbimbi ya Yehowa.
26 Hene, wathuphuile koko guenji, wadilogele
egi mbawaashiya mu mavu a luselenga;
27 mbawumuanga an’awo mukatshi dia ifutshi,
ene mbaafua mu ifutshi yene.
28 Gungima akombelele Bale wa gu Pheole,
adile milambu yahanewe gudi mvumbi.
29 Ndaga akalegele jiamuhanele khabu,
hene lamba diakola diaabuidile.
30 Uvi Fineyase wazugile, wanginyile mulonga wene ha katshi,
hene lamba diene diahuile.
31 Nzambi wamumonele egi udi muthu wabonga gu meso enji
mbayikhala ngenyi mu indongo yagasue, ivo nu ivo.
32 Ene amuhanele khabu gu meya a Meriba,
hene mukunda nu ene, ndaga jiayidilego muabonga mukunda nu Moize.
33 Ene amuhanele gisuga monyo,
ngenyi muene gatangijilego gutuama dia guzuela.
34 Ene atumagelego ndaga yaawambelele Yehowa
ashiyilego enya ifutshi iko.
35 Uvi adibungishile nu ifutshi iko,
alanduile* nji makalegelo awo.
36 Alanduile gukombelela nzambi jiawo jia isongo,
nzambi jiene jiabuile gifua muheto mukunda nu ene.
37 Ahanele an’awo a mala
nu an’awo a akhetu gifua milambu gudi bademo.
38 Ambosesele mahatshi a athu anyi kalegelego gubola,
mahatshi a an’awo a mala nu a akhetu
anyi ahanele ene gifua milambu gudi nzambi jia isongo jia gu Kanana;
abolesele gifutshi nu mahatshi.
39 Adibuishile enya usala mu midimo yawo;
akalegele uthambi wa mu nyuma mu makalegelo awo.
40 Hene, Yehowa wavidile athu enji khabu,
gakhalelego luko muzumba khapho dienji.
41 Hene wakhalele guahana mbala jiavula ha mago a ifutshi iko,
hagula athu anyi akhalelego guazumba, a ahinyine.
42 Mbalagaji jiawo jiakhalele guasagesa,
jiakhalele nji guahinyina.
43 Mahugo avula, Nzambi wakhalele guahuluisa,
uvi ene akhalele gumulumbugila, akhalelego nji gumutumagela,
akhalele muhanewa musonyi mukunda nu gujimbila guawo.
44 Uvi muene wakhalele mumona lamba diawo,
wakhalele muvua tangua akhalele mudila ha gutoga ukuateshi.
45 Handaga wawungulugile gikotelo gienji mukunda nu ene,
guzumba guenji guavula gua giamatshidia guakhalele gumutuma ha guavila khenda.*
46 Watshitshile egi athu anyi a akuatele mu uhiga
a avile khenda.
47 Tuhuluise, Oo Yehowa Nzambi wetu,
tukatule mukatshi dia ifutshi, utubungise
hagula tutumbuise jina diaye dia gijila
nu hagula tugutumbuise nu gusuanguluga guagasue.
48 Yehowa Nzambi wa Isalele atumbuishiwe
sendese mangino uu ivo nu ivo.*
Athu agasue azuele egi: “Amen!”*
Tumbuisenu Yah.*