Ngimbo
Gudi mutuameji wa miziki. Lungimbo lua Davidi.
140 Oo Yehowa, nguhuluise ha mago a athu abola;
ngubambe hagula enya khuta angutshitshigo gubola,
2 ngubambe mukunda nu athu adi mutangiza ndaga jiabola mu mitshima yawo,
anyi ana zola nguma lusugu lua mudidi.
3 Ene adi muviga madimi awo gifua madimi a nioga;
malengo-lengo a vuambu adi goshi’a ivungu yawo. (Sela)
4 Oo Yehowa, ngubambe hagula athu abola angutshitshigo gubola;
nguhuluise ha mago a enya khuta,
anyi anaya giphungi ha gunguluisa.
5 Enya lulendo angutela muheto mu gisuegi;
angutela wanda nu shinga mu khulo ya njila.
Angutela miheto. (Sela)
6 Ngawambela Yehowa egi: “Udi Nzambi wami.
Oo Yehowa, tegelela luholo ngudi gugutoga ukuateshi.”
7 Oo Yehowa Fumu Wabalega Gukoma, muhuluishi wami wa ngolo,
wabambele muto wami mu lusugu lua ita.
8 Oo Yehowa, utagenesago nzala jia athu abola.
Ubingisago iphungi yawo hagula adihadigo. (Sela)
9 Ndaga jiabola jidi muzuela athu adi agungujieta
jizale holu dia mito yawo.
10 Makala a tshuya a anogele gifua mvula.
Abishidiwe ha tshuya
mu mawina aleha,* hagula azugigo luko.
11 Muthu wana mbila athu ako mambo gahetshigo fundo dia gukhala ha mavu.*
Gubola gulandule enya khuta guashiye.
12 Ngudi mujiya egi Yehowa mbawuluila muthu udi ya guleba,
mbawubatula milonga ya phutu mu luholo luabonga.
13 Yadiago athu abonga mbaatumbuisa jina diaye;
athu ana kalagala ndaga jiabonga mbaajinga gutuama diaye.