Ngimbo

17 Oo Yehowa, vua gisambu giami, ngukalegele ndaga mu luholo luabonga;

vua luholo ngudi mudila ha gutoga ukuateshi;

tegelela gisambu ngudi mutshita nu giamatshidia.

 2 Batula mulonga wami, ngubingise;

meso aye amone ndaga jidi jiabonga.

 3 Aye wana tala muabonga mutshima wami, ikhale mu phipha;

wanguphelegetesele,

aye hakhaye wadimonela egi ngushigo nu matangi a gutshita gubola,

kano guami guana zuelago ndaga jiabola.

 4 Ngana tshita ndo ndaga gifua athu ako,

ngana landula mbimbi yaye, ngana landulago njila jia nzangi.

 5 Malu ami alandule guwenda mu njila jiaye

hagula ngukhakhugago.

 6 Oo Nzambi wami, ngudi gugukombelela,

handaga ngudi mujiya egi mbawunguhana mvutu.

 7 Oo aye muhuluishi wa athu ana gudisuega gu koko diaye dia madia

ha gulenga athu ana gugulumbugila,

monesa guzumba guaye gua giamatshidia mu luholo lua gushimana.

 8 Ngubambe gifua gana ga diso diaye,

ngusuege moshi’a mahambu aye.

 9 Ngubambe handaga muthu wabola udi gunguluisa,

handaga mbalagaji jiami jiangujieta, jidi mutshigina gungushiya.

10 Ene ashigo nu khenda;

adi muzuela nu lulendo luagasue;

11 henyaha atujieta;

adi mukamba luholo lua gututshita gubola.*

12 Mbalagaji wami udi gifua khoshi idi nu nzala yakola ya gukalula shitu itshinyi-itshinyi,

gifua mutumba wa khoshi udi mubandemena ha gukuata shitu.

13 Oo Yehowa, zuga umuluise, umubuise hashi;

nguhuluise ha mago a muthu wabola nu phogo yaye ya khusa.

14 Oo Yehowa, nguhuluise nu koko guaye

ha mago a athu a ha mavu awa, anyi adi mujinga phamba mukunda nu lujingu lua mangino,*

athu wahanele ima yavula yabonga,

anyi ana bembela an’awo avula umonyi.

15 Uvi ame, luholo ngudi muthu wabonga, mbangudi mumona phala yaye;

tangua ngana zuga, ngana khala nu gusuanguluga handaga wana khala hehi nu ame.