Ngimbo
Lungimbo lua Davidi.
א [Alefe]
25 Oo Yehowa, ngadihana gudi aye mu gisambu.
ב [Bete]
2 Nzambi wami, ngana gugushila mutshima;
ubembigo egi nguvuishiwe musonyi.
Ubembigo egi mbalagaji jiami jisuanguluge mukunda nu lamba diami.
ג [Gimele]
3 Muthu wana gudifelela gudi aye mbagashigo muvuishiwa musonyi nga hazonda,
uvi athu ana kalegela athu ako ndaga jiabola mbaavuishiwa musonyi.
ד [Dalete]
4 Oo Yehowa, ngudijige njila jiaye;
ngulongese luholo lua guwenda mu njila jiaye.
ה [He]
5 Ngukuatese ha guwenda mu giamatshidia giaye, ngulongese,
handaga udi Nzambi wami, aye muhuluishi wami.
ו [Waw]
Lusugu luagasue, ngana gudifelela gudi aye.
ז [Zayine]
6 Oo Yehowa, wunguluga khenda jiaye nu guzumba guaye gua giamatshidia
gunu wana monesa tangua diagasue.*
ח [Heth]
7 Oo Yehowa, uwungulugago gubola ngakalegele mu ulenge.
Nguwunguluge mukunda nu guzumba guaye gua giamatshidia,
handaga aye udi Nzambi wabonga.
ט [Teth]
8 Yehowa udi Nzambi wabonga nu watagana.
Gishina giene muene wana longesa athu adi mutshita gubola njila adi naye gulandula.
י [Yod]
9 Mbawutuameza athu a gudibulumuisa ha gukalagala ndaga jiabonga,
mbawulongesa athu a gudibulumuisa njila jienji.
כ [Kaph]
10 Njila jiagasue jia Yehowa jiana monesa guzumba gua giamatshidia nu gujinginyina guenji
mukunda nu athu ana nemesa gikotelo gienji nu mikhuala yenji.
ל [Lamede]
11 Oo Yehowa, mukunda nu jina diaye,
ngutotesele gubola guami ngatshima gudi guakoma.
מ [Mem]
12 Muthu munu udi muvila Yehowa Nzambi woma,
Nzambi mbawumudijiga njila idi naye gulandula muene.
נ [Nune]
13 Muene mbawuheta gubonga,
ajigulu* enji mbaaheta mavu.
ס [Sameke]
14 Yehowa wana kuata ufuta wakola nu athu ana gumuvila woma,
wana guadijiga gikotelo gienji.
ע [Ayine]
15 Meso ami adi mutala tangua diagasue gudi Yehowa,
muene mbawuzola malu ami adi a gukuatagana mu wanda.
פ [Pe]
16 Ngutale, unguvile khenda,
handaga ngudi hakhami, ngushigo nu muthu ya gungukuatesa.
צ [Tsade]
17 Gikenene gidi gudivudisa mu mutshima wami;
nguzole mu lamba ngudi mumona.
ר [Resh]
18 Tala lamba diami,
ngutotesele gubola guami guagasue.
19 Tala luholo mbalagaji jiami jidi gudivudisa,
adi mutshigina gungutshita gubola nu khuta yagasue.
ש [Shin]
20 Bamba monyo wami, nguhuluise.
Ubembigo egi nguhanewe musonyi, handaga ngana lengela gudi aye.
ת [Taw]
21 Ngubambe, handaga ngudi muthu ya gunjinginyina, ngana kalagala ndaga jiabonga,
ngana gudifelela gudi aye.
22 Oo Nzambi, huluisa* Isalele mu malamba enji agasue.