Mukanda wa Thomo wa Mafumu
1 Fumu Davidi wabuile diago muthu wa gukola; wakhalele muvua guhuma ikhale tangua akhalele gumutshuiga milele. 2 Enya mudimo enji amuwambelele egi: “Fumu tugukambele muvuala wa mukhetu udi gandongo* ha gugukuatesa. Mbawukhala mubanda ha mago aye hagula ukhale muvua tshuiya.” 3 Akambele mon’a mukhetu wabonga mu mavu agasue a Isalele. Ahetele mon’a mukhetu mumoshi gu Shuneme, jina dienji Abishage, ayile n’enji gudi fumu. 4 Mon’a mukhetu muene wakhalele diago wabonga. Wasendesele gukuatesa fumu, uvi fumu gabungishilego n’enji muila.
5 Mu tangua diene Adoniya mun’a Davidi, munu avualele nu Hagita wakhalele gudihala egi: “Ame nguza mubua fumu!” Walondele phusu-phusu, wakhalele nu athu ana wendesa tubalu, wakhalele nji nu athu 50 akhalele muzula phushi gutuama dienji. 6 Uvi sh’enji gamubalelego nga hazonda egi: “Mukunda natshi watshita ndaga eyi?” Adoniya wakhalele nji wabonga, wavualewe gungima dia Abasaloma. 7 Adoniya wayile giphungi nu Yoabe mun’a Seluya nu nganga-nzambi Abiatare. Ayile gu khanda yenji, amukuatesele. 8 Uvi nganga-nzambi Zadoke nu Benaya mun’a Yoyada, nu profete Natana nu Shimeyi, nu Reyi nu masuta a ngolo a Davidi ayilego gu khanda ya Adoniya.
9 Gungima Adoniya wahanele mulambu wa imeme nu ngombe nu shitu jia maji-maji holu dia seso dia Zohelete didi hehi nu Ene-Logela. Watamegele aphangi’enji agasue, ana a fumu, nu mala agasue a gu Yuda anyi akhalele enya mudimo a fumu. 10 Uvi gatamegelego profete Natana nu Benaya nu masuta a ngolo nga phangi’enji Salomo. 11 Natana wawambelele Batesheba gin’a Salomo egi: “Wavui gale! Adoniya mun’a Hagita wabui gale fumu. Uvi fumi’etu Davidi gashigo mujiya nga gima. 12 Henyaha ngabuba, iza nguguwambele ndaga udi naye gutshita hagula uhuluise monyo waye nu wa mun’aye Salomo. 13 Nda gudi fumu Davidi umuwambele egi: ‘Fumu, aye wadilogele gutuama diami egi: “Mun’aye Salomo mbawubua fumu gungima diami, muene mbawukhala ha nguasa yami ya ufumu.” Na mukunda natshi Adoniya wabua fumu?’ 14 Gutuama egi umanesele guta maga nu fumu, ame mbangungina ha gutshiginyisa mbimbi jiaye.”
15 Batesheba wanginyine gu sugu yakhalele fumu, fumu wakhalele wabui gale muthu wa gukola diago. Abishage, mon’a mukhetu wa gu Shuneme wakhalele gumukuatesa. 16 Batesheba washiwugile, wafugamele phala mu mavu gutuama dia fumu. Fumu wamuhudile egi: “Itshi udi mutshigina?” 17 Muene wamuvutuile egi: “Fumu, aye wadilogele gutuama diami mu jina dia Yehowa Nzambi waye egi mun’aye Salomo mbawubua fumu gungima diami, muene mbawukhala ha nguasa yami ya ufumu. 18 Uvi tala, Adoniya wabui gale fumu; uvi aye ushigo mujiya nga gima gimoshi. 19 Adoniya wahanyi milambu yavula ya ngombe nu ya shitu jia maji-maji nu ya imeme. Watamega nji ana a fumu agasue nu nganga-nzambi Abiatare nu Yoabe fumu wa masuta; uvi gatamegelego muenya mudimo waye Salomo. 20 Henyaha fumu, enya Isalele agasue adi munengena wawambele gula nanyi mbawukhala ha nguasa yaye ya ufumu gungima diaye. 21 Gula ndo, tangua mbawufua gifua muafuile akhakh’aye, athu mbaazuela egi ame nu mun’ami Salomo tudi athu abola.”
22 Hakhalele muene muzuela nu fumu, profete Natana wanginyile. 23 Awambelele fumu mbala imoshi egi: “Profete Natana waza!” Natana wayile gutuama dia fumu, wafugamele phala mu mavu. 24 Natana wazuelele egi: “Fumu, wazuelele egi Adoniya mbawubua fumu gungima diaye? Muene mbawukhala ha nguasa yaye ya ufumu ba? 25 Handaga mangino Adoniya wayi muhana milambu yavula ya ngombe, nu ya shitu jia maji-maji nu ya imeme. Watamega ana a fumu agasue nu mafumu a masuta nu nganga-nzambi Abiatare. Adi guene mudia nu gunua; adi mulandula guzuela egi: ‘Fumu Adoniya akhale nu monyo!’ 26 Uvi ame muenya mudimo waye nu nganga-nzambi Zadoke, nu Benaya mun’a Yoyada nu muenya mudimo waye Salomo atutamegelego. 27 Fumu, wahanyi diago njila egi atshite ndaga eyi, uvi nu gunguwambela ndo ame muenya mudimo waye gula nanyi mbawukhala ha nguasa yaye ya ufumu gungima diaye ba?”
28 Fumu Davidi wamuvutuile egi: “Ngutamegele Batesheba.” Batesheba wanginyile, wamaganele gutuama dia fumu. 29 Fumu wadilogele egi: “Ngudi gumiwambela giamatshidia mu jina dia Yehowa Nzambi wa monyo, munu wanguhuluishile mu malamba ami agasue egi, 30 mangino ngudi mutagenesa ndaga ngadilogele gutuama diaye mu jina dia Yehowa Nzambi wa Isalele egi: ‘Mun’aye Salomo, muene mbawubua fumu ha fundo diami. Muene mbawukhala ha nguasa yami ya ufumu.’” 31 Batesheba washiwugile phala mu mavu, wafugamele gutuama dia fumu. Wazuelele egi: “Fumi’ami Davidi akhale nu monyo ivo nu ivo!”
32 Fumu Davidi wazuelele mbala imoshi egi: “Ngutamegelenu nganga-nzambi Zadoke nu profete Natana nu Benaya mun’a Yoyada.” Mukut’awo agasue ajile gutuama dia fumu. 33 Fumu waawambelele egi: “Zulenu enya mudimo ami, nginyisenu mun’ami Salomo holu dia phunda* yami, mubulumuge n’enji gu Gihona. 34 Nganga-nzambi Zadoke nu profete Natana amumbe maji guene ha gukhala fumu gu Isalele. Gungima shigenu phungi, zuelenu egi: ‘Fumu Salomo akhale nu monyo!’ 35 Gungima muvutuge n’enji, muene uza mukhala ha nguasa yami ya ufumu; mbawubua fumu ha fundo diami, mbangumubuisa mutuameji wa Isalele nu Yuda.” 36 Benaya mun’a Yoyada wawambelele fumu mbala imoshi egi: “Amen! Fumu, Yehowa Nzambi waye atshigine ndaga yene. 37 Fumu, Yehowa akhale nu Salomo gifua muakhalele muene nu aye. Muene akomese ufumu wenji gubalega wa Fumu Davidi.”
38 Gungima nganga-nzambi Zadoke nu profete Natana, nu Benaya mun’a Yoyada nu enya Kerete nu enya Phelete, ahagele Salomo holu dia phunda ya fumu Davidi, ayile n’enji gu Gihona. 39 Nganga-nzambi Zadoke wazanguile lumbinga lua maji mu tenta, wambile Salomo maji; asendesele gushiga phungi. Athu agasue asendesele gukaluguga egi: “Fumu Salomo akhale nu monyo!” 40 Gungima athu agasue akandugile nu Salomo, akhalele muya nu gushiga mbinga nu gusuanguluga muavula; mavu adigitshile mukunda nu matululu awo.
41 Hamanesele Adoniya nu athu atamegele muene gudia, avuile matululu ene. Tangua Yoabe wavuile matululu a lumbinga, wazuelele mbala imoshi egi: “Mukunda natshi matululu adi avula mu dimbo?” 42 Hakhalele muene muzuela, Yonatana mun’a nganga-nzambi Abiatare wajile. Adoniya wamuwambelele egi: “Ngina handaga udi muthu wabonga. Idi naye gukhala egi waza nu mene jiabonga.” 43 Uvi Yonatana wawambelele Adoniya egi: “Ndo! Fumi’etu Davidi wabuisa Salomo fumu. 44 Fumu watumi nganga-nzambi Zadoke nu profete Natana nu Benaya mun’a Yoyada nu enya Kerete nu enya Phelete; ene anginyisa Salomo holu dia phunda ya fumu. 45 Tangua ahetshi gu Gihona, nganga-nzambi Zadoke nu profete Natana amumbi maji ha gubua fumu. Gungima avutuga nu gusuanguluga, dimbo diagasue diabua nyiga-nyiga. Gishina giene mudi muvua matululu. 46 Salomo nji wakhadi gale ha nguasa ya ufumu. 47 Ndaga iko yenyeyi: Enya mudimo a fumu aji mushimana fumi’etu Davidi. Amuwambela egi: ‘Nzambi waye ahane Salomo lutumbu luavula gubalega luaye; akomese nji ufumu wenji muavula gubalega waye!’ Hene, fumu Davidi washigula muto ha gitanda gienji. 48 Gungima fumu wazuedi egi: ‘Yehowa Nzambi wa Isalele atumbuishiwe, handaga mangino watomba muthu ha gukhala ha nguasa yami ya ufumu. Wangukuatesa nji ha gumumona nu meso ami!’”
49 Athu agasue anyi Adoniya watamegele, asendesele guvua woma. Muthu nu muthu walengele, wayile gumbo dienji. 50 Adoniya wavuile nji woma mukunda nu Salomo. Hene wazugile, wayile mukuata mbinga jia giwotshielo. 51 Athu ayile muwambela Salomo egi: “Fumu, Adoniya udi guguvuila woma, wayi mukuata mbinga jia giwotshielo. Udi muzuela egi: ‘Ngabuba, Fumu Salomo adiloge thomo egi mbagashigo gungushiya ame muenya mudimo wenji nu phogo ya khusa.’” 52 Salomo wazuelele egi: “Gula wadituameza muabonga, sanga dienji nga dimoshi mbadishigo mubua hashi. Uvi gula watshita ndaga yabola, mbawushiyiwa.” 53 Fumu Salomo watumine athu ha guya gumukatula gu giwotshielo. Adoniya wajile, wafugamele gutuama dia fumu Salomo. Gungima Salomo wamuwambelele egi: “Vutuga gumbo diaye.”