Mukanda wa Mbadi wa Mafumu
4 Lusugu lumoshi, mukhetu mumoshi mukatshi dia akhaji’a ana a baprofete wayile mudidila Elisha egi: “Mulumi’ami, muenya mudimo waye wafuile gale. Udi mujiya muabonga egi wakhalele muvuila Yehowa woma. Uvi muenya mukudi mumoshi waza muzula an’ami mbadi ha guabuisa ahiga mukunda nu mukudi wenji.” 2 Elisha wamuhudile egi: “Nguwambele, itshi ngajiya gutshita mukunda nu aye? Itshi udi naye gu inzo?” Mukhetu muene wamuvutuile egi: “Ame muenya mudimo waye ngushigo nga nu gima gimoshi gu inzo, phamba bungu dimoshi dia maji.” 3 Gungima Elisha wamuwambelele egi: “Nda utoge mabungu a gituhu gudi athu agasue wana khala nawo hehi. Toga mabungu avula diago. 4 Gungima vutuga, ungine monzo nu an’aye, ukange mufulo. Zalesa maji mu mabungu agasue, haga mabungu a guzala gu khanda imoshi.” 5 Hene, mukhetu muene wayile.
Wanginyile monzo nu an’enji, wakangele mufulo. An’enji akhalele gumuhana mabungu, muene wakhalele mulungulula maji. 6 Tangua mabungu ene azalele, mukhetu muene wawambelele mun’enji mumoshi egi: “Nguhane bungu diko.” Uvi muene wamuwambelele egi: “Mabungu agasue ahui.” Mu tangua diene, maji abatugile. 7 Mukhetu muene wayile muwambela muthu wa Nzambi wa giamatshidia ndaga yene. Muene wamuvutudile egi: “Nda udige maji ene ufute mikudi yaye, anyi asala ajiya gugukuatesa nu an’aye.”
8 Lusugu lumoshi, Elisha wayile gu Shuneme. Guakhalele nu mukhetu mumoshi wa lutumbu mu dimbo diene, wabubidile Elisha ha gudia gumbo dienji. Tangua diagasue diakhalele Elisha mubalegela guene, wakhalele muya gumbo dienji ha gudia. 9 Mukhetu muene wawambelele mulumi’enji egi: “Ngudi mujiya egi muthu yowu wana guza gumbo dietu mbala jiavula, udi muthu wa gijila wa Nzambi. 10 Ngabuba, tumulondele sugu yazonda gu yangi, tumuhagele gitanda* nu mesa nu nguasa nu gihagelo gia muenda. Ngenyi tangua diagasue mbadiza muene gumbo dietu, wajiya gukhala guene.”
11 Lusugu lumoshi Elisha wajile gumbo diawo, wakandugile gu sugu yakhalele gu yangi ha gubanda. 12 Gungima wawambelele muenya mudimo wenji Gehazi egi: “Tamega mukhetu yowu wa gu Shuneme.” Gehazi wamutamegele, mukhetu muene wajile mumagana gutuama dienji. 13 Elisha wawambelele Gehazi egi: “Ngabuba, muwambele egi: ‘Wadisagesa muavula mukunda nu esue. Itshi ngajiya gutshita mukunda nu aye, nguya guguzuelela gudi fumu nga gudi fumu wa masuta ba?’” Uvi mukhetu muene wavutudile egi: “Ndo, ngana khala gami muabonga mukatshi dia akuaku’ami.” 14 Hene Elisha wazuelele egi: “Itshi tuajiya gutshita mukunda nu muene?” Gehazi wavutudile egi: “Mukhetu muene gashigo nu mona wa yala, mulumi’enji udi gale muthu wa gukola.” 15 Wazuelele mbala imoshi egi: “Mutamege.” Gehazi wamutamegele, mukhetu muene wajile mumagana ha mufulo. 16 Elisha wamuwambelele egi: “Mu givo gidi muza, mu tangua edi, mbawubata mona wa yala ha mago aye.” Uvi mukhetu muene wazuelele egi: “Ndo fumu, udi muthu wa Nzambi wa giamatshidia, ungumbilago ame muenya mudimo waye mambo.”
17 Mu givo gialanduile, mukhetu muene wavualele mona wa yala mu tangua diene, gifua luholo Elisha wamuwambelele. 18 Mona muene wakudile. Lusugu lumoshi, wayile gudi sh’enji, mu tangua diene sh’enji wakhalele nu athu akhalele mukatula mbuto. 19 Wakhalele muwambela sh’enji egi: “Aa muto! Muto udi gungukata!” Gungima sh’enji wawambelele muenya mudimo wenji egi: “Mubate gudi gin’enji.” 20 Wabatele mona gudi gin’enji. Mona muene wabandele ha malu a gin’enji uu nu mu midi, gungima wafuile. 21 Mukhetu muene wakandugile nu mona muene, wamubandesele ha gitanda gia muthu wa Nzambi wa giamatshidia. Gungima wajidigile mufulo, wayile. 22 Watamegele mulumi’enji, wamuwambelele egi: “Ngabuba, ngutumine muenya mudimo mumoshi nu phunda. Ngudi mutshigina guya muphushi gudi muthu wa Nzambi wa giamatshidia, gungima nguze nguvutuge.” 23 Uvi mulumi’enji wamuhudile egi: “Mukunda natshi udi mutshigina gumumona mangino? Mangino ishigo lusugu lua mbeji ihe-ihe nga lua guhuluguga.” Muene wamuvutudile egi: “Udisagesago, gushigo nu mulonga.” 24 Walondele phunda, wawambelele muenya mudimo egi: “Ngubate muphushi. Uyigo mage-mage mukunda nu ame gula ngaguwambelelego.”
25 Hene, wayile gudi muthu wa Nzambi wa giamatshidia gu Mulundu wa Karmele. Tangua muthu wa Nzambi wa giamatshidia wamumonele muza gualeha, wawambelele muenya mudimo wenji Gehazi egi: “Tala! Mukhetu wa gu Shuneme yowu muza. 26 Ngabuba, nda muphushi umutagane, muhule egi: “Udi muabonga? Mulumi’aye udi muabonga? Mun’aye nji udi muabonga ba?’” Mukhetu muene wamuvutuile egi: “Ayi, ndaga jiagasue jidi muyila muabonga.” 27 Tangua mukhetu muene wahetele gudi muthu wa Nzambi wa giamatshidia gu mulundu, wamukuatele mbala imoshi gu ikanzo. Gehazi wasuenele ha gumulutula, uvi muthu wa Nzambi wa giamatshidia wazuelele egi: “Mubembe, udi nu gikenene giavula. Uvi Yehowa wangusuegela ndaga yene, ganguwambelelego.” 28 Mukhetu muene wazuelele egi: “Fumi’ami, ame ngagutogele mona wa yala ba? Ngaguwambelele gami egi: ‘Unguhanyigo felela dia mambo.’
29 Elisha wawambelele Gehazi mbala imoshi egi: “Wonga milele yaye mu mbunda, zula muhango wami, nda. Gula watagana nu muthu, umuhanyigo lumene; gula muthu waguhana lumene, utayigo. Nda uhage muhango wami gu phala ya mona.” 30 Gin’a mona muene wazuelele egi: “Ngudi guguwambela giamatshidia mu jina dia Yehowa Nzambi wa monyo, ngudi nji gudiloga gutuama diaye egi, ngushigo gugubemba.” Hene Elisha wayile nu mukhetu muene. 31 Gehazi wadiangele gutuama diawo, wahagele muhango gu phala ya mona, uvi gavuilego nga dijui, mona nji gadinyigishilego. Wavutugile ha gutagana nu Elisha, wamuwambelele egi: “Mona gazugilego.”
32 Tangua Elisha wanginyile monzo, mona wakhalele wa gufua ha gitanda. 33 Wanginyile gu sugu, wakangele mufulo. Wakhalele muene hakhenji nu mona. Wasendesele gukombelela Yehowa. 34 Gungima wanginyile ha gitanda, wabandele holu dia mona, wahagele kano dienji holu dia kano dia mona, meso enji holu dia meso a mona, ikata yenji ya mago holu dia ikata ya mago ya mona, wasalele ya gubanda ngenyi holu dienji. Gungima muila wa mona wasendesele guzula tshuya. 35 Elisha wasendesele guwenda mu inzo gayi gutuama, gavutuga gungima. Gungima wanginyile ha gitanda, wabandele luko holu dia mona. Mona wasabuile* mbala 7, gungima wakangudile meso. 36 Elisha watamegele Gehazi, wamuwambelele egi: “Tamega mukhetu wa gu Shuneme.” Wamutamegele, wajile gudi muene. Elisha wamuwambelele egi: “Zula mun’aye.” 37 Mukhetu muene wanginyile, wabuile mu malu enji, washiwugile phala mu mavu gutuama dienji. Gungima wazudile mun’enji, wazogele hanze.
38 Tangua Elisha wavutugile gu Gilegale, nzala yakhalele mu gifutshi. Ana a baprofete akhalele a gukhala gutuama dienji, wawambelele muenya mudimo wenji egi: “Haga nzungu yakoma ha jigo, ulondele ana a baprofete suphu.” 39 Muthu mumoshi mukatshi dia ana a baprofete wayile muhela ivunza. Wamonele dishui dia mvumbu, wahelele mabundu* enji, waazalesele ha mulele. Wavutugile, wabatuile mabundu ene, waambile mu suphu yakhalele mu nzungu. Uvi gakhalelego mujiya mabundu ene. 40 Ahanele athu ima yene ha gudia. Uvi tangua adile ima yakhalele mu suphu, akalugile egi: “Muthu wa Nzambi wa giamatshidia, nzungu eyi idi nu puazo!” Akhalelego nu luholo lua gudia ima yene. 41 Elisha wazuelele egi: “Ngubatelenu ndambo ya phupha.” Amubatele phupha, wayimbile mu nzungu yene, gungima wazuelele egi: “Hanenu athu ima yene.” Guakhalelego luko nga nu gima giabola mukatshi.
42 Muthu mumoshi wakatugile gu Bale-Shalisha, wabatediele muthu wa Nzambi wa giamatshidia mapha 20 alondewe nu mbuto jia thomo jia orje nu sagi imoshi ya mbuto jihe-jihe. Elisha wazuelele egi: “Hana athu ima yene adie.” 43 Uvi muenya mudimo wenji wazuelele egi: “Luholo lutshi ngajiya guyihana gudi athu 100?” Elisha wamuvutudile egi: “Ihane gudi athu adie, handaga Yehowa wazuela egi: ‘Mbaadia, iko mbayisala.’” 44 Hene wahagele ima yene gutuama diawo, adile, iko yasalele gifua luholo Yehowa wazuelele.