Mukanda wa Thomo wa Mafumu
3 Salomo wakotele gikotelo nu Farao fumu wa gu Ejipitu, wazudile mun’enji wa mukhetu mu ulo. Wayile mukhala n’enji mu Dimbo dia Davidi uu nu tangua diamanesele muene gutunga inzo yenji nu inzo ya Yehowa nu gibayi giakhalele mujieta Yelusalema. 2 Uvi mu tangua diene, athu akhalele wawa gawo muhana milambu mu mafundo a gukombelela;* handaga inzo ya gutumbuishila jina dia Yehowa yakhalele khenji itungiwa galego. 3 Salomo wakhalele muzumba Yehowa, walanduile gunemesa mikhuala ya sh’enji Davidi. Uvi wakhalele muhana milambu ya guwotshia mu mafundo a gukombelela.
4 Fumu wayile gu Gibeona ha guhana mulambu guene, handaga guene guakhalele fundo dia gukombelela* diabalega ndando.* Washiyile shitu 1 000, wahanele milambu ya guwotshia ha giwotshielo giene. 5 Mu phipha, Yehowa wamonegele gudi Salomo mu nzoji gu Gibeona. Wamuwambelele egi: “Ngulombe gima giagasue watshigina, ngudi guguhana nagio.” 6 Salomo wamuvutuile egi: “Wamonesele guzumba gua giamatshidia guavula gudi sh’ami Davidi muenya mudimo waye, handaga wagukombelele* nu gujinginyina guagasue. Muene wakhalele mutshita ndaga jiabonga nu mutshima wenji wagasue; uu nu mangino wana gumumonesela diago guzumba gua giamatshidia luholo wamuhanele mona wa yala ha guhingana ha nguasa yenji ya ufumu. 7 Henyaha Yehowa Nzambi wami, ame muenya mudimo waye ngudi muvuala,* ngushigo mujiya ndaga jiavula. Uvi wangubuisa fumu ha fundo dia sh’ami Davidi. 8 Ame muenya mudimo waye ngudi muhinyina athu watombele; athu ene adi avula, ajiyilego gutangewa. 9 Nguhane mutshima watumaga ha gusophesa athu aye, ha gukotelesa gudisha gudi mukatshi dia ndaga jiabonga nu ndaga jiabola; handaga athu aye adi avula,* nanyi wajiya guasophesa?”
10 Ndaga yatogele Salomo yasuanguluishile Yehowa. 11 Nzambi wamuwambelele egi: “Wangutogelego ha gukhala nu monyo masugu avula,* nga umonyi; wangutogelego nji egi mbalagaji jiaye jifue, uvi wangutoga ndunge ha gusophesa milonga muabonga. Luholo watoga ndaga eyi, 12 ngudi guguhana nayo. Ngudi guguhana ndunge nu gutema guavula gubalega athu agasue akhalele gutuama diaye, mbagukhadigo nu muthu gifua aye gungima diaye. 13 Ngudi guguhana nji ima inyi watogelego, umonyi nu lutumbu. Ngenyi mbagushigo mukhala nu fumu muko gifua aye masugu agasue a monyo* waye. 14 Gula watumagela malongo ami nu mikhuala yami gifua muatshitshile sh’aye Davidi, mbangulehesa monyo waye.”*
15 Hazugile Salomo gu tulo, wakotelesele egi yakhalele nzoji. Gungima wayile gu Yelusalema, wamaganele gutuama dia mushete wa gikotelo wa Yehowa. Wahanele milambu ya guwotshia nu milambu ya guhuima. Wakalegele nji wano mukunda nu enya mudimo enji agasue.
16 Mu tangua diene, akhetu mbadi a thambi ayile gudi fumu Salomo. 17 Mukhetu wa thomo wazuelele egi: “Fumu, ame nu mukhetu yowu tuana khala inzo imoshi. Muene wakhalele hene tangua ngavualele. 18 Gungima dia masugu thathu, muene nji wavualele. Tuakhalele phamba esue muyadi, guakhalelego nu muthu muko monzo. 19 Mu phipha, mukhetu yowu wabandela mun’enji, mona muene wafui. 20 Hene mukatshi dia phipha muene wazugi, wazula mun’ami wamuhaga gu khanda* yenji. Uvi wazula mun’enji wa gufua wamuhaga gu khanda yami. 21 Tangua ngazugi mu gimenegena ha guwamuesa mun’ami, ngamumonyi ya gufua. Ngasendesa gumutala muabonga, ngakotelesa egi ishigo mun’ami munu ngavualele.” 22 Uvi mukhetu wa mbadi wazuelele egi: “Ndo! Mun’ami muene udi nu monyo, waye muene udi wa gufua. Uvi mukhetu wa thomo wakhalele muzuela egi: “Ndo! Mun’aye muene udi wa gufua, wami muene udi nu monyo.” Akhalele mumana ngenyi gutuama dia fumu.
23 Gungima fumu wazuelele egi: “Yowu egi, ‘Mun’ami muene udi nu monyo, waye muene udi wa gufua!’ Muko egi, ‘Mun’aye muene udi wa gufua, wami muene udi nu monyo!’ 24 Ngubatelenu phogo ya khusa.” Amubatele nayo. 25 Wazuelele luko egi: “Zangulenu mona udi nu monyo, mubatulenu mu itshinyi mbadi. Hanenu akhetu awa gitshinyi gimoshi-gimoshi.” 26 Mu tangua diene, gin’a mona munu wakhalele nu monyo wabubidile fumu, handaga wavuidile mun’enji khenda. Wazuelele egi: “Ngabuba fumu! Muhane mona udi nu monyo. Mumushiyigo!” Uvi mukhetu muko wakhalele muzuela egi: “Amubatule mu itshinyi mbadi, hagula tudifule mukut’etu agasue!” 27 Fumu wazuelele egi: “Hanenu mona udi nu monyo gudi mukhetu wa thomo! Muene gin’enji, mumushiyigo.”
28 Tangua enya Isalele agasue avuile luholo luabatuile fumu mulonga wene, amunemesele muavula diago* handaga amonele egi Nzambi wamuhanele ndunge ha gusophesa mu luholo luabonga.