Mukanda wa Mbadi wa Mafumu
22 Yoziase wakhalele nu ivo 8 habuile muene fumu, wahinyine ivo 31 gu Yelusalema. Jina dia gin’enji diakhalele Yedida mun’a Adaya wa gu Bosekate. 2 Yoziase wakalegele ndaga jiabonga gu meso a Yehowa; wawendele mu njila jiagasue jiawendele khakh’enji Davidi, gayilego nga gu koko dia madia nga gu koko dia mahidi.
3 Mu givo gia 18 gia uhinyinyi wenji, Fumu Yoziase watumile sekretere Shafane mun’a Asaliya mujigulu wa Meshulame gu inzo ya Yehowa. Wamuwambelele egi: 4 “Nda gudi nganga-nzambi wakoma Hilikiya, umuwambele ha guya muzula mbongo jiagasue jiabatewa mu inzo ya Yehowa, mbongo jinyi athu ana bamba mifulo azudi gudi athu. 5 Adi naye guhana mbongo jiene gudi athu adi mutuameza midimo mu inzo ya Yehowa. Gungima ene adi naye gufuta athu adi naye gulonda mafundo adi abola* mu inzo Yehowa; 6 yakotelesa egi adi naye gufuta mbembo, athu adi mutshita midimo ya gutunga nu bamaso; mbaasumba nji mabaya nu maseso a gusonga ha gulonda inzo. 7 Uvi ashigo naye guahula luholo adi mukalegela mbongo jiaahanewa, handaga adi athu a gushila mutshima.”
8 Gungima nganga-nzambi wakoma Hilikiya wawambelele sekretere Shafane egi: “Ngamona mukanda wa Mikhuala mu inzo ya Yehowa.” Hene Hilikiya wahanele Shafane mukanda wene, muene wasendesele guwutanga. 9 Gungima sekretere Shafane wayile gudi fumu, wamuwambelele egi: “Enya mudimo aye azudi mbongo asangi mu inzo, ajihanyi nji gudi athu atombewa ha gutuameza midimo mu inzo ya Yehowa.” 10 Wamuwambelele nji egi: “Nganga-nzambi Hilikiya wanguhanyi mukanda umoshi.” Shafane wasendesele guwutanga gutuama dia fumu.
11 Tangua fumu wavuile mbimbi jiakhalele mu mukanda wa Mikhuala, watawile mbala imoshi milele yenji. 12 Gungima fumu wawambelele nganga-nzambi Hilikiya nu Ahikama mun’a Shafane nu Akebole mun’a Mikaya nu sekretere Shafane nu Asaya, muenya mudimo wa fumu egi: 13 “Ndenu muhule Yehowa mukunda nu ame nu mukunda nu athu nu mukunda nu enya Yuda agasue mukunda nu mbimbi jidi mu mukanda owu wamonewa; Yehowa watuvuila khabu jiakola handaga akhakh’etu atumagelego mbimbi jidi mu mukanda owu, alanduilego ndaga jiagasue jiasonegewe mukunda nu esue.”
14 Hene nganga-nzambi Hilikiya nu Ahikama nu Akebole nu Shafane nu Asaya ayile gudi profete Hulda. Hulda wakhalele mukaji’a Shaluma mun’a Tikeva, mujigulu wa Halasa. Shaluma wakhalele mubambi wa milele. Hulda wakhalele mukhala mu gitshinyi gihe-hihe gia dimbo dia Yelusalema; atele n’enji maga guene. 15 Waawambelele egi: “Yehowa Nzambi wa Isalele wazuela egi: ‘Wambelenu muthu wamitumi gudi ame egi: 16 “Yehowa wazuela egi: ‘Mbangubata malamba ha fundo edi nu gudi athu adi ha fundo diene. Mbimbi jiagasue jidi mu mukanda watangi fumu wa gu Yuda mbajitagenesewa. 17 Handaga angutunyi, adi mukanduisa mishi ya milambu yawo gudi nzambi jiko ha gunguhana khabu mukunda nu ndaga jiagasue adi mutshita; khabu jiami mukunda nu fundo edi mbajishigo muhua.’” 18 Uvi mudi naye guwambela fumu wa gu Yuda munu wamitumi ha guza muhula Yehowa egi: “Eji ndaga Yehowa Nzambi wa Isalele wazuela mukunda nu ndaga wavui: 19 Wakoleselego mutshima waye, wadibulumuisa gutuama dia Yehowa tangua wavui ndaga ngazuedi mukunda nu fundo edi nu athu adi hene egi mbaatewa mukumbu; athu mbaavua woma mukunda nu ndaga mbajiabuila, watawula nji milele yaye, wadidi gutuama diami; luholo watshita ngenyi, ame nji ngagutegelela, Yehowa wazuela. 20 Gishina giene, mbangutshita egi ufue mu guhuima gifua muafuile akhakh’aye.* Mbawufundjiwa mu malumba mu guhuima, meso aye mbaashigo mumona malamba agasue mbangubatela fundo edi.”’” Gungima athu ene ayile muwambela fumu mbimbi jiene.