Mukanda wa Mbadi wa Mafumu
2 Tangua Yehowa wakhalele mutshigina gukanduisa Eliya mu dilu mu funji yakola, Eliya nu Elisha akatugile gu Gilegale, ayile. 2 Eliya wawambelele Elisha egi: “Ngabuba, sala haha handaga Yehowa wangutumi gu Betele.” Uvi Elisha wamuvutuile egi: “Ngudi guguwambela giamatshidia mu jina dia Yehowa Nzambi wa monyo, ngudi nji gudiloga gutuama diaye egi, mbangushigo gugubemba.” Hene, ayile gu Betele. 3 Gungima ana a baprofete* a gu Betele ayile mutagana Elisha, amuwambelele egi: “Udi mujiya egi mangino Yehowa udi muzula fumi’aye, ushigo luko mukhala mu utuameji wenji ba?” Elisha waavutuile egi: “Ayi, ame mujiya. Henenu tedie.”
4 Gungima Eliya wamuwambelele egi: “Ngabuba Elisha, sala haha handaga Yehowa wangutumi gu Yeliko.” Uvi Elisha wamuvutuile egi: “Ngudi guguwambela giamatshidia mu jina dia Yehowa Nzambi wa monyo, ngudi nji gudiloga gutuama diaye egi, mbangushigo gugubemba.” Hene, ayile gu Yeliko. 5 Ana a baprofete anyi akhalele gu Yeliko ajile gudi Elisha, amuwambelele egi: “Udi mujiya egi mangino Yehowa udi muzula fumi’aye, ushigo luko mukhala mu utuameji wenji ba?” Elisha waavutuile egi: “Ayi, ame mujiya. Henenu tedie.”
6 Eliya wamuwambelele luko egi: “Ngabuba, sala haha handaga Yehowa wangutumi gu muta wa Yordane.” Uvi Elisha wamuvutuile egi: “Ngudi guguwambela giamatshidia mu jina dia Yehowa Nzambi wa monyo, ngudi nji gudiloga gutuama diaye egi, mbangushigo gugubemba.” Hene ayile muyadi awo. 7 Ana a baprofete 50 a alanduile. Uvi tangua Eliya nu Elisha amaganele hehi nu muta wa Yordane, ana a baprofete ene amaganele nji, akhalele guatala gualeha. 8 Gungima Eliya wazudile mulele wenji wa giprofete, wawulangele, wawubetele holu dia meya. Meya akhaphumugile, ako ayile gu koko dia mahidi, ako gu koko dia madia. Mukut’awo agasue mbadi azawugile ha mavu a gimigina.
9 Tangua amanesele guzawuga muta, Eliya wawambelele Elisha egi: “Ngutoge gima giagasue udi mutshigina egi ngugutshitshile gutuama egi ngukatudiwe gutuama diaye.” Elisha wamuwambelele egi: “Ngabuba, ngajiya guheta makhapho mbadi* a nyuma yaye ba?” 10 Eliya wamuvutudile egi: “Wangutoga ndaga yakola. Gula wangumona tangua nguza mukatudiwa gutuama diaye, mbawuheta ndaga watogi. Uvi gula wangumonelego, mbawushigo guyiheta.”
11 Tangua akhalele muya nu guta maga, phusu-phusu ya tshuya nu tubalu tua tshuya tuakhaphumuine mbala imoshi Eliya nu Elisha. Eliya wakandugile gosa* mu funji. 12 Hakhalele Elisha mutala, wakhalele mukaluguga mu dijui diakola egi: “Tata, tata! Tala phusu-phusu ya Isalele nu awendeshi enji a tubalu!” Gungima gamonelego luko Eliya, watawile milele yenji mu itshinyi mbadi. 13 Elisha wazudile mulele wa giprofete wa Eliya unu wabuile. Wavutugile, wamaganele mu khulo ya muta wa Yordane. 14 Wazudile mulele wa giprofete wa Eliya unu wabuile, wawubetele holu dia muta, wazuelele egi: “Yehowa Nzambi wa Eliya udi gui?” Habetele muene mulele wene holu dia muta, meya adikhaphumuine, ako gu koko dia mahidi, ako gu koko dia madia. Elisha wazawugile.
15 Tangua ana a baprofete a gu Yeliko amumonele gualeha, azuelele egi: “Nyuma ya Eliya yaza gudi Elisha.” Ayile gumutagana, afugamele, ashiwugile phala mu mavu gutuama dienji. 16 Amuwambelele egi: “Esue enya mudimo aye tudi nu mala a ngolo 50 haha. Tuabuba ahane njila hagula aye akambe fumi’aye. Yajiya gukhala egi nyuma* ya Yehowa yamuthuphula, yamubishila gu mulundu umoshi nga mu baba dimoshi.” Uvi Elisha waawambelele egi: “Ndo, muatumigo.” 17 Uvi alanduile gumutoga uu nu tangua Elisha waawambelele egi: “Atumenu.” Atumile mala 50. Mala ene amukambele masugu thathu, uvi amumonelego. 18 Avutugile gudi Elisha, mu tangua diene wakhalele gu Yeliko. Waawambelele egi: “Ngamiwambelele egi muyigo.”
19 Lusugu lumoshi, mala a mu dimbo diene awambelele Elisha egi: “Fumu, aye hakhaye udi mumona egi dimbo didi ha fundo diabonga, uvi meya adi abola, mavu nji ashigo muzola mbuto.”* 20 Waawambelele egi: “Ngubatelenu longa dihe-dihe diazonda, mbenu nji mungua mukatshi.” Amubatele nadio. 21 Gungima wayile gu gito gia muta, wambile mungua mu meya, wazuelele egi: “Yehowa wazuela egi: ‘Ngabuisa meya awa abonga. Mbaashigo mubata gufua nga ukunya.’”* 22 Meya ene wawa gawo ana khala abonga uu nu mangino gifua luholo luazuelele Elisha.
23 Gungima Elisha wakatugile guene, wakandugile ha guya gu Betele. Hakhalele muene muya mu njila, ana a mala azogele mu dimbo, asendesele gumulela. Akhalele muzuela egi: “Katuga haha, muenya banji! Katuga haha, muenya banji!” 24 Gungima, wabalumugile, watalele ana ene, waatele mukumbu mu jina dia Yehowa. Mu tangua diene urse mbadi jia akaji jiazogele mu gishitu, jiakaluile ana 42 itshinyi-itshinyi, afuile. 25 Elisha wakatugile guene, wayile gu Mulundu wa Karmele. Gungima wavutugile gu Samaliya.