Mukanda wa Mbadi wa Mafumu
20 Mu masugu ene, Ezekiase wasendesele gukata, wakhalele mutshigina gufua. Profete Yeshaya mun’a Amoza wayile gumumona, wamuwambelele egi: “Yehowa wazuela egi: ‘Hana enya fami yaye malongo asuga handaga udi mufua, ushigo mukola.’” 2 Tangua Ezekiase wavuile ndaga yene, wabalumuile phala yenji gu gibayi, wasendesele gutshita gisambu gudi Yehowa egi: 3 “Oo Yehowa, ngabuba, ujimbilago egi ngawendele gutuama diaye nu gujinginyina guagasue nu mutshima wami wagasue. Ngakalegele nji ndaga jiabonga gu meso aye.” Gungima wasendesele gudila muavula.
4 Yeshaya wazogele ha guya; gutuama egi ahete hakatshi na katshi dia luphango lua inzo ya fumu, Yehowa wamuwambelele egi: 5 “Vutuga, wambela Ezekiase mutuameji wa athu ami egi: ‘Yehowa Nzambi wa khakh’aye Davidi wazuela egi: “Ngavui gisambu giaye. Ngamonyi masoji aye. Ngudi gugusaga. Mu lusugu lua thathu mbawukanduga gu inzo ya Yehowa. 6 Ngudi gugulezela ivo 15 mu monyo* waye, mbanguguhuluisa nu dimbo edi ha mago a fumu wa gu Asiliya. Mbanguluila dimbo edi mukunda nu jina diami nu mukunda nu Davidi, muenya mudimo wami.”’”
7 Gungima Yeshaya wazuelele egi: “Izenu nu gato galondewe nu mabundu a figi a gimigina.” Hene ajile nu gato gene, wagakungile gu gijimbo gia fumu. Gungima fumu wasendesele guvua muabonga.
8 Ezekiase wahudile Yeshaya egi: “Gijiyishilo gitshi gidi mumonesa egi Yehowa mbawungusaga nu mu lusugu lua thathu mbangukanduga gu inzo ya Yehowa?” 9 Yeshaya wamuvutuile egi: “Gijiyishilo giakatuga gudi Yehowa gidi mumonesa egi Yehowa mbawutagenesa ndaga yazuedi muene giene gigi: Udi mutshigina egi vule didi holu dia gikalo* diye gutuama mathambo 10 nga ndo divutuge gungima mathambo 10?” 10 Ezekiase wazuelele egi: “Idi ndaga yaleba hagula vule diene diye gutuama mathambo 10, uvi idi lamba hagula divutuge gungima mathambo 10.” 11 Profete Yeshaya wakombelele Yehowa, hene wavutuile vule dia gikalo gia Ahaza gungima mathambo 10.
12 Mu tangua diene, fumu wa gu Babilona Belodake-Baladane mun’a Baledana, watumile athu gudi Ezekiase nu mikanda nu bakado handaga wavuile egi Ezekiase wakhalele mukata. 13 Ezekiase waayambele* muabonga, waadijigile inzo yenji yagasue yakhalele nu umonyi: utadi wa siliva, wolo, maji a balesame nu maji ako a ndando yavula, nu iluilo yenji ya ita nu ima yenji yagasue yakhalele mu sugu jiakhalele mubambela muene umonyi. Ezekiase waadijigile ima yagasue yakhalele mu inzo* yenji nu ima yagasue yakhalele mu ufumu wenji.
14 Gungima profete Yeshaya wajile gudi Fumu Ezekiase, wamuhudile egi: “Athu ene azuedi egi itshi? Akatuga gui?” Ezekiase wamuvutuile egi: “Akatuga mu gifutshi gia gualeha, gu Babilona.” 15 Gungima Yeshaya wamuhudile egi: “Itshi amonyi mu inzo* yaye?” Muene wamuvutudile egi: “Amonyi ima yagasue ya mu inzo* yami. Ngaadijiga ima yagasue idi ha fundo ngana bambela umonyi wami.”
16 Yeshaya wawambelele Ezekiase egi: “Tegelela mbimbi ya Yehowa. 17 Yehowa wazuela egi: ‘Tala! Gudi nu lusugu ima yagasue idi mu inzo* yaye nu ima yagasue inyi akhakh’aye abambele uu nu mangino mbayibatewa gu Babilona. Gushigo nga nu gima mbagisala.’ 18 An’aye ako a mala anyi mbawuvuala mbaabatewa mu uhiga, ene mbaabua enya mudimo a mu inzo ya fumu wa gu Babilona.’”
19 Hene Ezekiase wawambelele Yeshaya egi: “Mbimbi ya Yehowa yinyi wazuela idi yabonga.” Gungima wazuelele luko egi: “Idi ndaga yabonga gula mu masugu ami guhuima mbangukhala guene nu ndaga mbajiyila muabonga.”
20 Ndaga jiko jiakalegele Ezekiase nu ngolo jienji nu luholo lualondele muene gijiba gia meya nu njila yabudile muene ha gubata meya mu dimbo, jidi jiagusonega mu mukanda wa mene jia mafumu a gu Yuda. 21 Gungima Ezekiase wafuile gifua muafuile akhakh’enji; mun’enji Manase wabuile fumu ha fundo dienji.