Ngimbo
105 Hanenu Yehowa mersi, tumbuisenu jina dienji,
Wambelenu athu ndaga jiakoma jiatshitshile muene.
3 Disunzulenu mukunda nu jina dienji dia gijila.
Mitshima ya athu adi mukamba Yehowa ikhale nu gusuanguluga.
4 Kambenu Yehowa, mutogenu ngolo.
Kambenu phala yenji tangua diagasue.
5 Wungulugenu ndaga jiabonga jiakalegele muene,
ndaga jienji jia gushimana nu luholo luasophesele muene,
6 enue ajigulu* a Abalahama muenya mudimo wenji,
enue ana a Yakoba, athu atombele muene.
7 Muene udi Yehowa Nzambi wetu.
Wana sophesa mavu agasue.
8 Wana wunguluga gikotelo gienji mayilago,
ndaga jialayele muene* uu nu gu indongo 1 000,
9 gikotelo giakotele muene nu Abalahama,
nu gudiloga guadilogele muene gudi Izake,
10 gudiloga guahagele muene gifua mukhuala mukunda nu Yakoba
nu gifua gikotelo gia ivo nu ivo mukunda nu Isalele,
11 hazuelele muene egi: “Mbanguguhana gifutshi gia Kanana,
mbagikhala khapho diaye.”
12 Wazuelele ndaga yene tangua akhalele athu azonda,
ayi akhalele diago azonda, akhalele nji ngenji mu gifutshi.
13 Akhalele muya nu guwenda akatuga mu gifutshi giko ayi mu gifutshi giko,
akatuga mu ufumu umoshi, ayi mu ufumu uko.
14 Nzambi gabembelego nga muthu mumoshi ha guasagesa,
uvi wabalele mafumu mukunda nu ene.
15 Wazuelele egi: ‘Mukuatshigo athu ami ngatombele,*
mutshitshigo baprofete ami nga ndaga imoshi yabola.’
16 Muene watumile nzala mu gifutshi;
wabembele guahana dipha.*
17 Watumine muthu mumoshi gutuama diawo,
Yozefe, yago wadigiwe gifua muhiga.
18 Amujitshigile malenge gu malu,
amukudigile malenge a utadi mu shingo;*
19 uu nu tangua ndaga jiazuelele muene jiatagenesewe,
ndaga yazuelele Yehowa yamubuishile muthu wabonga.
20 Fumu watumile muthu ha gumuzola mu bologo,
fumu wa ifutshi wamuzolele mu bologo.
21 Muene wamubuishile fumu mu inzo yenji,
fumu wa ima yenji yagasue,
22 ha guhinyina tuphungu tuenji gifua luholo luatshigina muene*
nu ha gulongesa manene enji ungambi.
23 Gungima Isalele wayile gu Ejipitu,
Yakoba wajingile gifua ngenji mu mavu a Kame.
24 Nzambi wavudishile diago athu enji;
waahanele ngolo jiavula gubalega mbalagaji jiawo,
25 muene waabembele ha gusombegesa mitshima yawo, hagula azumbigo luko athu enji,
nu ha guyila enya mudimo enji giphungi.
26 Muene watumile muenya mudimo wenji Moize,
nu Alona, munu watombele muene.
27 Amonesele ijiyishilo yenji mukatshi diawo,
akalegele ndaga jia gushimana mu mavu a Kame.
28 Muene watumile phipha, gifutshi giabuile bui;
ene alumbugilego mbimbi jienji.
29 Wabuishile meya awo mahatshi,
washiyile nji jishui jiawo.
30 Gifutshi giawo giazalele pha nu minonge,
yanginyile uu nu gu sugu jia fumu.
31 Muene waatumidile tudimu tuavula,
nu jimue ha guzala mu mavu awo agasue.
32 Ha bugu dia mvula yawo, muene waatumidile may’a-nzanza,
watumile khuba* mu gifutshi giawo.
33 Muene wabuishile mitshi yawo ya vinyo nu ya figi,
wabolesele mitshi ya mu mavu awo.
34 Muene wazuelele egi matulu adi naye guzala mu gifutshi,
ibumbi ya matulu inyi yajiyiwego gutangewa.
35 Matulu adile mayiji agasue mu gifutshi,
nu mbuto jiazogele mu mavu awo.
36 Gungima washiyile ana agasue a somi mu gifutshi giawo,
ana a thomo avualele ene.
37 Muene wazolele athu enji, azogele nu utadi wa siliva nu wolo;
gushigo nga muthu mumoshi mukatshi dia iphuta yenji wakhakhugile.
38 Tangua azogele, enya Ejipitu asuangulugile,
handaga akhalele muvila enya Isalele* woma wakola.
39 Wasunuine tuta ha gutshuiga athu enji,
wahagele nji tshuya ha guphelegetesa mu phipha.
40 Tangua atogele mbiji, muene waahanele tumbangu;
walanduile guahana mapha a mu dilu ha gudia.
41 Wakangudile seso, meya azogele;
asendesele gubulumuga mu mavu a luselenga gifua muta.
42 Handaga wawungulugile ndaga jia gijila jialayele muene muenya mudimo wenji Abalahama.
43 Hene wazolele athu enji; azogele asuangulugile,
athu enji anyi atombele muene, ambile milolo ya gusuanguluga.
44 Muene waahanele mavu a ifutshi iko;
ahetele ima inyi athu ako atshitshile mudimo wakola ha guheta.
45 Hagula ene atumagele ndaga jiazuelele muene
nu anemese mikhuala yenji.
Tumbuisenu Yah!*