Ngimbo

37 Uvilago athu abola khabu,*

uvilago athu adi mutshita ndaga jiabola giphi.

 2 Mbaazoga mu phushi gifua muangu

uvi mbaamigina gifua muana migina muangu wa gibisu.

 3 Shila Yehowa mutshima, tshita ndaga jiabonga;

jinga ha mavu,* khala mutshita ndaga jiabonga.

 4 Heta gusuanguluga guavula gudi Yehowa,

muene mbawutagenesa nzala jia mutshima waye.

 5 Haga ndaga jiagasue udi mutshita ha mago a Yehowa;

muzegemene, muene mbawukalagala ndaga mukunda nu gubonga guaye.

 6 Muene mbawuhenyesa ndaga jiabonga udi mutshita gifua muanya wa gimenegena,

mbawuhenyesa ndaga jiabonga udi mukalagala gifua muanya wa mu midi.

 7 Khala tedie gutuama dia Yehowa,

munengenene nu guhuiminyina guagasue.

Uvigo khabu mukunda nu muthu munu

udi mubinga mu ndaga jiabola jidi mutshita muene.

 8 Bemba guvua khabu, bemba gubundumuga;

bemba guvua gisuga monyo, handaga mbayigutuma ha gutshita gubola.

 9 Handaga athu abola mbaashiyiwa,

uvi athu adi gudifelela gudi Yehowa, mbaaheta mavu.

10 Guasala tangua diazonda, athu abola mbakhadigo luko;

mbawutala fundo akhalele,

mbaakhadigo guene.

11 Uvi athu a gudibulumuisa mbaaheta mavu,

mbaasuanguluga handaga mbaakhala mu guhuima guavula diago.

12 Muthu wabola udi muyila muthu wabonga giphungi;

udi mudia mazo* gula wamumona.

13 Uvi Yehowa mbawumulela,

handaga udi mujiya egi lusugu luenji lua gushiyiwa mbalumuza.

14 Athu abola azola phogo jiawo mu indalo, anana mata awo a manana

ha gushiya phutu nu muthu udi mu lamba,

ha gushiya athu adi mukalagala ndaga jiabonga.

15 Uvi phogo jiawo mbajiatua gu mitshima yawo;

mata awo a manana mbabooga.

16 Ima yazonda ya muthu wabonga yana khala yabonga

gubalega ima yavula ya athu avula abola.

17 Mago a muthu wabola mbabooga,

uvi Yehowa mbawukuatesa muthu wabonga.

18 Yehowa yowu mujiya muabonga ndaga jiana tagana najio athu abonga,*

khapho diawo mbadisala mayilago.

19 Ene mbaashigo muhanewa musonyi mu tangua dia lamba;

mbaakhala nu ima yavula ya gudia mu tangua dia nzala.

20 Uvi athu abola mbaafua;

mbalagaji jia Yehowa mbajitota gifua muana tota muangu wabonga mu temu;

mbaatota gifua muana tota mishi.

21 Muthu wabola wana somba uvi gana vutula ndo,

uvi muthu wabonga wakhala wahana nu wana vila athu khenda.

22 Athu ana shimbigiwa gudi Nzambi mbaaheta mavu,

uvi athu anyi ana ta muene mikumbu mbaafua.

23 Yehowa wana tuameza muthu

gula wasuanguluga nu ndaga jidi mutshita muene.

24 Ikhale muthu muene wakhakhuga, mbagashigo mubua mu mavu,

handaga Yehowa mbawumukuata nu koko dienji.

25 Ngakhalele muvuala, henyaha ngabua muthu wa gukola,

uvi khenji ngamonele galego Nzambi mubemba muthu wabonga,

nga an’enji mukamba ima ya gudia.*

26 Muthu muene wana somba athu ima yagasue adi naye funu,

hene an’enji mbaashimbigiwa.

27 Tuna ndaga jiabola, tshita ndaga jiabonga,

ngenyi mbawujinga mayilago.

28 Handaga Yehowa wana zumba ndaga jiabonga,

muene mbagashigo mubemba athu enji a gujinginyina.

Mbawaabamba tangua diagasue;

uvi ajigulu a athu abola mbaashiyiwa.

29 Athu abonga mbaazula mavu,

mbaajinga hene mayilago.

30 Kano dia muthu wabonga diana zuela mbimbi jia ungambi,*

ludimi luenji luana zuela ndaga jiabonga.

31 Mukhuala wa Nzambi wenji wana khala mu mutshima wenji;

kulu dienji mbadishigo mukhakhuga.

32 Muthu wabola udi mutala muthu wabonga,

udi mukamba gumushiya.

33 Uvi Yehowa mbagashigo gumubemba ha mago a muthu wabola,

mbagashigo nji gumufuisa milonga tangua mbadisophesewa muene.

34 Haga felela gudi Yehowa, landula njila jienji,

muene mbawuguvila khenda, mbawugukuatesa ha guheta mavu.

35 Ngamonele muthu wabola, muenya khuta

mukula bugu-bugu gifua mutshi udi mukula mu mavu enji.

36 Uvi sagumugu, watotele;

ngamukambele uvi ngamumonelego.

37 Tema gutala muthu gashigo nu gubola,

khala mutala muabonga muthu wabonga,

handaga muthu muene mbawukhala mu guhuima mu masugu adi muza.

38 Uvi athu agasue ana shiya mikhuala ya Nzambi mbaashiyiwa;

athu abola mbaashiyiwa mu masugu adi muza.

39 Yehowa wana huluisa athu abonga;

muene udi fundo diawo dia gulengela mu tangua dia lamba.

Mbawaahuluisa ha mago a athu abola,

handaga ana lengela gudi muene.