Ngimbo
Gudi mutuameji wa miziki. Lungimbo lua Davidi, muenya mudimo wa Yehowa.
36 Ndaga jiabola jidi mu mutshima wa muthu wabola, jiana gumutuma ha gutshita gubola.
Muene gana vilago Nzambi woma.
2 Wana tangiza egi udi muthu wabonga,
hene gajiyilego gumona nu gutuna gubola guenji.
3 Mbimbi jiana zoga mu kano dienji jiana khala jia khuta nu jia mambo;
gashigo nu gutema ha gujiya luholo lua gutshita ndaga jiabonga.
4 Wana tangiza ha gutshita ndaga jiabola ikhale tangua didi muene ha gitanda gienji.
Wana wenda mu njila yabola;
gana tuna ndo ndaga jiabola.
5 Oo Yehowa, guzumba guaye gua giamatshidia guana heta uu nu mu dilu,
gujinginyina guaye guana kanduga uu nu mu matuta.
6 Gubonga guaye gudi gifua milundu yakoma;*
usopheshi waye udi gifua mita yakoma idi nu jinga.
Oo Yehowa, aye wana bamba* athu nu shitu.
7 Oo Nzambi, guzumba guaye gua giamatshidia gudi nu ndando yavula
ana a athu ana gudisuega mu vule dia mahambu aye.
8 Waanuisa ima yavula yabonga ya mu inzo yaye;
waanuisa gusuanguluga guaye gudi mubulumuga gifua muta.
9 Aye udi gito gia monyo;
mukunda nu muanya waye, esue nji tudi mumona muanya.
10 Landula gumonesa guzumba guaye gua giamatshidia gudi athu ana gugujiya,
nu gubonga guaye gudi athu adi nu mitshima yabonga.
11 Ubembigo egi kulu dia muenya lulendo dingudiate,
ubembigo egi koko dia muthu wabola dingukaye.
12 Tala fundo diabuile athu abola;
ene adi a gubua hashi, ajiyilego guzuga luko.